Laika Hti Ai Ni Hpang De Na Ga San

2020, June, Sin Langchyi hta lawm ai “Na A Amying Nsang Chyoi Pra Nga Lit Ga” ngu ai sumhpa gaw, Yehowa a mying hte shi a awm dawm ahkang hte seng ai lam hpe gara hku sanglang dan wa ai kun?

Dai sumhpa hta, lamu kasa ni hte shinggyim masha ni hkrum nga ai ahkyak ai lam langai nga ai hpe anhte chye wa sai. Dai gaw, Yehowa a grau htum ai mying chyoi pra san seng ai hte seng ai lam re. Dai hta, Yehowa a uphkang ai lam gaw kaja htum re ai lam, shinggyim masha ni sadi dung ra ai lam ni lawm ai.

Yehowa a mying hte dai hpe chyoi pra hkra galaw ai lam gaw, ahkyak htum lam re ai ngu anhte hpa majaw tsun nga ai kun? Lam 3 hpe yu yu ga.

Langai, Edin sun hta Yehowa a mying hpe Satan gasat wa ai. Yehowa gaw gam jaw gam ya n kam ai Karai, Adam yan Ewa hpe ladu lai tara ni jahkrat ai Karai ngu lachyum nga ai ga san Ewa hpe Satan san wa ai. Yehowa tsun wa ai ga hpe Satan nhtang hku tsun wa ai. Karai Kasang gaw masu ai wa re ngu nna mung tsun ai. Dai hku nna, Yehowa a mying hpe sari jahpoi wa ai. Shi gaw “Sari Jahpoi Ai Wa” ngu lachyum nga ai “gumlau nat” byin wa ai. (Yhn 8:44) Satan a ga Ewa madat wa ai majaw, Karai a ga n madat wa ai. Karai a awm dawm ahkang hpe mung ninghkap wa ai. (Nin 3:1-6) Dai ni aten hta mung, Satan gaw Karai a mying hpe sari jahpoi nga ai, Yehowa hte seng nna masu ga ni chyam bra hkra galaw nga ai. Masu ga hpe kam ai ni gaw Yehowa a ga n madat ma ai. Dai majaw, Yehowa a chyoi pra ai mying sari jahpoi hkrum ai gaw, Karai a masha ni a matu grai sawng ai n tara ai lam re. Mungkan hta yakhkak ai lam ni, nhkru ai lam ni byin nga ai a npawt re.

Lahkawng, hpan da hkrum ai ni yawng akyu lu na matu, Yehowa gaw shi a mying chyoi pra san seng hkra galaw na, shi a mying hpe sari jahpoi ai lam yawng hpe yeng seng kau na re. Dai gaw Yehowa a matu ahkyak htum re. Shi ndai hku tsun ai: “Nye a galu kaba ai mying hpe ngai shagrau shaa [shachyoi shapra, NWT] na nngai.” (Eze 36:23) Yehowa a sadi dung ai mayam yawng akyu hpyi ai shaloi: “Na a amying nsang chyoi pra nga lit ga” ngu ahkyak shatai nna hpyi ra ai lam, Yesu asan sha tsun wa ai. (Mat 6:9) Dai hta n-ga, Yehowa a mying hpe shagrau na matu ahkyak ai lam, Chyum Laika hta kahtap htap tsun da ai. Ga shadawn nkau mi hpe yu yu ga: “Yehowa a hpung shingkang hte hpring ai mying ningsang hpe shagrau shaa mu.” (1 Hl 16:29; Shk 96:8, NWT) “Shi mying a hpung shingkang hpe mahkawn mu.” (Shk 66:2) “Tut nawng e, na a amying hpe shagrau na nngai.” (Shk 86:12) Yerusalem na nawku htingnu hta, “Wa e, na a mying ningsang hpe sha shagrau u” ngu Yesu tsun ai shaloi: “Ngai shagrau se ai, bai naw shagrau na we ai” ngu sumsing lamu kaw na Yehowa bai htai ai.—Yhn 12:28.a

