Yakhkak Ai Aten Ni Hta Nang Hpe Yehowa Karum Na

1-2. Yehowa a sadi dung ai mayam ni gaw, hpa mayak mahkak ni hkrum chye ai kun?

YAWN hpa mabyin ni a majaw, anhte a prat gaw kalang ta galai shai mat chye ai. Sadi dung ai hpunau Luwita gaw, grai sawng ai mawng ana byin nga ai lam chye dat ai. Shata loi mi sha asak hkrung sana ngu sarawun tsun ai. Monika hte madu wa gaw Karai a magam hta myit rawt let shang lawm nga ai. Raitim, madu wa gaw mara ni hpe lagu galaw nga ai lam Monika chye dat ai. Hariking nbung laru ru hkyen sai majaw, dinghku n nga ai nauna Olibiya gaw, nta hpe kau da nna hprawng ra ai. Nta hpe bai wa yu ai shaloi laru kaw lawm mat sai. Myi grip mi hta sha, dai hpunau nauna ni a prat masa gaw, grai nan galai shai mat ai. Nang mung n myit mada ai sha prat hpe kalang ta galai shai mat shangun ai masa ni hkrum ga ai kun?

² Yehowa hpe sadi dung let nawku nga ai ni gaw, mungkan kaw na masha ni zawn sha, mayak mahkak ni hkrum ai, machyi makaw ni hkrum ai, Karai hpe nju ndawng ai ni a ninghkap ai lam hpe hkrum ai, zingri zingrat ni hkrum ai. Mayak mahkak yawng kaw na anhte hpe Yehowa n makawp maga ya ai. Raitim, karum ya na ngu ga sadi jaw ai. (Esa 41:10) Karai Kasang karum ya ai majaw, yak dik ai aten hta pyi, matut kabu gara lu ai, kaja ai dawdan lam ni jahkrat lu ai, matut sadi dung lu ai. Yehowa karum ya ai lam 4 gaw hpa ni rai kun? Karai a karum shingtau lu na matu anhte hpa galaw ra ai kun? Ndai sumhpa hta hkaja mat ga.

Yehowa Nang Hpe Bau Sin Ya Na

3. Yawn hpa mabyin ni hkrum ai aten hta hpa galaw na matu yak chye ai kun?

³ Mayak mahkak. Yawn hpa mabyin ni hkrum ai aten hta atsawm myit yu na matu, dawdan na matu yak chye ai. Hpa majaw kun? Anhte grai myit ru myit tsang nga ai majaw re. Saiwan mawng nga ai lapran, lam hkawm ra ai zawn, gara de sa ra na hpe n chye ai baw byin chye ai. Shawng hta tsun wa ai nauna 2 a lam hpe myit yu u. “Hariking laru ru nna, nta hten mat ai majaw, hpa galaw ra na hpe n chye mat ai. Grai myit tsang mat ai” ngu Olibiya tsun ai. “Myit daw ai hta n-ga, nhtu hte galun hkrum ai zawn hkamsha ai. Shani shagu galaw ai lam ni hpe pyi n lu galaw mat sai. Dai zawn hkrum na hpe n shadu da ai” ngu Monika tsun ai. Anhte myit daw nga ai aten hta Yehowa gara hku karum ya ai kun?

4. Hpilipi 4:6, 7 hku nga yang, Yehowa hpa ga sadi jaw da ai kun?

⁴ Yehowa karum ya ai lam. “Karai Kasang a ngwi pyaw ai” lam jaw na ngu ga sadi jaw ai. (Hpilipi 4:6, 7 hpe hti u.) Yehowa hte kaja ai hku hkau lam nga ai majaw, myit simsa lam lu ai hpe tsun ai re. “Chye chyang ai nyan yawng hta grau lai ai Karai Kasang a ngwi pyaw ai” lam ngu tsun da ai. Yehowa kaw akroi anoi akyu hpyi ngut ai hpang, mau na zawn myit simsa lam lu mat ai kun? Dai gaw “Karai Kasang a ngwi pyaw ai” lam re.

