Hkumshan roi rip na matu shakut ai hkrum wa yang hpa galaw ging ai kun?

Hkumshan roi rip na matu shakut ai ngu ai gaw hpa rai kun?

Hkumshan roi rip na matu shakut ai hta, ngang hte seng nna n htap htuk ai hku tsun ai, sa jum ai ni zawn re ai n htap htuk ai arawn alai yawng lawm ai. Raitim kalang lang gaw, shala ai kun? nse nsa galaw ai kun? ngu ai hte hkumshan roi rip na matu shakut taw ai kun? ngu ai hpe ginhka na matu yak chye ai.

Hkumshan roi rip na matu shakut nga ai hpe gara hku chye lu ai kun? Hkumshan roi rip na matu shakut ai hte seng ai ga san hpe htai nna mahtai hpe tam yu u!

Hkumshan roi rip na matu shakut ai hpe hkrum ai lam gaw, jawng lung ai aten hta sha n-ga, hpang de mung hkrum wa chye ai manghkang re. Gara hku bai galaw ra na lam hpe, ya kaw nna sharin la da yang, nang bungli shang ai shaloi dai zawn hkrum wa yang, atsawm hparan lu na re. Kaga ni hkra machyi hkra dingbai dingna jaw chye ai masha ni hpe pyi, lu jahkring na re.

Hkumshan roi rip na matu shakut ai hkrum wa yang hpa galaw ging ai kun?

Hkumshan roi rip na matu shakut ai ngu ai gaw hpa hpe tsun ai? Dai hku hkrum wa yang gara hku galaw ra na? ngu ai hpe chye da yang, hkumshan roi rip na matu shakut ai masa hpe grau nna jahkring kau lu ai. Masa lam masum hte dai masa lam langai hpra hpe gara hku hparan lu ai lam myit yu ga.

MASA LAM:

“Bungli galaw ai shara kaw, ngai hta asak grai kaba ai bungli manang nkau mi gaw, ngai hpe grai tsawm ai lam tsun nna shanhte asak 30 ning daram bai kaji mayu ai ngu tsun ai. Shanhte kaw na langai mi gaw, nye hpang hkan sa wa nna ngai na kara hpe manam ai!”​—Tabihta, 20 ning.

Tabihta ndai hku myit yang myit na re: ‘Ngai n chye masu su kau nna hkam sharang na nga yang, shi hkring yang hkring mat na re.’

Dai hku myit ai gaw akyu n nga ai: Hkumshan roi rip na matu shakut ai hpe n chye masu su kau ai rai yang, chyahkring hkring dai hku sha galaw hkrum nna grau pyi sawng wa na ngu, ndai lam hte seng nna tam sawk sagawn ai ni tsun ai.

Ndai hpe galaw yu u: Shi galaw ai hte tsun ai hpe hkam sharang nga na n re ai lam hkumshan roi rip na matu shakut ai wa hpe myit simsa let dan dan leng leng tsun u. “Ngai hpe n htap htuk ai hku wa hkra ai ni hpe, ngai bai kayin yu nna hpang kalang dai hku galoi mung hkum wa hkra ngu tsun dat ai. Dai gaw shanhte hpe kajawng mat shangun ai” ngu asak 22 ning re ai Tayin tsun ai. Dai wa gaw atik anang naw galaw nga ai rai yang, asum hkum jaw. Kaja ai akyang lailen hte seng ai tsang madang hpe “hkan sa nna myit su kunghpan ai hte kam sham ai lam hta atsawm sha myit hkawn” nga na matu chyum Laika hta hpaji jaw da ai.​—Kolose 4:12, Kabu Gara Shiga Chyum Laika.

Nang hpe jahkrit shama wa yang gara hku galaw na? Dai hku byin wa yang, shi hte myiman hkrum nna hkum hparan. Byin mai yang dai kaw na alawan pru mat u. Tinang kam mai ai masha kaba ni kaw karum hpyi u.

MASA LAM:

“Ngai tsang 6 shaning hta, jawng kaw ngai lam hkawm nga yang num kasha lahkawng ngai hpe gang da ai. Langai gaw num shada ra hkat ai wa rai nna ngai hpe ra taw ai. Ngai ningdang kau tim, shani shagu jamjau jaw ai. Kalang mi hta, shanhte ngai hpe shakum de htu kanawng da ai.”​—Bituriya, 18 ning.

Bituriya ndai hku myit yang myit na re: ‘Kaga ni hpe ndai lam tsun dan yang, ngai hpe gawngkya ai wa ngu shadu mat na re. Ngai tsun ai hpe mung kadai kam na n re.’

Dai zawn myit ai gaw akyu n nga ai: Nang marai langai ngai hpe tsun dan na matu hkrit tsang taw ai nga yang, roi rip na matu shakut ai wa gaw grau sawng wa nna kaga ni hpe pyi dai hku sha hkan galaw chye ai.​—Hpaji 8:11.

