Shingran Laika Gaw Na A Htawm Hpang A Matu Hpa Lachyum Nga Ai Kun?

1. Masha yawng gara ahkyak ai dawdan lam jahkrat ra ai kun?

DAI ni aten hta, masha ni gaw grai ahkyak ai dawdan lam langai hpe jahkrat ra ai. Yehowa Karai Kasang hpe ninggawn tawa Uphkang Madu hku nna madi shadaw na kun? Karai a hpyen Nat Satan hpe madi shadaw na kun? ngu ai hpe dawdan ra ai. Lapran n mai nga ai. Dawdan lam gaw shanhte a htawm hpang htani htana prat a matu akyu shabyin ya na re. (Mat 25:31-33, 46) “Ru tsang kaba” laman, hkye la hkrum na kun? Jahten hkrum na kun? ngu ai hpe masat hkrum na re.​—Shr 7:14; 14:9-11; Eze 9:4, 6.

2. (a) Hebre 10:35-39 hta hpa galaw na matu n-gun jaw da ai kun? (b) Shingran Laika gaw anhte hpe gara hku karum ya lu ai kun?

² Hebre 10:35-39 hpe hti u. Yehowa a uphkang ai lam hpe madi shadaw na ngu dawdan ai gaw hpaji rawng ai lam re. Kaga ni mung jaw ai hku lata lu hkra, nang karum ya mayu na re. Shingran Laika hta lawm ai lam ni hpe akyu jashawn nna karum ya mai ai. Yehowa hpe ninghkap ai ni, hpa byin mat na lam, Karai uphkang lam hpe sadi dung let madi shadaw ai ni, hpa shaman chyeju lu na lam ni hpe Shingran Laika hta tsun da ai. Dai ahkyak ai lam ni hpe anhte hkaja ging ai. Dai zawn hkaja na nga yang, Yehowa hpe matut nawku na ngu ai dawdan lam grau ngangkang wa na re. Jaw ai hpe lata lu hkra kaga ni hpe mung karum ya lu na re.

3. Ndai sumhpa hta hpa lam bawngban na kun?

³ Karai a uphkang lam hpe madi shadaw ai ni hpa akyu lu na kun? Shingran Laika hta lawm ai hkyeng ai matse labye hpe madi shadaw ai ni hpa byin mat na kun? Dai ga san ni hpe ndai sumhpa hta bawngban mat na re.

Sadi Dung Ai Ni Hpa Akyu Lu Na Kun?

4. Sumsing lamu hta, Yesu hte rau gara hpung hpe kasa Yawhan mu wa ai kun?

⁴ Yehowa a uphkang lam hpe madi shadaw nna, htani htana asak shaman chyeju lu la na hpung 2 a lam hpe kasa Yawhan shingran mu wa ai. Nambat 1 hpung hta marai 144,000 lawm ai. (Shr 7:4) Sumsing lamu hta, Yesu hte rau asuya hpawng de na matu, ginding aga kaw na lata la hkrum ai ni re. Yesu hte rau mungkan hpe uphkang na re. (Shr 5:9, 10; 14:3, 4) Sumsing lamu na Ziun Bum hta, Yesu hte rau shanhte tsap nga ai hpe shingran hta Yawhan mu wa ai.​—Shr 14:1.

5. 144,000 hta lawm ai ngam nga ai ni gaw, kade n na yang hpa ni byin wa na kun?

⁵ Kasa ni prat kaw nna dai ni aten du hkra, 144,000 hta lawm na matu masha law law lata hkrum ai. (Luk 12:32; Rom 8:17) Raitim, hpang jahtum aten laman, ginding aga kaw loi mi sha ngam na ngu Yawhan tsun ai. Dai ngam nga ai ni gaw, ru tsang kaba n hpang shi yang, Yehowa a myiman lu ai masat dingsat hku nna hpang jahtum “dazik” shakap hkrum na re. (Shr 7:2, 3; 12:17) Shanhte gaw, sadi dung let si mat ai 144,000 hta lawm ai kaga ni hte hkrum na matu, ru tsang kaba laman aten langai ngai hta, sumsing lamu de woi la hkrum na re. Dai hpang, Karai Mungdan hta Yesu hte rau uphkang na re.​—Mat 24:31; Shr 5:9, 10.

6-7. (a) Yawhan gaw gara hpung hpe naw mu ai kun? Shanhte a lam hpa chye lu ai kun? (b) Shingran Laika daw kaba 7 hpe, ngam nga ai ni hte “wunawng wuwa kaba” hpa majaw myit lawm ging ai kun?