5. Myit masin hte myit mang ai lam hpe Karai Kasang a ngwi pyaw ai gaw gara hku bau sin ya ai kun?

⁵ “Karai Kasang a ngwi pyaw ai gaw, nanhte a myit masin hte nanhte a myit mang ai hpe, . . . bau sin na” ngu dai daw kaji hta matut tsun da ai. “Bau sin” ngu ai ga si gaw, hpyen hte seng ai ga si rai nna, mare n gasat hkrum hkra sin nga ai hpyen la ni hpe tsun ai shaloi lang ai. Mare chyinghka hta hpyen la ni sin nga ai hpe chye ai majaw, mare masha ni simsa let yup lu ai. Dai hte maren, Karai Kasang a ngwi pyaw ai gaw, myit masin hte myit mang ai lam hpe bau sin ya ai majaw, shim lum ai ngu hkamsha nna, myit simsa ai. (Shk 4:8) Hana a mabyin zawn, manghkang ni kalang ta n mat mat yang pyi, myit simsa lu ai. (1 Sa 1:16-18) Myit simsa mat yang, atsawm sha myit yu na matu, hpaji rawng ai dawdan lam ni jahkrat lu na matu loi mat ai.

6. Karai Kasang a ngwi pyaw ai lam lu na matu hpa galaw ra ai kun? (Sumla hpe mung yu u.)

⁶ Galaw mai ai lam. Manghkang hkrum ai shaloi, sin langa hpe shaga u. Gara hku nna kun? Karai a simsa lam lu ai du hkra akyu hpyi ai hku nna re. (Luk 11:9; 1 Ht 5:17) Shata loi mi sha asak hkrung sana lam chye dat ai shaloi, madu jan Anna hte rau Luwit hpa galaw ai kun? “Dai zawn aten ni hta, hkamja lam, kaga lam ni hte seng nna dawdan lam jahkrat na matu grai yak ai. Akyu hpyi dat yang she, myit simsa mat ai” ngu Luwit tsun ai. Dawdan lam ni jahkrat lu hkra nyan hpaji jaw na matu, myit simsa na matu Yehowa kaw akroi anoi chyahkring hkring akyu hpyi ai. Yehowa karum ya ai ngu hkamsha ai. Nang mung manghkang hkrum ai shaloi, akroi anoi akyu hpyi u. Rai yang, na a myit masin hte myit mang ai lam hpe Karai Kasang a ngwi pyaw ai gaw bau sin ya na ra ai.—Rom 12:12.

Nang Hpe Yehowa Shangang Shakang Ya Na

7. Mayak mahkak hkrum ai aten hta gara hku hkamsha chye ai kun?

⁷ Mayak mahkak. Mayak mahkak hkrum ai shaloi, shawoi na zawn myit na matu, hkamsha na matu, galaw na matu yak ai. Nbung laru hkrum ai sanghpaw gaw, hka leng langai hte langai a lapran, ndi nda byin mat ai zawn, hkamsha lam langai hte langai a lapran hta mung rap ra lam mat mat chye ai. Luwit si mat ai hpang, hkamsha lam amyu myu byin wa ai ngu Anna tsun ai. “Garen ai ngu hkamsha nna myit daw wa ai. Tinang hkum tinang matsan dum ai, kalang lang rai yang gaw, shi ngai hpe tawn da ai majaw, masin pawt taw ai” ngu tsun wa ai. Luwit nga ai shaloi, lit la galaw ya wa ai lam ni hpe, ya tinang hkrai galaw ra ai majaw myit shuk ai. Lata maga mi di mat ai zawn hkamsha ai. Kalang lang, nbung laru ja ai panglai hta du nga ai zawn re. Dai zawn hkamsha ai aten ni hta, Yehowa anhte hpe gara hku karum ya ai kun?

8. 1 Petru 5:10 hta Yehowa hpa ga sadi jaw da ai kun?

⁸ Yehowa karum ya ai lam. Shangang shakang ya na ngu, shi ga sadi jaw da ai. (1 Petru 5:10 hpe hti u.) Nbung laru hkrum ai shaloi, hkrit na zawn rai hkra, sanghpaw gaw ndi nda byin wa chye ai. Raitim, sanghpaw a lahkawng maga hta sanghpaw hpe hkang ya ai rai ni lawm ai. Dai ni gaw, sanghpaw ndi nda n byin hkra hkang ya ai. Bu hkawm ai ni hpe shim lum shangun ai, hkyam sa shangun ai. Raitim, sanghpaw matut gawt yang she, sanghpaw hpe hkang ya ai rai ni atsawm bungli galaw na re. Dai zawn sha, mayak mahkak ni hkrum tim, sadi dung let matut hkawm sa yang, Yehowa shangang shakang ya na re.

