Anhte Htani Htana Asak Hkrung Lu

1. Htani htana asak ngu ai Yehowa jaw ai ga sadi hpe myit sawn sumru ai gaw anhte hpe hpa akyu lu shangun ai kun?

YEHOWA gaw, Shi a ga madat ai ni “htani htana asak” lu na ngu ga sadi jaw da ai. (Rom 6:23) Yehowa jaw da ai ga sadi hpe anhte myit sawn sumru ai shaloi, shi hpe tsawra ai myit grau ngang kang wa ai. Anhte a sumsing Kawa gaw anhte hpe grai tsawra ai majaw, shi hte galoi mung jahka kau na n re.

2. Htani htana asak myit mada lam gaw anhte hpe gara hku karum ya ai kun?

² Karai Kasang jaw ai htani htana asak ga sadi gaw, anhte ya hkrum nga ai chyam dinglik lam ni hpe hkamjan lu hkra karum ya ai. Hpyen ni gaw anhte hpe sat na ngu jahkrit shama wa tim pyi, asum jaw na n re. Hpa majaw kun? Lam langai gaw, Yehowa hpe sadi dung let si mat yang, galoi mung n si lu ai myit mada lam hte bai jahkrung sharawt ya na majaw re. (Yhn 5:28, 29; 1 Ko 15:55-58; Heb 2:15) Htani htana asak hkrung na matu, mai byin ai ngu ai hpe anhte hpa majaw kam mai ai kun? Ndai lam ni hpe myit yu ga.

Yehowa Gaw Htani Htana Asak Hkrung

3. Anhte hpe htani htana asak hkrung hkra Yehowa galaw ya lu ai ngu ai hpe hpa majaw kam mai ai kun? (Shakawn 102:12, 24, 27)

³ Yehowa gaw asak Hka Hpawk rai nna htani htana asak hkrung ai majaw anhte hpe mung htani htana asak hkrung hkra galaw ya lu ai ngu ai hpe anhte chye ai. (Shk 36:9) Yehowa gaw galoi mung nga wa nna, galoi mung nga mat na ngu ai hpe sakse madun ai Chyum daw nkau hpe yu yu ga. Shakawn Kungdawn 90:2 hta Yehowa gaw “chyi nma hpri nhpra kaw nna” nga wa ai ngu tsun da ai. Shakawn Kungdawn 102 kaw mung dai zawn sha tsun da ai. (Shakawn 102: 12, 24, 27 hpe hti u.) Anhte a sumsing Kawa hte seng nna myihtoi Habaku ndai hku ka da ai: “Madu e, nang gaw moi chyaloi nhkoi prat kaw nna Karai Kasang rai nga ndai. Nang gaw nye a Karai Kasang rai nna, chyoi pra ai hte htani htana agrin nga ndai.”​—Hab 1:12, JCLB.

4. Yehowa gaw galoi mung nga wa ai ngu ai lam hpe chye na na matu yak nga yang, myit tsang ging ai kun? Sanglang dan u. 

⁴ Yehowa gaw “n htum n wai” nga nga ai ngu ai lam hpe chye na na matu yak nga ai kun? (Esa 40:28) Masha law law mung, dai hpe chye na na matu yak nga ai. Karai Kasang hte seng na Elihu ndai hku tsun ai: “Shi a asak shaning gade re ai kadai n dang gawn lu ai.” (Yob 36:26) Lama ma hpe anhte n chye na ai hte sha, dai gaw n jaw ai ngu ai lachyum n re. Ga shadawn, myihprap wan gara hku bungli galaw ai hte seng nna anhte n chye na ai majaw, dai gaw myihprap wan n nga ai ngu ai lachyum kun? Tsep kawp n re. Dai zawn sha, Yehowa gaw galoi mung nga wa ai, galoi mung nga mat na matu mai byin ai ngu ai lam hpe, shinggyim masha ni galoi mung hpring tup chye na na n re. Raitim, dai gaw Karai Kasang gaw htani htana asak n hkrung lu ai ngu ai lachyum n re. Hpan da madu hpe anhte chye na ai, n chye na ai ngu ai lam ni hte n mai masat da ai. (Rom 11:33-36) Ninggawn tawa hta jan, shata ni hte hpawn, hpa mung grai n nga shi ai aten kaw na shi nga wa ai. Yehowa gaw, “shi a n-gun atsam hte lamu hte lamu ga hpe hpan da” ai lam anhte kam ai. “Sumsing lamu” hpe n “kahpyen da” shi ai aten kaw na shi nga wa ai. (Yer 51:15; Kas 17:24) Anhte htani htana asak hkrung na matu, mai byin ai lam hpe kam shangun ai kaga lam langai gaw hpa rai kun?

