“Ga Ningtsa Ting A Tara Agyi Wa” Gaw Matsan Dum Myit Nga Ai Hpe Kam U

1. Shalan shabran lam lu shangun ai gara lam hpe Abraham chye na hkra Yehowa karum ya wa ai kun?

SODOM hte Gomora mare hpe jahten na lam lamu kasa hku nna Abraham hpe Yehowa tsun ai. Yehowa hpe Abraham kam tim, chye na yak taw ai. Dai majaw “ding hpring ai ni hpe n shawp ai ni hte rau, gaja wa nang jahten kau na wu ni? . . . ga ningtsa ting a Tara agyi wa gaw ding man ai hku galaw na n rai ni?” ngu nna san ai. Yehowa gaw ding hpring ai masha ni hpe galoi mung n jahten kau ai lam, tsawra ai jinghku Abraham chye na hkra myit galu let karum ya wa ai. Dai lam kaw na anhte akyu grai lu la ai, shalan shabran lam lu la ai.—Nin 18:23-33.

2. Yehowa a jeyang ai lam ni gaw galoi mung ding hpring ai, matsan dum myit lawm ai hpe hpa majaw kam mai ai kun?

² Yehowa a tara dawdan ai lam ni gaw galoi mung ding hpring ai, matsan dum myit lawm ai ngu ai hpe hpa majaw kam mai ai kun? “Myit masin she yu ai” Karai Kasang re ai majaw re. (1 Sa 16:7) Teng ai. Shi gaw “shinggyim masha ni” a myit masin hpe chye ai. (1 Hk 8:39; 1 Hl 28:9) Karai Kasang chye ai lam ni hpe anhte n chye ai majaw, Karai a tara dawdan ai lam ni hpe hpring tup n chye na ai aten ni nga chye ai. Dai majaw mung, “kadai n sawk ya lu ai shi a jeyang ai” lam ngu kasa Pawlu tsun wa ai re.—Rom 11:33.

3-4. Kalang lang anhte gara hku myit chye ai kun? Ndai sumhpa hta hpa lam hkaja na kun? (Yawhan 5:28, 29)

³ Yehowa gaw tengman ai hpe sha galaw ai hpe chye tim, Abraham zawn anhte mung myit wa chye ai. Ga shadawn, ‘Sodom hte Gomora mare masha ni zawn, Yehowa jahten kau yang pyi, htawm hpang hta asak bai hkrung wa na kun? “Bai hkrung rawt wa na” “n ding n man ai ni” hta shanhte kaw na nkau lawm na kun?’ ngu nna myit chye ai.—Kas 24:15.

⁴ Bai hkrung rawt wa ai lam hte seng nna anhte gara hku chye na da ai hpe bai maram yu ga. “Asak hkrung ai a bai rawt ai de” “tara dawdan hkrum ai a bai rawt ai de” hkrung rawt ai lam hte seng nna kade n na shi ai aten hta chye na wa ai lam hpe galai shai da ai.a (Yawhan 5:28, 29 hpe hti u.) Dai galai shai lam a majaw, chye na ai lam ni hpe kahtap nna galai shai ra wa ai. Dai galai shai ai lam ni hpe ndai sumhpa hte hpang na sumhpa hta hkaja mat na re. Yehowa a dingman ai tara jeyang ai lam hte seng nna anhte hpa ni chye ai, hpa ni n chye ai hpe shawng hkaja yu ga.

ANHTE HPA NI N CHYE AI KUN?

5. Sodom hte Gomora mare hta jahten hkrum ai ni hte seng nna, uhpung a laili laika ni hta moi gara hku sanglang dan wa ai kun?

⁵ N ding hpring ai ni hku nna Yehowa tara jeyang ai ni gaw, hpa byin mat ai ngu ai hpe uhpung a laili laika ni hta moi de sanglang dan wa ai. Sodom hte Gomora mare masha ni gaw, bai hkrung rawt na myit mada lam n nga ai ngu sanglang dan wa ai. Raitim, atsawm akyu hpyi nna sawk sagawn ngut ai hpang, dai zawn tup hkrak lu tsun na kun? ngu ai ga san pru wa ai.

6. N ding hpring ai ni hpe Yehowa tara jeyang wa ai lam Chyum Laika labau nkau hpe tsun dan u. Anhte hpa hpe n chye ai kun?

