Yehowa Sakse Ni Gaw Dinghku Hka Bra Ai Lam Hpe Gara Hku Mu Mada Ai Kun?

Yehowa Sakse ni gaw dinghku de ai, dinghku hka bra ai lam hte seng nna, Chyum Laika tsun da ai hku sha hkan sa ga ai. Dinghku de ai ngu ai gaw, num langai hte la langai prat tup arau nga na matu Karai Kasang lajang ya ai lam re. Num shaw la shaw amu rai yang she, dinghku hka bra mai ai ngu Chyum Laika hta tsun da ai.​—Mahte 19:​5, 6, 9.

Dinghku N Pyaw Ai Yan La Ni Hpe Sakse Hkam Ni Karum Ya Ai Kun?

Lam amyu myu hku nna karum ya ai.

• Laili Laika Ni Hku Nna. Dinghku ngang kang hkra karum ya lu ai laili laika ni a majaw, ngwi pyaw na matu n mai byin sai nga nna myit da ai dinghku ni pyi, bai ngwi pyaw lu wa ai. Ga shadawn, “Dinghku Hte Seng Ai Ga Sadi Hpe Makawp Maga U,” “Gara Hku Mara Raw Ya Na” hte “Kam Ai Myit Bai Lu Hkra Shakut U” ngu ai sumhpa ni hpe yu u.

• Zuphpawng Ni Hku Nna. Yehowa Sakse ni a bat shagu zuphpawng ni, ninghtawn zuphpawng ni hte ginwang zuphpawng ni hta dinghku a matu tatut re ai Chyum Laika hpaji jaw ga ni hpe bawngban ga ai.

• Myitsu Salang Ni Hku Nna. Nawku hpung kaw nna myitsu salang ni gaw, Ehpesu 5:​22-​25 zawn re ai Chyum daw ni hpe akyu jashawn nna, dinghku num dinghku la ni hpe karum ya ai.

Sakse Hkam Langai Dinghku Hka Bra Na Nga Yang Hpung Myitsu Salang Ni Madi Shadaw Ya Ai Kun?

N madi shadaw ai. Manghkang byin nga ai yan la gaw, manghkang hparan ya na matu myitsu salang ni hpe karum hpyi yang pyi, myitsu salang ni gaw shanhte a malai daw dan ya na ahkaw ahkang n nga ai. (Galati 6:5) Chyum Laika lam matsun ai hku n re ai sha dinghku hka bra yang, dai wa gaw dinghku nnan bai n mai de ai.​—1 Timohti 3:​1, 5, 12.

Garan Nga Ai Hte Seng Nna Sakse Hkam Ni Gara Hku Mu Mada Ai Kun?

Dinghku hta mayak mahkak ni nga tim, arau nga na matu Chyum Laika hta n-gun jaw da ai. (1 Korinhtu 7:​10-​16) Akroi anoi akyu hpyi ai, Chyum Laika lam matsun ai hku tatut hkan sa ai hte tsawra myit madun ai lam ni gaw manghkang law law hpe hparan ya lu ai.​—1 Korinhtu 13:​4-8; Galati 5:​22.

Raitim, ndai zawn grai sawng ai masa ni hkrum wa yang, Hkristan nkau mi gaw garan nga na matu dawdan ma ai.

• Dingsang n madi shadaw ya ai.​—1 Timohti 5:8.

• Hkumshan hkra machyi hkra galaw ai.​—Shakawn 11:5.

• Nawku daw jau lam hpe laja lana ninghkap ai. Ga shadawn, Karai Kasang a tara ni hpe tawt lai na matu, ningrum ningtau gaw atik anang shadut wa chye ai. Dai shaloi, “Masha ga madat na hta, Karai Kasang a ga mahtang grau madat” lu hkra, garan nga na matu dawdan yang dawdan na re.​—Kasa 5:​29.