Yehowa Sakse Ni Gaw Yesu hpe Kam Sham Ai Kun?

Kam sham ai. “Lam gaw ngai rai nga nngai, tengman ai hte asak mung, ngai rai nga nngai: ngai hta nna n rai yang gaw, kadai mung nye Wa kaw n du wa lu ai” nga nna tsun ai Yesu hpe anhte kam sham ai. (Yawhan 14:6) Yesu gaw sumsing lamu kaw nna, mungkan ga de yu wa ai. Shi a hkum tsup ai asak hpe gawng malai shagu hkungga hku nna jaw wa ai hpe anhte kam sham ai. (Mahte 20:28) Shi si hkam ai hte hkrung rawt ai lam hpe kam sham ai ni gaw htani htana asak lu la na re. (Yawhan 3:16) Yesu gaw ya Hkawhkam hku nna Karai Kasang a sumsing lamu Mungdan hpe uphkang nga sai. Kade n na yang, dai mungdan gaw mungkan ting hpe ngwi pyaw simsa lam jaw ya na hpe mung, anhte kam sham ai. (Shingran 11:15) Yesu tsun wa ai ndai ga hpe mung anhte kam sham ai: “Wa gaw ngai hta grau kaba nga ai.” (Yawhan 14:28) Yesu gaw Chyahtum Chyalai N-gun Rawng Ai Karai Kasang n re ai majaw, anhte shi hpe n nawku ai.