Laning Mi Na Ahkyak Htum Shani A Matu Jin Jin Rai Sai Kun?

1. Myit Dum Poi gaw laning mi a ahkyak htum poi hpa majaw re ai kun? (Luka 22:19, 20)

YEHOWA a amyu masha ni a matu, Hkristu a si ai Myit Dum Poi gaw laning mi hta ahkyak htum poi re. Shi hpang hkan ai ni galaw na matu, Yesu laksan htet da ai poi re. (Luka 22:19, 20 hpe hti u.) Myit Dum Poi nhtoi hpe lam law law a matu anhte myit mada nga ai. Lam nkau hpe yu yu ga.

2. Myit Dum Poi hpe myit mada nga ai lam nkau gaw hpa rai kun?

² Gawng malai jahpu gaw, kade daram manu dan ai lam, hpa shaman chyeju ni jaw ai lam, dai hpe chyeju dum ai lam gara hku madun mai ai hpe Myit Dum Poi lamang gaw bai shadum ya ai. (2 Ko 5:14, 15) Hpunau nauna ni hte “shada da n-gun jaw” na ahkang lu shangun ai. (Rom 1:12, NWT) Shaning shagu, wenyi lam hta katsi mat ai ni law law gaw, Myit Dum Poi wa lung ai. Alum ala hkap tau la hkrum ai majaw, Yehowa hpang de bai kayin wa ai. Myit lawm ai masha nnan ni mung wa lung ma ai. Dai shani hta mu lu, na lu ai lam ni a majaw, asak lam hta hkawm lu wa ai. Dai majaw mung, shaning shagu Myit Dum Poi hpe anhte myit mada nga ai re.

3. Myit Dum Poi gaw mungkan ting na hpunau nauna ni hpe gara hku kahkyin gumdin shangun ai kun? (Sumla hpe mung yu u.)

³ Dai hta n-ga, Myit Dum Poi gaw hpunau nauna ni hpe kahkyin gumdin shangun ai. Jan shang ai hte mungkan ting na Yehowa Sakse ni gaw, Myit Dum Poi lung na matu hkrum zup ai. Gawng malai jahpu grai ahkyak ai hpe ahkyak shatai tsun da ai mungga langai madat ai. Shakawn mahkawn lahkawng mahkawn ai. Muk hte tsabyi hpe shalai ai. Akyu hpyi ga mali hpe myit masin mahkra hte “amen” ngu tsun ai. Nawku hpung yawng, hkying hkum 24 laman dai hte maren galaw ai. Anhte yawng kahkyin gumdin let shagrau nga ai hpe mu ai shaloi, Yehowa hte Yesu kade daram kabu nga na hpe myit yu u.

4. Ndai sumhpa hta hpa lam bawngban na kun?

⁴ Myit Dum Poi a matu myit hpe gara hku shajin mai ai kun? Kaga ni akyu lu hkra gara hku karum ya mai ai kun? Wenyi lam hta katsi mat ai ni hpe gara hku karum ya mai ai kun? Dai ga san ni hpe ndai sumhpa hta bawngban mat na re. Ndai laksan lamang a matu jin jin rai nga hkra, dai ga san ni a mahtai gaw karum ya na re.

Myit Dum Poi A Matu Myit Hpe Shajin U

5. (a) Gawng malai jahpu kade daram manu dan ai hpe hpa majaw myit ging ai kun? (Shakawn 49:8, 9) (b) Yesu Hpa Majaw Si Hkam Ai Kun? video kaw na hpa chye lu ai kun?

⁵ Myit hpe shajin mai ai ahkyak htum lam langai gaw, Yesu Hkristu a gawng malai hkungga kade daram manu dan ai hpe myit ai re. Anhte gaw yubak hte si ai kaw na tinang hkum tinang n lu hkye la ai. (Shakawn 49:8, 9 hpe hti u; Yesu Hpa Majaw Si Hkam Ai Kun? video hpe mung yu u.)a Dai majaw, anhte a matu Yesu si hkam na hku Yehowa lajang ai. Yehowa hte Yesu grai sak jaw wa ai. (Rom 6:23) Yehowa hte Yesu sak jaw wa ai lam ni hpe myit magang, gawng malai jahpu hpe grau manu shadan magang byin wa ai. Rai yang, Yehowa hte Yesu hpa ni sak jaw wa ai kun? Shawng nnan, gawng malai jahpu ngu ai gaw hpa re ai hpe hkaja yu ga.

