Shada Da Tsawra Nga Mu

1-2. (a) Tsawra ai myit gaw “grau kaba ai” ngu kasa Pawlu hpa majaw tsun ai kun? (b) Gara ga san ni hpe bawngban na kun?

MAKAM masham, myit mada lam, tsawra myit ngu ai atsam ningja 3 hta, “grau kaba ai [atsam ningja] gaw tsaw ra ai myit rai nga ai” ngu kasa Pawlu tsun ai. (1 Ko 13:13) Hpa majaw kun? Myit mada nga ai mungkan nnan ga sadi ni hpring tsup mat ai shaloi, myit mada shara, kam shara n nga sai. Yehowa hte shada da hpe gaw, galoi mung tsawra nga ra na. Tsawra myit atsam ningja gaw, prat tup a matu re.

² Galoi mung tsawra nga ra ai majaw, ga san 3 hpe bawngban yu ga. Langai, hpa majaw shada da tsawra ging ai kun? Lahkawng, gara hku tsawra ra na kun? Masum, tsawra myit ngang kang hkra gara hku galaw mai ai kun?

Hpa Majaw Shada Da Tsawra Ging Ai Kun?

3. Shada da hpa majaw tsawra ra ai kun?

³ Shada da tsawra na matu hpa majaw ahkyak ai kun? Lam langai gaw, Hkristan ajet re ai hpe ginhka lu shangun ai majaw re. “Shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai” ngu kasa ni hpe Yesu tsun ai. (Yhn 13:35) Dai sha n-ga, tsawra myit gaw kahkyin gumdin shangun ai. Tsawra myit hpe “kahkyin gumdin lam a matu ngang ai makyit sumri” ngu nna Pawlu tsun da ai. (Kol 3:14, NWT) Shada da tsawra ging ai ahkyak ai lam naw nga ai. Shada da tsawra ai gaw, Karai Kasang hpe tsawra ai lam madun ai majaw re. “Karai Kasang hpe tsaw ra nga ai wa gaw, shi a kahpu kanau wa hpe mung tsaw ra lu na” ngu kasa Yawhan tsun ai.—1 Yh 4:21.

4-5. Karai Kasang hpe tsawra ai lam hte shada da tsawra ai lam gara hku matut mahkai nga ai kun? Ga shadawn tsun dan u.

⁴ Karai Kasang hpe tsawra ai hte hpunau nauna ni hpe tsawra ai gaw gara hku matut mahkai ai kun? Salum hte kaga hkum hkrang adaw achyen ni gara hku matut mahkai nga ai hpe myit yu u. Sai lam gumlawt ai shadang hpe chye na matu, lata lahkawn hkawn ai shara hpe chyam yu ai hte salum a masa hpe sarawun chye ai. Dai kaw na hpa chye lu ai kun?

⁵ Sai lam gumlawt ai shadang hpe chyam nna, salum a masa hpe sarawun chye ai zawn, hpunau nauna ni hpe kade daram tsawra ai hpe yu nna, Karai Kasang hpe kade daram tsawra ai lam chye lu ai. Hpunau nauna ni hpe tsawra ai myit yawm wa ai gaw, Karai Kasang hpe tsawra ai myit yawm wa ai kumla re. Hpunau nauna ni hpe galoi mung tsawra nga ai gaw, Karai Kasang hpe tsawra ai myit ngang ai kumla re.

6. Hpunau nauna ni hpe tsawra myit yawm ai gaw hpa majaw shoihpa nga ai kun? (1 Yawhan 4:7-9, 11)

⁶ Hpunau nauna ni hpe tsawra ai myit yawm wa yang shoihpa nga ai. Yehowa hte anhte a hku hkau lam mung gawngkya wa sai hpe madun nga ai. “Tinang mu lu ai kahpu kanau wa hpe n tsaw ra a yang gaw, tinang n mu lu ai Karai Kasang hpe tsaw ra lu na n rai” ngu kasa Yawhan tsun ai. (1 Yh 4:20) Hpa sharin la lu ai kun? ‘Shada da tsaw ra’ nga yang she, anhte hpe Yehowa hkap la na re.—1 Yawhan 4:7-9, 11 hpe hti u.

