“Hkrap Ngu Hkrap Ngoi Re Ai Ni Hte Rau Hkrap Ngu Hkrap Ngoi Nga Mu”

1, 2. Yawn hkyen hkrum nga ai ni hpe shalan shabran lu na matu anhte hpa majaw hkaja ra ai kun? (Ndai sumhpa shawng na sumla hpe yu u.)

“AN a kasha si mat ai laning mi daram rai sai. An grai yawn ai” nga nna Susi tsun ai. Hpunau langai gaw shi a madu jan n myit mada ai sha si mat wa ai shaloi, shi n dang tsun hkra hkamsha nna hkum hkrang hta mung hkra machyi wa ai nga nna tsun dan ai. Yawn hpa lam re. Masha law law gaw, dai zawn yawn hkyen hkrum nga ma ai. Dai ni aten na Hkristan nawku hpung hta, anhte a hpunau nauna ni gaw shanhte tsawra ai ni hpe Hara Magedon n du shi yang, si na matu n myit mada ma ai. Nang tsawra ai marai langai ngai si mat ai (sh) nang chye ai marai langai ngai yawn hkyen hkrum nga ai mai byin ai. Dai rai yang, ‘Yawn hkyen hkrum nga ai ni shalan shabran lam gara hku mu tam na kun?’ nga nna nang myit na re.

² Aten gaw yawn hkyen ai lam yawng hpe shamai ya lu ai nga nna masha nkau mi tsun ai. Raitim, dai gaw jaw ai kun? “Aten gaw shamai ya lu ai gaw teng ai raitim, dai aten hta tinang galaw ai lam ni gaw, shamai ya lu ai ngu tsun yang grau jaw ai” nga nna gaida jan langai tsun wa ai. Hkum hkrang machyi ai hpe tsi na matu aten hte atsawm yu lanu lahku ai lam ra ai. Dai hte maren, myit masin hta hkra machyi ai hpe tsi na matu mung aten hte atsawm lanu lahku lam ra ai. Myit masin hta hkra machyi ai lam yawm wa hkra, yawn hkyen hkrum nga ai ni hpe laksan hku nna hpa gaw karum ya lu na kun?

Yehowa Gaw “Shangwi Shapyaw Na Lam Amyu Myu A Karai Kasang” Re

3, 4. Yehowa gaw anhte a yawn hkyen ai lam hpe chye na ya lu ai lam hpa majaw kam mai ai kun?

³ Matsan dum chye ai anhte a Kawa Yehowa gaw anhte ra nga ai shalan shabran lam hpe jaw lu ai. (2 Korinhtu 1:​3, 4 hpe hti u.) Shi gaw matsan dum chye ai hta kasi kaja htum rai nna shi a masha ni hpe ndai hku ga sadi jaw ai: “Nanhte hpe shalan shabran ai wa gaw . . . ngai nan rai nga nngai.”​​—⁠​Esaia 51:12; Shakawn 119:​50, 52, 76.

⁴ Karai Kasang mung shi a tsawra ai mayam ni re ai Abraham, Isak, Yaku, Mawshe hte Hkawhkam Dawi ni si mat ai hpe hkrum ga ai. (Bu Hkawm 12:​6-8; Mahte 22:​31, 32; Kasa 13:22) Yehowa gaw dai zawn sadi dung ai masha ni hpe, shi bai jahkrung ya na nhtoi hpe myit mada nga ai lam Chyum Laika hta tsun da ai. (Yoba 14:​14, 15) Dai aten hta, shanhte gaw ngwi pyaw hkam kaja let kabu gara nga na re. Yehowa gaw shi a Kasha alat si mat ai hpe mung hkrum ga ai. Karai Kasang gaw Yesu hpe “lani hte lani tsawra wa ai” nga nna Chyum Laika hta tsun da ai. (Ga Shagawp 8:​22, 30, NW) Yehowa gaw shi a Kasha grai nni nkri hkrum let si ra ai hpe mu ai shaloi, myit hta kade daram yawn hkyen hkrum na hpe shingran yu u.​​—⁠​Yawhan 5:20; 10:​17.