6. Gawng malai jahpu ngu ai gaw hpa rai kun?

⁶ Gawng malai jahpu gaw, lama ma hpe bai lata na matu jaw ra ai manu re. Shawng nnan na masha Adam gaw, hkum tsup ai wa hku nna hpan da hkrum ai. Raitim, mara galaw ai majaw, tinang mung, kashu kasha ni yawng mung, htani htana asak hkrung lu ai ahkang sum mat ai. Adam a majaw sum mat ai hpe bai lu na matu, hkum tsup ai asak hpe Yesu sak jaw wa ai. Mungkan ga hta nga ai laman, Yesu “yubak galaw yu ai n rai; shi a n-gup hta na hkalem ai ga mung n mu hkrup ai.” (1 Pe 2:22) Adam mara n galaw shi ai aten na zawn, Yesu gaw si ai aten du hkra hkum tsup ai. Dai majaw, Yesu jaw wa ai asak gaw, Adam sum mat ai asak hte maren sha re.—1 Ko 15:45; 1 Tm 2:6.

7. Mungkan ga hta Yesu hkrum ai chyam dinglik lam nkau gaw hpa ni rai kun?

⁷ Mungkan ga hta chyam dinglik lam law law hkrum tim, sumsing Kawa hpe Yesu hpring tup madat mara ai. Hkum tsup ai wa hku nna shangai wa tim, n hkum tsup ai kanu kawa ni hpe lata npu taw ra ai. (Luk 2:51) Ramma aten hta, kanu kawa ga n madat na matu, Karai Kasang hpe sadi n dung na matu, gunglau ai lam ni hpe ninghkap ra ai. Asak ram wa ai shaloi, nat Satan a gunglau ai lam ni hpe ninghkap ra ai. Kalang mi hta, Karai Kasang hpe sadi n dung na matu Satan ding tawk tsun ai. (Mat 4:1-11) Yesu mara galaw hkrup hkra gunglau na matu Satan dawdan da ai. Rai yang she, gawng malai jahpu n lu jaw na re.

8. Gara chyam dinglik lam ni hpe mung Yesu naw hkrum ai kun?

⁸ Mungkan ntsa magam gun ai aten laman hta mung, Yesu gaw gunglau ai lam ni naw hkrum ai. Zingri zingrat hkrum ai. Asak shoihpa hkrum ai. (Luk 4:28, 29; 13:31) Shi hpang hkan ai ni a n hkum tsup ai lam hpe mung hkam sharang ra ai. (Mrk 9:33, 34) Mungkan ga asak aprat a hpang jahtum chyam dinglik lam hta, zingri hkrum ai, jahpoi asawng hkrum ai. Grai nni nkri hkrum nna, kaya hkrum nna sat hkrum ai. (Heb 12:1-3) Yehowa a karum shingtau lam n lawm ai sha, mayak mahkak ni hpe langai hkrai hkamjan ra ai.b—Mat 27:46.

9. Yesu a gawng malai hkungga hte seng nna gara hku hkamsha ai kun? (1 Petru 1:8)

⁹ Gawng malai jahpu lu jaw hkra Yesu grai nan sak jaw wa ai. Tinang a matu sharawng awng let, Yesu sak jaw wa ai hpe myit dat ai shaloi, grau tsawra wa ai n re i?—1 Petru 1:8 hpe hti u.

10. Gawng malai jahpu jaw lu na matu Yehowa hpa ni sak jaw ra wa ai kun?

¹⁰ Yehowa mung hpa ni sak jaw wa ai kun? Yehowa hte Yesu a lapran na tsawra myit gaw grai ngang kang ai. (Gsh 8:30) Mungkan ntsa Yesu nni nkri hkrum nga ai aten, Yehowa gara hku byin nga na kun? Shi a Kasha n tara ai hku kanawn mazum hkrum ai, nyet kau hkrum ai, nni nkri hkrum nga ai hpe yu nna grai hkamsha nga na re.

