‘Yehowa A Myihprap N-gun’ Matut Tu Nga U

1. Jet ai tsawra myit hpe Chyum Laika hta gara hku tsun da ai kun?

TSAWRA myit a “n-gun gaw wan n-gun hte, Yehowa kaw na myihprap n-gun rai nga ai. Hka law law sumtsaw sumra hpe n sat kau lu ai, Hka hpungla ni pyi, dai hpe n lim kau lu ai.”b (Smg 8:6, 7) Jet ai tsawra myit hpe grai tsawm htap ai hku hkrang shapraw da ai. Dai ga ni gaw dinghku num la ni hpe grai n-gun jaw ya lu ai. Shada da ngang grin ai tsawra myit madun lu ai.

2. Yan la ni gaw tsawra myit n yawm mat na matu hpa galaw ra ai kun?

² Yan la ni gaw tsawra myit matut ngang grin na matu shakut ra ai. Ga shadawn, marai langai ngai gaw wan mang hta hpun ayan bang yang she, wan matut grung nga lu ai. Dai hku n galaw yang, angwi ngwi wan si mat na re. Dai hte maren, yan la ni a lapran na makyit sumri ngang kang yang she, tsawra myit mung grin nga lu na re. Kalang lang, ja gumhpraw mayak mahkak, hkamja lam manghkang, kashu kasha bau maka ai zawn re ai lam ni a majaw, yan la ni gaw tsawra myit yawm wa sai ngu hkamsha chye ai. Dai majaw, nang gaw dinghku hte rai yang, na a dinghku hta “Yehowa kaw na myihprap n-gun” matut tu nga na matu gara hku galaw lu ai kun? Ndai sumhpa hta, dinghku makyit sumri matut ngang grin lu na, dinghku ngwi pyaw lu na lam 3 hpe bawngban mat na re.c

Yehowa Hte Hku Hkau Lam Matut Ngang Kang Nga U

3. Yehowa hte hku hkau lam ngang kang ai gaw, yan la ni a tsawra myit matut ngang grin na matu gara hku karum ya ai kun? (Hpaji 4:12) (Sumla hpe mung yu u.)

³ “Yehowa kaw na myihprap n-gun” matut tu nga na matu, yan la ni gaw Yehowa hte hku hkau lam ngang kang ra ai. Dai hku hkau lam gaw dinghku hpe gara hku karum ya ai kun? Yan la ni gaw, Sumsing Kawa hte shan a hku hkau lam hpe manu shadan yang, Shi a hpaji jaw ga hpe hkan sa na matu, jin jin rai nga na re. Rai yang, shada da a tsawra myit yawm mat shangun na manghkang ni hpe koi lu, tawt lai lu na re. (Hpaji 4:12 hpe hti u.) Wenyi lam kaja ai ni gaw, myit galu ai, matsan dum ai, mara raw ya ai zawn re ai Yehowa a atsam ningja ni hpe shalat la na matu, tatut madun na matu shakut na re. (Ehp 4:32–5:1) Dai zawn atsam ningja ni hpe madun yang, shada da a tsawra myit law htam wa na re. Dinghku de ai 25 ning jan sai, nauna Lena ndai hku tsun ai: “Wenyi lam kaja ai wa hpe tsawra ai lam, hkungga ai lam madun na matu grau loi ai.”

4. Meshia a kanu kawa byin na matu, Yosep yan Mari hpe Yehowa hpa majaw lata ai kun?

⁴ Chyum Laika ga shadawn langai hpe yu yu ga. Meshia a kanu kawa byin na matu, yan la langai hpe Yehowa lata ai shaloi, Dawi a aru arat law law nga ai kaw nna, Yosep yan Mari hpe lata ai. Hpa majaw kun? Shan gaw, Yehowa hte hku hkau lam ngang kang ai. Shan a dinghku hta Shi hpe shawng tawn na hpe chye ai. Yan la ni gaw Yosep yan Mari kaw nna hpa sharin la mai ai kun?

