Myi Hte N Mu Lu Ai Karai Kasang A Atsam Ningja Ni Hpe Nang Sadi Hkrup Ai Kun?

Nsam hkum ai nam pan, san tsawm ai lamu, (sh) hka rum kaba ni hpe nang yu ai shaloi, hpan madu a galaw da ai lam ni hpe nang mu ai kun? Anhte a makau grup yin hta nga ai hpan da lam ni gaw, myi hte n mu lu ai Yehowa a atsam ningja ni hpe madun nga ai. (Rom 1:20) Anhte a myi hte mu ai ni hpe chyahkring mi hkring nna myit yu yang, Karai Kasang a n-gun atsam, tsawra myit, nyan hpaji hte tara rap ra ai lam ni hte hpawn, shi a gam jaw gam ya ai lam hpe mung anhte sadi hkrup na re.​—⁠Shk 104:24.

Nang shani shagu sadi hkrup ai, Yehowa a hpan da lam nkau mi gaw hpa ni rai kun? Nang mare kaba hkan nga yang pyi, ntsa malen u ni (sh) hpun ni hpe nang mu na re. Yehowa a hpan da ai lam ni hpe galoi mung yu nga ai gaw, anhte a myit ru myit tsang lam ni hpe shayawm lu na matu, ahkyak htum lam ni hpe myit maju jung lu na matu, karum ya lu ai. Anhte hpe htani htana lanu lahku lu ai Yehowa a atsam hpe, kamsham ai anhte a myit hpe mung grau ngang shangun ai. (Mat 6:25-32) Nang hta ma nga yang, Yehowa a grau htum ai atsam ni hpe, shanhte sadi hkrup wa hkra karum ya u. Anhte a makau grup yin hta nga ai hpan da lam ni hpe grau manu shadan wa ai hte maren, Hpan Da Madu hte ni htep wa na re.​—⁠Shk 8:3, 4.

MAU HPA HPAN DA LAM NI GAW, KARAI A HPUNG SHINGKANG HPE MADUN​—⁠NHTOI HTE NSAM NGU AI VIDEO HPE YU NGUT AI HPANG, NDAI GA SAN NI HPE HTAI U:

• Anhte gaw nsam ni hpe gara hku na mu lu ai kun?

• Tu kabrim ai lam gaw gara hku byin wa ai kun?

• Lamu a nsam hpe hpa majaw amyu myu, anhte mu lu ai kun?

• Na a nta makau hta, hpan da ai ni hta na hpa nsam ni hpe sadi hkrup ai kun?

• Shingra tara a lam hpe ayan hkaja na matu, hpa majaw aten jaw ging ai kun?