11. Yesu sat hkrum ai aten hta Yehowa kade daram hkamsha na hpe ga shadawn jaw u.

¹¹ Kasha si mat ai hpe hkrum ga ai kanu kawa rai yang, dai hkamsha lam hpe chye na na re. Hkrung rawt ai myit mada lam hpe kam tim, tsawra ai wa si mat ai majaw, n hkamsha ai wa kadai mung n nga ai. Rai yang, A.D. 33 ginhtawng ta hta tsawra ai Kasha nni nkri hkrum let si mat ai hpe yu nga ra ai Yehowa gaw, gara hku hkamsha na hpe chye na na re.c—Mat 3:17.

12. Myit Dum Poi n du shi ai bat ni laman hpa galaw lu ai kun?

¹² Ya kaw nna Myit Dum Poi du hkra, tinang hkrai hkaja ai lam hta, dinghku nawku hta, gawng malai jahpu a lam hkaja u. Yehowa Sakse Ni A Matu Hkaja Lam Matsun laika buk (sh) kaga hkaja mai ai hkingrai ni hpe lang nna, gawng malai jahpu a lam ahkri ahkrai hkaja u.d Anhte A Hkristan Prat Hte Magam​—Zuphpawng Shaman Laika Buk hta lawm ai Myit Dum Poi a matu Chyum Laika hti ai chyarang hte maren hti u. Myit Dum Poi shani hta, laksan jahpawt manap nawku daw jau lamang hpe yu na matu mung hkum malap. Myit Dum Poi shani a matu myit hpe shajin da yang, tinang nan akyu lu na, kaga ni akyu lu hkra mung karum ya lu na re.—Ezr 7:10.

Kaga Ni Akyu Lu Hkra Karum Ya U

13. Myit Dum Poi lamang kaw na kaga ni akyu lu na matu shawng nnan hpa galaw lu ai kun?

¹³ Myit Dum Poi shani lamang kaw na kaga ni akyu lu hkra, gara hku karum ya lu ai kun? Shawng nnan galaw lu ai lam gaw, saw shaga laika jaw ai re. Hkaw tsun bungli hta, saw shaga laika garan ai daram sha n-ga, jinghku ni, bungli manang ni, jawng manang ni, kaga ni hpe saw shaga na matu jahpan galaw u. Saw shaga laika n law yang, electronic hkrang hte link sa ya mai ai. Marai kade sa lung na hpe n lu tsun ai.—Hpj 11:6.

14. Saw shaga hkrum ai majaw hkamsha ai myit hpe hpa majaw ahpa atang n sawn la ging ai kun?.

¹⁴ Saw shaga hkrum ai majaw, hkamsha ai myit hpe ahpa atang n sawn la ging ai. Myit Dum Poi hkan lung na ngu, n kamsham ai madu wa tsun wa ai majaw, nauna langai grai mau mat ai. Hpa majaw kun? Moi de Myit Dum Poi lung na matu, chyahkring hkring shaga tim, kalang mung n hkan ai. Dai ning gaw hpa majaw lung mayu ai kun? “Saw shaga laika lu da ai” ngu tsun ai. Shi hte hkau ai myitsu salang saw shaga da ai re. Dai shaning kaw na shaning shagu Myit Dum Poi hkan lung ai.

15. Myit Dum Poi saw shaga ai shaloi gara lam hpe dum ra ai kun?

¹⁵ Zuphpawng kalang mung n lung ga ai ni hta, san mayu ai lam ni nga na re. Hpa ni san wa chye ai, gara hku bai htai na ngu ai hpe tau hkrau myit da u. (Kol 4:6) Ga shadawn, hpa ni galaw na kun? Kade daram na na kun? Gara hku bu hpun ra na kun? Shang gumhpraw hta na kun? Alu hta na kun? ngu nkau myit hkrup chye ai. Saw shaga laika jaw ai shaloi, san mayu ai lam nga ai kun? ngu san yu u. Shanhte san ai hpe htai ya u. Yesu Si Hkam Ai Lam Hpe Myit Dum Nga U hte Nawku Htingnu Hta Hpa Ni Galaw A Ta? video ni hpe hpaw nna, zuphpawng lamang hpe sanglang dan u. Htani Htana Ngwi Pyaw Ai Prat! laika buk, daw 28 kaw na lam nkau hpe tsun dan u.

