Mahkrum Madup Law Ai Hkaw Tsun Masha Ni Kaw Na Sharin La U

Hpung hta nga ai mahkrum madup law ai hkaw tsun masha ni gaw, anhte a matu grai manu dan ai sut gan ni re. Nkau mi gaw, Yehowa hpe shaning law law magam gun wa ai. Nkau mi gaw hkaw tsun bungli hta grau kaja na matu shakut nna galaw wa ai. Ndai hkaw tsun masha ni gaw, hpang jahtum na nhtoi hta hkaw tsun bungli hte sape shatai ai bungli hta, Hkristan hpung hpe Yesu gara hku woi awn nga ai hpe mu wa ai. (Mah. 28:19, 20) Tinang a manghkang ni, chyam dinglik ai lam ni hkrum ma tim, “chyahtum chyalai re ai n-gun atsam” hpe lu la nna, hkaw tsun bung­li hta shang lawm nga ai. Mahkrum madup grai law ai hkaw tsun masha ni kaw na sharin la na lam grai nga ai. Shanhte mung mahkrum madup ni hpe, ahkaw ahkang lu shagu kaga masha ni hpe tsun dan mayu ai. (Shk. 71:18) Dai zawn ahkaw ahkang hpe lu hkra galaw nna, shanhte kaw na sharin la mai ai. Gara hku galaw mai na kun?

Hkaw Tsun Bungli Hta. Hkaw tsun bungli hta akyu lu na matu, masha nnan ni hte mahkrum madup nlaw shi ai hkaw tsun masha ni hpe shaman ya ra ai. Kung hpan ai hkaw tsun masha ni gaw, shanhte hte rau sa nna shanhte hpe shaman ya mai ai. (February 15, 2015, Sin Langchyi-BU, “Hkaw Tsun Bungli Hta Matut Nna Shakut Shaja U” ngu ai gabaw npu hta na “Mahkrum Madup Nlaw Ai Ni Hpe Karum Ya U” ngu ai sumhpa hpe mung yu u.) Hkaw tsun bungli hta dai zawn galaw ga ai kun?

Hkaw tsun bungli hta atsam marai nga ai hkaw tsun masha hte arau galaw na matu nang saw shaga mai na kun? Lama na, dai hkaw tsun masha gaw nkung nkang rai yang, na a Chyum Ga sharin lamang hpe shi a nta kaw sa galaw mai ai. Chyum Ga sharin ngut ai hpang, ra ang ai lam ni hte lam matsun ni jaw na matu shi hpe hpyi shawn mai ai.

Shanhte Hte Arau Tinang A Aten Ni Hpe Jailang U: Mahkrum madup law ai hkaw tsun masha ni hte rau aten jailang na matu shakut u. Ti­nang a dinghku nawku hta saw shaga nna, hkrum san shaga mai ai. Lama na, hkaw tsun masha gaw nkung nkang rai yang, shi a nta de dinghku nawku hpe sa galaw mai na kun? Gara hku nna teng man ai lam hta du wa a ta? Hpa shaman chyeju ni hpe hkam sha wa ai kun? Buga hta hpa ni rawt jat galu kaba wa ai hpe mu ai kun? Yehowa a magam gun ai majaw, hpa ngwi pyaw lam ni lu wa ai kun? ngu nna san u.

Mahkrum madup law ai hkaw tsun masha ni hta mung, ra rawng ai lam ni nga ai majaw nau myit mada ai hku gaw nmai ai. Anhte ni zawn sha, aten na na rai sai hkaw tsun masha ni mung, hkaw tsun bungli hta atsam amyu myu nga ma ai. (Rom. 12:6-8) Nkau mi gaw asak kaba wa ai majaw, anhte hte ayan kanawn mazum lu na nre. Hpa mi raitim, Yehowa hpe sadi dung let magam gun wa ai majaw, shanhte a mahkrum madup kaw na anhte grai law hkra sharin la lu na re.