Akyu Hpyi Ga Ni Hpe Yehowa Htai Ya Ai Kun?

1-2. Akyu hpyi da ai lam ni hpe Yehowa mahtai n jaw ai ngu hpa majaw hkamsha chye ai kun?

“YEHOWA hta sharawng awng nga nna, na a myit hpyi ai hku shi nang hpe jaw na ndai.” (Shk 37:4) Grai kaja ai ga sadi re. Rai yang, hpyi ai yawng hpe Yehowa kalang ta jaw na ngu, myit mada ging ai kun? Masa nkau hpe myit yu u. Kabu Gara Shiga Hkaw Tsun Ai Ni A Matu Jawng lu lung na matu, dinghku n nga ai nauna langai akyu hpyi ai. Shaning hku na mat tim n lu lung shi ai. Nawku hpung hta grau magam gun mayu ai majaw, yoga hkyam sa wa hkra ramma hpunau langai akyu hpyi ai. Raitim, n hkyam sa wa ai. Kasha ni tengman lam hta nga na matu, Hkristan kanu kawa ni akyu hpyi ai. Raitim, Yehowa hpe kasha ni matut n nawku ai.

² Nang mung Yehowa kaw lama ma hpyi da tim, mahtai n lu shi ai rai chye ai. ‘Kaga ni hpyi ai hpe jaw nna, ngai hpyi ai hpe n jaw ai’ ngu myit hkrup chye ai. Mara langai ngai galaw da ai majaw rai na re ngu myit wa chye ai. Nauna Jenetb dai zawn myit wa ai. Behtela hta magam gun mayu ai lam, shan la akyu hpyi ai. “Kade n na yang saw shaga wa na re ngu shadu ai” ngu Jenet tsun ai. Shaning hku na mat tim, n saw shaga hkrum ai. “Yawn mung yawn, myit mung shuk rai mat ai. Yehowa n ra ai hpa galaw hkrup da ai kun? Behtela hta magam gun mayu ai lam, laksan akyu hpyi da ai. Hpa majaw mahtai n jaw ai kun?” ngu tsun ai.

3. Ndai sumhpa hta hpa lam bawngban na kun?

³ Kalang lang, akyu hpyi ga ni hpe Yehowa madat ya ai kun? ngu myit hkrup chye ai. Moi na sadi dung ai la nkau pyi, dai zawn myit hkrup ma ai. (Yob 30:20; Shk 22:2; Hab 1:2) Tinang a akyu hpyi ga hpe, Yehowa htai ya ai lam hpa gaw kam shangun ai kun? (Shk 65:2) Mahtai lu na matu, shawng nnan lawu na lam ni a mahtai hpe chye ra ai. (1) Yehowa hpa galaw ya na ngu myit mada mai ai kun? (2) Anhte hpa galaw na matu Yehowa myit mada ai kun? (3) Akyu hpyi ai lam galai shai na matu hpa majaw ra chye ai kun?

Yehowa Hpa Galaw Ya Na Ngu Myit Mada Mai Ai Kun?

4. Yeremia 29:12 hku nga yang Yehowa hpa ga sadi jaw da ai kun?

⁴ Akyu hpyi ga ni hpe madat ya na ngu ga sadi jaw ai. (Yeremia 29:12 hpe hti u.) Sadi dung ai shi a mayam ni hpe Karai Kasang grai tsawra ai majaw, akyu hpyi ga ni hpe galoi mung madat ya ai. (Shk 10:17; 37:28) Raitim, hpyi shagu jaw na ngu ai lachyum gaw n re. Akyu hpyi ga nkau a mahtai lu na matu, mungkan nnan du hkra la ra chye ai.

5. Akyu hpyi ga ni hpe Yehowa hpa hte shingdaw yu ai kun? Sanglang dan u.

⁵ Yehowa gaw akyu hpyi ga ni hpe shi a yaw shada lam hte shingdaw yu ai. (Esa 55:8, 9) Yaw shada lam langai gaw, shi a uphkang lam hpe kabu gara ai myit hte kahkyin gumdin let, npu taw na num la ni mungkan ga hta hpring nga na matu re. Raitim, masha shada da uphkang ai gaw, grau kaja ai ngu Satan tsun ai. (Nin 3:1-5) Satan shut ai hpe madun mayu ai majaw, masha shada da uphkang na matu, Yehowa ahkang jaw dat ai. Dai majaw, dai ni aten hta manghkang law nga ai re. (Hpj 8:9) Raitim, manghkang yawng hpe ya aten hta Yehowa n hparan ya ai. Dai hku hparan ya yang, masha shada da uphkang ai gaw kaja ai, manghkang ni lu hparan ai ngu shadu mat chye ai.

