Tsawra Myit Hte Matut Hkaw Tsun U!

1. 2023 ladu hkrum zuphpawng hta hpa ni chye wa sai kun?

2023, ladu hkrum zuphpawnga hta chye na ai lam nkau hpe galai shai kau dat ai lam ni, hkaw tsun bungli hte seng ai myit kahpra hpa ndau shana lam ni hpe na lu wa ai. Ga shadawn, Galu Kaba Ai Babelon jahten hkrum ai hpang hta pyi, Yehowa a amyu masha hte matut mahkai na matu nkau mi ahkaw ahkang lu mai ai lam chye wa sai. 2023, November kaw nna hkaw tsun bungli hta galaw ai lam langai hpra hpe jahpan n jaw ra sai lam hpe mung chye wa ai. Dai zawn galai shai ai lam ni gaw, hkaw tsun bungli nau n ahkyak mat sai ngu ai lachyum kun? Tsep kawp n re.

2. Lani mi htum mat shagu hkaw tsun bungli hpa majaw grau ahkyak wa ai kun? (Marku 13:10)

² Lani mi htum mat shagu hkaw tsun bungli grau nna ahkyak wa ai. Aten nau n nga mat sai majaw re. Hpang jahtum na nhtoi ni hta galaw na hkaw tsun bungli hte seng nna, Yesu hpa hpe tau hkrau tsun ai kun? (Marku 13:10 hpe hti u.) Mahte shingdaw chyum labau hta “jahtum” n du shi yang, mungkan ting hta kabu gara shiga hkaw tsun ra na ngu tsun ai. (Mat 24:14) Jahtum ngu ai gaw, Satan mungkan a jahtum hpe tsun nga ai re. Kade n na yang byin wa na htawm hpang mabyin ni a matu, “shani hte ahkying” hpe Yehowa masat da ngut sai. (Mat 24:36; 25:13; Kas 1:7) Lani mi htum mat shagu, dai shani hte ahkying grau grau ni wa sai. (Rom 13:11) Jahtum du hkra anhte matut hkaw tsun nga ra na re.

3. Hkaw tsun na matu hpa gaw shadut ya ai kun?

³ Myit na zawn re ai ga san pru wa ai. Anhte hpa majaw kabu gara shiga hkaw tsun ai kun? Tsawra myit a majaw re. Hkaw tsun ai gaw, kabu gara shiga hpe, masha ni hpe, Yehowa hte shi a mying ningsang hpe tsawra ai lam madun nga ai re. Lam langai hpra hpe hkaja yu ga.

KABU GARA SHIGA HPE TSAWRA AI MAJAW ANHTE HKAW TSUN

4. Kabu gara shiga na ai aten gara hku bai htang chye ai kun?

⁴ Kabu gara shiga na ai aten hta anhte gara hku hkamsha ai kun? Ga shadawn, nta masha langai ngai hta ma hkum kap ai hpe na ai, grai ra taw ai bungli lu mat ai aten ni hta anhte grai kabu ai. Dai kabu hpa shiga hpe, tinang a nta masha, jinghku ni hpe grai tsun dan mayu na re. Shiga yawng hta kaja htum shiga re ai Karai a Mungdan kabu gara shiga na ai aten hta, grau pyi tsun dan mayu ai n re i?

5. Chyum Laika tengman lam shawng nnan chye ai aten gara hku hkamsha ai kun? (Sumla ni hpe mung yu u.)

⁵ Chyum Laika tengman lam shawng nnan chye ai aten gara hku hkamsha ai hpe bai myit yu u. Tinang hpe sumsing Kawa tsawra ai lam, mungkan grup nta masha byin shangun mayu ai lam, yakhkak jamjau lam ni jahtum kau ya na ngu ga sadi jaw da ai lam, tinang tsawra ai si mat ai ni mungkan nnan hta bai hkrung rawt wa na ngu ai myit mada lam ni hpe nang chye wa sai. (Mrk 10:29, 30; Yhn 5:28, 29; Rom 8:38, 39; Shr 21:3, 4) Dai tengman lam ni a majaw myit hta alum ala hkamsha ai. (Luk 24:32) Chye wa ai lam ni hpe tsawra ai majaw, kaga ni hpe n tsun dan ai sha n nga lu ai.—Yeremia 20:9 hte shingdaw u.