5. Madu wa ni gaw Yosep kaw na hpa sharin la mai ai kun?

⁵ Yosep gaw, Yehowa a lam matsun hpe tatut hkan sa ai majaw, kaja ai madu wa byin nga ai re. Yawm htum masa lam 3 hta, shi a dinghku hte seng nna Karai a lam matsun hpe lu la ai. Masa lam langai hpra hta, shi a matu grai yak ai raitim, kalang ta hkan sa wa ai. (Mat 1:20, 24; 2:13-15, 19-21) Yosep gaw Karai a lam matsun hte maren Mari hpe makawp maga ya ai, madi shadaw ya ai, lanu lahku ya ai. Yosep hpe yu nna Mari grai tsawra nna hkungga na re. Madu wa ni, dinghku hpe lanu lahku na matu Chyum Laika hpaji jaw ga ni hpe tam ai hku nna, Yosep hpe kasi la u.d Yak ai lam ni nga tim, dai hpaji jaw ga ni hpe hkan sa ai gaw, madu jan hpe tsawra ai lam madun ai rai nna, dinghku makyit sumri mung grau ngang kang wa na re. Dinghku de ai 20 ning jan sai, Banwatu mungdan kaw na nauna langai ndai hku tsun ai: “Nye a madu wa gaw Yehowa a lam matsun hpe tam ai, hkan sa ai shaloi shi hpe ngai grau hkungga ai. Shimlum ai, shi a dawdan lam ni hpe kam mai ai ngu hkamsha ai.”

6. Mari kaw na madu jan ni hpa sharin la mai ai kun?

⁶ Mari gaw Yehowa hte hku hkau lam kaja ai. Makam masham ngang kang hkra shi nan galaw ai. Chyum Laika hpe atsawm chye ai. Myit sawn sumru na matu aten masat da ai. (Luk 2:19, 51) Mari gaw wenyi lam kaja ai majaw, grai ram ai dinghku num rai na hpe kam mai ai. Dai ni aten hta mung, dinghku num law law gaw Mari zawn shakut nga ai. Ga shadawn, nauna Emiko ndai hku tsun ai: “Dinghku n de shi yang, tinang hkrai hkaja ai lam galaw ai. Raitim, dinghku de ngut ai hpang nye madu wa gaw anhte a matu akyu hpyi ya ai, nawku ai lamang ni hpe woi awn ya ai majaw, nye a makam masham gaw shi galaw ai lam ni hta madung tawn wa ai hpe ngai chye dat ai. Yehowa hte nye a hku hkau lam kaja hkra, ngai nan galaw ra ai hpe chye wa ai. Dai majaw, ya nga yang langai hkrai akyu hpyi na matu, Chyum Laika hti na matu, myit sawn sumru na matu aten masat da ai.” (Gal 6:5) Madu jan gaw Yehowa hte hku hkau lam matut ngang kang yang, madu wa gaw grau tsawra nna, shakawn na lam ni grau law wa na re.—Gsh 31:30.

7. Nawku daw jau ai lam hpe rau galaw ai hte seng nna Yosep yan Mari kaw na yan la ni hpa sharin la lu ai kun?

⁷ Yosep yan Mari gaw, Yehowa hte hku hkau lam ngang kang na matu rau shakut ai. Yehowa hpe dinghku nawng rau nawku ai gaw, grai ahkyak ai hpe shan chye na ai. (Luk 2:22-24, 41; 4:16) Laksan hku nna, dinghku kaba ai majaw, dai hku galaw na matu yak chye ai. Raitim, shan galaw lu wa ai. Dai ni aten na yan la ni a matu grai kaja ai kasi ningli re. Ma nga ai yan la ni gaw, Yosep yan Mari zawn nawku zuphpawng ni lung na matu, dinghku nawku hpe chyarang hte maren galaw na matu yak chye ai. Marai lahkawng hkrai aten la nna, hkaja na matu, akyu hpyi na matu grau yak chye ai. Raitim, Yehowa hpe rau nawku ai shaloi Shi hte mung, shada da mung grau ni htep wa lu ai. Dai majaw, nawku dawjau lam hpe shawng tawn u.

