HKRISTAN PRAT HKRUN LAM

Shangwi Shapyaw Lam Hpe Hpaji Rawng Ai Hku Lata U

Shangwi shapyaw lam hpe, hpaji rawng ai hku hpa majaw lata ra ai kun? Hpa majaw nga yang, anhte lata nna yu ai video, madat ai mahkawn, yu ai website, hti ai laika buk ni, ginsup ai video game ni gaw anhte a myit hta shang nga chye ai majaw re. Anhte lata ai lam ni gaw, anhte a arawn alai hpe akyu shabyin ai. Yawn hpa gaw, dai ni aten na shangwi shapyaw ai lam law law hta, Yehowa matsat ai lam ni lawm nga ai. (Shk 11:5; Gal 5:19-21) Dai majaw, Yehowa hpe shakawn shagrau ai lam ni hpe, matut myit sumru na matu Chyum Laika hta anhte hpe n-gun jaw da ai.—⁠Hpl 4:8.

GARA SHANGWI SHAPYAW LAM HPE LATA GING AI KUN? NGU AI VIDEO HPE YU NNA, LAWU NA GA SAN NI HPE HTAI U:

Moi na Roma ni a galetdiyeta ngu ai du daw sai hkaw re ai ginsup ai lam gaw, ya aten na shangwi shapyaw lam nkau mi hte gara hku bung ai kun?
Ramma ni, shangwi shapyaw lam hpe hpaji rawng ai hku lata lu hkra, nawku hpung kaw nga ai ni gaw, gara hku karum ya na kun?
Shangwi shapyaw lam lata ai shaloi, Roma 12:9 hpe anhte gara hku hkan sa ging ai kun?
Na a makau grupyin hta nga ai akyu rawng ai shangwi shapyaw lam nkau mi gaw hpa ni kun?

TINANG NAN GALAW NA KUN (SH) KAGA NI GALAW DA AI HPE YU NA KUN?

Dai ni aten na mying gumhkawng ai shangwi shapyaw lam ni gaw, tinang nan lama ma hpe galaw ai a malai, kaga masha ni galaw da ai lam ni hpe hti na (sh) yu na matu sharin ya ai. Sumla hkrung ni, laika buk ni hte TV lamang ni hta tinang a myit mang ai lam hpe n re ai sha, kaga masha ni a myit mang ai lam hpe madun da ai. Kaga masha ni galaw da ai shangwi shapyaw lam ni nga tim, tinang nan galaw ai shangwi shapyaw lam ni gaw, grau nna akyu nga ai hpe masha law law mu wa ai. Ga shadawn, masha nkau mi gaw sumla soi ai (sh) madum sumpyi dum ai hpe ra sharawng ma ai. Nkau mi gaw shinggan de sa nna bansa ai, ginsup ai, hkanu ni hta hka hpungyawt ai, htunghking ka manawt ai lam ni galaw ai hpe ra sharawng ma ai. Anhte “hpa galaw timung, nga manga hta Karai Kasang a hpung shingkang tam let” shangwi shapyaw ai lam hpe lata ga.—⁠1Ko 10:31.