6. Anet hte Rosi a mahkrum madup kaw na hpa chye lu ai kun?

⁶ Hpunau Anetb a mahkrum madup hpe myit yu u. Asak 10 ning hta kawa si mat ai. “‘Awa sumsing lamu de du mat sai kun? (sh) htani htana si mat sai kun?’ ngu myit hkrup ai. Kaga ma ni hpe shanhte a kawa hte mu dat shagu manawn ai.” Kawa a lup de sa nna hput di let, “Karai Kasang e, wa gara kaw du nga sai hpe chye mayu ai” ngu ayan akyu hpyi ai. Kawa si nna 17 ning na ai hpang, Anet chyum ga sharin na matu saw shaga hkrum ai. Kalang ta hkap la kau ai. Si mat ai ni gaw grai yup pyaw nga ai zawn hpa n chye sai lam, htawm hpang hta asak bai hkrung wa na lam chye dat ai. (Hpj 9:5, 10; Kas 24:15) Hpang jahtum, shaning grai na hkra shi chye mayu wa ai ga san a mahtai ni lu mat ai. Chye wa ai Chyum Laika tengman lam ni a majaw grai kabu mat ai. Madu jan Rosi mung Anet hte rau Chyum Laika hkaja wa ai. Hkaja wa ai lam ni hpe grai ra sharawng ai. 1978 hta, shan hkalup hkam ai. Nta masha, manaw manang ni hte madat mayu ai yawng hpe, Chyum Laika tengman lam myit rawt let hkaw tsun ai. Akyu gaw masha 70 jan hpe hkalup hkam ai du hkra rawt jat wa na matu karum ya lu wa ai.

7. Chyum Laika tengman lam hpe tsawra yang hpa galaw na kun? (Luka 6:45)

⁷ Chyum Laika tengman lam hpe tsawra yang, kaga ni hpe n tsun dan ai sha n nga lu ai. (Luka 6:45 hpe hti u.) “An chyawm gaw, mu la, na la sai lam ni hpe n tsun ai, n nga lu ga ai” ngu tsun wa ai tsaban langai na Yesu a sape ni zawn anhte hkamsha ai. (Kas 4:20) Tengman lam hpe tsawra ai majaw, masha law lu ai daram law law hpe tsun dan mayu ai.

MASHA NI HPE TSAWRA AI MAJAW ANHTE HKAW TSUN

8. Kabu gara shiga hkaw tsun na matu hpa gaw shadut ya ai kun? (“Masha Ni Hpe Tsawra U—Sape Shatai U” lawk hpe yu u.) (Sumla hpe mung yu u.)

⁸ Yehowa hte Kasha Yesu zawn, masha ni hpe anhte tsawra ai. (Gsh 8:31; Yhn 3:16) “Myit mada shara mung, Karai Kasang mung n lu ai ni” hpe grai matsan dum ai. (Ehp 2:12) Shanhte hta manghkang ni hte hpring taw ai. Shanhte ra kadawn ai hparan ai ladat anhte hta nga ai. Dai gaw Karai a Mungdan kabu gara shiga re. Dai zawn masha ni hpe tsawra ai, matsan dum ai myit gaw, dang lu ai made kabu gara shiga hkaw tsun na matu shadut ya ai. Kabu gara shiga gaw shanhte hpe myit mada lam jaw ai. Ya aten hta pyi ngwi pyaw ai prat lu shangun ai. Mungkan nnan hta “asak majing” re ai htani htana asak lu na matu ahkaw ahkang mung lu shangun ai.—1 Tm 6:19.