16. Myit Dum Poi sa lung ai ni gaw gara ga san ni san chye ai kun?

¹⁶ Myit Dum Poi lung ngut ai hpang, myit lawm ai masha nnan ni hta san mayu ai lam ni naw nga chye ai. Ga shadawn, hpa majaw muk hte tsabyi hpe masha loi mi sha sha ai kun? Hpa majaw kadai mung n sha ai kun? Laning mi hta kade lang galaw ai kun? Zuphpawng yawng hpe dai hku sha galaw ai kun? ngu san chye ai. Myit Dum Poi mungga hta dai lam ni lawm mat tim, masha nnan ni hpe bai sanglang dan ra chye ai. jw.org hta mara da ai “Yehowa Sakse Ni Galaw Ai Madu A Shana Shat Sha Poi Gaw Kaga Nawku Hpung Ni Galaw Ai Hte Hpa Majaw Shai Ai Kun?” sumhpa kaw na mahtai tam mai ai. ‘Myit madung nga ai ni’ akyu lu na matu, Myit Dum Poi n galaw shi ai aten, Myit Dum Poi galaw nga ai aten, Myit Dum Poi galaw ngut ai aten ni hta, anhte dang lu ai daram karum ya mayu ai.—Kas 13:48, NWT.

Wenyi Lam Hta Katsi Nga Ai Ni Hpe Karum Ya U

17. Wenyi lam hta katsi nga ai ni hpe myitsu salang ni gara hku karum ya lu ai kun? (Ezekela 34:12, 16)

¹⁷ Wenyi lam hta katsi nga ai ni hpe, Myit Dum Poi aten ladaw hta myitsu slang ni gara hku karum ya mai ai kun? Lanu lahku ai lam madun u. (Ezekela 34:12, 16 hpe hti u.) Myit Dum Poi n du shi yang, masha law lu ai daram law law hpe matut mahkai u. Shanhte hpe lanu lahku ai lam, dang lu ai made karum ya mayu ai lam tsun dan u. Myit Dum Poi sa lung na matu saw shaga u. Sa lung ai shaloi alum ala hkap tau la u. Myit Dum Poi ngut ai hpang hta mung, shanhte hte ayan na matut mahkai u. Yehowa hpang de bai kayin wa na matu, karum ya lu ai lam yawng hte karum ya u.—1 Pe 2:25.

18. Wenyi lam hta katsi nga ai ni hpe anhte yawng gara hku karum ya lu ai kun? (Roma 12:10)

¹⁸ Wenyi lam hta katsi mat ai ni, Myit Dum Poi sa lung ai shaloi, nawku hpung ting karum ya lu ai. Gara hku nna kun? Tsawra myit, matsan dum myit hte hkungga ai lam madun ai hku nna re. (Roma 12:10 hpe hti u.) Shanhte gaw zuphpawng bai sa lung na matu htingnut nga chye ai. Hpunau nauna ni atsawm n hkalum la na hpe tsang chye ai.e Dai majaw, myit n pyaw shangun na ga san ni, hkra machyi shangun na ga ni hpe koi u. (1 Ht 5:11) Shanhte gaw anhte a hpunau nauna ni sha re. Shanhte hte bai nawku lu ai majaw pyaw ai.—Shk 119:176; Kas 20:35.

19. Yesu a si ai Myit Dum Poi kaw na hpa akyu ni lu ai kun?

¹⁹ Myit Dum Poi galaw na matu grai ahkyak ai lam chye wa sai. Myit Dum Poi lung ai shaloi tinang mung, kaga ni mung akyu grai lu ai. (Esa 48:17, 18) Yehowa hte Yesu hpe grau tsawra wa ai. Shan galaw ya wa ai lam ni a matu, grai chyeju dum ai lam madun mai ai. Hpunau nauan ni hte grau hku hkau wa ai. Gawng malai jahpu kaw na kaga ni akyu lu na matu karum ya lu ai. Shaning shagu Shi a si ai lam hpe myit dum na matu, Yesu htet wa ai majaw, grai chyeju dum na re. Laning mi a ahkyak htum shani re ai Myit Dum Poi a matu jin jin rai nga hkra ya kaw na shajin da ga.