⁶ N ding hpring ai ni hpe Yehowa tara jeyang wa ai lam Chyum Laika labau law law nga ai. Ga shadawn, Noa hte shi a nta masha ni hta lai nna, mungkan ntsa hta nga ai masha yawng hpe, Hka Sha-u Ing nna yeng seng kau ai. Israela ni hpe akyu jashawn nna, Ga Sadi Tawn Da Ai Mung na amyu baw 7 hpe shamyit kau ai. Lamu kasa langai hpe akyu jashawn nna, Asuri hpyen la 185,000 hpe lana mi hta sha sat kau ai. (Nin 7:23; Trj 7:1-3; Esa 37:36, 37) Shanhte yawng hpe Yehowa htani htana jahten kau ai, bai hkrung rawt na myit mada lam n nga ai ngu Chyum Laika hta asan sha tsun da ai kun? N tsun da ai. Hpa majaw dai zawn lu tsun ai kun?

7. Hka sha-u ing ai aten, Hkanan mung hpe Israela ni zing la ai aten hta jahten hkrum ai ni hte seng nna, anhte hpa hpe n chye ai kun? (sumla hpe yu u.)

⁷ Shanhte langai hpra hpe Yehowa gara hku tara jeyang wa ai, Yehowa a lam sharin la na matu, myit malai la na matu shanhte ahkaw ahkang lu wa ai kun? ngu ai hpe anhte n chye ai. Hka sha-u ing ai hte seng nna Chyum Laika hta ndai hku tsun da ai. Noa gaw “ding hpring ai tara hkaw dan ai sara” re. (2 Pe 2:5) Raitim, manu mana kaba ai sanghpaw li gap nga ai laman, maga mi hta, mungkan ntsa hta nga ai masha yawng hpe hkaw tsun wa ai ngu Chyum Laika hta n tsun da ai. Dai zawn sha, Hkanan mung na nhkru ai masha ni mung, Yehowa a lam sharin la na matu, akyang lailen galai shai na matu, ahkaw ahkang lu wa ai kun? ngu ai hpe anhte n chye ai.

8. Sodom hte Gomora mare masha ni hte seng nna anhte hpa hpe n chye ai kun?

⁸ Sodom hte Gomora mare masha ni hte seng nna gaw gara hku kun? Sodom hta ding hpring ai Lawt nga ai. Raitim, shanhte yawng hpe Lawt hkaw tsun wa ai kun? ngu ai hpe anhte n chye ai. Shanhte grai nhkru ma ai. Raitim, jaw ai lam, shut ai lam hpe gaw chye ai kun? Lawt a manam ni hpe roi rip mayu ai majaw shaw ya shangun ai nhkru ai masha hpung hpe dum u. Dai masha hpung hta, “lasha kaji kaba nlang” lawm ai ngu Chyum Laika hta tsun ai. Dai zawn kaji kaba yawng nhkru ai shara hta Karai a lam, Karai a tsang madang ni a lam sharin la na matu, ahkaw ahkang lu wa ai kun? (Nin 19:4; 2 Pe 2:7) Shanhte yawng hpe bai n jahkrung ya sai ngu, Yehowa dawdan kau ai lam, anhte gaja wa chye lu ai kun? Dai mare hta, ding hpring ai masha 10 pyi n nga ai ngu Abraham hpe Yehowa tsun wa ai. (Nin 18:32) N ding hpring ai majaw mung shanhte hpe Yehowa jahten kau ai re. Raitim, “bai hkrung rawt wa na” “n ding n man ai ni” hta shanhte langai mi mung n lawm ai ngu tup hkrak lu tsun ai kun? N lu tsun ai.

