Sharin Achyin Ya Lu Ai Hkingrai Ni
1. Hkristan ni gaw lata hpaji bungli galaw ai ni hte gara hku bung ai kun?
1 Lata hpaji hte bungli galaw ai ni gaw, hkingrai amyu myu hpe jailang ma ai. Hkingrai nkau hpe shi shara hte shi jailang tim, nkau arai ni hpe gaw chyahkring hkring jailang ma ai. Kung kyang ai ni gaw, madung hku nna jailang ai hkingrai ni hpe ayan gun da nna tang du hkra atsawm jailang chye ma ai. Hkristan langai hpra gaw, hkaw tsun bungli hta shakut shaja nna “kaya shara n rawng ai . . . magam gun hpai wa zawn” byin na matu Chyum Laika hta n-gun jaw da ai. (2 Tim. 2:15) Hkristan ni a matu ahkyak htum hkingrai gaw hpa rai ta? Chyum Laika re. Dai hpe “sape shatai” ai bungli hta madung hku nna jailang ai. (Mah. 28:19, 20) Dai majaw anhte ni gaw, “teng man ai mung ga hpe ding ding chye hpajang ai” ni byin hkra shakut ra ai. Sharin achyin lu ai hkingrai ni hta chyahkring hkring jailang ai arai ni nga ai. Hkristan ni yawng gaw, ndai hkingrai ni hpe atsawm chye jailang hkra sharin la yang, kaga masha ni hpe teng man ai tara sharin ya lu na re.—Ga Sh. 22:29.
2. Sharin achyin ya lu na hkingrai ni gaw hpa ni rai ta?
2 Sharin Achyin Ya Lu Na Hkingrai: Chyum Laika hta n-ga gara hkingrai ni hpe mung jailang mai na kun? Teng man ai tara hpe sharin ya lu na matu, ahkyak htum ai hkingrai langai gaw Chyum Laika Teng Sha Sharin Ya Ai Gaw Hpa Rai Ta? ngu ai laika buk re. Chyum ga sharin hpe ndai laika buk hte sharin ngut ai hpang, shi prat hta Chyum Laika lam matsun ni hte maren asak hkrung lu hkra “Karai Kasang A N-Gaw Nwai Ai Myit Hta A Nga Nga Mu” ngu ai laika buk hpe jailang ra na re. Dai majaw, anhte ni gaw ndai laika buk lahkawng hpe atsawm jailang chye ai ni byin ra ai. Brochure nkau mung sharin achyin lu ai hkingrai ni hta lawm ai. Karai Kasang Kaw Na Kabu Gara Shiga brochure gaw Chyum Laika sharin hpang lu hkra karum ya ai hkingrai langai re. Buga hta na masha ni, laika nau nchye hti yang, shanhte a amyu ga hte uhpung shapraw ai laili laika kachyi mi sha nga ai (sh) n nga ai rai yang, Karai Kasang A Ga Madat U (sh) Karai Kasang A Ga Madat Nna Htani Htana Asak Hkrung U brochure ni hpe jailang mai ai. Chyum Ga sharin hpe uhpung a lam tsun dan mayu yang, Ya Aten Hta Yehowa Myit Ra Ai Hpe Kadai Ni Galaw Nga A Ta? ngu ai hkingrai hpe jailang mai ai. Chyum Laika Hpe Hpa Majaw Hkaja Ra Ai Kun?, Nawku Htingnu Hta Hpa Ni Galaw A Ta?, Karai Kasang Kaw Amying Nga Ai Kun?, ngu ai video ni mung sape shatai ai bungli a matu grai kaja ai hkingrai ni re. Dai majaw hkingrai ni hpe atsawm jailang chye hkra sharin da ging ai.
3. Hpang de shapraw na Anhte A Mungdan Magam laika ni gaw anhte hpe hpa ni chye galaw wa hkra karum ya na kun?
3 Hpang de shapraw na Anhte A Mungdan Magam laika ni gaw, madung hku nna sharin achyin ya lu ai laili laika hkingrai ni hpe atsawm chye jailang hkra karum ya na re. Dai ni hpe anhte jailang na matu shakut na nga yang: “Na a hkum hpe mung, na a sharin shaga ai lam hpe mung, a sadi nga u; ndai lam hte hta e a grin nga u; shing rai galaw n yang gaw, na a hkum hpe mung, nang hpe madat mara ai ni hpe mung, nang hkye hkrang la lu na ra ai.”—1 Tim. 4:16.