Masum, Yehowa a yaw shada ai lam gaw mying ningsang hte matut mahkai nga ai. Hkristu Shaning Hkying Mi Uphkang ngut nna, hpang jahtum chyam dinglik hkrum ngut ai hpang, matut hpa naw byin na kun? Yehowa a mying hte seng nna, lamu kasa ni hte shinggyim masha ni gara hku hkamsha na kun? Mahtai chye na matu, shinggyim masha ni a sadi dung ai lam hte ninggawn tawa awm dawm ahkang hte seng ai ahkyak ai lam 2 hpe hkaja yu ga. Dai aten hta, shinggyim masha ni sadi dung ai lam sakse naw madun ra na kun? N ra sai. Yawng hkum tsup nga sai. Tsep kawp chyam dinglik hkrum ngut sai. Htani htana asak lu sana re. Karai a uphkang ai ladat gaw kaja htum re ai hpe sakse naw madun ra na kun? N ra sai. Kaja htum re ai hpe chye ai majaw, Karai a uphkang ai lam hpe, lamu kasa ni mung shinggyim masha ni mung kahkyin gumdin let npu taw nga sai. Yehowa a mying hte seng nna gaw gara hku kun?

Hpang jahtum chyam dinglik ai lam ngut ai hpang, Yehowa a mying sari jahpoi ai lam n nga sai, tsep kawp san seng chyoi pra mat sai. Raitim, sumsing lamu hte ginding aga ntsa na shi a mayam yawng a matu, Yehowa a mying gaw ahkyak htum naw byin nga na re. Hpa majaw kun? Yehowa matut galaw na mauhpa lam ni hpe naw mu lu na majaw re. Myit yu u, Yesu gaw uphkang lu ai ahkang aya yawng hpe Yehowa kaw shagrit shanem let ap ya na re. Dai shaloi, Karai Kasang gaw, “yawng mayawng hta e baw sumhpa tai na” re. (1 Ko 15:28) Dai hpang, masha yawng “Karai Kasang a kashu kasha ni a pru lawt wa ngu ai hpung shingkang” hpe hkamsha lu na re. (Rom 8:21) Yehowa gaw, sumsing lamu hte ginding aga hta nga ai shi a kasha yawng hpe, kahkyin gumdin ai dinghku langai byin hkra galaw nna, shi a yaw shada lam hpe hpring tsup hkra galaw na re.—Ehp 1:10.

Dai ni hpe mu ai shaloi, sumsing lamu hte ginding aga hta nga ai, Yehowa a nta masha ni gara hku hkamsha na kun? Yehowa a mying hpe myit rawt let shakawn shagrau mayu nga na re. “Yehowa Karai Kasang gaw, a nga u ga . . . Shi a dan hkung nga ai amying nsang prat dingsa e, a nga u ga” ngu shakawn kungdawn sara Dawi ka wa ai. (Shk 72:18, 19) Dai zawn shakawn shagrau lu ai lam nnan ni, htani htana prat dingsa nga nga na re.

Yehowa a mying hpe na dat ai hte Yehowa hte seng ai lam yawng hpe myit hkrup ai. Madung hku na, shi a tsawra myit a lam hpe myit hkrup ai. (1 Yh 4:8) Tsawra myit a majaw Karai Kasang anhte hpe hpan da ai, gawng malai jahpu lajang ya ai, Karai a uphkang ai ladat gaw ding hpring ai ngu ai hpe sakse madun wa ai. Dai zawn tsawra myit hte galaw ai lam ni hpe, anhte galoi mung dum nga na re. Karai a tsawra myit hpe htani htana matut hkamsha mat na re. Htani htana prat dingsa sumsing kawa hte grau hku hkau wa na re. Karai Wa a grau htum ai mying hpe shakawn shagrau lu na re.—Shk 73:28.