Nse Nsa Sumla Yu Ai Akyang Nga Taw Yang Gara Hku Galaw Ra Na Kun?

Galaw lu ai lam

Nse nsa sumla gaw hpa a matu re ai hpe chye u. Nse nsa sumla gaw, Karai Kasang hpan da ai sari rawng ai arai hpe sari jahpoi ai hta lai nna hpa akyu n rawng ai. Nse nsa sumla hpe dai hku mu mada da na nga yang, “n hkru ai hpe ndawng kau” lu na matu karum ya na re.​—Shakawn 97:10.

Lu wa na n kaja ai akyu ni hpe myit u. Nse nsa sumla gaw, sumla hta lawm ai ni ma, sumla hpe yu ai ni hpe mung, manu n nga mat shangun ai. Chyum Laika hta ndai hku tsun da ai: “Hpaji rawng ai wa gaw, n kaja ai hpe tau chye nna, koi kau nga ai.”​—Ga Shagawp 22:3.

Ga shaka galaw da u. “Ngai gaw numsha langai hpe ngang gayut ai myi hte galoi mung n mada yu na ngu, ga sadi dagam da se ai” ngu sadi dung ai Yoba tsun wa ai. (Yoba 31:1, JCLB) Lawu hta madun da ai ni gaw nang galaw mai ai ga shaka n kau re.

• Ngai langai sha nga ai aten hta Intanet n lang ai.

• Ndum shami pru wa ai nhtap htuk ai sumla ni hpe kalang ta pat kau na.

• Bai yu hkrup mat yang, kunghpan ai manang langai hpe tsun dan na.

Dai lam hte seng nna akyu hpyi u. Shakawn Kungdawn sara gaw, Yehowa kaw ndai hku akyu hpyi wa ai: “Kaman lila hpe n mu n ga, nye a myi kayin la ya e.” (Shakawn 119:37) Karai Kasang gaw nang hpe awng dang shangun mayu ai. Nang akyu hpyi na nga yang, jaw ai hpe galaw na matu shi n-gun jaw na re.​—Hpilipi 4:13.

Marai langai ngai hpe tsun dan u. Marai langai ngai hpe tsun dan ai gaw, dai akyang hpe shamat kau lu na matu ahkyak ai lahkam re.​—Ga Shagawp 17:17.

Ndai hpe dum u: Nse nsa sumla hpe kalang koi lu yang, ahkyak ai awng dang lam langai hpe lu dat ai re. Ndai awng dang lam hte seng nna Yehowa Karai Kasang hpe tsun dan u. N-gun atsam jaw ai majaw chyeju dum ai lam tsun dan u. Nse nsa sumla hpe koi ai gaw, Yehowa a myit pyaw hkra galaw nga ai re.​—Ga Shagawp 27:11.