5, 6. Yehowa gaw anhte hpe gara hku shalan shabran ya ai kun?

⁵ Yehowa anhte hpe karum ya na lam tsep kawp kam mai ai. Dai majaw, shi hpe galoi mung wanglu wanglang akyu hpyi nna anhte a nchyi nmu, yawn hkyen ai lam hpe tsun dan mai ai. Yehowa gaw shalan shabran ya lu nna anhte a hkamsha lam ni hpe chye na ya ai lam chye lu ai majaw myit shalan lu ai. Raitim, shi dai hpe gara hku galaw ya na kun?

⁶ Yehowa shalan shabran ya ai lam ni kaw nna langai gaw, shi a chyoi pra ai wenyi hku nna re. (Kasa 9:31) Anhte a Kawa, Karai Kasang gaw shi a chyoi pra ai wenyi hpe hpyi ai ni yawng hpe jaw na nga nna Yesu ga sadi jaw da ai. (Luka 11:13) Susi ndai hku tsun ai: “Yehowa anhte hpe shalan shabran ya na matu hput di di let akroi anoi hpyi lajin ai aten ni law law nga wa ai. Akyu hpyi shagu, Karai Kasang a ngwi pyaw ai lam gaw anhte a myit masin hpe teng sha bau sin ya ai.”​​—⁠​Hpilipi 4:​6, 7 hpe hti u. 

Yesu Mung Anhte A Hkamsha Lam Hpe Chye Na Ai

7, 8. Yesu anhte hpe shalan shabran ya na hpe anhte hpa majaw kam mai ai kun?

⁷ Yesu mungkan ntsa nga ai shaloi, shi Kawa a grai kaja ai atsam ningja ni hpe kasi la nna shi galaw ai, tsun ai lam ni hta madun wa ai. (Yawhan 5:19) Yehowa gaw “gawng run ai ni” hte “yawn hkyen hkrum ai ni” hpe shalan shabran ya na matu Yesu hpe mungkan ga de shangun dat ai. (Esaia 61:​1, 2; Luka 4:​17-21) Yesu gaw shinggyim masha ni a yakhkak ai lam ni hpe chye na ya nna, teng sha karum ya mayu ai hpe dai prat na masha ni chye ma ai. ​​—⁠​Hebre 2:17.

⁸ Yesu asak naw kaji ai aten hta, shi grai hkau ai manang ni hte nta masha ni si mat ai hpe hkrum ga na re. Ga shadawn, Yesu hpe bau la ai kawa Yawsep gaw, shi naw kaji ai aten hta si mat ai mai byin ai.a (Lawu matsing hpe yu u.) Asak kaji ai masha langai hku nna, shi a yawn hkyen lam, shi kanu, kahpu, kanau ni a yawn hkyen lam hpe shalan shabran ya na matu kade daram yak na hpe shingran yu u. 

9. Lazaru si mat ai shaloi, myit tau ya ai lam Yesu gara hku madun wa ai kun?

⁹ Yesu gaw hkaw tsun bungli galaw ai laman, shi gaw masha ni hpe teng sha chye na ya nna, shanhte hpe myit tau ya ai lam madun wa ai. Ga shadawn, shi grai hkau ai manang Lazaru si ai shaloi, Mari hte Marhta yawn hkyen hkrum nga ai hpe yu nna shi grai yawn wa ai. Lazaru hpe asak bai jahkrung ya lu na hpe shi chye ai raitim, shanhte hpe grai yu matsan dum ai majaw shi hkrap wa ai.​​—⁠​Yawhan 11:​33-36.

