Hkrung Rawt Ai Lam Gaw Karai A Tsawra Myit, Nyan Hpaji Hte Myit Galu Ai Lam Hpe Madun

1. Yehowa gaw asak hpe hpa majaw hpan ai kun?

YEHOWA chyu sha nga ai aten nga wa ai. Shi gaw lam yawng mayawng hta hkum tsup nga ai majaw, garen gari ai lam n nga ai. Raitim, kaga ni hpe mung ngwi pyaw ai asak lu shangun mayu ai. Yehowa a tsawra myit gaw nga yawng nga pra hpe hpan na matu shadut ya wa ai.​—Shk 36:9; 1 Yh 4:19.

2. Yehowa a hpan da ai lam hte seng nna Yesu hte lamu kasa ni gara hku hkamsha ai kun?

² Shawng nnan Yehowa gaw Kasha Yesu hpe hpan ai. Dai hpang, Kasha alat hte arau wan hku law ai lamu kasa ni hte hpawn, yawng mayawng hpe hpan ai. (Kol 1:16) Yesu gaw Kawa hte arau bungli galaw lu ai majaw grai kabu ai. (Gsh 8:30) Lamu kasa ni mung kabu ai. Sumsing lamu hte ginding aga hpe Yehowa hte Yesu hpan ai shaloi shanhte yu nga ai. Ginding aga hpe hpan ngut ai shaloi Karai Kasang hpe shakawn ma ai. Kaga yawng mayawng hpe hpan ngut ai hpe mu ai shaloi hta mung, matut shakawn ma ai. Laksan hku nna shinggyim masha ni hpe hpan ai shaloi hta re. (Yob 38:7; Gsh 8:31) Hpan tawn da ai lam langai hpra gaw Yehowa a tsawra myit hte nyan hpaji hpe madun dan nga ai.​—Shk 104:24; Rom 1:20.

3. 1 Korinhtu 15:21, 22 hku nga yang Yesu a gawng malai hkungga gaw hpa galaw ya lu ai kun?

³ Yehowa gaw shi hpan da ai tsawm htap ai mungkan hta shinggyim masha ni hpe ngwi pyaw let htani htana asak hkrung shangun mayu ai. Raitim, Adam yan Ewa gaw tsawra ai Kawa hpe gumlau ai majaw, mungkan ting gaw yubak hte si hkrung si htan hkrum ra mat ai. (Rom 5:12) Yehowa hpa galaw wa ai kun? Shinggyim masha ni hpe hkye la na matu kalang ta lajang wa ai. (Nin 3:15) Adam yan Ewa a kashu kasha ni yubak hte si hkrung si htan kaw nna lawt lu na matu, gawng malai hkungga hpe lajang ya wa ai. Shi hpe nawku na matu lata ai ni hpe htani htana asak jaw na re.​—Yhn 3:16; Rom 6:23; 1 Korinhtu 15:21, 22 hpe hti u.

4. Ndai sumhpa hta gara ga san ni hpe hkaja na kun?

⁴ Si mat ai ni hpe bai hkrung rawt hkra galaw ya na ngu ai Karai a ga sadi hte seng nna ga san ni nga na re. Ga shadawn, hkrung rawt ai lam gaw gara hku byin wa na kun? Anhte a tsawra ai ni bai hkrung rawt wa ai shaloi, shanhte hpe matsing na kun? Hkrung rawt ai lam gaw gara hku nna kabu shangun ai kun? Hkrung rawt ai lam gaw, Yehowa a tsawra myit, nyan hpaji hte myit galu ai lam hte seng nna hpa sharin ya ai kun? Dai ga san langai hpra hpe hkaja yu ga.

Hkrung Rawt Ai Lam Gaw Gara Hku Byin Wa Na Kun?