9. Hkaja hkingrai ni gaw rap ra lam nga na matu gara hku karum ya ai kun? (Sumla hpe mung yu u.)

⁹ Galaw mai ai lam. Nang mung grai sawng ai hkamsha lam ni byin nga yang, akyu hpyi ai, zuphpawng lung ai, hkaw tsun ai lam ni hpe shakut nna galaw nga u. Shawoi na zawn galaw lu na gaw n re. Raitim, Yehowa gaw rap ra lam nga ai Karai re. (Luka 21:1-4 hte shingdaw yu u.) Tinang hkrai hkaja ai lam ni galaw na matu, myit sawn sumru na matu aten masat da u. Anhte rap ra lam matut nga hkra, sumhpa ni, video ni hpe uhpung kaw na Yehowa lajang da ya ai. JW Library^®, Yehowa Sakse Ni A Matu Hkaja Lam Matsun laika buk zawn, na amyu ga hte lu mai ai hkaja hkingrai ni hpe akyu jashawn nna tam sawk sagawn u. Grai sawng ai hkamsha lam ni byin wa ai shaloi, hkaja hkingrai ni hte hpaji jaw ga ni hpe tam ai ngu Monika tsun ai. Ga shadawn, tam ngu ai lawk hta, “masin pawt ai” ngu ai ga si hpe kayat bang ai. Kalang lang gaw, “sadi n dung ai” (sh) “sadi dung ai” ngu ai lam ni hpe tam ai. Myit simsa mat ai du hkra sumhpa ni hti ai. “Nnan hta gaw grai myit shuk ai. Raitim, matut hti ai shaloi, Yehowa ahpum da ya ai zawn hkamsha ai. Ngai hpe Yehowa chye na ya ai, karum ya ai hpe chye na wa ai” ngu tsun ai. Nang hpe mung Yehowa dai zawn karum ya lu ai. Karai a karum shingtau a majaw, grai sawng ai hkamsha lam ni zim mat ai du hkra, rap ra lam matut nga lu na re.—Shk 119:143, 144.

Nang Hpe Yehowa Madi Shadaw Ya Na

10. Myit ana lu mat yang, gara hku hkamsha chye ai kun?

¹⁰ Mayak mahkak. Myit ana lu mat yang, hkum hkrang mung, myit masin mung, n-gun yawm mat chye ai. Hkala nba hkrum da ai majaw, shawoi na zawn n lu gat mat ai ginsup ninghkrin zawn hkamsha chye ai. Tinang aloi sha lu galaw wa ai ni hpe n lu galaw mat sai, ra sharawng ai lam ni hpe n kam galaw mat ai baw byin chye ai. Elia zawn, n kam rawt mat ai du hkra byin mat chye ai. Yup chyu yup nga mayu chye ai. (1 Hk 19:5-7) Anhte hpe Yehowa gara hku karum ya ai kun?

11. Yehowa karum ya ai kaga lam langai gaw hpa rai kun? (Shakawn 94:18)

¹¹ Yehowa karum ya ai lam. Madi shadaw ya na ngu shi ga sadi jaw da ai. (Shakawn 94:18 hpe hti u.) Hkala nba hkrum da ai ginsup ninghkrin gaw, shamu shamawt na matu karum shingtau ra ai zawn, Karai a magam hta myit rawt let matut shang lawm lu na matu, karum shingtau ra ai. “Na a Karai Kasang ngai Yehowa gaw, Hkum hkrit et; ngai nang hpe karum na de ai, nga nna, na a hkra lata jum let, tsun na nngai” ngu Yehowa amahkam da ai. (Esa 41:13) Hkawhkam Dawi hpe Yehowa dai zawn karum ya wa ai. Chyam dinglik lam ni hkrum ai shaloi, hpyen ni a shinggrup hkrum ai shaloi, Yehowa a “hkra lata ngai hpe shadaw ya” ai ngu tsun ai. (Shk 18:35) Gara hku madi shadaw ya ai kun?

12. Myit kaji nga ai aten hta karum ya na matu kadai ni hpe Yehowa akyu jashawn chye ai kun?

¹² Karum ya mayu wa hkra, kaga ni hpe shadut ya ai hku nna Yehowa madi shadaw ya ai. Dawi myit kaji nga ai aten hta, manang Yonahtan sa nna n-gun jaw ai. (1 Sa 23:16, 17) Elia hpe madi shadaw na matu, Elisha hpe Yehowa lata ai. (1 Hk 19:16, 21; 2 Hk 2:2) Anhte hpe madi shadaw na matu, manang, nta masha, myitsu salang ni hpe akyu jashawn chye ai. Myit hkra machyi ai aten hta, kaga ni hte tsan tsan nga mayu ai, langai hkrai nga mayu ai rai na re. Raitim, Yehowa a karum shingtau lu na matu hpa galaw ra ai kun?