10. Dai ni aten hta anhte a hkamsha lam ni hpe Yesu chye na ya ai lam gara hku kam mai ai kun?

¹⁰ Lai wa sai aten na Yesu a shalan shabran ga ni gaw, anhte hpe gara hku karum ya lu ai kun? Yesu gaw n galai shai ai nga nna Chyum Laika hta asan sha ndai hku tsun da ai: “Yesu Hkristu gaw, mani, dai ni, htawm prat dingsa mung, maren a nga nga ai.” (Hebre 13:​8) Shi gaw anhte hpe htani htana asak hkrung na matu galaw ya lu ai majaw, shi hpe “asak Madu” nga nna tsun da ai. Yesu gaw yawn hkyen ai lam hpe shi nan hkrum wa ai majaw, atsawm chye na ya ai. Dai majaw, “agung alau hkrum ai ni hpe shalan shabran” ya lu ai. (Kasa 3:15; Hebre 2:​10, 18) Dai majaw, ya aten hta mung, masha ni nchyi nmu hkrum ai hpe Yesu matsan dum ai lam kam mai ai. Shi gaw anhte a yawn hkyen ai lam hpe chye na ya nna, “kyindut hkrum ai aten” hta anhte hpe shalan shabran ya lu ai.​​—⁠​Hebre 4:​15, 16 hpe hti u. 

“Chyum Laika Ni A Shangwi Shapyaw Ai Ga”

11. Gara Chyum daw ni gaw nang hpe shalan shabran ya lu ai kun?

¹¹ Lazaru si ai shaloi Yesu grai yawn wa ai lam Chyum Laika hta madun da ai gaw, shalan shabran ya ai Chyum daw ni kaw nna langai sha naw re. Chyum Laika hta, “anhte shakut sharang nga lu nna, Chyum Laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai” nga nna tsun da ai. (Roma 15:​4) Nang yawn hkyen hkrum yang, shalan shabran lam lu na matu lawu na Chyum daw ni gaw karum ya lu ai:

• “Dai Madu gaw myit daw myit hten ai ni hte ani sha nga nga nna; myit mada shara n nga mat sai ni hpe shi hkye hkrang la nga ai.”​​—⁠​Shakawn 34:​18, 19, JCLB.

• “Ngai myit ru myit tsang hkrum hkra nga ai shaloi; nang [Yehowa] ngai hpe shalan shabran ai hte kabu gara shangun nga ndai.”​​—⁠​Shakawn 94:​19, JCLB.

• “Ya, anhte hpe tsawra nga nna, chyeju a jaw e anhte hpe htani htana shangwi shapyaw ai hte, mai kaja ai myit mada shara jaw ai, anhte a Wa Karai Kasang hte anhte a Madu Yesu Hkristu nan, nanhte a kraw lawang hpe shangwi shapyaw nga nna, mai kaja ai amu bungli hte ga sumtu amyu myu hta, nanhte hpe shangang jahkang nga myit ga law.”​​—⁠​2 Htesaloni 2:​16, 17.b​​—⁠​Lawu matsing hpe yu u.

Nawku Hpung Gaw Shalan Shabran Lam Jaw Lu Ai Madung Shara Re

12. Anhte gaw kaga ni hpe gara hku shalan shabran ya lu ai kun?

¹² Yawn hkyen hkrum nga ai ni gaw Hkristan nawku hpung hta mung shalan shabran lam lu mai ai. (1 Htesaloni 5:11 hpe hti u.) “Gawng run ai” ni hpe nang gara hku shalan shabran ya nna n-gun jaw lu na kun? (Ga Shagawp 17:22) “Atsin sha nga ai aten hte, ga tsun na aten” mung nga ai hpe dum u. (Hpaji 3:​7) Yawn hkyen ai ni gaw shanhte a hkamsha lam ni hte myit ai lam ni hpe tsun dan ra ai nga nna gaidan jan langai re ai Dalin tsun ai. Shanhte dai hku tsun dan ai shaloi, atsawm sha madat ya na matu grai ahkyak ai. Tinang hkum tinang sat si mat ai kahpu langai nga ai Junia ndai hku tsun wa ai: “Yawn hkyen hkrum ai ni a yawn hkyen ai lam hpe tsep kawp n chye na ya lu yang pyi, shanhte gara hku hkamsha nga ai hpe chye na ya mayu ai myit nga na matu ahkyak ai.”