Gara Hku Tsawra Ra Na Kun?

7-8. Shada da tsawra ai lam gara hku madun mai ai kun?

⁷ “Shada da tsaw ra” na matu Chyum Laika hta chyahkring hkring tsun da ai. (Yhn 15:12, 17; Rom 13:8; 1 Ht 4:9; 1 Pe 1:22; 1 Yh 4:11) Raitim, tsawra ai myit gaw, atsam ningja langai re ai majaw, myi hte n mu lu ai. Rai yang, shada da tsawra ai hpe mu hkra gara hku galaw lu ai kun? Anhte a tsun ai, galaw ai lam ni hte re.

⁸ Tsawra myit madun mai ai lam law law nga ai. Ndai ni gaw ga shadawn nkau mi re: “Langai hte langai . . . teng man ai ga tsun mu.” (Zeh 8:16) “Shada da ahkau achyap rai nga mu.” (Mrk 9:50) “Hkungga lara ai hta shada da shagrau hkat mu.” (Rom 12:10) “Shada da hkap hkalum la mu.” (Rom 15:7) “Mara langai ngai nga yang gaw, shada da raw dat kau hkat nga mu.” (Kol 3:13) “Shada da a lit hpe gun hpai shingtau” nga mu. (Gal 6:2) “Shada da shalan shabran hkat nga mu.” (1 Ht 4:18, NWT) “Shada da . . shadaw shalan nga mu.” (1 Ht 5:11) “Shada da a matu mara akyu hpyi nga mu.”—Yak 5:16.

9. Shalan shabran ya ai gaw, hpa majaw tsawra ai lam madun ai ladat langai rai kun? (Sumla hpe mung yu u.)

⁹ Shada da tsawra myit madun mai ai lam langai hpe yu yu ga. “Shada da shalan shabran hkat nga mu” ngu Pawlu tsun ai. Dai gaw hpa majaw tsawra myit madun ai lam rai kun? Laika buk langai hta tsun da ai hku nga yang, Pawlu tsun ai “shalan shabran” ngu ai ga si gaw, “grai sawng ai chyam dinglik lam hkrum ai wa a makau hta tsap nna n-gun jaw ai” ngu lachyum nga ai. Dai majaw, chyam dinglik hkrum nga ai hpunau nauna hpe shalan shabran ya ai gaw, asak lam hta matut hkawm lu hkra karum ya lu ai majaw, tsawra myit madun ai lam re.—2 Ko 7:6, 7, 13.

10. Matsan dum myit madun ai hte shalan shabran ya ai gaw, gara hku matut mahkai ai kun?

¹⁰ Matsan dum myit madun ai hte shalan shabran ya ai gaw, matut mahkai nga ai. Gara hku nna kun? Matsan dum chye ai wa gaw, kaga ni hpe shalan shabran ya mayu ai, karum ya mayu ai. Yehowa gaw, masha ni hpe matsan dum ai majaw, shalan shabran ya ai lam Pawlu sanglang dan ai. “Matsan dum chye ai Kawa hte, shangwi shapyaw na lam amyu myu a Karai Kasang” ngu tsun da ai. (2 Ko 1:3) Grai matsan dum chye ai Karai Kasang re ai majaw, matsan dum myit a Npawt, matsan dum myit kaba ai Kawa ngu shaga ai re. Anhte “tsin-yam tsindam amyu myu hkrum ai” shaloi, shalan shabran ya na matu, matsan dum myit gaw Yehowa hpe shadut ya ai. (2 Ko 1:4) Hka hpawk kaw na katsi ai hka gaw, hpang kara ai wa hpe shalan ya ai zawn, myit ru myit tsang hkrum ai wa hpe Yehowa shalan shabran ya ai, n-gun jaw ai. Yehowa hpe kasi la nna, kaga ni hpe matsan dum myit hte gara hku shalan shabran ya mai ai kun? Lam langai gaw, matsan dum chye na matu, shalan shabran ya chye na matu anhte hpe karum ya ai atsam ningja ni nga hkra shakut ai re. Gara atsam ningja ni kun?