13. Yehowa madi shadaw ya ai hpe lu na matu hpa galaw ra ai kun? (Sumla hpe mung yu u.)

¹³ Galaw mai ai lam. Langai hkrai nga mayu ai myit hpe gasat u. Dai zawn langai hkrai nga ai shaloi, tinang a mu mada ai lam ni gyip wa nna, tinang a lam, tinang a manghkang hpe sha myit wa chye ai. Rai yang, dawdan lam ni atsawm jahkrat lu sana n re. (Gsh 18:1) Myit ana lu ai shaloi, langai hkrai san san hkring la ra chye ai. Raitim, langai hkrai nga ai na wa yang, Yehowa madi shadaw ya ai lam ni hpe nyet kau hkrup chye ai. Dai majaw, nta masha, manang, myitsu salang ni kaw na karum shingtau hkap la u. Nang hpe madi shadaw ya na matu, Yehowa akyu jashawn nga ai ni ngu nna mu u.—Gsh 17:17; Esa 32:1, 2.

Yehowa Shalan Shabran Ya Na

14. Gara zawn hkrit hpa mabyin ni hkrum chye ai kun?

¹⁴ Mayak mahkak. Hpyen ni, dip n-gun ni a majaw hkrit wa ai moi na sadi dung ai mayam ni a lam Chyum Laika hta lawm ai. (Shk 18:4; 55:1, 5) Anhte mung hkrit ai aten ni nga chye ai. Jawng hta, bungli hta ninghkap ai lam ni hkrum chye ai. Nta masha ni, asuya ni a ninghkap ai lam hkrum chye ai. Hkamja lam manghkang a majaw, si na hpe hkrit nga chye ai. Ma langai zawn karum shingtau lam n nga ai ngu hkamsha chye ai. Yehowa gara hku karum ya ai kun?

15. Shakawn 94:19 hta Yehowa hpa amahkam da ai kun?

¹⁵ Yehowa karum ya ai lam. Shalan shabran ya ai, myit simsa lam jaw ai. (Shakawn 94:19 hpe hti u.) Laja lana laru ru ai majaw, hkrit nna yup n pyaw ai ma hpang de, kawa du wa nna yup pyaw mat ai du hkra ahpum da ya ai ngu shingran yu u. Laru gaw naw ru nga ai. Raitim, kawa ahpum da ya ai majaw, shim lum ai ngu hkamsha ai. Anhte mung hkrit hpa lam ni hkrum ai shaloi, hkrit myit n mat dingsa Yehowa hpe ahpum da shangun mayu ai. Rai yang, hpa galaw ra na kun?

16. Yehowa a shalan shabran lam lu na matu hpa galaw ra ai kun? (Sumla hpe mung yu u.)

¹⁶ Galaw mai ai lam. Ayan akyu hpyi na matu, Chyum Laika hti na matu aten masat da u. (Shk 77:1, 12-14) Rai yang, myit ru myit tsang hkrum ai hte kalang ta, Yehowa kaw karum hpyi chye na re. Tinang a myit ru myit tsang lam ni, Yehowa hpe tsun dan u. Chyum Laika hti ai hku nna shi tsun ai hpe madat u. Shalan shabran ya ai hpe hkap la u. (Shk 119:28) Chyum Laika hta lawm ai lam nkau gaw, myit ru myit tsang hkrum ai aten hta laksan hku nna shalan shabran lam jaw ya lu ai. Ga shadawn, Yoba Laika, Shakawn Kungdawn Laika, Ga Shagawp Laika ni hti mai ai. Mahte daw kaba 6 hta lawm ai Yesu a ga ni hpe hti mai ai. Akyu hpyi ai, Chyum Laika hti ai nga yang, Karai Kasang shalan shabran ya ai hpe hkamsha lu na re.

17. Hpa hpe kam mai ai kun?

¹⁷ Prat a yak dik htum aten ni hta, Yehowa rau nga ya na hpe kam mai ai. Galoi mung langai hkrai byin nga na n re. (Shk 23:4; 94:14) Bau sin ya na, shangang shakang ya na, madi shadaw ya na, shalan shabran ya na ngu Yehowa ga sadi jaw da ai. “Myit maju jung ai wa gaw, nang hta shamyet shanat nga ai majaw, nang ban sa nga shangun wu ai” ngu Esaia 26:3 hta tsun da ai. Dai majaw, Karai Kasang hpe kamhpa u. Karai a karum shingtau lam lu na matu, galaw lu ai lam yawng hpe galaw u. Rai yang, yakhkak ai aten ni hta n-gun bai hpring wa na re.