13. Yawn hkyen ai lam hte seng nna anhte hpa hpe myit dum ra ai kun?

¹³ Anhte yawng gaw, hkamsha ai hte yawn hkyen ai hpe madun ai lam langai hte langai n bung ai hpe dum ra ai. Kalang lang, anhte kade daram hkamsha nga ai hpe tup hkrak tsun dan na matu n mai byin ai. Chyum Laika hta ndai hku tsun da ai: “Myit masin gaw, tinang ru yak ai hpe, dum nga ai; Tinang kabu gara ai hta, tsasam wa lawm lu ai n rai.” (Ga Shagawp 14:10) Marai langai gaw shi kade daram hkamsha nga ai hpe tsun dan yang pyi, shi hpa tsun mayu ai hpe kaga ni chye na yang she chye na ya na.

14. Yawn hkyen ai ni hpe shalan shabran na matu hpa galaw lu ai kun?

¹⁴ Yawn hkyen hkrum nga ai marai langai ngai hpe hpa tsun ra na lam chye na matu yak chye ai. Raitim, Chyum Laika hta “hpaji rawng ai wa a shinglet chyawm gaw, ana pyi shamai ya lu ai” nga nna tsun da ai. (Ga Shagawp 12:18) Masha law law gaw, Nang Tsawra Ai Marai Langai Ngai Si Mat Ai Shaloi (BU) ngu ai laika buk kaw na shalan shabran ya lu ai ga si ni hpe tam mu ma ai.c (Lawu matsing hpe yu u.) Kalang lang, “hkrap ngu hkrap ngoi re ai ni hte rau hkrap ngu hkrap ngoi” ai mung kaja htum karum shingtau lam re. (Roma 12:15) Kalang lang, hkamsha lam ni hpe shapraw na lam langai gaw, hkrap ai lam re nga nna madu wa si mat ai Gabi tsun ai. Shi ndai hku bai tsun ai: “Nye a manang ni ngai hte rau hkrap ai shaloi shalan shabran lam lu ai. Dai aten hta, ngai langai sha yawn hkyen nga ai ngu n hkamsha mat ai.”

15. Kaga masha ni hpe shalan shabran na matu yak taw ai nga yang, gara hku galaw mai ai kun? (“Shalan Shabran Na Matu Ga Si Ni” ngu ai lawk hpe mung yu u.)

¹⁵ Marai langai ngai hpe shalan shabran ga tsun na matu yak taw ai nga yang, postcard langai, e-mail (sh) laika shagun ai gaw grau kaja chye ai. Shalan shabran ya ai Chyum daw langai, si mat ai masha hte seng nna nang myit dum ai grai kaja ai atsam ningja langai (sh) nang dum nga ai shi a lam langai ngai hpe tsun dan mai ai. “N-gun jaw ai laika langai hpe hkap la lu ai shaloi (sh) kanawn mazum na matu hpunau nauna ni saw shaga ai shaloi, dai gaw ngai hpe shalan ya ai” ngu Junia tsun ai. “Dai zawn tsawra myit madun ai majaw, ngai hpe tsawra ma ai, lanu lahku ma ai nga nna hkamsha ai.”

16. Kaga ni hpe shalan shabran ya lu ai tang du ai lam langai gaw hpa rai a ta?

¹⁶ Anhte a akyu hpyi ai lam gaw, yawn hkyen hkrum nga ai hpunau, nauna ni hpe karum ya lu ai. Anhte gaw shanhte a matu (sh) shanhte hte rau akyu hpyi mai ai. Shanhte hte rau akyu hpyi yang, nang hkamsha nna hkrap mayu wa na hpe tsang yang pyi, na a myit masin mahkra hte hpyi ai lam gaw shalan shabran ya lu ai atsam byin lu na re. “Kalang lang, nauna ni ngai hpe sa shalan shabran ya ai shaloi, akyu hpyi ya rit nga nna ngai hpyi shawn ai. Shawng nnan hta gaw shanhte akyu hpyi ga tsun na matu yak ai. Raitim, ga yan loi mi tsun ngut ai hpang, shanhte a nsen gaw grau ja wa nna myit masin mahkra hte hpyi ai akyu hpyi ga byin wa ai. Shanhte a ngang kang ai makam masham, tsawra myit hte myit tau ya ai lam gaw nye a makam masham hpe shangang ya ai” ngu Dalin tsun ai.

Matut Nna Shalan Shabran Ya U

17-19. Anhte hpa majaw matut nna shalan shabran ya ra ai kun?