Anhte Gaw Htani Htana Asak Hkrung Lu Hkra Hpan Da Hkrum

5. Shawng nnan na shinggyim masha yan la hta hpa myit mada lam nga ai kun?

⁵ Shinggyim masha hta lai nna mungkan ntsa hta nga ai kaga hkrung mahkrung ni hpe gaw angwi ngwi si wa na matu Yehowa hpan da ai. Galoi mung nsi lu ai mauhpa myit mada lam shanhte hpe jaw da ai. Raitim, Adam hpe Yehowa ndai hku sadi jaw ai: “Kaja ai hte n kaja ai hpe chye ginhka shangun ai hpun hta na chyawm gaw, nang n sha lu na ndai: . . . dai hpun hta na sha ai nhtoi hta, nang teng teng si lu na ndai.” (Nin 2:17) Adam yan Ewa Yehwoa a ga hpe madat yang, shanhte galoi si na n re. “Asak jahkrung ai hpun a asi” hpe sha na ahkang Yehowa jaw da ai hpe yu yang, dai gaw mai byin ai. Dai gaw shanhte “prat dingsa hkrung nga lu” na ngu Karai Kasang tup hkrak tsun da ai lachyum re.b​—Nin 3:22.

6-7. (a) Shinggyim masha ni hpe si na matu hpan da ai n re ai lam hpa naw madun dan ai kun? (b) Gara myit lawm ai lam hpe galaw na matu nang myit mada nga ai kun? (Sumla ni hpe yu u.)

⁶ Anhte a bawnu gaw, ya na prat laman hkaja lu ai lam hta grau nna, matsing da lu ai madi madun lam hpe hpungtang hpaji du nkau tam mu wa ai. Dai gaw grai myit lawm hpa re. anhte a bawnu gaw shaning 300 jan daram nga ai TV lamang hta lawm ai lam ni hpe matsing da lu ai ngu 2010 hta shapraw ai laika buk langai (Scientific American Mind) hta tsun da ai. Dai hta grau nna matsing da lu ai mung mai byin ai. Dai gaw asak 70, 80 sharin la lu ai hta grau nna matsing da lu hkra, anhte a bawnu hpe Yehowa hpan da ai lam madun nga ai.​—Shk 90:10.

⁷ Ngut nna, Yehowa gaw, matut asak hkrung mayu ai myit nga hkra, anhte hpe hpan da ai. “Htani htana prat dingsa nga nga na marit shangun” ai myit hte shinggyim masha ni hpe hpan da ai ngu Chyum Laika hta tsun da ai. (Hpj 3:11) Dai gaw, si hkrung si htan hpe hpyen hku na anhte mu mada ai lam langai re. (1 Ko 15:26) Lama na, anhte grai machyi sawng wa yang, dai masa lam hpe hkap la nna asum jaw kau ai kun? n re. Anhte sara wun kaw sa ai, tsi tsi ai. Asak shoihpa nga ai lam ni hpe koi lu ai daram koi ai. Anhte tsawra ai si mat ai wa gaw, asak kaba ai raitim, kaji ai raitim anhte aten na na grai yawn ai. (Yhn 11:32, 33) Anhte htani htana sharin la lu ai, htani htana asak hkrung mayu ai myit nga ai. Hpa majaw nga yang, tsawra myit rawng ai hpan da madu gaw, anhte hpe dai zawn myit nga hkra hpan da ai majaw re. Anhte hpe htani htana asak hkrung hkra, shi galaw ya lu ai gaw dan dawng nga ai. Anhte htani htana asak hkrung lu ai ngu ai hpe kam shangun ai kaga lam ni mung naw nga ai. Shi a madung yaw shada lam n galai shai mat ai ngu ai hpe sakse madun ai moi aten hte ya aten hta Yehowa galaw wa ai lam nkau hpe hkaja yu ga.

Yehowa A Yaw Shada Lam N Galai Shai

8. Esaia 55:11 gaw, anhte a matu Yehowa a yaw shada lam hte seng nna hpa sharin ya ai kun?

⁸ Adam yan Ewa mara galaw nna, shi a kashu kasha ni si hkrung si htan hkrum wa tim pyi, Yehowa gaw shi a yaw shada lam n galai shai mat ai. (Esaia 55:11 hpe hti u.) Sadi dung ai shinggyim masha ni htani htana asak hkrung na ngu ai Shi a yaw shada lam matut nga nga ai. Shi a yaw shada lam hpring tsup wa na matu, shi galaw ai, tsun ai lam ni hpe yu yang chye lu ai.

