“N-gaw Nwai Ai Tara” Shadut Ai Hpe Hkap La U

“NYE a myit hpe hkra ya dik htum gaw hpunau nauna ni a n-gaw nwai ai tsawra myit re” ngu Lisaa tsun ai. Tengman ai tara de shi hpe lau la wa ai lam shi tsun nga ai re. Nauna An mung dai hku tsun ai: “Sharin achyin ai lam hta na, n-gaw nwai ai tsawra myit a majaw re.” Ya dai nauna lahkawng yan gaw, Chyum Laika hti nna myit sawn sumru ai hpe grai ra sharawng nga sai. Raitim, n-gaw nwai ai tsawra myit gaw shan a ntsa naw shingkang ka-up nga ding yang re.

Makau grup-yin na masha ni a myit hpe hkra shangun ai tsawra myit hpe anhte gara hku madun mai na kun? Tsun ai ladat, galaw ai ladat ngu ai lam lahkawng hpe bawngban yu ga. Kadai ni hpe tsawra matsan dum myit madun ging ai hpe mung bawngban na re.

“N-gaw Nwai Ai Tara” Hku Tsun Shaga U

Ga Shagawp 31 hta tsun da ai, bungli kangka ai dinghku num a shinglet hta, “n-gaw nwai ai tara” nga ai. (Gsh 31:26) Dai “tara” gaw shi a nsen, tsun ai ga ni hta akyu shabyin ai. Kawa ni hta mung dai “tara” nga ging ai. Zai ai hku, grai mazut ai hku tsun yang, kasha ni myit hkra machyi nna, na hta n shang ai hpe kanu kawa ni sadi hkrup ai. Tsawra matsan dum myit hte tsun yang, kasha ni grau madat mayu nna, grau hkan sa mayu ai.

Kanu kawa raitim, n raitim, tsawra matsan dum ai lam hte gara hku tsun shaga lu na kun? Ga Shagawp 31:26 a shawng na daw hta “shi n-gup hpaw yang, hpaji ga pru” wa ai ngu tsun da ai. Nsen hte ga si ni hpe hpaji rawng ai hku lata nna tsun ai mung lawm ai. ‘Ngai tsun na ga gaw kaga ni hpe masin pawt shangun na kun? Masin kawp shangun na kun?’ ngu tinang hkum tinang san ai gaw akyu nga ai. (Gsh 15:1) N tsun shi yang, myit ai gaw hpaji rawng ai lam re.

“Majoi mi baw law ai ga gaw sung hkra galun ai nhtu nma zawn jahpye ya lu” ai ngu nna Ga Shagawp Laika hta tsun da ai. (Gsh 12:18, JCLB) Tinang a ga hte nsen a majaw, masha ni gara hku hkamsha na kun? ngu ai hpe myit ai gaw, tsun shaga ai ga hpe hkang na matu, grau loi shangun ai. “N-gaw nwai ai tara” gaw zai ai ga ni n tsun na matu, tsawra myit n lawm ai ga ni n tsun na matu karum ya ai. (Ehp 4:31, 32) N kaja ai myit jasat, tsun shaga ai ga ni a malai, tsawra myit rawng ai ga ni hpe alum ala hte tsun shaga u. Hkrit kajawng nga ai mayam Elia hpe shalan shabran ya ai shaloi, dai lam hte seng nna Yehowa kasi kaja madun wa ai. Yehowa a dat kasa re ai lamu kasa gaw Elia hpe “angwi sha nga ai nsen” hte ga shaga wa ai. (1 Hk 19:12) Raitim, tsawra matsan dum ai lam nga ai ngu ai gaw, ga ngwi ga pyaw tsun ai hta n-ga lawm ai. Tatut mung madun ra ai. Gara hku nna kun?

Matsan Dum Ai Myit Madun Ai Gaw Kaga Ni A Myit Hpe Shadut Ya

Tsawra myit hte tsun shaga ai, galaw ai hku nna Yehowa hpe anhte kasi la ai. (Ehp 4:32; 5:1, 2) Shawng hta tsun wa ai Lisa gaw Sakse Hkam ni tsawra myit madun ai hpe ndai hku tsun ai: “Anhte a nta masha ni akajawng sha nta htawt ra na hpe chye dat ai. Nawku hpung kaw na yan la 2 gaw bungli kaw na ahkang la nna, rai ni sa zing ya ai. Dai aten hta ngai Chyum Laika hpe pyi n hkaja shi ai.” Dai zawn, tsawra myit lawm ai lam ni a majaw, tengman lam hpe atsawm hkaja na matu Lisa dawdan dat ai.

Sumhpa shawng hta tsun wa ai An mung Sakse Hkam ni a tsawra myit hpe grai manu shadan ai. Shi ndai hku tsun ai: “Mungkan masha ni a majaw ngai hta ntsen ai myit grai nga ai. Masha hpe kam na matu yak ai. Sakse Hkam ni hte hkrum ai shaloi, ngai shanhte hpe mung n kam ai. ‘Shanhte ngai hpe hpa majaw dai daram myit lawm ai kun?’ ngu nna myit ai. Raitim, ngai hpe Chyum Laika sharin ya ai wa a myit majing hte madun ai tsawra myit a majaw ngai shi hpe kam wa ai.” Hpa akyu lu ai kun? “Hpang hta, sharin la nga ai lam hpe grau myit maju jung lu wa ai.”