¹⁷ Marai langai hpra gaw kade daram na hkra yawn hkyen nga na hpe tup hkrak chye na matu n mai byin ai. Tsawra ai marai langai si mat ai shaloi, shawng nnan hta manang ni hte jinghku ni gaw sa shalan shabran ya na re. Raitim, shanhte dai zawn sa shalan shabran ya ngut ai hpang pyi, yawn hkyen hkrum nga ai ni gaw shalan shabran lam matut nna naw ra nga ai. Dai majaw karum ya na matu jin jin rai nga u. “Jinghku wa gaw tut nawng tsaw ra nga nna, Ru yak hkrum ai nhtoi a matu, kahpu kanau tai nga ai.” (Ga Shagawp 17:17) Yawn hkyen hkrum nga ai ni hpe anhte matut nna shalan shabran ya ra ai.​​—⁠​1 Htesaloni 3:7 hpe hti u.

¹⁸ Masha langai gaw gara aten hta raitim, yawn hkyen ai lam kalang ta byin wa chye ai hpe myit dum u. Yawn hkyen ai lam gaw, ladu hkrum nhtoi, yu ngwi, sumla ni, galaw hkawm sa ai lam ni, sama, nsen hte duhkra ladaw ni a majaw byin pru wa chye ai. Yawn hkyen hkrum nga ai gaida (sh) shingkra gaw zuphpawng (sh) Myit Dum Poi zawn re ai ni hta shawng nnan marai langai sha lung ra ai shaloi, grai yawn hkyen ai lam byin chye ai. Hpunau langai ndai hku tsun ai: “Nye madu jan si mat ai hpang, shawng nnan na hkungran poi ladu hkrum nhtoi du yang, ngai grai hkamsha na hpe chye ai, dai gaw n loi ai. Raitim, hpunau nauna nkau gaw, ngai hte grai hkau ai manang ni hte kanawn mazum poi kaji galaw na matu lajang ma ai. Dai majaw, ngai langai sha re nga nna n hkamsha sai.”

¹⁹ Yawn hkyen hkrum nga ai ni gaw laksan nhtoi hta she n-gun jaw lam ra ai n re ai hpe dum ra ai. “Ladu hkrum nhtoi hta she n re ai sha, kaga aten ni hta manang ni chyahkring hkring karum shingtau ya ai gaw grai akyu lu ai. Dai hku matut nna karum ya ai gaw grai manu dan nna shalan shabran lam lu ai” nga nna Junia tsun dan ai. Anhte gaw shanhte a yawn hkyen ai lam (sh) garen gari ai lam yawng mat mat hkra n galaw ya lu tim, shanhte a matu lama ma galaw ya ai hku nna shalan shabran ya lu ai. (1 Yawhan 3:18) Gabi ndai hku tsun ai: “Ngai grai yakhkak ai aten shagu hta karum ya ai myitsu salang ni hpe jaw da ai majaw Yehowa hpe chyeju dum ai. Shanhte a majaw, Yehowa gaw shi a tsawra myit rawng ai lata hte ngai hpe shinggrup da ai ngu hkamsha lu ai.”

20. Yehowa a ga sadi ni gaw hpa majaw shalan shabran ai lam a madung re ai kun?

²⁰ Shalan shabran ya ai lam yawng a Karai Kasang Yehowa gaw, hkrung rawt ya ai aten hta yawn hkyen ai lam yawng hpe tsep kawp yeng seng kau ya na hpe chye lu ai majaw, anhte myit shalan lu ai. (Yawhan 5:​28, 29) Karai Kasang ndai hku ga sadi jaw da ai: “Shi gaw si hkrung si htan hpe mayu kau nu ai; Madu Yehowa gaw myi man shagu a myi prawi katsut kau na ra ai.” (Esaia 25:​8) Dai hpang, “hkrap ngu hkrap ngoi re ai ni hte rau hkrap ngu hkrap ngoi” na malai, mungkan hta nga ai yawng gaw “kabu gara re ai ni hte rau kabu gara” nga na re.​​—⁠​Roma 12:​15.