6. Yehowa galaw ai lam shagu galoi mung tsawra myit lawm ai, tara rap ra ai ngu ai hpe hpa majaw kam ra ai kun?

⁶ Hpyi ai lam bung tim, Yehowa mahtai jaw ai gaw bung yang she bung na. Ga shadawn, Hkawhkam Hezekia si na daram machyi taw ai majaw, mai wa na matu hpyi ai. Yehowa shi hpe shamai shatsai ya ai. (2 Hk 20:1-6) Hkamja lam manghkang rai na masa nga ai “hkum shan hta ju ai aju” hpe yen kau ya na matu kasa Pawlu hpyi ai shaloi, Yehowa n galaw ya ai. (2 Ko 12:7-9) Kasa Yaku hte Petru a lam hpe mung myit yu u. Lahkawng yan hpe Herod Hkawhkam sat mayu ai. Petru a matu nawku hpung akyu hpyi ya ai zawn, Yaku hpe mung hpyi ya na re. Raitim, Yaku sat hkrum mat ai. Petru hpe gaw lamu kasa sa hkye la ai. (Kas 12:1-11) ‘Petru hpe Yehowa hkye la nna, Yaku hpe hpa majaw n hkye la ai kun?’ ngu myit hkrup chye ai. Chyum Laika hta n tsun da ai.c Raitim, Yehowa galaw ai lam shagu “ding hpring ai” hpe kam mai ai. (Trj 32:4) Lahkawng yan hpe Yehowa tsawra ai lam anhte chye ai. (Shr 21:14) Kalang lang, anhte n myit mada da ai lam hte akyu hpyi ga a mahtai lu chye ai. Yehowa galaw ai lam shagu gaw, galoi mung tsawra myit lawm ai, tara rap ra ai hpe kam mai ai. Dai majaw, akyu hpyi ga a mahtai hte seng nna ga san bai n san ai.—Yob 33:13.

7. Hpa hpe koi ra ai kun? Hpa majaw kun?

⁷ Tinang a masa hte kaga ni a masa shingdaw ai hpe koi ra ai. Ga shadawn, Yehowa kaw lama ma hpe laksan hpyi da tim, mahtai n lu ai. Tinang hte masa bung ai kaga langai a akyu hpyi ga hpe gaw, Yehowa mahtai jaw ai zawn rai chye ai. Nauna Anna dai zawn hkrum wa ai. Madu wa Mettayu hte asak kaba ai nauna lahkawng mawng ana byin nga ai. Shanhte a matu Anna akroi anoi akyu hpyi ai. Nauna yan gaw bai hkyam sa wa tim, Mettayu gaw si mat ai. Yehowa a majaw nauna yan bai hkyam sa wa ai nga yang, Mettayu gaw hpa majaw si mat ai kun? ngu nna Anna myit hkrup ai. Hpa majaw re ai hpe anhte n chye ai. Raitim, yakhkak ai lam yawng hpe Yehowa jahtum kau ya na, tsawra ai ni hpe bai jahkrung sharawt ya na hpe gaw anhte chye ai.—Yob 14:15.

8. (a) Esaia 43:2 hku nga yang Yehowa gara hku madi shadaw ya na kun? (b) Mayak mahkak hkrum ai aten hta akyu hpyi ai gaw gara hku karum ya lu ai kun? (Akyu Hpyi Ai Gaw Hkamjan Lu Hkra Karum Ya video hpe yu u.)

⁸ Yehowa galoi mung madi shadaw ya na. Tsawra myit nga ai Kawa Yehowa gaw anhte yakhkak hkrum ai hpe n ra sharawng ai. (Esa 63:9) Raitim, hka nu zawn, wan zawn re ai mayak mahkak ni, langai mung n hkrum hkra gaw n makawp maga ya ai. (Esaia 43:2 hpe hti u.) “Rap” lu hkra karum ya na ngu ga sadi jaw ai. Mayak mahkak ni a majaw, shi hte hku hkau lam hkra machyi shangun na n re. Hkamjan lu hkra chyoi pra ai wenyi jaw na re. (Luk 11:13; Hpl 4:13) Dai majaw, matut sadi dung lu hkra, hkamjan lu hkra, ra ai lam ni Karai Kasang jaw na hpe kam mai ai.d

Anhte Hpa Galaw Na Matu Yehowa Myit Mada Ai Kun?

