Uphkang Hpung Shang Nnan Lahkawng
2023, January 18, Bat Masum Ya shani, jw.org hta laksan ndau shana ai shiga langai lung wa ai. Yehowa Sakse ni a uphkang hpung shang hku nna, Hpunau Gik Hpalige hte Hpunau Jekhpri Winda yan hpe aya tang sai lam re. Shan gaw, Yehowa a magam hta shaning law law sadi dung wa ai.
Gik Hpalige hte madu jan Nadiya
Hpunau Hpalige gaw, Amerikan mungdan, sinna Pensibeniya hta nga kaba wa ai. Karai Kasang hpe hkrit hkungga ai kanu kawa ni kaw nna tengman ai lam lu la wa ai. Ramma aten, hkaw tsun masha grau ra kadawn ai kahtawng langai de dinghku nawng htawt mat ai. Dai hpang, kade n na yang, 1988, November 20 ya hta, Hpunau Hpalige hkalup hkam ai.
Kanu yan kawa gaw, aten hpring magam hta shang lawm na matu ayan n-gun jaw ai. Ninghtawn hpung kawan ni, Behtela nta masha ni hpe nta de chyahkring hkring saw shaga ai. Hpunau nauna ni grai pyaw nga ai hpe Hpunau Hpalige mu ai. Dai majaw, hkalup hkam nna kade n na yang, 1989, September 1 ya hta, aten galu ningshawng galaw hpang ai. Lahkawng ning na ai hpang, asak 12 hta bandung tawn wa ai hte maren, Behtela hta magam gun na ahkang lu wa ai. 1991, October shata, Brukalin Behtela hta magam gun hpang ai.
Laika Buk Chywi Ai Dap hta 8 ning galaw ai. Dai hpang, Magam Bungli Dap hta lit lu ai. Dai laman, Rasha ga shaga ai nawku hpung hta shaning loi na na shang lawm ai. 2006 hta, nauna Nadiya hte hkungran nna, Nadiya hte rau Behtela hta magam gun ai. Potugi ga shaga ai nawku hpung hta shan magam gun ai. Saping ga shaga ai nawku hpung hta 10 ning jan magam gun ai. Magam Bungli Dap hta shaning law law galaw ngut ai hpang, Sharin Achyin Komiti Rung hta, dai hpang, Magam Dap Komiti Rung hta lit lu ai. 2022, March hta, Uphkang Hpung a Magam Dap Komiti hpe karum ya na matu lit lu ai.
Jekhpri Winda hte madu jan Enjela
Hpunau Winda gaw, Amerikan mungdan, Kelihponiya mung daw, Marita mare hta nga kaba wa ai. Kanu kawa ni kaw na tengman lam chye wa ai. 1986, March 29 hta hkalup hkam ai. Hpang shata hta aten kadun ningshawng galaw ai. Ningshawng galaw ai grai pyaw ai majaw matut galaw byin ai. Aten kadun ningshawng shata loi mi galaw ngut ai hpang, 1986, October 1 hta, aten galu ningshawng galaw hpang ai.
Brang ram aten hta, Behtela kaw magam gun nga ai kahpu lahkawng hpang de sa chyai ai. Kaba wa yang, Behtela hta magam gun na ngu ai myit nga wa ai. 1990, May shata hta, Wawki Behtela hta magam gun na matu saw shaga hkrum ai.
Jasan Jaseng Dap, Hkai Rem Dap, Behtela Rung zawn re ai Dap amyu myu hta bungli galaw wa ai. 1997 hta, nauna Enjela hte hkungran nna, Behtela hta rau magam gun ai. 2014 hta Wawit de htawt ai. Mungkan ginjaw, gawgap bungli hta karum ya ai. 2016 hta, Petasin mare na, Sin Langchyi Hpaji Jaw Dap de htawt ra ai. Dai kaw na Audio/Video Dap hta galaw ai. Mali ning na ai hpang, Wawit de bai htawt wa ai. Magam Dap Komiti Rung hta, Hpunau Winda lit lu ai. 2022, March hta, Uphkang Hpung a Magam Dap Komiti hpe karum ya na matu lit lu ai.
Mungdan akyu a matu shakut shaja nga ai aten ni laman, dai masha “kumhpa” ni hpe Yehowa shaman chyeju nhpaw n ya jaw u ga ngu anhte akyu hpyi ya ga ai.—Ehp 4:8.