Ndai hpe galaw yu u: Karum hpyi u. Hkumshan roi rip ai wa hkring mat hkra, na a kanu kawa ni hte sara, saranum ni gaw karum ya lu ai. Nang tsun ai hpe masha ni ahkyak n shatai ya yang gara hku di na kun? Ndai hku galaw yu u: Nang hpe dingbai dingna jaw shagu, dai hpe ahkri ahkrai ka da u. Nhtoi, ahkying aten, byin ai shara hte shi tsun ai ga ni hpe mung ka shalawm u. Dai hpe na a kanu kawa ni hte sara, saranum ni hpe jaw u. Masha law law gaw n-gup ga hte tsun ai hta na laika hte tsun ai hpe grau nna ahkyak shatai ma ai.

MASA LAM:

“Rakbi gawdin hpung kaw na la kasha langai hpe ngai grai hkrit ai. Shi gaw pe 6 jan galu nna, pau 300 daram nga na re. Ngai hte hkum shan kanawn mayu taw ai. Laning mi ting, shani shagu ngu na daram ngai hpe dingbai dingna jaw ai. Lani mi, jawng gawk kaw kadai n nga ai aten, ngai hpang de sa wa ai. Ngai gaw hku wawt hku hku gum htawn nna shinggan hte hprawng mat ai.”​—Julieta, 18 ning.

Julieta ndai hku myit yang myit na re: ‘La kasha ni gaw dai hku sha re.’

Dai hku myit ai gaw akyu n nga ai: Yawng gaw dai hpe hkap la da ai nga yang hkumshan roi rip na matu shakut ai wa gaw shi a lailen hpe galai shai na n re.

Ndai hpe galaw yu u: Dai masa lam hpe mani hpa byin hkra galaw kau ai (sh) mani sumsai hte bai htang ai baw hkum galaw. Gara hpe gaw hkam lu ai, gara hpe gaw hkam sharang nga na n re ai lam chye mat hkra, na a myiman nsam hte bai htang ai lam ni hta dan leng hkra galaw u.

Ngai hpa galaw lu na kun?

Kaja Byin Ai Mabyin 1:

“Masha ni hpe zai ai hku bai htang ai hpe ngai n ra ai. Dai majaw, masha ni ngai hpe dingbai dingna jaw wa yang pyi, shanhte hpe n galaw na matu tsun ai. Raitim, shanhte hpe tsun ai shaloi, ngang ngang kang kang hte n re ai sha, kalang marang mani sum sai hte bai tsun ai. Dai majaw shanhte gaw ngai nse nsa galaw ai ngu shadu ma ai.”​—Tabihta.

• Tabihta a shara hta nang rai yang, dingbai dingna jaw ai ni hpe gara hku bai htang na kun? Hpa majaw kun?

• Gara lailen gaw shanhte hte nse nsa galaw nga ai ngu shadu shangun ai kun?

Kaja Byin Ai Mabyin 2:

“Jawng kaw, hkumhkrang shamu shamawt lam galaw sharin ai aten hta, la kasha nkau mi tsun ai matsat shabat ga ni kaw na hpang wa ai re. Bat nkau mi daram shanhte tsun ai hpe ngai n chye masu su wa ai. Raitim, dai gaw grau na sawng wa ai. Dai hpang la kasha ni gaw nye makau wa dung nna ngai hpe wa ahpum ai. Ngai shanhte hpe kanawng kau ai. Raitim shanhte matut galaw taw ai. Hpang jahtum, dai ni kaw na langai gaw, matsat shabat laika ka nna ngai na lata hta bang ya ai. Dai laika hpe sara hpe jaw dat ai. Dai la kasha jawng jahkring kau hkrum ai. Shawng nnan kaw nna sara hpang de sa ging ai hpe ngai chye dat ai.”​—Sabina.

• Sabina gaw sara hpang de hpa majaw jau jau n sa ai ngu nang shadu ai rai? Shi kaja ai dawdan lam jahkrat ai ngu nang shadu ai i? hpa majaw re ai kun? (sh) hpa majaw n re ai kun?

Kaja Byin Ai Mabyin 3:

“Namdum hta nye kanau lasha Garet hpang de kaga lasha langai sa wa ai. Dai lasha gaw makau kaw kap nna, ‘ngai hpe manam u’ ngu tsun ai. Garet gaw n kam ai ngu tsun ai. Raitim, dai lasha gaw n pru mat ai. Dai majaw, Garet gaw dai wa hpe kanawng nna hprawng mat ai.”​—Suzanne.

• Garet gaw hkumshan roi rip na matu shakut hkrum wa ai ngu nang shadu ai kun? Hpa majaw re kun? (sh) Hpa majaw n re ai kun?

• Lasha nkau gaw kaga lasha ni shanhte hpe hkumshan roi rip na matu shakut ai hpe ninghkap na matu hpa majaw htingnut chye ai kun?

• Masa lam hpe Garet hparan wa ai gaw jaw ai hpe nang myit hkrum ai kun? Nang rai yang gara hku galaw na kun?