9. Shawlumon hte seng nna anhte hpa hpe n chye ai kun?

⁹ Shawng nnan hta ding hpring tim, matut n ding hpring mat ai ni a lam mung Chyum Laika hta tsun da ai. Ga shadawn, Hkawhkam Shawlumon gaw Yehowa kadai re ai, shi hpe gara hku nawku dawjau ging ai lam atsawm chye ai. Shaman chyeju ni mung lu wa ai. Raitim, hpang de shut shai ai hpara ni hpe nawku wa ai majaw Yehowa grai masin pawt ai. Shawlumon galaw wa ai mara a majaw, Israela amyu masha ni shaning tsa lam hku hkamsha ra wa ai. Shawlumon si mat ai hpe “kaji kawa ni hte rau yup pyaw” ai ngu Chyum Laika hta tsun da ai. Kaji kawa ni ngu tsun ai hta, Hkawhkam Dawi zawn sadi dung ai ni lawm ai. (1 Hk 11:5-9, 43; 2 Hk 23:13) Raitim, dai zawn makoi mayang hkrum ai majaw, Shawlumon hpe Yehowa bai jahkrung sharawt ya na ngu ai lachyum kun? Chyum Laika hta n tsun da ai. “Si mat ai wa gaw yubak hta na lawt pru nga ai” ngu Chyum Laika hta tsun da ai majaw, Shawlumon bai hkrung rawt wa na ngu masha nkau myit na re. (Rom 6:6) Raitim, si mat ai ni yawng bai hkrung rawt wa na ngu ai lachyum kun? N re. Si mat ai majaw sha, asak bai hkrung na matu ging dan ai wa n byin mat ai. Bai hkrung rawt ai lam ngu ai gaw Karai Kasang kaw na kumhpa re. Shi hpe htani htana nawku na matu ahkaw ahkang lu shangun mayu ai ni hpe sha ndai kumhpa jaw ai. (Yob 14:13, 14; Yhn 6:44) Ndai kumhpa hpe Shawlumon lu na kun? ngu ai hpe Yehowa sha chye ai. Anhte n chye ai. Yehowa gaw galoi mung tengman ai hpe sha galaw na ngu ai hpe gaw kam mai ai.

ANHTE HPA HPE CHYE AI KUN?

10. Masha ni hpe tara jeyang ai shaloi Yehowa gara hku hkamsha ai kun? (Ezekela 33:11) (Sumla hpe mung yu u.)

¹⁰ Ezekela 33:11 hpe hti u. Masha ni hpe tara jeyang ai hte seng nna gara hku hkamsha ai hpe Yehowa tsun dan ai. Yehowa gaw “kadai rai ti mung, hten bya ai n hkrum” shangun mayu ai ngu kasa Petru tsun ai. Dai gaw myihtoi Ezekela tsun wa ai lam hte bung ai. (2 Pe 3:9) Ndai ga ni gaw anhte hpe shalan shabran ya ai. Yehowa gaw hpa majaw ngu ai lam n nga ai sha, marai langai hpe htani htana n jahten kau ai lam chye lu ai majaw re. Yehowa gaw matsan dum myit hpring ai. Matsan dum myit madun mai ai aten shagu madun ai.

11. Kadai ni bai n hkrung rawt wa sai kun? Gara hku chye lu ai kun?

¹¹ Bai n hkrung rawt wa na ni a lam hte seng nna anhte hpa chye da ai kun?b Chyum Laika hta ga shadawn kachyi mi sha lawm ai. Yuda Iskarut bai hkrung rawt wa na n re ai lam Yesu tsun ai. (Mrk 14:21; Yhn 17:12) Yehowa Karai Kasang hte Shi a Kasha hpe gumlau ai lam re ai hpe chye ninglen, dingsang mara galaw ai majaw re. (Mrk 3:29) Yesu gaw shi hpe ninghkap ai nawku htung ningbaw nkau mung, bai hkrung rawt wa na n re ngu tsun ai. (Mat 23:33, NWT; Yhn 19:11) Dai sha n-ga, kasa Pawlu mung myit malai n la ai makam masham htak ai ni bai hkrung rawt wa na n re ai ngu sadi jaw ai.—Heb 6:4-8; 10:29.

12. Yehowa a matsan dum myit hte seng nna anhte hpa chye da ai kun? Ga shadawn tsun dan u.

¹² Lahta hta tsun wa ai hte maren, Yehowa gaw matsan dum myit hpring ai. Shi gaw “kadai rai ti mung, hten bya ai n hkrum” shangun mayu ai. Mara kaba tawt lai wa ai masha nkau hpe gara hku matsan dum myit madun ai lam yu yu u. Hkawhkam Dawi gaw num shaw ai, masha sat ai zawn re ai mara kaba ni tawt lai wa ai. Raitim, myit malai lu ai majaw Yehowa matsan dum myit madun nna mara raw ya ai. (2 Sa 12:1-13) Hkawhkam Manashe gaw prat ting ngu na daram nhkru wa ai. Raitim, myit malai lu ai majaw, Yehowa matsan dum myit madun nna mara raw ya ai. (2 Hl 33:9-16) Matsan dum na lam nga shagu, Yehowa matsan dum myit madun ai lam ndai labau kaw na chye lu ai. Mara kaba tawt lai wa ai hpe yin la ai ni, myit malai lu ai ni hpe Yehowa bai jahkrung sharawt ya na re.

13. (a) Ninewe mare masha ni hpe Yehowa hpa majaw matsan dum myit madun ai kun? (b) Ninewe mare masha ni hte seng nna Yesu hpa tsun ai kun?