⁶ Sumsing lamu lung na hpung hpe mu ngut ai hpang, masha “wunawng wuwa kaba” hpe Yawhan mu ai. 144,000 hte n bung ai sha, dai hpung gaw n dang hti hkra law ai. (Shr 7:9, 10) Shanhte a lam hpa chye lu ai kun? Yawhan ndai hku tsun ai: “Dai ni gaw, dai ru tsang kaba kata na hkrang pru wa nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai.” (Shr 7:14) Ru tsang kaba kaw na lawt ai hpang, dai “wunawng wuwa kaba” gaw ginding aga hta mauhpa shaman chyeju ni hkamsha lu na re.​—Shk 37:9-11, 27-29; Gsh 2:21, 22; Shr 7:16, 17.

⁷ Sumsing lamu de lung na ni raitim, ginding aga hta asak hkrung na ni raitim, Shingran Laika daw kaba 7 hta tinang mung lawm nga ai ngu shingran yu ging ai. Dai hpung 2 yan a matu grai myit kahpra hpa re. Yehowa a uphkang ai lam hpe, madi shadaw na matu lata wa ai majaw kabu na re. Ru tsang kaba hte seng ai lam Shingran Laika hta kaga hpa naw tsun da ai kun?​—Mat 24:21.

Karai Kasang Hpe Ninghkap Ai Ni Hpa Byin Mat Na Kun?

8. Ru tsang kaba gara hku hpang wa na kun? Masha law malawng gara hku bai htang na kun?

⁸ Shawng na sumhpa hta chye wa sai hte maren, kade n na yang, mungkan kaw na mungdan ni gaw, shut shai ai nawku htung yawng re ai galu kaba ai Babelon hpe gasat sana re. (Shr 17:16, 17) Dai gasat ai lam gaw, ru tsang kaba nnan hpang ai re. Dai aten hta, masha ni gaw Yehowa hpang sa wa na kun? Sa wa na n re. Shingran Laika daw kaba 6 hku nga yang, yakhkak ai dai aten hta, Yehowa hpe n nawku ai ni gaw, bum hte bung ai mungkan a mung masa lam, hpaga lam galaw ai uhpung ni kaw nna makawp maga ai lam tam na re. Karai Mungdan maga n tsap ai majaw, ninghkap ai ni hku nna, shanhte hpe Yehowa masat na re.​—Luk 11:23; Shr 6:15-17.

9. Ru tsang kaba laman, Yehowa a amyu masha gaw hpa majaw shai nga ai kun? Matut hpa byin na kun?

⁹ Yakhkak ai ru tsang kaba laman, Yehowa a sadi dung ai mayam ni gaw, kaga ni hte n bung ai sha, shai nga na re. Mungkan ntsa Yehowa hpe matut nawku nga na re. “Matse labye” hpe n madi shadaw ai gaw, ndai uhpung langai sha re. (Shr 13:14-17) Shanhte gaw, Yehowa maga de ngang ngang tsap ai majaw, Yehowa hpe gumlau ai ni grai masin pawt ma ai. Mungkan ting na Karai a amyu masha hpe, mungdan yawng hte hpawng de da ai uhpung kaba gaw gasat na re. Dai gasat ai lam hpe, Magoga mung na Goga gasat ai lam ngu Chyum Laika hta tsun da ai.​—Eze 38:14-16.

10. Shingran 19:19-21 hku nga yang, Karai a amyu masha ni gasat hkrum ai shaloi, Yehowa gara hku bai htang na kun?

¹⁰ Dai gasat ai lam hpe Yehowa gara hku bai htang na kun? “Nye a sindawng kahtet ai rawt nna, pru na ra ai” ngu tsun da ai. (Eze 38:18, 21-23) Matut hpa byin na hte seng nna, Shingran Laika daw kaba 19 hta tsun da ai. Karai a amyu masha hpe makawp maga na matu, hpyen ni hpe gasat na matu, Kasha hpe Yehowa shangun dat na re. Sadi dung ai lamu kasa ni hte 144,000 mung lawm ai “sumsing lamu na luksuk ni” gaw, Yesu hte rau gasat na re. (Shr 17:14; 19:11-15) Majan gara hku ngut mat na kun? Yehowa hpe ninghkap ai masha ni hte uhpung yawng jahten hkrum ai hku nna ngut mat na re.​—Shingran 19:19-21 hpe hti u.