5. Si mat ai ni yawng kalang ta hkrung rawt wa na ngu myit mada ai gaw hpa majaw n mai byin ai kun?

⁵ Yehowa gaw shi a Kasha hku nna wan hku law ai masha ni hpe jahkrung ya ai shaloi, yawng kalang ta hkrung rawt wa na ngu anhte n mai myit mada ai. Hpa majaw kun? Dai masha ni kalang ta hkrung rawt wa yang, mungkan ting gaw shuk shak mat na re. Yehowa gaw dai zawn byin hkra galoi mung galaw na n re. Masha ni simsa hkra nga lu na matu, atsawm hpawng de da ra ai hpe shi chye ai. (1 Ko 14:33) Shinggyim masha ni hpe garai n hpan shi ai shaloi, Yesu hte arau mungkan ga hpe gau ngwi ngwi hkyen lajang wa ai hpe yu yang, Yehowa a nyan hpaji hte myit galu ai lam hpe chye lu ai. Yesu mung shaning 1,000 uphkang ai laman, bai hkrung rawt wa na ni nga na matu, Hara Magedon kaw nna tawt lai wa ai ni hte arau bungli galaw ai shaloi, dai atsam ningja ni hpe madun na re.

6. Kasa 24:15 hku nga yang hkrung rawt wa ai ni hta kadai ni lawm na kun?

⁶ Hara Magedon kaw nna tawt lai wa ai ni gaw, bai hkrung rawt wa ai ni hpe Karai Mungdan hte seng ai lam, Yehowa hpyi shawn da ai lam ni hpe sharin ya ra ai. Hpa majaw kun? Bai hkrung rawt wa ai ni kaw nna law malawng gaw, “n ding n man ai ni” re ai majaw re. (Kasa 24:15 hpe hti u.) Shanhte gaw, Hkristu a gawng malai hkungga kaw nna akyu lu la na matu, galai shai ai lam law law galaw ra ai. Yehowa a lam n chye shi ai wan hku law ai masha ni hpe Karai hte seng ai tengman lam sharin ya ai bungli hta hpa ni lawm na hpe myit yu u. Dai ni anhte Chyum Laika sharin ya nga ai zawn sha, marai langai hpra hpe laksan sharin ya ra na kun? Dai masha nnan ni hpe nawku hpung hta lit jaw nna, hpang hta hkrung rawt wa na ni hpe sharin ya na matu shaman shakyang ya na kun? Anhte la yu ra na re. Raitim, Hkristu A Shaning Hking Mi Uphkang ngut ai hpang hta gaw, “Yehowa hpe chye chyang ai lam, mungkan ting pri rai na” hpe gaw anhte chye ai. (Esa 11:9) Bungli law nna kabu gara lu ai shaning 1,000 byin nga na re.

7. Karai a masha ni gaw hkrung rawt wa ai ni hpe sharin ya ai shaloi chye na ya ai myit hpa majaw nga wa na kun?

⁷ Shaning Hking Mi Yesu Uphkang ai laman, Yehowa a mayam ni gaw, shi myit ra ai hte maren asak hkrung na matu, galai shai ra ai lam ni galaw ra na re. Dai majaw, bai hkrung rawt wa ai ni hpe karum ya ai shaloi, chye na ya ai myit nga wa na re. (1 Pe 3:8) Rai yang, Yehowa a masha ni gaw shagrit shanem ai, hkye hkrang la hkrum na matu shakut nga ai hpe bai hkrung rawt wa ai ni mu ai shaloi, shanhte hte arau Yehowa hpe nawku mayu wa na re.​—Hpl 2:12.

Bai Hkrung Rawt Wa Ai Ni Hpe Anhte Matsing Na Kun?

8. Hkrung rawt wa ai ni hpe nta masha ni hte manang ni gaw bai matsing na ngu hpa majaw lu tsun ai kun?

⁸ Bai hkrung rawt wa na ni hpe, nta masha ni hte manang ni gaw bai matsing lu na re ngu lu tsun ai lam law law nga ai. Ga shadawn, lai wa sai aten na hkrung rawt ai labau ni hpe yu yang, garai n si shi ai shaloi na hkrang nsam, tsun shaga lu ai atsam, myit mang lu ai atsam ni bai nga na ngu myit mada mai ai. Yesu gaw si ai hpe yup ai hte shingdaw da nna, hkrung rawt ai hpe gaw yup rawt wa ai hte shingdaw da ai. (Mat 9:18, 24; Yhn 11:11-13) Masha ni yup rawt wa ai shaloi, hkrang nsam, nsen, matsing nyan ni gaw mi na zawn sha rai nga ai. Lazaru a mabyin hpe bai myit yu ga. Si mat ai 4 ya na sai majaw, hkum hkrang gaw yat mat sai. Raitim, Yesu shi hpe bai jahkrung ya ai shaloi, kana ni gaw kalang ta matsing nna, Lazaru mung shanhte hpe matsing ai.​—Yhn 11:38-44; 12:1, 2.