11. Kolose 3:12 hte 1 Petru 3:8 hku nga yang, kaga ni hpe matut tsawra na matu, shalan shabran ya na matu, hpa atsam ningja ni naw ra ai kun?

¹¹ Lani hte lani hpunau nauna ni hpe matut tsawra na matu, “shalan shabran hkat nga” na matu, hpa gaw karum ya ai kun? Myit tau ya ai, kahpu kanau tsawra myit hte tsawra ai, matsan dum myit zawn re ai atsam ningja ni gaw karum ya ai. (Kolose 3:12; 1 Petru 3:8 hpe hti u.) Gara hku karum ya ai kun? Matsan dum myit hte matut mahkai nga ai kaga atsam ningja ni, tinang hta nga wa sai nga yang, myit ru myit tsang hkrum nga ai hpunau nauna ni hpe n karum ai sha n nga lu sai. Yesu tsun wa ai zawn, “kraw hta hpring chyat nga ai kaw na, n-gup de tsun nga ai. Kaja ai wa gaw tinang a kaja ai sut dek hta na kaja ai arai shapraw wu ai.” (Mat 12:34, 35) Hpunau nauna ni hpe gaja wa tsawra ai nga yang, myit ru myit tsang hkrum ai shaloi, shalan shabran ya na re.

Tsawra Myit Ngang Kang Hkra Gara Hku Galaw Na Kun?

12. (a) Hpa hpe sadi ra ai kun? (b) Gara ga san hpe bawngban na kun?

¹² Anhte yawng gaw matut nna “shada da tsaw ra” mayu ai. (1 Yh 4:7) Raitim, “masha law law a tsaw ra ai myit kawp mat na” ngu Yesu sadi jaw da ai. (Mat 24:12) Sape law law a tsawra myit kawp mat na ngu tsun ai n re. Raitim, tsawra myit kawp wa ai ndai mungkan a myit jasat n kap wa hkra sadi ra ai. Rai yang, hpunau nauna ni hpe matut tsawra ai kun? n tsawra ai kun? ngu ai hpe chyam yu mai ai ladat nga ai kun?

13. Hpunau nauna langai hpe matut tsawra nga, n nga gara aten hta dan dawng ai kun?

¹³ Lam langai gaw, masa lam nkau hta anhte gara hku bai htang ai hpe jep yu ai hku nna re. (2 Ko 8:8) “Mahkra, hta n-ga, nanhte shada da tsaw ra ai myit makyit rawng nga mu; kaning rai nme law, tsaw ra ai myit gaw, yubak mara law law hpe magap da lu ai” ngu, masa langai hpe kasa Petru tsun dan ai. (1 Pe 4:8) Hpunau nauna langai gaw, tinang hpe galaw shut ai shaloi, myit hkra machyi hkra galaw ai shaloi, shi hpe matut tsawra ai lam nga n nga tinang a bai htang ai lam hta dan dawng ai.

14. 1 Petru 4:8 hku nga yang, gara hku tsawra ra na kun? Ga shadawn tsun dan u.

¹⁴ Petru tsun ai ga hpe atsawm dinglik yu ga. Daw kaji 8 nnan daw hta, gara hku tsawra na matu tsun ai kun? “Tsawra ai myit makyit rawng” nga u ngu tsun ai. Petru tsun ai “makyit rawng” ngu ai ga si gaw, “gang kren” ai ngu lachyum nga ai. Tsawra ai myit makyit rawng nga yang, hpa galaw na ngu matut tsun ai kun? Hpunau nauna ni a mara ni hpe magap kau ya ai ngu tsun ai. Mahkret hkang hkrai re ai saboi langai hpe shingran yu u. Gang magap mai ai sumpan nga yang, mahkret hkang langai, lahkawng hpe sha n-ga, yawng hpe magap kau lu ai. Dai zawn sha, hpunau nauna ni hpe tsawra ai myit makyit rawng nga yang, mara langai, lahkawng hta n-ga, yawng hpe magap kau ya lu na, raw kau ya lu na re.

