Tinang Myit Hpe Hkang Lu Ai​—Yehowa A Myiman Lu Shangun Ai Atsam Ningja

“Jinghku langai gaw ngai hpe ga law saw ai shaloi, shi nsa sa chyat mat ai du hkra ngai du manat da ai. Ngai shi hpe sat mayu ai.”​—Paw.

“Nta kaw rai yang, ngai grai pawt ja ai. Arung arai ni, ginsup rai ni, mu ai hpa hpe raitim kabai jahten kau ai.”​—Mako.

Anhte law malawng gaw, dai zawn ladu lai masin pawt ai ni gaw n re. Raitim, kalang lang anhte hkum anhte hkang na matu grai yak ai. Anhte gaw Adam kaw nna yu hkrat wa nna, mara galaw mayu ai myit kap wa ai majaw re. (Rom 5:12) Nkau mi gaw Paw hte Mako zawn masin pawt ai hpe hkang na matu yak chye ai. Nkau mi gaw shanhte a myit mang ai lam hpe hkang na matu yak chye ai. Ga shadawn, hkrit shangun ai, myit daw shangun ai lam ni hpe sha myit nga ai. Nkau mi chyawm gaw hpye ai amu galaw na matu, tsa chyaru lu lai na matu, nanghpam tsi lu sha na matu shadut hkrum ai hpe ninghkap na matu yak chye ai.

Tinang a myit mang ai lam, ra marin ai lam hte galaw hkawm sa ai lam ni hpe n hkang ai ni gaw prat hten mat na re. Dai hku n byin hkra gara hku koi lu na kun? Myit hpe hkang ai hku nna re. Ndai ga san 3 hpe hkaja yu ga: (1) Tinang myit hpe hkang lu ai ngu ai gaw hpa rai kun? (2) Dai gaw hpa majaw ahkyak ai kun? (3) “Wenyi a asi” re ai ndai atsam ningja hpe gara hku shalat lu na kun? (Gal 5:22, 23) Tinang myit hpe hkang na matu yak ai aten ni hta, hpa galaw lu ai lam hpe mung hkaja yu ga.

Tinang Myit Hpe Hkang Lu Ai Ngu Ai Gaw Hpa Rai Kun?

Tinang myit hpe hkang lu ai wa gaw myit shadang nna galoi mung n galaw ai. Karai Kasang n ra ai lam ni hpe shi n galaw ai, n tsun ai.

Tinang myit hpe hkang lu ai lam hta gara lam lawm ai hpe Yesu madun dan ai. Chyum Laika hta ndai hku tsun da ai: “Shi aroi arip hkrum yang, bai roi htang ai n rai; nni nkri hkrum yang, ahkrim nga ai n re ai sha, ding man ai hku daw dan ai wa a lata hta e, shi a hkum hpe ap da nu ai.” (1 Pe 2:23) Hpyen ni gaw Yesu hpe hpun shadaw hta jen da nna jahpoi asawng ai shaloi, tinang myit hpe hkang wa ai. (Mat 27:39-44) De a shawng hta, nawku htung ningbaw ni gaw ga tsun shut hkra shi hpe ga san ni san ai shaloi, myit hpe hkang lu wa ai. (Mat 22:15-22) Yuda masha ni masin pawt nna, nlung hte kabai ai shaloi hta mung, kasi kaja madun wa ai. Matai htang na malai, “makoi mat nna, naw ku Htingnu na pru mat wa ai.”​—Yhn 8:57-59.

Yesu hpe kasi la lu na kun? Madang langai du hkra anhte kasi la lu ai. Kasa Petru ndai hku ka wa ai: “Hkristu mung nanhte a matu mara nni nkri hkrum wu ai hte, nanhte shi a hkang hta hkan nang lu myit ga, nanhte a matu ningli tawn da nu ai.” (1 Pe 2:21) Anhte gaw n hkum tsup ai ni raitim, tinang myit hpe hkang lu ai Yesu a kasi hpe htep lahti hkan sa lu ai. Dai hku galaw na matu hpa majaw ahkyak ai kun?

Tinang Myit Hpe Hkang Na Matu Hpa Majaw Ahkyak Ai Kun?

Yehowa a myiman lu na matu, tinang myit hpe hkang lu ai atsam ningja anhte hta nga ra ai. Yehowa hpe sadi dung let nawku wa ai grai na sai raitim, anhte tsun ai galaw ai lam ni hpe n hkang ai rai yang, shi hte hku hkau lam hten run mat chye ai.

“Ga ningtsa ting na masha nlang hta myit grau sumnung ai wa” re ai Mawshe a lam hpe myit yu ga. (Bhk 12:3) Israela ni aput angun tsun ai hpe shaning law law myit galu let hkam sharang wa ai. Raitim, lani mi hta tinang hkum tinang n hkang lu wa ai. Hka n nga ai majaw, aput angun bai tsun ai shaloi, shi grai masin pawt wa ai. “Gumlau masha ni e, madat mu: an nanhte a matu dai nlung hta na ntsin shapraw jaw na rai nga ga ni?” ngu nna Israela ni hpe grai mazut ai hku tsun wa ai.​—Bhk 20:2-11.

Mawshe gaw tinang hkum tinang n hkang lu wa ai. Hka hpe mauhpa lam hku jaw wa ai Yehowa hpe n shagrau wa ai. (Shk 106:32, 33) Dai majaw, Yehowa gaw Ga Sadi Tawn Da Ai Mungdan de shang na ahkang n jaw wa ai. (Bhk 20:12) Mawshe gaw shi a myit hpe n hkang lu wa ai majaw, myit malai lu nga na re.​—Trj 3:23-27.