9. Hkrung rawt wa ai ni gaw hkum tsup let hpa majaw n hkrung rawt wa na kun?

⁹ Hkristu uphkang ai npu hta nga ai kadai mung, “ngai machyi nga nngai” ngu n tsun ra sana lam Yehowa ga sadi jaw da ai. (Esa 33:2:1; Rom 6:6) Dai majaw, si ai kaw nna bai hkrung rawt wa ai ni gaw, hkam kaja ai hkum hkrang lu la na re. Raitim, kalang ta gaw hkum tsup wa na n re. Lama na shanhte hkum tsup taw na nga yang, shanhte hpe tsawra ai ni gaw matsing lu sana n re. Masha yawng gaw, Hkristu A Shaning Hkying Mi Uphkang ai laman, angwi ngwi hkum tsup wa na re. Yesu gaw shaning 1,000 jahtum hta, Mungdan hpe shi Kawa hpang de bai ap na re. Dai shaloi, shinggyim masha yawng hpe hkum tsup hkra galaw ya ai lam hte hpawn, Yehowa ra sharawng ai lam yawng hpe ngut kre hkra Mungdan gaw galaw ya na re.​—1 Ko 15:24-28; Shr 20:1-3.

Hkrung Rawt Ai Lam Gaw Gara Hku Nna Kabu Gara Shangun Na Kun?

10. Hkrung rawt ai lam gaw nang hpe gara hku hkamsha shangun na kun?

¹⁰ Nang tsawra ai ni hpe bai hkap tau la lu ai shaloi, gara hku byin nga na hpe shingran yu u. Grai kabu nna mani nga na kun? hkrap nga na kun? Yehowa hpe shakawn ai mahkawn ni hkawn nga na kun? Chye lu ai lam langai gaw, hkrung rawt ya ai mauhpa shaman chyeju hpe galaw ya ai Yehowa hte Kasha hpe grau nna tsawra wa na re.

11. Yawhan 5:28, 29 hta lawm ai Yesu a ga ni hku nga yang Karai Kasang a ga madat ai ni gaw hpa byin wa na kun?

¹¹ Hkrung rawt wa ai ni gaw, gawng shing-yan dingsa hpe raw kau nna, Karai Kasang a tsang madang ni hte maren asak hkrung ai shaloi, kade daram pyaw nga na hpe shingran yu u. Dai hku galai shai ai ni gaw, Hparadisu hta htani htana asak hkrung lu na re. N galai shai ai ni gaw asak hkrung na n re. Shanhte a majaw Hparadisu a simsa ai lam hten run mat na hpe Karai Kasang ahkang jaw na n re.​—Esa 65:20; Yawhan 5:28, 29 hpe hti u.

12. Mungkan ting hta nga ai masha yawng gaw Yehowa a shaman chyeju hpe gara lam hku nna lu la na kun?

¹² Mungdan npu hta nga ai Karai a masha yawng gaw, Ga Shagawp 10:22 hta tsun da ai ndai ga ni jaw ai hpe mu lu na re: “Yehowa a shaman ai gaw ngamu ngamai shangun nga ai; Dai hta e yawn hkyen hpa mung n lawm nga ai.” Yehowa a chyoi pra ai wenyi karum ya ai majaw, wenyi lam hta grau rawt jat wa na re. Hkristu hte mung grau grau bung wa nna, hkum tsup wa na re. (Yhn 13:15-17; Ehp 4:23, 24) Lani hte lani, grau hkam kaja wa nna, myit hpraw tsawm ai ni byin wa na re. Grai ngwi pyaw ai asak aprat rai na re. (Yob 33:25) Hkrung rawt wa ai lam hpe myit sawn sumru ai gaw ya aten hta nang hpe gara hku karum ya lu na kun?

