Shanhte A Makam Masham Hpe Kasi La U
1. October 19 bat kaw nna gara laika buk hpe Hpung Chyum Laika Hkaja Hpawng hta jailang na kun?
1 2015, October 19 bat kaw nna, Hpung Chyum Laika Hkaja Hpawng hta Shanhte A Makam Masham Hpe Kasi La U ngu ai laika buk hpe hkaja mat wa na re. Ndai laika buk hta Chyum Laika prat na sadi dung ai num, la 14 a labau ni lawm ai. Ndai laika buk hpe hkaja ai shaloi, Yehowa hpe sadi dung ai masha ni mung, mayak mahkak ni hkrum wa ai lam chye wa nna, shanhte a mabyin ni hpe shingran mu wa na re. Dai ni aten hta anhte hpe mung, ndai Chyum Laika labau ni kaw nna sharin la lu ai ni hpe hkan sa na matu karum ya ai.—Heb. 6:12.
2. Shanhte A Makam Masham Hpe Kasi La U laika buk a hkrang nkau mi hpe tsun dan u.
2 Laika Buk A Hkrang: Chyum Laika prat na masha ni gara aten hta, gara shara kaw asak hkrung wa ai hpe chye na matu, aten madun ai mahkret ni hte ga sumla ni hpe ndai laika buk hta madun da ya ai. Daw shagu hta “Myit Yu U” ngu ai ga baw lawm ai. Dai gaw Chyum Laika labau ni hpe myit sawn yu na matu, sharin la lu ai lam ni hpe tatut jailang na matu karum ya ai. Atsawm sawk sagawn nna hkrang shapraw sumla ni hpe lajang da ya ai majaw, Chyum Laika labau ni hpe anhte shingran yu mai ai re.
3. Ndai laika buk hpe hkaja ai shaloi, akyu lu la hkra anhte gara hku galaw na kun?
3 Akyu Lu Mai Ai Lam: Uphkang Hpung kaw nna shagun ai laika hta, ndai hku n-gun jaw da ai: “Nanhte a myit sawn yu ai atsam hpe jailang nna shingran yu u. Chyum Laika kaw na masha ni hkam sha ai zawn hkam sha yu u. Shanhte mu ai hpe hkan mu na matu shakut u. Shanhte dai lam hpe gara hku hparan wa ai hte, shi shara hta nang rai yang gara hku hparan na ngu ai hpe shingdaw yu u.” Myit sawn yu ai atsam hpe jailang na matu tsun ai shaloi, ladu lai hkra myit sawn yu na matu tsun ai nre. Chyum Laika labau hta lawm ai lam ni hpe hkrang shapraw na, dai masha ni hkam sha ai lam ni hpe chye hkra, shi shara hta shang yu na matu, tsun mayu ai re. Dai zawn galaw na matu aten la nna myit sumru ra ai. (Neh. 8:8) Hkaja ai shaloi, daw langai a ka-ang na daw rai yang, woi awn ai wa gaw, hkaja ngut wa ai daw ni hpe second 30, 60 daram bai maram nna hpang na re. Hkaja nga ai daw hta “Myit Yu U” ngu ai ga baw n lawm yang, hpungdim dat ai shaloi ga san langai lahkawng san mai ai.
4. Shanhte A Makam Masham Hpe Kasi La U laika buk hpe hpa majaw hkaja ra ai kun?
4 Anhte asak hkrung nga ai mungkan gaw, anhte a makam masham hten mat hkra, n-gun yawm mat hkra galoi mung galaw nga ai. Ndai laika buk hte Sin Langchyi-BU hta lawm ai makam masham hpe kasi la u ngu ai daw ni gaw, Yehowa jaw ai kumhpa ni re. Dai gaw, anhte a makam masham hpe ngang kang shangun ai. (Yak. 1:17) Hpung Chyum Laika Hkaja Hpawng hta, ndai laika buk hpe hkaja ai shaloi, ayan lung nna, mahtai law law jaw nna akyu hkam sha u.