¹³ Ninewe masha ni hpe Yehowa matsan dum myit madun ai lam mung anhte chye da ai. “Shanhte a nhkru ai amu nye a man de hkrang lung wa ra ai” ngu Yehowa tsun ai. Raitim, Ninewe masha ni myit malai lu ai shaloi, Yehowa matsan dum nna mara raw ya ai. Dai zawn mara raw ya ai hpe Yona masin pawt ai. Ninewe mare masha ni gaw “tinang a hkra lata hte pai lata hpe pyi n chye ginhka ai” ngu Yona hpe Yehowa shadum wa ai. Yehowa gaw, Yona hta na matsan dum myit grau nga ai gaw dan dawng ai. (Yon 1:1, 2; 3:10; 4:9-11) Hpang de, ndai labau hpe lang nna Yehowa a tara rap ra ai lam, matsan dum myit a lam Yesu sharin ya ai. “Tara dara ai nhtoi” hta, myit malai lu ai Ninewe mare masha ni “rawt wa” na ngu tsun ai.—Mat 12:41.

14. “Tara daw dan hkrum ai a bai rawt ai de” hkrung rawt ai lam gaw Ninewe mare masha ni a matu hpa lachyum nga ai kun?

¹⁴ “Tara dara ai nhtoi” hta Ninewe mare masha ni “rawt wa” na ngu ai gaw hpa lachyum kun? “Tara daw dan hkrum ai a bai rawt ai de” hkrung rawt ai a lam Yesu tsun ai. (Yhn 5:29) “Ding man ai ni hte n ding n man ai ni” bai hkrung rawt wa na shaning hkying mi uphkang ai aten a lam Yesu tsun ai re. (Kas 24:15) N dingman ai ni gaw “tara daw dan hkrum ai a bai rawt ai de” hkrung rawt wa na re. Bai hkrung rawt wa ai shaloi, shanhte madat mara ai lam nga, n nga, sharin la wa ai ni hpe hkan sa, n sa ngu ai hpe Yehowa hte Yesu yu nna dawdan na re. Asak bai hkrung wa ai Ninewe masha ni gaw, Yehowa hpe nawku na matu nyet kau yang matut asak hkrung lu na n re. (Esa 65:20) Yehowa hpe sadi dung let nawku na matu dawdan ai ni yawng htani htana asak hkrung lu na.—Dan 12:2.

15. (a) Sodom hte Gomora mare jahten hkrum ai shaloi lawm ai yawng bai hkrung rawt wa na n re ngu hpa majaw n tsun ging ai kun? (b) Yuda 7 hta lawm ai ga ni hpe gara hku chye na lu ai kun? (“Yuda Hpa Hpe Tsun Mayu Ai Kun?” lawk hpe yu u.)

¹⁵ Yesu gaw, shi hte shi a sharin achyin lam ni hpe n hkap la ai ni hta na, Sodom hte Gomora mare masha ni gaw “tara dara ai nhtoi” hta grau hkyam sa na ngu tsun ai. (Mat 10:14, 15; 11:23, 24; Luk 10:12) Hpa hpe tsun mayu ai kun? Tinang a prat na masha ni gaw, Sodom hte Gomora mare masha ni hta na grau nhkru ai hpe chye na matu ga shadawn tsun ai rai kun? “Tara dara ai nhtoi” hta Ninewe mare masha ni “rawt wa” na ngu ai gaw, ga shadawn hku nna tsun ai n re ai hpe dum u. Dai majaw, Sodom hte Gomora mare masha ni a lam hpe mung, ga shadawn hku nna tsun nga ai zawn n re. Ninewe mare masha ni a lam tsun ai shaloi lawm ai, “tara dara ai nhtoi” hte Sodom hte Gomora mare masha ni a lam tsun ai shaloi lawm ai “tara dara ai nhtoi” gaw maren sha re. Dai sha n-ga, “tara daw dan hkrum ai a bai rawt ai de” hkrung rawt na ni hta “n shawp ai” ni mung lawm na ngu Yesu tsun ai hpe dum u. (Yhn 5:29) Ninewe mare masha ni mung, Sodom hte Gomora mare masha ni zawn nhkru ai lam ni galaw wa ai. Ninewe mare masha ni gaw myit malai lu na matu ahkaw ahkang lu wa ai. Dai majaw, Sodom hte Gomora mare masha ni a matu, myit mada lam nga na zawn re. Shanhte kaw na nkau bai hkrung rawt yang hkrung rawt wa na. Yehowa hte Yesu Hkristu a lam shanhte hpe sharin ya na matu, anhte ahkaw ahkang lu wa chye ai.