9. Yaku 1:6, 7 hku nga yang, Yehowa karum ya na ngu ai hpe hpa majaw kam ra ai kun?

⁹ Yehowa gaw shi hpe kam na matu myit mada ai. (Heb 11:6) Kalang lang, mayak mahkak ni gaw n lu tawt lai na zawn re. Yehowa karum ya na kun? ngu ntsen ai myit shang wa chye ai. Raitim, Karai jaw ai n-gun atsam a majaw, “bunghku hpe shingtawt lu” na ngu, Chyum Laika hta tsun da ai. (Shk 18:29) Dai majaw, ntsen ai myit hkum nga. Yehowa htai ya na hpe kam ai myit hte akyu hpyi u.—Yaku 1:6, 7 hpe hti u.

10. Akyu hpyi ai hte maren galaw ra ai lam ga shadawn tsun dan u.

¹⁰ Akyu hpyi ai hte maren galaw na matu Yehowa myit mada ai. Ga shadawn, ginwang zuphpawng lung lu hkra, bungli kaw na ahkang lu na matu hpunau langai akyu hpyi ai. Yehowa gara hku htai ya na kun? Bungli madu kaw ahkang sa hpyi gwi hkra, Yehowa nden marai jaw lu ai. Raitim, sa hpyi ra na gaw hpunau a lit re. Chyahkring hkring sa hpyi ra chye ai. Kaga shani hta bungli bai galaw ya na, shata shabrai shayawm ya mai ai ngu, jahkrum ra wa chye ai.

11. Hpa majaw chyahkring hkring hpyi ging ai kun?

¹¹ Chyahkring hkring akyu hpyi na matu Yehowa myit mada ai. (1 Ht 5:17) Akyu hpyi ga nkau a mahtai hpe kalang ta n lu ai lam, Yesu a ga ni kaw nna chye lu ai. (Luk 11:9) Myit hkum daw. Chyahkring hkring hpyi u. (Luk 18:1-7) Lama ma hpe dingyang hpyi taw ai gaw, myit lu yang she rawt hpyi ai baw n re ai hpe madun ai re. Yehowa karum ya lu ai hpe kam ai lam madun ai mung re.

Akyu Hpyi Ai Lam Galai Shai Na Matu Hpa Majaw Ra Chye Ai Kun?

12. (a) Akyu hpyi ai hte seng nna myit ging ai ga san langai gaw hpa rai kun? Hpa majaw kun? (b) Yehowa hpe hkungga ai lam madun ai hku nna gara hku akyu hpyi ra na kun? (“Nye Akyu Hpyi Ga Ni Gaw Yehowa Hpe Hkungga Ai Lam Madun Nga Ai Kun?” lawk hpe yu u.)

¹² Akyu hpyi ga ni mahtai n lu ai nga yang, ndai ga san masum hpe myit yu u. Langai, ‘Hpyi ging ai hpe ngai hpyi nga ai rai kun?’ Tinang a matu gara gaw kaja htum re ai hpe chye ai ngu shadu chye ai. Raitim, tinang hpyi da ai gaw, tinang a matu kaja htum n re ai baw byin chye ai. Manghkang langai hpe hparan lu ai ladat hte seng nna akyu hpyi da ai. Raitim, dai hta grau kaja ai ladat nga chye ai. Kalang lang, tinang hpyi ai lam gaw Yehowa a myit ra ai lam hte shai nga chye ai. (1 Yh 5:14) Nnan daw hta tsun wa ai kanu kawa ni a lam myit yu u. Kasha ni tengman lam hta matut nga na matu akyu hpyi ai. Dai zawn hpyi ai gaw, htap htuk ai zawn rai chye ai. Raitim, Yehowa gaw shi hpe nawku na matu, kadai hpe mung atik anang n shadut ai. Anhte yawng, tinang a myit hte lata nna nawku ai hpe sha ra sharawng ai. (Trj 10:12, 13; 30:19, 20) Rai yang, kanu kawa ni gara hku bai galai shai nna hpyi mai ai kun? Karai Kasang hpe kasha ni tsawra wa hkra, Karai hte grau hku hkau wa hkra, tang du ai hku sharin shaga lu hkra karum ya rit ngu hpyi mai ai.—Gsh 22:6; Ehp 6:4.

