Myihtoi Ni Hpe Kasi La U—Habaku
1. Myihtoi Habaku hpe, hpa majaw myit tau ya lu ai kun?
1 Mungkan ting n kaja ai lam ni law wa ai hte maren, anhte mung Habaku zawn hkam sha wa chye ai. Shi Yehowa hpe: “Nang hpa majaw n shawp n kap ai amu, ngai hpe madun nna, myit magaw ai lam mu shangun nga n ta?” ngu nna san wa ai. (Hab. 1:3; 2 Tim. 3:1, 13) Habaku a myihtoi ga hte sadi dung ai kasi ni hpe sumru ai gaw, Yehowa a tara dara na shani hpe hkam sharang let la nga lu na matu karum ya na re.—2 Pet. 3:7.
2. Dai ni aten hta makam masham hte asak hkrung nga ai ngu gara hku mai madun a ta?
2 Makam Masham Hte Asak Hkrung: Mayak mahkak ni a majaw myit daw na malai, Habaku gaw wenyi lam hta matut nna shakut shaja wa ai. (Hab. 2:1) Yehowa gaw, shi masat da ai aten hta shi a ga ni teng sha hpring tsup wa na, “ding hpring ai wa chyawm gaw, shi a kam sham ai hte hkrung nga lu na” ngu Habaku kam hkra tsun dan ai. (Hab. 2:2-4) Ndai ga ni gaw hpang jahtum nhtoi hta asak hkrung nga ai hkristan ni a matu hpa lachyum nga ai kun? Hpang jahtum nhtoi, galoi du na hpe chye na matu hta grau nna, du wa na re ngu kam na matu grau ahkyak ai. Makam masham gaw, maja let nga na matu, magam gun ai hpe shawng tawn na matu anhte hpe shadut ya na re.—Heb. 10:38, 39.
3. Hpa majaw Karai a magam hpe ngwi pyaw ai myit hte matut nna gun hpai ra ai kun?
3 Yehowa Hta Kabu Gara: Magoga masha Goga gaw, Yehowa a masha ni hpe gasat ai shaloi, anhte a makam masham chyam dinglik hkrum na re. (Ezk. 38:2, 10-12) Awng dang nga ai ni pyi ndai majan a majaw, mayak mahkak ni hkrum wa na re. Lu sha ni taw wa na, sut gan ni sum wa na, masha a nga sat nga sa grau yak wa ai ni byin yang byin na. Dai zawn re ai mayak mahkak ni law wa yang, anhte ni gara hku galaw na kun? Habaku gaw mayak mahkak hkrum na hpe chye ai. Raitim, Yehowa a magam hpe ngwi pyaw let matut nna gun na matu dawdan da ai. (Hab. 3:16-19) “Yehowa hta kabu gara” nga ai gaw, htawm hpang hta hkrum na mayak mahkak ni hpe hkam sharang lu na matu, anhte hpe karum ya na re.—Neh. 8:10; Heb. 12:2.
4. Ya aten hte htawm hpang hta anhte ni hpa majaw ngwi pyaw lu na kun?
4 Tara dara ai shani hta tawt lai lu ai ni gaw, Karai Kasang ra sharawng ai hku asak hkrung na matu, matut nna sharin la ra na re. (Hab. 2:14) Bai hkrung rawt wa ai ni mung, Yehowa a lam sharin la ra na re. Dai majaw, ya aten hta, ahkaw ahkang lu shagu Yehowa hte shi galaw ai mau hpa amu ni a lam, kaga masha ni hpe tsun dan nga ga.—Ps. 34:1; 71:17.