Yesu Dinghku De Wa Ai Kun? Yesu Kaw Kahpu Kanau Ni Nga Ai Kun?

Chyum Laika Mahtai

Yesu dinghku de wa ai, n de wa ai hte seng nna Chyum Laika hta tup hkrat n tsun da tima shi dinghku n de wa ai ngu ai hpe lawu na Chyum daw ni hku nna chye lu ai.

1. Yesu a nta masha ni, shi magam gun nga ai laman hkan nang ai num ni, shi makau hta nga nga ai num ni a lam hpe Chyum Laika hta jahkring hkring tsun da ai. Raitim, Yesu kaw madu jan nga ai ngu nna kalang mung n tsun da ai. (Mahte 12:46, 47; Marku 3:​31, 32; 15:40; Luka 8:​2, 3, 19, 20; Yawhan 19:25) Yesu kaw madu jan nga ai ngu nna Chyum Laika hta hpa majaw n tsun da ai nga yang, shi kalang mung dinghku n de wa ai majaw re.

2. Karai Kasang a magam bungli hpe grau nna gun hpai lu na matu, dinghku n de wa ai ni nga ai. Dai majaw sape ni hpe Yesu ndai hku tsun wa ai: “Nkau mi gaw sumsing Mungdan a matu grau lu galaw hkra dinghku n de ma ai.” (Mahte 19:10-​12, NW) Karai Kasang a bungli hpe aten tup galaw lu hkra dinghku n de ai ngu nna dawdan da ai ni a matu, Yesu gaw kasi ningli madun wa ai re.​​—Yawhan 13:15; 1 Korinhtu 7:​32-​38.

3. Yesu n si shi yang, shi kanu hpe lanu lahku na matu lajang da ya ai. (Yawhan 19:25-​27) Lama na, Yesu gaw dinghku de da ai (sh) ma kawa re ai nga yang, shi nta masha ni hpe mung lajang ya wa na re.

4. Madu wa ni hku nna, Yesu hpe kasi la ging ai ngu Chyum Laika hta tsun da tim, madu jan hpe kanawn mazum ai lam hku nna tsun da ai gaw n re. De a malai, Chyum Laika hta tsun ai gaw: “La ni e, Hkristu gaw dai Hpung hpe tsaw ra nna, shi hkum hpe nan de a matu ap kau ya wu ai hte maren, nanhte a madu jan ni hpe tsaw ra nga mu.” (Ehpesu 5:​25) Lama na, Yesu gaw dinghku de wa ai rai yang, hkum tsup ai madu wa langai hku nna shi a kasi ningli hpe hkan sa na matu dai Chyum daw hta n-gun jaw wa na re.

Yesu kaw kahpu kanau ni nga ai kun?

Nga ai. Yesu kaw yawm htum kahpu kanau marai 6 nga ai. Dai hta Yaku, Yosep, Simun hte Yuda ngu ai kanau ni hta n-ga, numsha 2 mung naw nga ai. (Mahte 13:54-​56; Marku 6:3) Dai kahpu kanau ni gaw, Yesu a kanu Mari hte Yosep a kasha ni re. (Mahte 1:​25) Chyum Laika hta Yesu hpe Mari a “shadang sha alat” ngu shaga da ai majaw, Mari hta kaga kasha ni mung naw nga na re hpe chye na lu ai.​—Luka 2:7.

Yesu a kanau ni hte seng nna chye na shut ai lam ni

Mari gaw shi a prat ting mahkawn ajet hku nna nga lai wa ai ngu tsun ai lam hpe madi shadaw na matu, nkau mi gaw kaga lachyum hku nna, “kanau ni” ngu ai ga hpe lang ma ai. Ga shadawn, Yesu a kahpu kanau ni ngu ai gaw Yosep a shawng na dinghku hte lawm wa ai ma ni re nga nna tsun ma ai. Chyum Laika hta Yesu gaw Dawi a hkawhkam aya hpe tara shang hkam la na wa re nga nna tsun da ai. (2 Samuela 7:​12, 13; Luka 1:​32) Yosep kaw Yesu hta kaba ai kasha ni nga ai rai yang, Yosep a tara shang sali wunli hpe dai kasha wa she hkam la mai na re.

“Kanau ni” ngu ai ga si gaw Yesu a sape ni hpe tsun taw ai kun? Chyum Laika hta “shi a kanau ni pyi shi hpe n kam n sham ma ai” ngu nna tsun da ai majaw, Yesu a sape ni hpe tsun taw ai n re. (Yawhan 7:5) Yesu a kanau ni hte sape ni hpe Chyum Laika hta ginhka nna tsun dan da ai.​—Yawhan 2:​12.

Nkau mi mung, Yesu a kanau ni ngu ai gaw lawu lahta kanau ni hpe tsun ai re ngu nna tsun ma ai. Raitim, madung Greek Chyum Laika hta “kanau ni,” “mayu dama ni,” “kahkri” ngu ai ga si ni hte garan nna tsun da ai. (Luka 21:16; Kolose 4:​10) Chyum hpaji ninghkring law malawng mung, Yesu a kanau lasha, numsha ni ngu ai gaw Yesu a kahpu kanau ni hpe tsun ai re ngu nna hkap la ma ai. Ga shadawn, The Expositor’s Bible Commentary ngu ai laika buk hta ndai hku tsun ai: “‘Kanau ni’ ngu ai gaw . . . Mari hte Yosep a kasha ni, Yesu hte kanu bung nna, kawa n bung ai kanau ni hpe tsun taw nga ai ngu asan sha chye na lu ai.”b