Myit Dum Poi A Matu Nang Shajin Da Sai Kun?

Yesu hpang jahtum galaw ai, Shalai Wa Ai Poi gaw laklai ai. Hpa majaw nga yang, shi si ra sana rai nna, kasa ni hte rau Shalai Wa Ai hkungga hpe sha na matu, shaning shagu galaw ra na Madu A Shana Shat Sha Poi hpe mung shachyen ya wa ai majaw re. Dai majaw Petru yan Yawhan hpe gawk lajang shangun wa ai. (Luk 22:7-13; makawp sumla hpe yu u.) Ndai gaw March 27 hta galaw na, Myit Dum Poi a matu hkyen lajang ra ai lam ni hpe shadum ya ai. Nawku hpung ni gaw, mungga htawn na wa, masat dingsat ni hte kaga lam ni a matu lajang da ra ai. Raitim, Myit Dum Poi a matu anhte langai hpra mung gara hku shajin da na?

Myit masin hpe shajin. Myit Dum Poi A Matu Chyum Laika hpe hti sumru u. Chyum Laika Hpe Shani Shagu Sawn Maram U laika buk kaw na, chyarang hpe yu u. Mungkan Nnan Ga Gale Chyum Laika-BU a, Bungjat Daw B12 hta chyarang lawm ai. (April 2020 Prat Hte Magam Zuphpawng Shaman Laika Buk hpe mung yu mai ai.) Dinghku nawku kaw gawng malai jahpu a ahkyak ai lam hpe, Yehowa Sakse Ni A Matu Hkaja Lam Matsun (sh) Sin Langchyi Hkaja Lam Matsun-E laika buk ni hta yu mai ai.

Myit Dum Poi aten ladaw hta, dinghku langai gaw dinghku nawku kaw bawngban nga.

Sa lung na matu saw shaga. Kemping hta hpring tup shang lawm u. Saw shaga mai ai, bai kawan ai lam ni, moi na chyum ga sharin ni, manang ni hte jinghku ni hpe myit yu u. Myitsu salang ni gaw, wenyi lam hta katsi mat ai ni hpe saw shaga ging ai. Dum ra na gaw, marai langai ngai gaw na a buga hta n nga taw yang, shi du taw ai shara kaw galaw na Myit Dum Poi a shara, aten ni hpe, jw.org home page a ANHTE A LAM hpe dip nna “Myit Dum Poi” ngu ai kaw yu mai ai.

Wenyi lam hta katsi nga ai hpunau langai kaw, myitsu salang ni sa kawan nna Myit Dum Poi saw shaga nga.

Anhte shajin da mai ai lam ni naw nga ai kun?