“Ga Ndai Hpe Na A Kraw Lawang E Gun Nga U”

Kanu kawa ni gaw sagu rem ai wa hte bung ai. Ma ni gaw aloi sha lam shai chye ai, hten za chye ai majaw kanu kawa ni gaw atsawm bau maka ra ai. (Ga Sh. 27:23) Ndai lit hpe kanu kawa ni gara hku gun hpai mai na kun? Ma ni a myit hta hpa lam ni myit nga ai hpe chye na matu, shanhte hpe aten jaw nna shani shagu tsun shaga ra ai. (Ga Sh. 20:5) Kanu kawa ni gaw, ma ni a makam masham ngang kang wa hkra galaw yang, hkalem hkalau ai lam ni hpe shanhte ning hkap lu na re. (1 Kor. 3:10-15) “Ga Ndai Hpe Na A Kraw Lawang E Gun Nga U” ngu ai video hta, dinghku nawku hpe ayan galaw na matu, kade daram ahkyak ai lam hpe madun da ai. Ndai video hpe nta masha yawng yu nna, lawu na ga san ni hpe bawngban u. 

(1) Thomas a nta dinghku gaw gara hku nna, wenyi lam hta n-gun yawm mat wa ai kun? (2) Dinghku nawku galaw hpang ai shaloi, Hpunau Thomas n awng dang ai gaw hpa majaw kun? (3) Gara Chyum Ga matsun ni gaw, kashu kasha ni hpe bau maka ya ai hta awng dang shangun na kun? (T.Ja 6:6, 7) (4) Nta masha ni atsawm sha kanawn mazum lu na matu hpa ra a ta? (5) Ma ni akyu a matu kanu kawa ni gaw, hpa ni asum hkam ra a ta? (6) Hpunau Barrow yanla gaw, Thomas hte shi nta dinghku a matu, kaja ai kasi ningli gara hku madun wa ai kun? (Ga Sh. 27:17) (7) Dinghku nawku galaw ai lam awng dang lu na matu, nta madu wa gaw hpa ni tau hkrau shajin ra a ta? (8) Hpunau Thomas gaw dinghku masa kaja wa hkra hpa ni galaw wa a ta? (9) Dinghku nawku hpe hpa majaw ayan galaw ra ai kun? (Ehp. 6:4) (10) Dinghku nawku a matu tatut hkrak re ai lam matsun nkau gaw hpa ni kun? (11) Jaw ai hpe galaw na matu, kade daram ahkyak ai hpe kasha Marcus chye wa hkra, kawa gaw gara hku sharin ya wa ai kun? (Yer. 17:9) (12) Kanu yan kawa gaw, kasha Rebecca hpe shi a manang Justin hte seng nna jaw ai hku dawdan lu hkra gara hku tsun shaga wa ai kun? (Mar. 12:30; 2 Tim. 2:22) (13) Kanu yan kawa gaw galai shai ai lam ni galaw ai shaloi, makam masham nga ai ngu gara hku madun wa ai kun? (Mah. 6:33) (14) Dinghku madu ni gaw, nta masha ni a wenyi lam hpe lanu lahku ra ai ngu, ndai video hta gara hku madun da ai kun? (1 Tim. 5:8) (15) Dinghku madu langai hku nna hpa galaw na matu nang dawdan da ai kun?

DINGHKU MADU NI A MATU: Ndai kamung naura hpe 2011, ginwang zuphpawng hta madun wa ai. Dai shaloi hta, dinghku nawku hpe grau kaja hkra galaw na matu, ra ai lam langai ngai hpe sadi hkrup ai kun? Rai yang, ya gaw taw? Na a nta dinghku a matu, akyu law law hkam sha lu hkra galai shai nna galaw ra ai lam nga yang, akyu hpyi nna galaw sa wa u.​—⁠Ehp. 5:15-17.