9. Karai Kasang hpa ga sadi jaw wa ai kun? (Daniela 12:2, 13)

⁹ Yehowa gaw si ai ni hpe bai jahkrung ya nna, shanhte hpe htani htana asak jaw na ngu ga sadi jaw da ai. (Kas 24:15; Tit 1:1, 2) Si ai ni hpe bai jahkrung ya na matu, Yehowa sharawng awng ai lam sadi dung ai Yoba kam wa ai. (Yob 14:14, 15) Shinggyim masha ni gaw, htani htana asak hkrung na ahkaw ahkang hte bai hkrung rawt na myit mada lam nga ai hpe myihtoi Daniela chye ai. (Shk 37:29; Daniela 12:2, 13 hpe hti u.) Yesu prat na Yuda ni mung, Yehowa gaw shi a sadi dung ai mayam ni hpe “n htum n wai asak” jaw na hpe chye ai. (Luk 10:25; 18:18) Dai ga sadi hte seng nna Yesu law law lang tsun wa nna, shi hpe mung shi Kawa jahkrung sharawt ya wa ai.​—Mat 19:29; 22:31, 32; Luk 18:30; Yhn 11:25, 26.

10. Lai wa sai aten na hkrung rawt ai lam ni gaw, hpa hpe sakse madun ai kun? (Sumla hpe yu u.)

¹⁰ Yehowa gaw asak jaw ai wa rai nna, masha ni hpe mung asak bai hkrung wa hkra galaw ya lu ai atsam nga ai. Zarephta mare na gaida jan a kasha hpe bai jahkrung sharawt ya lu ai atsam myihtoi Elia hpe shi jaw wa ai. (1 Hk 17:21-23) Bai nna, myihtoi Elisha gaw, Karai Kasang a karum shingtau lam hte Shunem num a kasha hpe bai jahkrung ya wa ai. (2 Hk 4:18-20, 34-37) Dai hte kaga hkrung rawt wa ai lam ni gaw, Yehowa hta masha ni hpe bai jahkrung ya lu ai atsam nga ai lam sakse madun nga ai. Mungkan ntsa nga ai shaloi, Kawa gaw shi hpe dai atsam jaw wa ai lam Yesu sakse madun wa ai. (Yhn 11:23-25, 43, 44) Ya Yesu gaw, sumsing lamu hta nga nna, “sumsing lamu hta e mung, ginding aga hta e mung, uphkang na ahkang nlang hte” lu da ai. Dai majaw, “lup ni hta rawng nga ai ni nlang hte” hpe, htani htana asak myit mada lam hte bai jahkrung sharawt ya na ngu ai ga sadi hpe hpring tsup hkra galaw ya na ahkang shi lu da sai.​—Mat 28:18; Yhn 5:25-29.

11. Gawng malai jahpu gaw, gara hku nna htani htana asak hkrung lu na matu mai byin shangun ai kun?

¹¹ Yehowa gaw, shi grai tsawra ai kasha hpe nni nkri hkrum nna si na ahkang hpa majaw jaw wa ai kun? “Karai Kasang a Kasha hpe kam sham ai ni nlang hte gaw, hten bya n hkrum ai sha, htani htana asak lu la mu ga nga, Karai Kasang gaw shi a Kasha shingtai hpe jaw kau ai kaw du hkra, mungkan ga hpe tsaw ra wu ai” ngu Yesu tsun wa ai shaloi, dai ga san a mahtai hpe chye lu ai. (Yhn 3:16) Anhte a mara hpe magap kau ya na matu, shi a kasha hpe gawng malai hkungga jaw kau ai hku nna, anhte htani htana asak lu hkra, Karai Kasang galaw ya wa ai. (Mat 20:28) Kasa Pawlu gaw, Karai a yaw shada lam hte seng nna ahkyak ai daw hpe sanglang dan na matu, ndai hku ka wa ai: “Masha a jaw e si hkrung si htan byin wa ai zawn, masha a jaw e mung si mat ai ni matu bai hkrung rawt wa na lam tai wa sai. Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung wa na ma ra ai.”​—1 Ko 15:21, 22.

12. Mungdan gaw anhte hte seng ai Yehowa a yaw shada lam hpring tsup wa hkra, gara hku karum ya na kun?

¹² Karai a Mungdan du wa na matu hte Karai a myit ra ai lam mungkan ga ntsa byin wa na matu, akyu hpyi na matu shi hpang hkan ai ni hpe Yesu sharin ya wa ai. (Mat 6:9, 10) Karai a yaw shada lam kaw na daw langai gaw, mungkan ntsa shinggyim masha ni htani htana asak hkrung na matu re. Dai lam hpring tsup wa na matu, Yehowa gaw shi Kasha hpe Meshia Mungdan a Hkawhkam hku nna aya tang da ai. Karai a myit ra ai lam hpring tsup wa hkra, Yesu hte arau galaw na matu mungkan ntsa na masha 144,000 hpe Karai Kasang kahkyin da ai.​—Shr 5:9, 10.