8. Dinghku hta manghkang byin nga yang, dinghku nawku kaw na grau akyu lu hkra hpa galaw ra ai kun?

⁸ Dinghku hta manghkang byin nga yang gaw gara hku kun? Rau dung nna dinghku nawku pyi galaw kam sana n re. Rai yang, bawngban na matu lahkawng yan myit hkrum ai lam lama ma hpe myit nna, kadun ai hku pyaw hpa lam byin hkra, dinghku nawku hpe galaw hpang u. Dai gaw shada da grau tsawra wa na matu, Yehowa hpe rau nawku mayu ai myit nga wa na matu karum ya lu ai.

Aten Rau Jahtum U

9. Yan la ni gaw hpa majaw aten rau jahtum ra ai kun?

⁹ Yan la ni gaw aten hpe rau jahtum yang, tsawra myit matut nga na matu karum ya lu ai. Shada da a hkamsha lam, myit ai lam hpe grau chye na hkra karum ya lu ai. (Nin 2:24) Lai wa sai 15 ning jan hta hkungran da ai Liliya yan Rasalan gaw, dinghku de nna kade n na yang dai lam hpe chye wa ai. Nauna ndai hku tsun ai: “An gaw shadu da ai daram, aten rau n jahtum wa ai hpe chye wa ai. Kan bau bungli, nta bungli hte ma ni hte sha aten htum nga ai. An hkrai aten n jahtum ai majaw, shada da tsan wa ai hpe chye wa ai.”

10. Ehpesu 5:15, 16 hta lawm ai npawt tara hpe yan la ni gara hku hkan sa mai ai kun?

¹⁰ Yan la ni aten rau jahtum lu hkra hpa galaw mai ai kun? Shada da aten jaw lu hkra, chyarang galaw nna aten masat da mai ai. (Ehpesu 5:15, 16 hpe hti u.) Naijiriya mungdan kaw na hpunau Uzondu ndai hku tsun ai: “Galaw ra na ni hte seng nna chyarang galaw ai shaloi, an aten rau jahtum na matu mung shalawm ai. Dai aten hpe ngai ahkyak shatai ai.” (Hpl 1:9) Modoba mungdan kaw na ninghtawn hpung kawan a madu jan, Anastasiya ndai hku tsun ai: “Nye madu wa magam lit ni hte bungli kyin nga ai aten, ngai maga na galaw ra ai ni hpe galaw magang ai. Dai majaw, bungli ngut ai hpang aten rau jahtum lu ai.” Raitim, shada da aten rau jahtum na matu yak nga yang gara hku kun?

11. Akula yan Priskila gaw gara bungli ni hpe rau galaw wa ai kun?

¹¹ Tsaban langai na Hkristan ni hkungga ai Akula yan Priskila a kasi ningli kaw na yan la ni sharin la mai ai. (Rom 16:3, 4) Chyum Laika hta shan a dinghku lam hpe ahkri ahkrai n tsun da tim, shan a arau bungli galaw ai lam, hkaw tsun ai lam, kaga ni hpe karum ya ai lam ni hpe gaw tsun da ai. (Kas 18:2, 3, 24-26) Chyum Laika hta shan a lam hpe, galoi mung rau ginrun nna sha tsun ai.

12. Yan la ni aten grau jahtum lu hkra hpa galaw mai ai kun? (Sumla hpe mung yu u.)

¹² Yan la ni gaw Akula yan Priskila a kasi ningli hpe gara hku hkan sa mai ai kun? Marai lahkawng rau galaw ra ai lam law law hpe myit yu u. Dai bungli nkau hpe langai hkrai galaw na malai rau galaw lu na kun? Ga shadawn, Akula yan Priskila gaw rau hkaw tsun ai. Dai zawn ayan galaw lu na matu lajang da mai na kun? Akula yan Priskila gaw bungli mung rau galaw ai. Nan gaw bungli bung yang she bung na. Raitim, nta bungli ni hpe rau galaw mai na kun? (Hpj 4:9) Bungli langai hpe rau jawm galaw ai shaloi, hpung langai zawn grau hkamsha lu wa nna, ga mung grau shaga lu wa na re. Hpunau Robat yan nauna Linda gaw hkungran ai 50 ning jan sai. Hpunau ndai hku tsun ai: “Rau ban sa na matu an hta aten law law n nga ai. Raitim, di hkawan ni hpe ngai kashin ai shaloi, nye madu jan gaw katsut ya ai. Nta na nampan sun kaw bungli galaw ai aten ni hta, shi sa karum ya yang ngai grai pyaw ai. Bungli rau galaw ai shaloi an grau ni htep wa ai. Grau tsawra wa ai.”