16. Bai jahkrung sharawt ya na matu Yehowa dawdan ai lam hte seng nna hpa chye lu ai kun? (Yeremia 17:10)

¹⁶ Yeremia 17:10 hpe hti u. Yehowa gaw “myit masin hpe sawk yu nna nhkyun ni hpe manaw yu” ai lam dai chyum daw kaw na chye lu ai. Kadai ni hpe bai hkrung rawt shangun na ngu ai hpe dawdan ai shaloi mung, “langai hte langai hpe tinang a arawn alai hte maren tinang hkam ang ai shabrai karan jaw na” re. Yehowa gaw, ngang kang ra ai aten hta ngang kang ai. Raitim, matsan dum myit madun ra ai aten hta madun ai. Dai majaw, Chyum Laika hta tsun da ai lam hpe tup hkrak n chye lu dingsa kadai gaw bai hkrung rawt wa na n re ngu n tsun ging ai.

“GA NINGTSA TING A TARA AGYI WA GAW” DINGMAN AI HKU GALAW NA

17. Si mat ai ni hpa byin na kun?

¹⁷ Adam hte Ewa gaw Satan hte pawng nna, Yehowa hpe gumlau mat ai aten kaw na, wan hkying hku law ai masha ni si sum ra ai. “Hpyen wa ngu ai si hkrung si htan” gaw asak law law hpe la kau nga ai. (1 Ko 15:26) Si mat ai ni yawng hpa byin mat na kun? Hkristu a hpang hkan ai sadi dung ai ni kaw na 144,000 gaw sumsing lamu hta n si lu ai asak hte bai hkrung rawt wa na re. (Shr 14:1) Yehowa hpe tsawra ai sadi dung ai num, la law law gaw “ding man ai ni . . . a matu, bai hkrung rawt wa na” ni hta lawm ai. Hkristu Shaning 1,000 Uphkang ai aten laman hte hpang jahtum chyam dinglik ai aten laman, matut ding hpring yang, htani htana asak hkrung lu na re. (Dan 12:13; Heb 12:1) Yehowa hpe kalang mung n nawku wa ai ni, “n shawp ai lam hkan galaw ai ni” hte hpawn, “n ding n man ai ni” mung Shaning 1,000 laman Yehowa hpe nawku na matu, galai shai na matu ahkaw ahkang lu na. (Luk 23:42, 43) Raitim, nkau gaw grai nhkru ai. Yehowa hte shi a yaw shada lam hpe dingsang nan ninghkap ai majaw, shanhte hpe n jahkrung sharawt ya na matu Yehowa dawdan ai.—Luk 12:4, 5.

18-19. (a) Si mat ai ni hte seng nna Yehowa a tara dawdan ai lam hpe hpa majaw kam mai ai kun? (Esaia 55:8, 9) (b) Hpang na sumhpa hta hpa lam hkaja na kun?

¹⁸ Yehowa a tara dawdan ai lam yawng hpe tsep kawp kam mai ai kun? Kam mai ai. Abraham atsawm chye na mat ai hte maren “ga ningtsa ting a Tara agyi” Yehowa gaw, hkum tsup ai, nyan hpaji hte hpring ai, matsan dum myit hpring ai. Kasha hpe shaman shakyang ya nna, tara dawdan na ahkang yawng ap da ai. (Yhn 5:22) Yehowa hte Yesu gaw masha langai hpra a myit masin hpe chye ai. (Mat 9:4) Dai majaw, langai hpra hpe tara dawdan ai shaloi “ding man ai hku galaw na.”

¹⁹ Yehowa gaw kaja htum hpe chye ai lam kam ga. Anhte hta tara dawdan lu ai atsam n nga ai, Yehowa hta sha nga ai hpe dum ga. (Esaia 55:8, 9 hpe hti u.) Yehowa a Kasha Hkawhkam Yesu gaw, Kawa a tara rap ra ai lam, matsan dum myit hpe hpring tup kasi la ai. Dai majaw tara dawdan ai lam shagu hpe Yehowa hte Yesu kaw kam ai myit hte ap da ga. (Esa 11:3, 4) Ru tsang kaba laman hta mung masha ni hpe Yehowa hte Yesu gara hku tara dawdan na kun? Anhte hpa ni hpe n chye ai kun? Hpa ni chye ai kun? Hpang na sumhpa hta dai ga san ni hpe bawngban mat na re.