13. Ya Yehowa hpa galaw nga ai kun? Dai hta nang gara hku shang lawm nga ai kun?

¹³ Yehowa gaw ya kawn na masha “wunawng wuwa kaba” hpe kahkyin la nna, Shi a Mung masha ni hku nna nga lu hkra, shaman shakyang ya nga ai. (Shr 7:9, 10; Yak 2:8) Dai ni aten, mungkan masha ni gaw, nju n dawng ai lam, majan ni a majaw, dum bru dum bra byin nga tim, masha wunawng wuwa chyawm gaw, amyu, mungdan, shada da nju n dawng ai lam ni hpe, ninghkap lu na matu shakut nga ma ai. Shanhte a nga sat nga sa ni hku nna, shanhte a nhtu ni hpe na jawn ni hku nna dup kau ai lam madun nga ma ai. (Mik 4:3) Masha law law hpe si shangun ai majan ni hta shang lawm na malai, Karai Kasang hte shi a yaw shada lam ni hte seng nna masha ni hpe sharin ya ai hku nna, “asak majing” hpe tam mu hkra masha ni hpe karum ya nga ai. (1 Tm 6:19) Karai a Mungdan hpe madi shadaw ai majaw, nta masha ni ninghkap tim, ja gumhpraw sum mat tim, shanhte ra ai lam ni hpe Yehowa madi shadaw ya ai. (Mat 6:25, 30-33; Luk 18:29, 30) Dai lam ni a majaw, Karai a Mungdan gaw gaja wa nga nna, Yehowa gaw shi a yaw shada lam hpring tsup wa hkra galaw ya na ngu ai hpe anhte hpe kam shangun ai.

Shawng Hta Nga Ai Ngwi Pyaw Ai Prat

14-15. Si hkrung si htan hpe htani htana shamyit kau na ngu ai Yehowa a ga sadi, hpang jahtum hta gara hku hpring tsup wa na kun?

¹⁴ Yesu gaw, ya sumsing lamu hta Karai Mungdan a Hkawhkam rai nna, Yehowa a ga yawng hpring tsup wa hkra, shi galaw ya na re. (2 Ko 1:20) 1914 kaw nna, Yesu gaw shi a hpyen ni hpe awng dang wa sai. (Shk 110:1, 2) Yesu hte shi hte rau uphkang na ni gaw, kade n na yang, n kaja ai lam hpe jahten kau nna, tsep kawp awng padang hkam na re.​—Shr 6:2.

¹⁵ Yesu Shaning Hkying Mi Uphkang ai laman, shi gaw si ai ni hpe bai jahkrung ya nna, Yehowa hpe madat mara ai ni bai hkum tsup wa hkra karum ya na re. Hpang jahtum chyam dinglik ngut ai hpang, dinghpring ai ngu Yehowa masat ai ni gaw, “mungdan hpe madu lu nna, Dai hta e nan nawng e nga nga lu na” re. (Shk 37:10, 11, 29) Kabu hpa gaw, “hpang chyahtum na hpyen wa ngu ai, si hkrung si htan gaw, yeng kau ai hkrum na” re.​—1 Ko 15:26.

16. Yehowa a magam gun na matu shadut ya ai madung lam gaw hpa rai ging ai kun?

¹⁶ Anhte bawngban wa sai hte maren, htani htana asak hkrung na ngu ai anhte a myit mada lam gaw, Chyum Laika hta tup hkrak madung tawn ai. Dai myit mada lam gaw, ndai yak la ai hpang jahtum nhtoi ni laman, matut sadi dung lu hkra karum ya ai. Raitim, Yehowa myit pyaw na matu, asak hkrung mayu ai myit nga ai hta n ga, kaga shadut ya ai lam mung naw nga ra ai. Yehowa hte Yesu ntsa anhte sadi dung ai a madung lam gaw, shanhte hpe grai tsawra ai majaw re. (2 Ko 5:14, 15) Dai tsawra myit gaw, shanhte hpe kasi la na matu, anhte a myit mada lam hpe kaga ni hpe tsun dan na matu shadut ya ai. (Rom 10:13-15) Anhte gaw tingkyeng myit n rawng ai ni, gam jaw gam ya chye ai ni byin hkra galaw na nga yang, Yehowa htani htana jinghku byin mayu ai ni byin wa na re.​—Heb 13:16.

17. Anhte langai hpra hpa galaw ra na lit nga ai kun? (Mahte 7:13, 14)

¹⁷ Htani htana asak lu ai ni hta anhte lawm na kun? Dai ahkaw ahkang Yehowa anhte hpe jaw da ai. Ya aten hta, asak lu shangun ai lam ntsa hta nga na matu lata ra ai. (Mahte 7:13, 14 hpe hti u.) Htani htana asak hkrung ai shaloi, anhte a prat gaw gara hku byin nga na kun? Dai ga san a mahtai hpe hpang na sumhpa hta bawngban mat na re.