9. Htawm hpang hte seng nna masha ni hpe anhte hpa sadi jaw ai kun? Hpa majaw kun? (Ezekela 33:7, 8)

⁹ Nhkru ai mungkan a jahtum, grai ni nga sai lam sadi jaw na matu mung, masha ni hpe tsawra ai myit gaw shadut ya ai. (Ezekela 33:7, 8 hpe hti u.) Yehowa hpe n nawku ai nta masha ni hte hpawn, masha yawng hpe anhte matsan dum ai. “Mungkan ga nnan lat kaw nna ya du hkra n byin yu ai hte hpang de mung n byin lu na ru tsang kaba” gaw du wa sana hpe n chye ai sha asak hkrung hkawm sa nga ma ai. (Mat 24:21) Dai aten hta hpa ni byin wa na hpe anhte chye mayu ai. Shawng nnan shut shai ai nawku htung jahten hkrum na. Dai hpang, Hara Magedon hta nhkru ai mungkan jahten hkrum na. (Shr 16:14, 16; 17:16, 17; 19:11, 19, 20) Ya aten hta, n kamsham ai nta masha ni hte hpawn, masha law lu ai daram law law sadi jaw ai ga hpe madat nna, chyoi pra ai nawku dawjau lam hta shang lawm wa na matu anhte akyu hpyi ai. Raitim, sadi jaw ga hpe ya aten hta n madat yang gara hku kun?

10. Masha ni hpe matut sadi jaw na matu hpa majaw ahkyak ai kun?

¹⁰ Shawng na sumhpa hta sanglang dan ai hte maren, Galu Kaba Ai Babelon jahten hkrum ai shaloi, myit masin galai shai wa ai ni hpe Yehowa hkye la mayu na re. Dai hku rai yang, ya aten hta masha ni hpe matut nna sadi jaw na matu grau pyi ahkyak ai. Myit yu u. Ya aten anhte sadi jaw yang she, hpang de shanhte dum yang dum wa na re. (Ezekela 33:33 hte shingdaw u.) Anhte sadi jaw ai hpe bai dum nna, aten n hpang hkrat shi yang chyoi pra ai nawku dawjau lam hta lawm yang lawm wa na re. Nnang nawn kaba nawn ngut ai hpang, Hpilipi mare na htawng agyi myit galai shai wa ai zawn, Galu Kaba Ai Babelon jahten hkrum ai zawn, mungkan ting hpe ashun shangun ai mabyin byin ngut ai hpang, myit masin galai shai wa ai ni nkau nga chye ai.—Kas 16:25-34

YEHOWA HTE SHI A MYING NINGSANG HPE TSAWRA AI MAJAW ANHTE HKAW TSUN

11. Yehowa hpe hpung shingkang, arawng sadang, hpung dagu anhte gara hku jaw ai kun? (Shingran 4:11) (Sumla ni hpe mung yu u.)

¹¹ Anhte kabu gara shiga hkaw tsun ai a madung lam gaw, Yehowa Karai Kasang hte shi a chyoi pra ai mying ningsang hpe tsawra ai majaw re. Hkaw tsun bungli gaw, anhte tsawra ai Karai hpe shakawn lu ai lam re ngu mu mada ai. (Shingran 4:11 hpe hti u.) Yehowa Karai Kasang gaw shi hpe sadi dung let nawku ai ni kaw na hpung shingkang, arawng sadang hte hpung dagu lu la na ging dan ai lam anhte myit hkrum ai. “Nga yawng nga pra hte hpe [Karai Kasang] hpan tawn da” ai lam, anhte asak hkrung nga ai gaw Karai Kasang a majaw re ai lam, kam mai ai madi madun lam ni, kaga masha ni hpe tsun dan ai gaw Karai Kasang hpe hpung shingkang, arawng sadang jaw nga ai re. Ahkaw ahkang lu shagu hkaw tsun bungli hta, aten, n-gun, tinang madu ai arai ni hpe akyu jashawn nga ai gaw, tinang a hpung dagu hpe Karai Kasang hpe jaw nga ai re. (Mat 6:33; Luk 13:24; Kol 3:23, 24) Karai Kasang hpe grai tsawra ai majaw, shi a lam tsun dan mayu ai. Mying ningsang a lam, Yehowa gaw gara zawn Karai re ai lam hpe mung tsun dan mayu ai. Hpa majaw kun?

