Yehowa Sakse ni gaw Mung masa lam hta hpa majaw n shang lawm ai kun?
Yehowa Sakse ni gaw Chyum Laika hta madung ai makam masham a majaw, mung masa lam ni hta n shang lawm ai re. Anhte ni gaw mung masa pati ni (sh) dat kasa ni hpe karum ya ai, ra lata me bang ai ni n galaw ga ai. N shang lawm shing jawng ga ai. Asuya galai shai na matu galaw ai shamu shamawt lam ni hta mung anhte n lawm ga ai. Chyum Laika hta tsun da ai ngang kang ai lam ni a majaw n shang lawm ai re.
Anhte ni gaw mung masa aya hpe n hkap la wa ai Yesu hpe kasi la ga ai. (Yawhan 6:15) Mungkan hte n seng na matu, sape ni hpe Yesu sharin ya wa ai. Dai majaw, shi a sape ni gaw mung masa lam hta n shang lawm ging ai.—Yawhan 17:14, 16; 18:36; Marku 12:13-17.
Anhte ni gaw Karai Kasang a Mungdan hpe sha sadi dung ga ai. Dai mungdan hte seng nna Yesu ndai hku tsun wa ai: “Dai mungdan a kabu gara shiga gaw, . . . mungkan ting hta e hkaw dan lu na rai nga ai.” (Mahte 24:14) Anhte ni gaw, Karai Kasang A Mungdan du na ni sai, nga nna hkaw tsun na matu lit ap da hkrum ai dat kasa ni re. Dai majaw, tinang nga ai mungdan sha n-ga, mungdan shagu a mung masa lam ni hta n shang lawm ga ai.—2 Korinhtu 5:20; Ehpesu 6:20.
Anhte ni gaw mung masa lam hta n shang lawm ai majaw, gara mung masa lam hpe hkap la ai wa hpe raitim, Karai Kasang a Mungdan hte seng ai kabu gara shiga hpe wanglu wanglang tsun dan lu ai. Mungkan a manghkang ni hpe hparan ya na matu, Karai a Mungdan hpe sha myit mada ga ai. Anhte a tsun ai ga, galaw ai lam ni hte dai hpe madun ga ai.—Shakawn 56:11.
Anhte ni gaw mung masa lam hta myit n hkrum ai lam n nga ai majaw, mungkan grup hpunau nauna ni hku nna kahkyin gumdin nga ga ai. (Kolose 3:14; 1 Petru 2:17) Mung masa lam hta shang lawm ai nawku htung ni gaw, hpung masha ni hpe myit garan shangun ai.—1 Korinhtu 1:10.
Asuya ni hpe anhte hkungga ai. Mung masa lam hta anhte n shang lawm tim, asuya ni hpe anhte hkungga ga ai. “Shinggyim masha nlang hte gaw, daru magam ahkang aya lu ai ni a npu e ataw nga mu” ngu ai Chyum Laika lam matsun hte maren re. (Roma 13:1) Anhte ni gaw tara upadi hpe hkan sa ai. Ahkun hkanse ni bang ai. Shawa masha a matu asuya ni galaw ai lam ni hta mung shang lawm ai. Asuya hpe gumlau na matu galaw ai lam ni hta n lawm ai. “Hkawhkam ni hte ahkang aya lu ai ni mahkra a matu mara” akyu hpyi ya mu ngu ai Chyum Laika lam matsun hpe hkan sa ga ai. Laksan hku nna, wanglu wanglang nawku daw jau na ahkang shanhte jaw na matu akyu hpyi ya ai.—1 Timohti 2:1, 2.
Mung masa lam hte seng nna kaga masha ni a dawdan lam hpe mung anhte hkungga ya ai. Ga shadawn, ra lata poi ni hpe sa nna ginjang ai, me jaw na ni hpe pat shingdang ai lam ni n galaw ga ai.
Anhte mung masa lam hta n lawm ai gaw ya she hpang wa ai kun? N re ai. Yesu a kasa ni hte tsa ban langai na kaga Hkristan ni mung, mung masa lam hta n shang lawm wa ai. Laika buk langai (Beyond Good Intentions) hta ndai hku ka da ai: “Shawng nnan na Hkristan ni gaw asuya ni hpe hkungga ra na hpe hkap la tim, mung masa lam hta shang lawm ra ai ngu nna gaw n hkap la ai.” Kaga laika buk langai (On The Road to Civilization) hta mung, shawng nnan na Hkristan ni gaw “mung masa ahkang aya lu hkra n galaw ma ai” nga nna ka da ai.
Mung masa lam hta anhte n shang lawm ai majaw mungdan a shimlum lam hkra machyi ai kun? N hkra machyi ai. Anhte ni gaw simsa lam hpe tsawra nna angwi apyaw hte sha nga mayu ai mung masha ni re majaw, uphkang du ni gaw anhte hpe hkrit tsang n ra ai. 2001 shaning National Academy of Sciences of Ukraine kaw nna shapraw ai shiga hpe myit yu u. Anhte mung masa lam hta n shang lawm ai lam hpe ndai hku ka da ai: “Dai ni aten na masha nkau mi gaw, Yehowa Sakse ni mung masa lam hta n shang lawm ai hpe n ra ma ai. Nazi hte Kunmyunit uphkang ai shaloi, shanhte hpe n tara ai hku mara shagun ma ai. Mung masa lam hta shanhte n shang lawm ai majaw re.” Raitim, Sobiyet asuya a pat shingdang tawn ai npu hta pyi Sakse Hkam ni gaw “upadi hpe galoi mung hkan sa ai mung masha ni re ai. Shanhte gaw asuya madu ai hkauna ni hte jat rung ni hta dingman ai myit hte grai shakut shaja let bungli galaw wa ai. Kunmyunit uphkang lam hpe mung gumlau ai lam n galaw ai.” Dai ni aten na Yehowa Sakse ni a kamsham lam hte galaw ai lam ni mung, mungdan a “shimlum lam hte uphkang lam hpe dingbai dingna n jaw ai” nga nna dai shiga hta hpungdim dat da ai.