15. Tsawra myit ngang kang yang hpa galaw lu ai kun? (Kolose 3:13)

¹⁵ Mara raw ya na matu yak nga yang pyi, lu raw hkra ngang kang ai tsawra myit nga ra ai. (Kolose 3:13 hpe hti u.) Kaga ni hpe mara raw ya ai gaw, ngang kang ai tsawra myit nga ai hpe madun ai. Yehowa hpe mung pyaw shangun ai. Mara raw ya na matu, loi loi hte masin n pawt na matu, hpa gaw naw karum ya lu ai kun?

16-17. Kaga ni a kaji kajaw mara ni hpe ahkyak n shatai na matu hpa gaw karum ya ai kun? Ga shadawn tsun dan u. (Sumla hpe mung yu u.)

¹⁶ Hpunau nauna ni a gawngkya lam hpe n re ai sha, kaja ai lam hpe myit maju jung u. Kanawn mazum hpawng ngut nna sumla jawm dem ai ngu shingran yu u. Shawng dem ai sumla nau n tsawm na tsang ai majaw, lahkawng lang bai dem ai. Sumla masum rai mat sai. Langai hta, hpunau langai n mani taw ai. Gara hku galaw na kun? Dai hpunau hte kaga masha yawng mani taw ai kaga sumla lahkawng naw nga ai. Dai majaw, nambat 1 dem ai sumla hpe jahten kau na re.

¹⁷ Tinang a matsing nyan hta, gara zawn myit dum hpa lam ni hpe matsing da na kun? ngu ai gaw, gara sumla hpe zing da na kun? ngu ai hte bung ai. Anhte hta, hpunau nauna ni hte kaja ai myit dum hpa lam ni nga ai. Hpunau nauna langai tsun ai, galaw ai lam a majaw, myit n pyaw ai aten ni mung nga chye ai. Hpa galaw na kun? N tsawm ai sumla hpe jahten kau ai zawn, dai myit n pyaw hpa lam hpe shakut nna malap kau u. (Gsh 19:11; Ehp 4:32) Kaja ai myit dum hpa lam ni nga ai majaw, kaji kajaw shut ai lam ni hpe hpa majaw matsing da na. Kaja ai lam ni hpe sha dum mayu nna, manu shadan mayu ai n rai?

Dai Ni Aten Shada Da Tsawra Na Matu Hpa Majaw Grau Ahkyak

18. Tsawra myit hte seng ai gara ahkyak ai lam ni hpe ndai sumhpa hta bawngban wa sai kun?

¹⁸ Shada da hpa majaw matut tsawra mayu ai kun? Hkaja wa sai hte maren, hpunau nauna ni hpe tsawra ai gaw, Yehowa hpe tsawra ai lam madun ai re. Hpunau nauna ni hpe tsawra ai lam gara hku madun na? Lam langai gaw, “shalan shabran” ya ai hku nna re. Matsan dum myit nga yang, “shalan shabran” ya lu na. Shada da matut tsawra lu hkra gara hku galaw na? Mara ni hpe raw kau ya na matu dang lu ai made shakut ai hku nna re.

19. Dai ni aten shada da tsawra na matu hpa majaw grau ahkyak ai kun?

¹⁹ Dai ni aten shada da tsawra na matu hpa majaw grau ahkyak ai kun? “Arai yawng mayawng htum mat na aten ni magang wa ra ai. Dai re ai majaw, . . . nanhte shada da tsaw ra ai myit makyit rawng nga mu” ngu kasa Petru tsun ai. (1 Pe 4:7, 8) Nhkru ai ndai mungkan a jahtum ni wa sai hte maren, hpa ni byin wa na kun? “Nye amying a majaw amyu baw shagu nanhte hpe ndawng n wawm na myit dai” ngu Yesu tau hkrau tsun ai. (Mat 24:9) Nju ndawng ai lam hpe hkamjan lu na matu kahkyin gumdin ra ai. “Kahkyin gumdin lam a matu ngang ai makyit sumri” re ai tsawra myit hte makyit da yang, anhte shada da myit garan mat hkra Satan shakut ai lam yawng sum mat na re.—Kol 3:14, NWT; Hpl 2:1, 2.