13. Kahkyin gumdin lam nga na matu yan la ni hpa galaw ging ai kun?

¹³ Raitim, rau nga ai daram hte sha shada grau ni htep wa na ngu tsun mayu ai n re. Brazi mungdan kaw na dinghku num langai ndai hku tsun ai: “Dai ni aten na masha ni hta myit bra na lam grai law ai. Shara mi hta rau nga ai daram hte sha, shada da aten jaw nga sai ngu shadu na matu grai loi ai. Raitim, ningrum ningtau a makau hta nga nga ai daram hte sha n ngut shi ai. Myit mung du ra ai hpe ngai chye wa ai.” Hpunau Bruno hte madu jan Te gaw, shada da myit maju jung na matu hpa galaw ai hpe yu yu u. “An rau nga taw ai aten ni hta, phone ni hpe tsan tsan de tawn da ai. Dai aten gaw marai lahkawng sha nga ai mungkan zawn re” ngu Bruno tsun ai.

14. Aten rau jahtum na matu myit n lawm ai yan la ni rai yang, hpa galaw mai ai kun?

¹⁴ Aten rau jahtum na matu myit n lawm ai rai yang gara hku kun? Ra sharawng ai lam n bung ai (sh) shada da magyep n kap ai mung rai chye ai. Hpa galaw mai ai kun? Wan mang ga shadawn hpe bai myit yu u. Wan nnan chyi wa ai shaloi, wan nsa nau n kaba shi ai. Wan grung wa na matu hpun matut bang ra ai. Dai hte maren, shani shagu aten loi mi daram rau jahtum ai hku nna hpang mai ai. Lahkawng yan pyaw lu ai lam, manghkang n byin na lam hpe galaw na matu gaw ahkyak ai. (Yak 3:18) Kaji kajaw lam galaw ai daram hte sha pyi, shada da tsawra ai myit jat wa shangun lu ai.

Shada Da Hkungga Ai Lam Madun U

15. Yan la ni shada da tsawra ai myit nga na matu, hkungga ai lam gaw hpa majaw grai ahkyak ai kun?

¹⁵ Hkungga ai lam gaw dinghku hta grai ahkyak ai. Dai gaw, wan hpe grai shagrung ya lu ai Oksijin hte bung ai. Oksijin n nga yang, wan alawan si mat na re. Dai hte maren, hkungga ai lam n nga yang, yan la ni a tsawra myit gaw alawan kawp mat chye ai. Lam mi hku tsun yang, shada da hkungga ai lam madun yang, shada da matut tsawra lu ai. Raitim, hkungga ai lam madun sai ngu nang myit la ai daram hte sha n mai ai. Hkungga hkrum ai ngu lahkawng yan hkamsha ra ai hpe dum ra ai. Hpunau Penni hte madu jan Aret gaw dinghku de ai 25 ning jan sai. “An shada da hkungga ai lam madun ai majaw, nta gaw tsawra myit hte hpring nga ai. Langai a ningmu hpe langai manu shadan ai hpe chye ai majaw, lam shagu hpe asan sha tsun dan gwi ai” ngu Penni tsun ai. Dai majaw, gaja wa hkungga ai ngu ningrum ningtau hkamsha lu hkra hpa galaw mai ai kun? Abraham yan Sara a kasi hpe myit yu ga.

