Ginwang Zuphpawng Saw Shaga Laika
1. Ginwang zuphpawng campaign galoi hpang na kun?
1 Jinghku jingyu ni hte manaw manang ni hpe shat daw mayu ai nga yang, atsawm hkyen lajang nna, shanhte hpe alum ala hte saw shaga na nre ni? Dai zawn sha, du wa na ginwang zuphpawng hta wenyi malu masha hpe, atsawm tau hkrau hkyen lajang da ya ga ai. Ginwang zuphpawng nhpang shi ai bat masum aten kaw nna, kaga masha ni zuphpawng sa lung lu na matu, saw shaga ai lamang hpe Yehowa lajang da ya ai. Saw shaga laika hpe myit rawt let gara hku garan lu na kun?
2. Campaign hta shang lawm na matu hpa gaw anhte hpe shadut ya na kun?
2 Ginwang zuphpawng kaw nna Yehowa hkyen lajang ya ai lam matsun ni hpe anhte manu shadan na nga yang, campaign hta myit maju jung nna shang lawm mayu wa na re. (Esa. 65:13, 14) Anhte galaw ai saw shaga lamang campaign a majaw, kaja ai akyu ni lu wa ai hpe myit dum u. (“Kaja Ai Akyu Ni Lu” ngu ai lawk hta yu u.) Anhte saw shaga ai masha yawng gaw, zuphpawng sa lung na gaw nre ai. Hpa mi raitim, campaign aten hta anhte ni shakut shaja nna galaw wa ai lam yawng gaw, Yehowa hpe shakawn shagrau ai rai nna, shi a tsaw ra myit kaba ai lam hpe kasi la nga ai re.—Shk. 145:3, 7; Shi. 22:17.
3. Saw shaga laika hpe gara hku garan mai a ta?
3 Tinang a buga hta, shawa hpawng man sakse hkam ai shaloi saw shaga laika garan na, masha n nga ai nta ni hta saw shaga laika tawn da na, saw shaga laika hpe grau nna law law garan lu hkra gara hku galaw na ngu ai ni hpe, myitsu salang ni gaw dawdan mat wa na re. Kru Ya, Laban nhtoi ni hta saw shaga laika hpe magazine ni hte garan mai ai. Campaign hta anhte myit rawt let shang lawm wa ai majaw, Yehowa hkyen lajang ya ai wenyi malu masha poi de, masha law law sa lung yang, nang grai pyaw na re.