Lisa hte An gaw nawku hpung hta nga ai ni a tsawra myit lawm ai galaw ai lam ni a majaw, myit hkra mat ai re. Tengman ai lam hpe grau chye mayu wa ai. Yehowa hte Shi a amyu masha ni hpe kam wa ai.

Karai A Tsawra Myit Hpe Kasi La U

Nkau gaw htunghking, shingdu labau a majaw, kaga ni hpe tsawra myit hte tsun shaga na matu, mani dan na matu n yak ai. Htunghking (sh) akyang lailen nga ai majaw tsawra myit madun chye ai majaw shakawn hpa re. Raitim, htunghking, akyang lailen nga ai majaw sha, tsawra myit madun ai nga yang gaw, Karai a tsawra myit hpe kasi la nga ai ngu n lu tsun sai.​—Kasa 28:2 hte shingdaw yu u.

Jet ai tsawra matsan dum ai myit gaw, Karai a chyoi pra ai wenyi a majaw byin wa ai atsam ningja re. (Gal 5:22, 23) Dai majaw, jet ai tsawra matsan dum ai myit madun na matu, chyoi pra ai wenyi a karum shingtau ra ai. Rai yang she, Yehowa hte Yesu hpe kasi la mayu ai myit a majaw madun ai tsawra matsan dum myit rai na re. Hkristan ni hku nna, anhte gaw kaga ni hpe myit lawm ai. Yehowa hte masha shada hpe tsawra ai myit gaw dai hku galaw na matu, shadut ya ai. Myit majing hte madun ai tsawra myit re ai majaw, atsam nga nna, Karai ra sharawng ai.

Kadai Ni Hpe Tsawra Matsan Dum Myit Madun Ging Ai Kun?

Tinang hpe tsawra ai wa, tinang chye ai wa hpe tsawra matsan dum myit madun na matu, chyeju dum myit madun na matu loi ai. (2 Sa 2:6; Kol 3:15) Raitim, langai ngai hpe tinang a tsawra myit hte n ging dan ai wa re ngu hkamsha nga yang gara hku kun?

Ndai lam hpe myit yu u: Yehowa gaw “n taw n tsang ai chyeju” (sh) grai kaba ai tsawra myit madun ai hku nna, kaja htum kasi ningli madun wa ai. Dai atsam ningja madun ai hte seng nna ahkyak ai lam hpe Chyum Laika hta ka da ai. “Chyeju kaba” “n taw n tsang ai chyeju” “chyeju” ngu ai ga si hpe Ga Shaka Ningnan hta chyahkring hkring lang da ai. Anhte hpe Karai Kasang matsan dum myit gara hku madun ai kun?

Asak hkrung na matu, ra ai lam yawng hpe hkyen lajang ya ai hku nna, shinggyim masha yawng hpe Yehowa tsawra matsan dum myit madun ai. (Mat 5:45) Masha ni shi hpe n chye shi ai aten kaw nna, tsawra myit madun wa ai. (Ehp 2:4, 5, 8) Ga shadawn, masha yawng a matu, shi a Kasha shingtai hpe jaw wa ai. “Shi a n taw n tsang ai chyeju a majaw” gawng malai jahpu hpe hkyen lajang ya wa ai ngu kasa Pawlu tsun ai. (Ehp 1:7) Dai sha n-ga, anhte mara galaw ai, Shi myit daw hkra galaw chye tim, matut lam matsun ya nna sharin achyin ya ai. “Marang” kachyi kachyi hkrat ai zawn, Karai Kasang gaw anhte hpe angwi ngwi hte matut sharin ya ai. (Trj 32:2) Karai madun ai tsawra matsan dum myit yawng a matu, chyeju bai htang yang pyi ma na n re. Yehowa sha matsan dum myit n madun yang, anhte hta htawm hpang myit mada lam nga na n re.​—1 Petru 1:13 hte shingdaw yu u.

Yehowa a matsan dum myit gaw grai ra sharawng hpa rai nna shadut ya lu ai. Dai majaw, anhte mung masha lata nna matsan dum myit madun na malai, shani shagu kaga ni hpe matsan dum myit madun ai hku nna Yehowa hpe kasi la na matu shakut ging ai. (1 Ht 5:15) Matsan dum myit ayan madun na nga yang, anhte gaw katsi ai shani hta lum hkra galaw ya ai wan hte bung na re. Nta masha ni, hpunau nauna ni, bungli manang ni, jawng manang ni, htingbu ni hpe shalan shabran ya lu na re.

Tinang a tsawra myit lawm ai ga, galaw ai lam a majaw, akyu lu na nta masha (sh) hpunau nauna ni hpe myit yu u. Nawku hpung kaw na hpunau nauna langai ngai hpe nta bungli galaw karum ya lu ai. Gat mari ya lu ai. Karum shingtau ra ai marai langai ngai hpe hkaw tsun magam hta hkrum ai shaloi, tatut karum ya lu ai.

Yehowa hpe kasi la nna, “n-gaw nwai ai tara” hku anhte tsun shaga, galaw hkawm sa mat wa ga.