12. Hkaw tsun bungli hta Yehowa a mying ningsang hpe anhte gara hku san seng chyoi pra shangun ai kun?

¹² Yehowa hpe tsawra ai gaw, shi a mying ningsang san seng chyoi pra hkra galaw na matu shadut hkrum ai. (Mat 6:9) Yehowa a lam Satan tsun da ai yawng, shut ai lam, kaga ni hpe anhte tsun dan mayu ai. (Nin 3:1-5; Yob 2:4; Yhn 8:44) Hkaw tsun bungli hta, Yehowa gaw gara zawn Karai re ai, shi a madung atsam ningja gaw tsawra myit re ai, Karai a uphkang lam gaw dingman ai lam, madat mayu ai ni yawng hpe tsun dan mayu ai. Kade n na yang, shinggyim masha ni a yakhkak jamjau lam ni hpe Karai a Mungdan jahtum kau ya nna, ngwi pyaw simsa hkra galaw ya sana lam, masha yawng hpe tsun dan mayu ai. (Shk 37:10, 11, 29; 1 Yh 4:8) Dai zawn tsun dan ai gaw, Yehowa a mying ningsang hpe san seng chyoi pra hkra galaw nga ai re. Yehowa Sakse ngu ai mying hte maren nga nga ai ngu ai hpe chye da ai majaw mung, anhte myit dik ai. Hpa majaw kun?

13. Yehowa Sakse ngu shaga hkrum ai hpe anhte hpa majaw arawng la ai kun? (Esaia 43:10-12)

¹³ Yehowa gaw anhte hpe “shi a sakse” ni ngu shaga ai. (Esaia 43:10-12 hpe hti u.) “Yehowa Sakse ngu shaga hkrum ai gaw, arawng lu htum re” ngu, lai wa sai shaning loi mi hta Uphkang Hpung a laika kaw tsun da ai.c Hpa majaw kun? Ga shadawn langai hpe myit yu ga. Tara rung hta tinang a matu sakse hkam ya na wa hpe lata ai ngu saga. Tinang atsawm chye ai, kam ai, mying kaja lu da ai wa hpe lata na n re i? Dai hte maren, Yehowa mung shi a sakse hku nna anhte hpe lata ai gaw, anhte hpe Yehowa atsawm chye ai lam, shi gaw tengman nna langai sha re ai Karai Kasang re ai lam, sakse hkam ya na hpe kam ai majaw re. Yehowa a Sakse byin lu ai hpe anhte grai arawng la ai. Dai majaw, ahkaw ahkang lu shagu Yehowa a mying ningsang hpe tsun dan ai. Karai a lam shut ai hku tsun da ai lam ni hpe, anhte jaw ai hku bai tsun dan ai. Dai hku nna, hkam la da ai Yehowa Sakse ngu ai mying hte htap htuk hkra nga ai.—Shk 83:18; Rom 10:13-15.

JAHTUM DU HKRA ANHTE HKAW TSUN NGA NA

14. Htawm hpang hta gara myit kahpra hpa lam ni byin wa na kun?

¹⁴ Htawm hpang hta myit kahpra hpa lam ni byin wa sana re. Ru tsang kaba n hpang shi yang, masha law law tengman lam hpe naw hkap la wa na matu, anhte myit mada ai. Shinggyim labau a yak htum aten, ru tsang kaba laman hta pyi, masha law law Satan a mungkan kaw na pru wa nna, Yehowa hpe anhte hte rau shakawn wa chye ai lam, chye lu ai majaw kabu ai.—Kas 13:48.

15-16. Anhte hpa matut galaw nga ra ai kun? Gara aten du hkra kun?

¹⁵ Ndai laman, anhte hta galaw ra na bungli nga ai. Hpang de, galoi n galaw ra sana bungli re. Dai gaw, Karai a Mungdan shiga hpe mungkan ting hkaw tsun na matu re. Dai sha n-ga, matut sadi jaw ra na re. Ndai mungkan a jahtum alawan du wa na hpe masha ni chye ra ai. Rai yang she, jahtum du ai shaloi anhte hkaw tsun wa ai shiga gaw, Yehowa kaw na re ai hpe chye na re.—Eze 38:23.

¹⁶ Hpa galaw na matu dawdan da ai kun? “Ram sai. Hkring sanu!” ngu Yehowa tsun ai aten du hkra, kabu gara shiga hpe, masha ni hpe, Yehowa hpe, shi a mying ningsang hpe tsawra ai myit hte ahkyak shatai let, myit rawt nna matut hkaw tsun nga ga.