13. Hebre 4:16 hku nga yang, gara aten hta Yehowa karum ya na kun? Sanglang dan u.

¹³ Lahkawng, ‘Yehowa jahpring shatsup ya na aten rai sai kun?’ Akyu hpyi ga a mahtai kalang ta lu yang she mai na ngu hkamsha chye ai. Gara aten gaw, kaja htum re ai hpe Yehowa chye ai. (Hebre 4:16 hpe hti u.) Mahtai kalang ta n lu yang, Yehowa ‘n jaw’ ai ngu myit hkrup chye ai. Raitim, ‘n jaw shi ai’ rai na re. Yoga hkyam sa wa hkra akyu hpyi ai ramma hpunau a lam hpe bai myit yu u. Mauhpa lam hte Yehowa shamai ya dat yang, ‘Yehowa hpe shi nawku na rai nga le. Yoga mai hkra galaw da ya nga ai gaw’ ngu nna Satan tsun na re. (Yob 1:9-11; 2:4) Ana ahkya yawng n nga mat na aten hpe, Yehowa masat da ngut sai. (Esa 33:24; Shr 21:3, 4) Dai aten n du dingsa, mauhpa lam hte yoga mai na matu n mai myit mada ai. Rai yang, ramma hpunau gara hku galai shai nna hpyi mai ai kun? Yoga hpe hkamjan lu hkra, Karai Kasang hpe sadi dung let matut nawku lu hkra, n-gun atsam hte simsa lam jaw rit ngu hpyi mai ai.—Shk 29:11.

14. Jenet a mabyin kaw na hpa sharin la lu ai kun?

¹⁴ Behtela hta magam gun mayu ai majaw, akyu hpyi ai Jenet a lam bai myit yu u. N myit mada da ai hku Yehowa mahtai jaw ai hpe, 5 ning na yang she chye na wa ai. “Dai shaning ni laman, Yehowa gaw grai sharin ya ai. Shaman ya ai. Shi hpe ngai grau kamhpa chye na matu, Chyum Laika hpe sung sung hkaja chye na matu grai naw ra ai. Masa shagu hta, kabu gara let Karai a magam hpe gun hpai chye na matu ra taw ai re” ngu tsun ai. Hpang de, shan la gaw hpung kawan bungli hta shang lawm lu ai. “Bai myit yu yang, Yehowa gaw ngai n myit mada da ai lam ni hte akyu hpyi ga ni hpe mahtai jaw ai. Karai jaw ai mahtai gaw, hpa majaw kaja htum re ai hpe chye na na matu gaw aten ra ai. Karai a tsawra myit, matsan dum myit hkamsha lu ai majaw pyaw ai” ngu Jenet tsun ai.

15. Ga baw n dat ai sha hpa majaw akyu hpyi ra chye ai kun? (Sumla ni hpe mung yu u.)

¹⁵ Masum, ‘Galai shai nna bai hpyi ging ai kun?’ Ga baw dat nna akyu hpyi ai gaw kaja ai. Raitim, kalang lang Yehowa hpa byin shangun mayu ai hpe chye hkra, ga baw n dat ai sha hpyi mai ai. Kabu Gara Shiga Hkaw Tsun Ai Ni A Matu Jawng lung mayu ai majaw akyu hpyi ai dinghku n nga ai nauna a lam hpe bai myit yu u. Shi gaw, grau ra ai shara hta magam gun mayu nna hpyi ai. Rai yang, jawng lung lu hkra akyu hpyi let, hkaw tsun bungli hpe grau galaw lu na lam ni hpe mu wa hkra mung shi hpyi mai ai. (Kas 16:9, 10) Dai hpang, ni ai sharan hkan ningshawng grau ra ai nawku hpung nga ai kun? ngu, hpung kawan hpe san mai ai. Hkaw tsun masha grau ra ai mungdan nga ai kun? ngu, ginjaw garan rung hpe laika ka nna san mai ai.e

16. Hpa hpe kam mai ai kun?

¹⁶ Bawngban wa sai hte maren, Yehowa gaw akyu hpyi ga ni hpe tsawra myit hte rap ra ai hku mahtai jaw na hpe kam mai ai. (Shk 4:3; Esa 30:18) Myit mada da ai hku mahtai lu yang she lu na re. Raitim, akyu hpyi ga ni hpe, Yehowa galoi mung ahpa atang n sawn la ai. Anhte hpe grai tsawra ai majaw, galoi mung n kabai da ai. (Shk 9:10) Dai majaw, myit masin mahkra hte akyu hpyi ai hku nna, Yehowa hpe “tut tut hpa nga mu.”—Shk 62:8.