Majan Ngut Ai Hpang Galaw Na Hkung Ran Poi

11. Shingran Laika a ahkyak htum mabyin gaw hpa rai kun?

¹¹ Karai a hpyen ni tsep kawp jahten hkrum ai shaloi, mungkan kaw na sadi dung ai ni asak lawt wa ai majaw, kade daram kabu nga na hpe shingran yu u. Galu kaba ai Babelon jahten hkrum ai majaw, sumsing lamu hta, ja ja kabu jahtau nga na re. Raitim, kaga kabu hpa naw nga ai. (Shr 19:1-3) Dai gaw, Shingran Laika a ahkyak htum mabyin re ai “Sagu Kasha a hkung ran ai poi” re.​—Shr 19:6-9.

12. Shingran 21:1, 2 hku nga yang, Sagu Kasha a hkung ran poi hpe gara aten hta galaw na kun?

¹² Gara aten hta hkung ran poi galaw na kun? Hara Magedon n hpang shi yang, 144,000 yawng sumsing lamu de du nga na re. Raitim, Sagu Kasha a hkung ran poi galaw na matu aten n du shi ai. (Shingran 21:1, 2 hpe hti u.) Hara Magedon majan ngut nna, Karai a hpyen ni yawng hpe yeng seng kau ngut ai hpang, Sagu Kasha a hkung ran poi galaw na re.​—Shk 45:3, 4, 13-17.

13. Sagu Kasha a hkung ran poi hta lawm ai ni a matu hpa lachyum nga ai kun?

¹³ Sagu Kasha a hkung ran poi hta lawm ai ni a matu hpa lachyum nga ai kun? Hkung ran poi gaw num hte la hpe pawng ya ai zawn, dai hkung ran poi mung, Hkawhkam Yesu hte shi a “num ningnan” 144,000 hpe pawng ya ai. Dai gaw, ginding aga hpe shaning 1,000 uphkang na asuya nnan hpe gawde ya ai ahkyak ai mabyin re.​—Shr 20:6.

Hkik Hkam Ai Mare Hte Na A Htawm Hpang Prat

14-15. Shingran Laika daw kaba 21 hta, 144,000 hpe hpa hte shingdaw da ai kun? (Makawp sumla hpe yu u.)

¹⁴ Shingran daw kaba 21 hta, 144,000 hpe grai tsawm ai mare “Yerusalem ningnan” hte shingdaw da ai. (Shr 21:2, 9) Dai mare hpe “Sagu Kasha a kasa shi lahkawng ni a amying shingteng shi lahkawng kap nga ai” npawt nhpang nlung 12 ntsa hta gawgap da ai. Yawhan hpa majaw myit lawm mat ai kun? Nlung langai a ntsa hta, shi a mying hpe mu dat ai majaw re. Dai gaw ahkaw ahkang kaba re.​—Shr 21:10-14; Ehp 2:20.

¹⁵ Ga shadawn mare gaw grai lak lai ai. Ja lam nmaw, pale mare chyinghka 12, nlung amyu myu hte galaw da ai mare bunghku ni, mare npawt nhpang ni nga ai. Shadawn shadang mung maren sha re. (Shr 21:15-21) Raitim, langai mi ra nga ai. Yawhan ndai hku tsun ai: “Dai mare kata e naw ku Htingnu ngai n mu nngai; . . . Chyahtum chyalai n-gun rawng ai Madu Karai Kasang hte Sagu Kasha gaw, dai mare a naw ku Htingnu rai nga ai. Dai mare e htoi ya na matu ajan mung, shata mung, n ra nga ai: Karai Kasang a hpung shingkang dai mare hpe jahtoi ya nna, Sagu Kasha gaw de a pyengdin rai nga ai.” (Shr 21:22, 23) Yerusalem ningnan hta lawm ai ni gaw, Yehowa hpang dingtawk pru pru shang shang galaw lu ai ahkang nga na re. (Heb 7:27; Shr 22:3, 4) Yehowa hte Yesu gaw mare a nawku htingnu nan re.