Hpa sharin la lu ai kun? Anhte gaw tengman ai lam hta aten na sai raitim pyi, anhte hpe myit shanut ya ai ni, shading sharai na matu ra nga ai ni hpe n hkungga ai hku n tsun ging ai. (Ehp 4:32; Kol 3:12) Anhte asak kaba wa ai hte maren, myit galu na matu kalang lang yak chye ai. Raitim, Mawshe hpe dum ra ai. Tinang hkum tinang n hkang lu ai majaw, Yehowa a man hta mying hten mat ai baw n byin mayu ai. Ndai ahkyak ai atsam ningja hpe gara hku shalat la na kun?

Tinang Myit Hpe Hkang Lu Ai Atsam Hpe Shalat La Mai Ai Lam

Chyoi pra ai wenyi hpe hpyi u. Hpa majaw kun? Tinang myit hpe hkang lu ai lam gaw Karai wenyi a asi re ai majaw, dai hpe hpyi ai ni hpe Yehowa jaw na re. (Luk 11:13) Anhte ra nga ai atsam ningja hpe Yehowa jaw ya lu ai. (Hpl 4:13) Tsawra myit zawn re ai kaga wenyi asi ni hpe shalat la lu hkra mung shi karum ya lu ai. Dai gaw tinang myit hpe hkang lu ai atsam grau nga shangun ai.​—1 Ko 13:5.

Tinang myit hpe hkang na matu yak shangun ai lam yawng hpe koi u. Ga shadawn, n kaja ai lailen ni lawm ai shangwi shapyaw lam ni hte intanet website ni hpe koi u. (Ehp 5:3, 4) Shut ai lam galaw hkrup hkra shadut ya chye ai lam yawng hpe koi ra ai. (Gsh 22:3; 1 Ko 6:12) Ga shadawn, n kaja ai akyang lailen aloi sha galaw hkrup chye ai masha langai gaw, sumtsaw sumra lam ni hpe madun ai sumla hkrung ni hte laika buk ni hpe koi ra ai.

Ndai hpaji jaw ga hpe hkan sa na matu yak chye ai. Raitim, anhte shakut na nga yang, ra ai atsam hpe Yehowa jaw ya na re. (2 Pe 1:5-8) Anhte myit ai, tsun ai, galaw ai lam ni hpe hkang lu na matu shi karum ya na re. Grai masin pawt ai hpe hkang lu na matu sharin la wa ai Paw hte Mako gaw dai hpe sakse madun nga ai. Mawdaw gau ai shaloi, chyahkring hkring masin pawt ai majaw, kaga ni hte pyi ga law wa ai hpunau langai a lam hpe myit yu ga. Shi gara hku hparan wa ai kun? “Ngai shani shagu akroi anoi akyu hpyi ai. Tinang myit hpe hkang lu ai hte seng ai sumhpa ni hpe hkaja ai. Ngai hpe karum ya lu ai Chyum daw ni hpe matsing hkra galaw ai. Myit simsa lam lu mayu ai majaw, jahpawt shagu tinang hkum tinang shadum nga ra dingyang re. Sa ra ai shara de jau jau sa ai majaw, n tin ra sai.”

Tinang Myit Hpe Hkang Na Matu Yak Ai Shaloi

Anhte yawng gaw kalang marang tinang myit hpe hkang na matu yak chye ai. Dai hku byin ai shaloi, Yehowa hpang akyu hpyi na matu, kaya ai ngu hkamsha chye ai. Raitim, grau nna akyu hpyi ra ai. Yehowa kaw kalang ta akyu hpyi u. Mara raw ya na matu hpyi shawn u. Shi a karum shingtau lam lu na matu tam u. Dai zawn shut ai lam hpe kalang bai n galaw hkrup hkra dawdan da u. (Shk 51:9-11) Matsan dum hkrum na matu myit madung hte akyu hpyi ai wa hpe Yehowa madat ya ai. (Shk 102:17) Karai Kasang a “Kasha Yesu a asai gaw, anhte hta na yubak nlang hte hpe jasan jaseng kau ya mi ai” ngu nna kasa Yawhan anhte hpe bai shadum ya ai. (1 Yh 1:7; 2:1; Shk 86:5) Chyahkring hkring mara raw ya na matu, shi a mayam ni hpe Yehowa tsun wa ai lam dum u. Dai majaw, anhte hpe mung mara raw ya na hpe kam mai ai.​—Mat 18:21, 22; Kol 3:13.

Mawshe gaw nam maling hta, tinang myit hpe hkang lu ai atsam chyahkring mi mat mat ai shaloi, Yehowa n ra sharawng wa ai. Raitim, Yehowa shi hpe mara raw ya wa ai. Anhte kasi la ging ai sadi dung ai masha hku nna, Chyum Laika hta tsun da ai. (Trj 34:12; Heb 11:24-28) Yehowa gaw Mawshe hpe Ga Sadi Tawn Da Ai Mungdan de shang na ahkang n jaw wa ai. Raitim, ginding aga Hparadisu hta nga lu na ahkang hte htani htana asak myit mada lam jaw wa ai. Anhte mung tinang myit hpe hkang lu ai atsam ningja rawt jat hkra galaw na nga yang, htani htana asak myit mada lam nga na re.​—1 Ko 9:25.