Kabu Gara Shiga Brochure Hte Sharin Ya U
1. Kabu Gara Shiga brochure hpe gara hku lajang da ai kun?
1 July shata Anhte A Mungdan Magam hta sharin achyin ya lu ai hkingrai langai re ai, Karai Kasang Kaw Na Kabu Gara Shiga laika buk hpe ahkyak shatai tsun da ai. Chyum daw ni hpe sha matsun da ai re majaw, nta madu gaw shi a Chyum Laika kaw na hkaja lu na re. Anhte na hkaja ai laili laika law malawng hpe gaw tinang hkrai hti lu ai hku nna ka da ai. Ndai brochure hpe gaw, sharin ya ai wa hte arau hkaja mai ai hku lajang da ai. Dai re ai majaw, ndai laika buk hpe garan ai shaloi, Chyum Laika hta lawm ai kabu gara shiga hpe nta madu chye wa hkra hkaja ai lamang hpe hkrang madun dan u.—Mah. 13:44.
2. Kabu Gara Shiga brochure hpe hkaw tsun bungli hta gara hku jailang mai na kun?
2 Hkaw Tsun Bungli Hta: Ndai hku tsun mai ai: “Masha ni gaw ndai mungkan ga a tsin-yam tsindam ni a majaw myitru myit tsang nga ai. Ndai zawn yakhkak ai lam ni gaw galoi mung byin nga na kun? [Mahtai la u.] Chyum Laika hta lawm ai kabu gara shiga gaw anhte hpe myit mada lam jaw ai. Ga san nkau mi a mahtai hpe Chyum Laika hta tsun da ai.” Nta madu hpe brochure jaw nna, hpang jahtum laika man kaw na ga san ni hpe lata shangun u. Shi lata ai daw hta lawm ai laika pang langai hpe gara hku hkaja mai na hpe hkrang madun dan u. Hkaja nga ai daw hpe madung nna, nta madu myit lawm na ga san ni san u. Chyum Laika mahtai ni hpe gara hku tam lu na lam nta madu hpe tsun dan u. Tinang tsun dan ai lam hte hkrak re ai video jw.org hta nga yang, dai video hpe Hpunau nauna nkau mi gaw hkrang madun nga ai ten hta madun dan ma ai.
3. Kabu Gara Shiga Brochure hte Chyum Ga sharin gara hku galaw mai na hpe tsun dan u.s
3 Chyum Ga Sharin Lamang: (1) Madung lam hpe nta madu sadi hkrup na matu, grau chyang ai gasi ni hte ka da ai ga san ni hpe hti u. (2) Ngut yang laika pang hpe matut nna hti u. (3) Gyeng da ya ai Chyum daw ni hpe hti u. Chyum Laika mahtai ni hpe nta madu chyena wa hkra, htap htuk ai ga san san u. (4) Kaga laika pang ni a ga san ni hpe matut nna hkaja na matu, nambat 2 hte 3 zawn sha galaw u. Dai ga san ni hte hkrak re ai video hpe n madun shi yang, hkaja nga ai shaloi madun dan u. (5) Hpang jahtum hta gaw nta madu kade daram chyena ai hpe chye na matu, ga san ni hpe bai san u.
4. Ndai Kabu Gara Shiga brochure hpe atsawm chye jailang lu hkra hpa gaw karum ya na ta?
4 Ndai brochure hpe atsawm chye jailang hkra galaw da u. Ahkaw ahkang lu shagu jailang u. Chyum sharin lamang n galaw shi yang, hkaja na wa a lam shawng myit da u. Hkaja na daw hta lawm ai Chyum daw ni hpe shi hte arau gara hku sawn dinglik na ngu myit da u. (Ga Sh. 15:28; Kasa 17:2, 3) Ndai brochure hpe nang atsawm sha chye jailang sai nga yang, teng man ai lam sharin ya na matu, brochure ndai gaw kaja htum hkingrai langai re ngu chye wa na re.