Yehowa A Tsawra Myit Hpe Chyeju Dum U

13. Shakawn 139:1-4 hku nga yang anhte hpe Yehowa atsawm chye ai lam hkrung rawt ai lam gaw gara hku madun ai kun?

¹³ Anhte hkaja wa sai hte maren, Yehowa gaw masha ni hpe bai jahkrung ya ai shaloi, mi na matsing nyan ni, atsam ningja ni bai nga hkra galaw ya na re. Dai lachyum gaw hpa re ai hpe myit yu ga. Yehowa gaw nang hpe grai tsawra ai majaw, nang myit ai, hkamsha ai, tsun ai, galaw ai lam yawng hpe shi matsing da ai. Dai majaw, bai jahkrung ya ai shaloi, na a matsing nyan ni, myit jasat ni hte atsam ningja ni hpe aloi sha bai bang ya lu ai. Langai hpra hpe Yehowa myit lawm ai hpe Hkawhkam Dawi chye ai. (Shakawn 139:1-4 hpe hti u.) Yehowa anhte hpe atsawm chye ai hpe chye na wa ai shaloi, gara hku hkamsha ai kun?

14. Anhte hte seng nna Yehowa kade daram chye ai hpe myit ai shaloi gara hku hkamsha ging ai kun?

¹⁴ Anhte hte seng nna Yehowa kade daram chye ai hpe myit sawn sumru ai shaloi, myit n tsang ging ai. Hpa majaw kun? Yehowa anhte hpe grai lanu lahku ai majaw re. Langai hpra hpe shi manu shadan ai. Anhte a prat hta galaw wa ai lam yawng mayawng hpe shi atsawm matsing ai. Dai gaw grai shalan shabran ya ai. Garen gari ai ngu n hkamsha ging ai. Yehowa gaw shani shagu, aten shagu anhte hte arau rai nna, karum ya mayu ai.​—2 Hl 16:9.

Yehowa A Nyan Hpaji Hpe Chyeju Dum U

15. Hkrung rawt ai lam gaw Yehowa hta nyan hpaji nga ai hpe gara hku sakse madun ai kun?

¹⁵ Si na hpe hkrit ai myit gaw atsam kaba ai laknak re. Satan a hkang ai npu hta nga ai ni gaw, dai laknak hpe akyu jashawn nna, manang ni hpe sadi n dung na matu, makam masham hpe asum jaw kau na matu, shadut chye ai. Raitim, anhte hpe gaw shadut lu na n re. Hpyen ni anhte hpe sat kau yang pyi, Yehowa bai jahkrung ya na hpe chye ai. (Shr 2:10) Yehowa hpe n nawku lu hkra hpa mung n lu galaw ai hpe anhte kam ga ai. (Rom 8:35-39) Hkrung rawt ai myit mada lam jaw ai hku nna, Yehowa gaw hpaji rawng ai hpe sakse madun dan ai. Dai myit mada lam a majaw, sat kau na ngu jahkrit shama hkrum tim pyi, anhte n hkrit ai sha n-ga, Yehowa hpe matut sadi dung lu na matu nden marai nga wa ai.

16. Tinang hkum tinang gara ga san ni hpe san ra ai kun? Yehowa hpe nang kade daram kamhpa ai hpe chye hkra dai ga san ni gaw gara hku karum ya lu ai kun?

¹⁶ Hpyen ni gaw nang hpe sat na ngu jahkrit shama wa yang, Yehowa nang hpe bai jahkrung ya lu ai hpe kam ai kun? Gara hku chye lu na kun? Lam langai gaw, tinang hkum tinang ndai hku san ai hku nna re: ‘Shani shagu na dawdan lam kaji kajaw ni hta pyi Yehowa hpe kamhpa ai lam ngai madun nga ai kun?’ (Luk 16:10) Hpang na ga san langai gaw, Karai A Mungdan hpe shawng tawn yang, ra ai lam ni hpe madi shadaw ya na ngu ai Yehowa a ga sadi hpe kamhpa ai lam nye a prat hkrun lam gaw madun nga ai kun? (Mat 6:31-33) Madun nga ai ngu lu htai yang, Yehowa hpe kam ai lam sakse madun nga nna, htawm hpang hta hkrum wa na mayak mahkak ni hpe tawt lai lu na matu jin jin rai nga na re.​—Gsh 3:5, 6.

Yehowa A Myit Galu Ai Lam Hpe Chyeju Dum U

17. (a) Hkrung rawt ai lam gaw Yehowa a myit galu ai lam hpe gara hku madun dan ai kun? (b) Yehowa a myit galu ai lam hpe gara hku chyeju dum lu ai kun?