16. Karai Mungdan shaning 1,000 uphkang ai laman, masha ni hpa shaman chyeju lu na kun?

¹⁶ Dai mare a lam myit dat yang, namman chya hkam ai ni a matu myit kahpra hpa re. Ginding aga myit mada lam nga ai ni mung myit lawm ging ai. Karai Mungdan shaning 1,000 uphkang ai laman, Yerusalem mare ningnan gaw shaman chyeju law law lu la hkra galaw ya na re. “Asak hka nu” zawn, shaman chyeju ni lwi nga ai hpe Yawhan mu ai. Hka nu a hkin gau lahkawng maga hta, “asak jahkrung ai hpun” ni tu nga ai. Hpun lap ni gaw, “masha amyu ni a ana shamai shatsai na matu rai nga ai.” (Shr 22:1, 2) Masha yawng, dai hkyen lajang ya ai lam ni kaw na akyu hkamsha lu na re. Madat mara ai masha yawng, angwi ngwi hte hkum tsup wa na re. Yawn hkyen ai myiprwi ni, machyi makaw ai lam ni n nga sai.​—Shr 21:3-5.

17. Shingran 20:11-13 hku nga yang, shaning 1,000 uphkang ai lam kaw na kadai ni akyu lu la na kun?

¹⁷ Dai mauhpa hkyen lajang ai lam ni kaw na kadai ni akyu lu na kun? Shawng nnan, Hara Magedon kaw na lawt wa ai wunawng wuwa kaba hte mungkan nnan hta shangai wa na ma ni akyu lu la na re. Dai sha n-ga, si mat ai ni mung bai hkrung rawt wa na ngu Shingran daw kaba 20 hta ga sadi jaw da ai. (Shingran 20:11-13 hpe hti u.) Yehowa a lam sharin la na matu ahkang n lu wa ai “n ding n man ai ni” ni gaw, si mat wa sai sadi dung ai, “ding man ai ni” hte rau ginding aga hta asak bai hkrung wa na re. (Kas 24:15; Yhn 5:28, 29) Shaning 1,000 uphkang ai laman, masha yawng gaw ginding aga hta asak bai hkrung wa na ngu ai lachyum kun? N re. N si shi ai shaloi, Yehowa hpe nawku na matu, ahkaw ahkang lu tim, dingsang nyet kau ai ni gaw, bai hkrung rawt wa na n re. Ahkaw ahkang lu nga ninglen, Hparadisu hta asak hkrung na matu, ging dan ai lam sakse n madun wa ai majaw re.​—Mat 25:46; 2 Ht 1:10; Shr 17:8; 20:15.

Hpang Jahtum Byin Na Lam

18. Shaning 1,000 htum ai shaloi, ginding ga ntsa gara masa nga na kun?

¹⁸ Shaning 1,000 htum ai shaloi, ginding ga ntsa asak hkrung wa ai ni yawng hkum tsup wa na. Adam a yubak mara a majaw lu la wa ai n kaja ai akyu hpe, kadai mung hkamsha ra sana n re. (Rom 5:12) Adam a mara a majaw, ari jaw hkrum ai lam ni nga sana n re. Dai lam hku nna, shaning 1,000 htum ai aten hta, ginding ga ntsa hkum tsup ai masha ni hku nna asak “hkrung lu” sana re.​—Shr 20:5.

19. Hpang jahtum chyam dinglik lam hpa majaw ra ai kun?

¹⁹ Sadi n dung na matu, Satan gunglau ai shaloi Yesu nyet kau ai. Sadi dung wa ai. Chyam dinglik na matu, Satan ahkaw ahkang kalang bai lu ai shaloi, hkum tsup ai masha ni gaw Yesu zawn bai htang na kun? Langai hpra a ntsa madung ai. Shaning 1,000 htum ai aten hta, sung htum ai nhkun kata kaw na Satan lawt wa na re. (Shr 20:7) Hpang jahtum chyam dinglik lam hta, sadi dung ai ni gaw htani htana asak hte jet ai lawt lu lam lu na re. (Rom 8:20, 21) Gumlau ai ni gaw, Satan, nat ni hte rau htani htana jahten hkrum na re.​—Shr 20:8-10.

20. Shingran Laika hta lawm ai myit kahpra hpa myihtoi ga ni hte seng nna nang gara hku hkamsha ai kun?

²⁰ Shingran Laika hpe kadun dawk bawngban ngut ai hpang, nang gara hku hkamsha ai kun? Mauhpa myihtoi ga ni hta, nang lawm nga ai majaw, grai myit kahpra mat na re. Jet ai nawku dawjau lam hta, kaga ni mung shang lawm wa hkra, nang saw shaga mayu na re. (Shr 22:17) Htawm hpang mabyin ni hpe bawngban wa sai majaw, “Madu Yesu e, Yu wa rit law” ngu tsun wa ai kasa Yawhan zawn, anhte mung hkamsha na re.​—Shr 22:20.