16. Abraham kaw na madu wa ni hpa sharin la mai ai kun? (1 Petru 3:7) (Sumla hpe mung yu u.)

¹⁶ Abraham gaw Sara hpe hkungga ai lam madun ai. Sara a ningmu hpe myit shalawm ya ai, hkamsha lam ni hpe ahkyak shatai ya ai. Kalang mi hta, Sara grai yawn wa ai. Shi myit n dik ai lam ni tsun dan nna, Abraham hpe mara shagun ai. Abraham masin pawt nna tsawra myit n lawm ai hku bai tsun dat ai kun? N tsun ai. Sara gaw lata npu taw ai, madi shadaw ya chye ai madu jan re ai hpe Abraham chye ai. Sara tsun ai hpe madat ya nna manghkang hpe hparan wa ai. (Nin 16:5, 6) Hpa sharin la lu ai kun? Madu wa ni hta, dinghku a matu dawdan na ahkang nga ai. (1 Ko 11:3) Raitim, n dawdan shi yang, madu jan a ningmu hpe myit shalawm ai gaw tsawra myit madun ai re. Laksan hku nna, madu jan hpe hkra machyi shangun na zawn re ai dawdan lam ni hta re. (1 Ko 13:4, 5) Kalang lang, na a madu jan gaw myit pu ba nga chye ai. Shi a hkamsha lam hpe tsun dan mayu na re. Dai shaloi, atsawm madat ya ai hku nna, shi a hkamsha lam hpe manu shadan ai lam madun u. (1 Petru 3:7 hpe hti u.) Nauna Enjela yan hpunau Dimitri gaw, dinghku de ai 30 ning daram na sai. Shi hkungga hkrum ai ngu hkamsha lu hkra, madu wa gara hku galaw ai hpe ndai hku tsun dan ai: “Ngai myit daw ai shaloi, ga shaga mayu ai shaloi, Dimitri gaw madat ya na matu galoi mung jin jin re. Nye a hkamsha lam hpe si mani ai hku n tsun dan lu ai aten ni hta pyi, shi ngai hpe myit galu ai.”

17. Sara a kasi ningli kaw na madu jan ni hpa sharin la mai ai kun? (1 Petru 3:5, 6)

¹⁷ Sara gaw Abraham a dawdan lam ni hpe madi shadaw ai hku nna hkungga ai lam madun ai. (Nin 12:5) Masa langai hta, n myit mada ai sha du wa ai manam ni hpe manam daw na matu Abraham dawdan wa ai. Galaw nga ai bungli hpe jahkring da nna, muk law law galaw ya na matu Sara hpe tsun ai. (Nin 18:6) Abraham a dawdan lam hpe Sara madi shadaw ya ai, alawan galaw ai. Madu wa a dawdan lam ni hpe madi shadaw ai hku nna, Sara hpe madu jan ni kasi la mai ai. Rai yang, na a dinghku ngang grin na re. (1 Petru 3:5, 6 hpe hti u.) Shawng na laika pang hta tsun wa sai Dimitri gaw, shi hkungga hkrum ai ngu hkamsha hkra madu jan gara hku galaw ai hpe ndai hku tsun dan ai: “Enjela gaw nye a dawdan lam ni hpe myit n hkrum tim pyi, madi shadaw na matu shakut ya ai majaw, shi hpe ngai chyeju dum ai. Lu la ai akyu ni nau n kaja tim, shi ngai hpe mara n shagun ai.” Nang hpe hkungga ai wa hpe tsawra na matu grau loi ai n re i?

18. Yan la shada tsawra myit matut nga hkra shakut yang gara hku akyu lu ai kun?

¹⁸ Hkristan dinghku hta nga ai tsawra myit kawp mat hkra Satan galaw mayu ai. Yan la ni shada da tsawra myit kawp mat yang, Yehowa hte tsan gang mat chye ai hpe shi chye ai. Raitim, jet ai tsawra myit gaw kawp mat lu na n re. Dai majaw, na a dinghku hta Shawlumon A Mahkawn ga hta hkrang shapraw da ai tsawra myit zawn byin u ga. Na a dinghku hta Yehowa hpe shawng tawn na matu, shada da aten jaw na matu, langai hpra a hkamsha lam hte ra rawng ai lam ni hpe myit ya na matu dawdan da u. Rai yang, jet ai tsawra myit a Npawt Yehowa hpe shagrau lu nna, wan hpe shagrung da ai zawn, na a tsawra myit mung asak hkrung nga dingsa grin nga na re.