¹⁷ Ndai nhkru ai mungkan hpe jahten na shani hte aten hpe Yehowa masat da ngut sai. (Mat 24:36) Dai shani garai n du shi yang, myit n galu ai majaw jahten kau ai baw galaw na n re. Si mat ai ni hpe alawan hkrung rawt ya mayu ai myit nga taw tim, myit galu ai. (Yob 14:14, 15) Asak bai jahkrung ya na kaja htum aten hpe shi la nga ai. (Yhn 5:28) Yehowa a myit galu ai lam hpe chyeju dum ging ai lam ni nga ai. Yehowa myit galu ai majaw, masha law law hte anhte mung myit malai lu nna, “myit kayin wa” na aten nga ai hpe myit yu u. (2 Pe 3:9) Yehowa gaw masha law law hpe htani htana asak lu shangun mayu ai. Dai majaw, shi a myit galu ai lam hpe chyeju dum ai lam madun nga ga. Gara hku nna kun? Yehowa “lau la ai” ni hpe myit rawt let tam nna, shanhte ni Yehowa hpe tsawra nna nawku daw jau wa na matu, karum ya ai hku nna re. (Yhn 6:44) Rai yang, shanhte gaw anhte zawn, Yehowa a myit galu ai lam kaw nna akyu lu la na re.

18. Kaga ni hpe hpa majaw myit galu ging ai kun?

¹⁸ Anhte hkum tsup wa na aten hpe shaning 1,000 htum ai du hkra, myit galu let Yehowa la nga na re. Dai aten du hkra Yehowa gaw anhte a mara ni hpe sharawng awng let raw dat ya nga na re. Dai majaw, anhte gaw Yehowa hpe kasi la nna, kaga ni a kaja ai atsam ningja ni hpe myit maju jung nna, myit galu ya ging ai. Nauna langai a mabyin hpe myit yu ga. Madu wa gaw ladu lai myit tsang wa ai majaw zuphpawng ni n lung mat ai. Shi ndai hku tsun ai: “Nye a matu grai yak ai. Dinghku a matu yaw shada da ai lam mung yawng galai shai mat ai.” Raitim, madu wa a ntsa matut nna myit galu wa ai. Yehowa hpe kamhpa nna galoi mung asum n jaw ai. Yehowa zawn, madu wa a kaja ai atsam ningja ni hpe sha myit maju jung ai. Shi ndai hku tsun ai: “Nye madu wa hta kaja ai atsam ningja ni nga ai. Myit tsang ai lam ni tawt lai lu wa hkra shi grai shakut ai.” Grai yak ai chyam dinglik ai lam ni hpe, tawt lai na matu shakut nga ai hpunau nauna ni hte nta masha ni hpe myit galu na matu grai ahkayk ai.

19. Hpa galaw na matu dawdan da ging ai kun?

¹⁹ Ginding aga hpe shawng nnan hpan ai shaloi, Yesu hte lamu kasa ni grai kabu ai. Ginding aga hta Yehowa hpe tsawra nna, nawku mayu ai hkum tsup ai masha ni hte hpring nga ai hpe mu ai shaloi, kade daram kabu na hpe shingran yu u. Hkristu hte arau uphkang na matu ginding aga kaw nna sumsing lamu de shaga la hkrum ai ni mung shanhte a bungli kaw nna masha ni akyu lu la nga ai hpe mu ai shaloi, kade daram kabu na hpe mung shingran yu u. (Shr 4:4, 9-11; 5:9, 10) Hkrap myi prwi a malai, kabu myi prwi pru ra na aten, machyi makaw ai lam ni, yawn hkyen ai lam ni hte si hkrung si htan ni galoi mung n nga sana aten hpe shingran yu u. (Shr 21:4) Ndai aten laman, tsawra myit nga nna hpaji rawng ai, myit galu ai Kawa hpe kasi la na matu dawdan da ga. Rai yang, hpa manghkang mi hkrum tim, matut nna ngwi pyaw lu na re. (Yak 1:2-4) “Bai hkrung rawt wa na lam nga ai” ngu ai Yehowa a ga sadi hpe grai chyeju dum ga ai.​—Kas 24:15.