Ramma langai gaw sumtsaw lahkawng hpe yu ai shaloi chyam dinglik hkrum ai ngu hkam sha, shadang sha lahkawng gaw electronic jak rai hpe yu nga, numsha langai makau kaw na lai wa

RAMMA NI A GA SAN

Chyam Dinglik Ai Lam Hpe Gara Hku Ninghkap Na Kun?

Kasa Pawlu gaw “mai kaja ai hpe galaw mayu ai shaloi, n hkru n hkra hpe galaw mayu ai myit ngai hta a nga nga ai” ngu tsun wa ai. (Roma 7:21, NW) Nang mung dai zawn hkamsha ga ai kun? Rai yang, ndai sumhpa gaw n kaja ai hpe galaw mayu ai myit pru wa yang, ninghkap lu na matu karum ya na re.

Chye da ging ai lam

Chyam dinglik ai lam hte ramma shada shadut ai lam gaw rau rai chye ai. “N kaja ai kanawn manang ni, mai kaja ai arawn alai hpe jahten ma ai” ngu Chyum Laika hta tsun da ai. (1 Korinhtu 15:33) Kaga masha ni shing nrai, media kaw na shadut ai lam a majaw, chyam dinglik hkrum chye ai. Dai hku nna “n hkru ai amu galaw na masha law ai maga de” hkan mat wa chye ai.—Pru Mat 23:2.

“Shadut ai lam gaw ra sharawng na zawn, hkap la hpa zawn re ai. Masha ni a ra sharawng ai lam hpe lu mayu ai hte sha shanhte galaw ai zawn hkan galaw hkrup mat chye ai.”—Jeremi.

Myit yu u: Kaga ni tinang hpe gara hku mu mada mat na hpe grai myit maju jung yang, chyam dinglik lam gaw hpa majaw grau yak mat ai kun?—Ga Shagawp 29:25.

Madung lam: Ramma shada n-gun jaw ai majaw, tinang a tsang madang ni hpe shayawm kau ai du hkra hkum galaw.

Galaw lu ai lam

Nang hkam la da ai hpe chye da u. Tinang hkam la da ai hpe n chye yang, kaga masha ni hkang ai hku galaw ai masha byin mat chye ai. “Lam yawng mayawng hpe chyam dinglik yu nga mu, mai kaja ai hpe mahkyu nga mu” ngu ai Chyum Laika matsun hpe hkan sa ai gaw grau kaja ai. (1 Htesaloni 5:21) Nang hkam la da ai hpe grau chye magang, hkam la da ai hte maren hkan sa na matu grau loi magang re. Chyam dinglik ai lam hpe mung ninghkap lu na re.

Myit yu u: Karai Kasang a tsang madang ni gaw na a matu kaja ai hpe hpa majaw kam ai kun?

“Tinang hkam la da ai hte maren galaw ai, chyam dinglik ai lam hpe asum n jaw ai shaloi, kaga masha ni gaw ngai hpe grau nna hkungga wa ma ai hpe mu ai.”—Kimbali.

Chyum Laika kasi: Daniela. Ramma aten kaw nna Daniela gaw Karai a tara ni hpe madat mara na matu “myit jahkut da wu ai.”—Daniela 1:8.

Ramma langai gaw sumri ni hte gyit da hkrum, hkang ai hku hkan galaw ra ai sumla zawn rai nga — Nang hpa hpe hkap la da ai hpe n chye yang, kaga ni a hkang ai hku galaw ai sumla zawn rai mat na

Tinang a gawng kya lam hpe chye da u. Chyum Laika hta “brang ram a myit kayut ai lam” hpe tsun da ai. Grau nna gaw, ramma aten hta myit katu chye ai. (2 Timohti 2:22) Ngang kayut ai myit hta n-ga, masha ni hte hku hkau mayu ai myit, wanglu wanglang nga mayu ai myit ni mung lawm ai.

Myit yu u: Chyum Laika gaw “kadai rai ti mung, tinang a myit kayut ai hta, len nang ai hte agaw hkalem ai hkrum nga yang gaw, gunglau ai hkrum nga ai” ngu tsun da ai. (Yaku 1:14) Gara lam gaw nang hpe grau chyam dinglik ai kun?

“Tinang hpe grau nna chyam dinglik ai lam hpe myit madung hte san jep yu u. Dai chyam dinglik ai lam hpe ninghkap lu na lam ni hpe sawk sagawn yu nna, hkan sa mai ai lam ni hpe laika pa hta ka da u. Hpang kalang hta nang chyam dinglik hkrum wa yang, gara hku ninghkap na hpe chye na re.”—Sewiya.

Chyum Laika kasi: Dawi. Shi gaw kaga ni a shadut ai lam hte shi a ra marin ai myit a majaw mung galaw hkrup wa ai. Raitim, Dawi gaw shut hpyit ai lam kaw nna sharin la wa nna, bai n shut na matu shakut wa ai. “Karai Kasang e, ngai hta san seng ai myit hpan tawn da nna, Agrin nga na Wenyi, nye a kata e shabai bang ya e” ngu nna Yehowa kaw akyu hpyi wa ai.—Shakawn 51:10.

Myit hpe hkang u. Chyum Laika hta ndai hku tsun ai: “N hkru n hkra ai gaw nang hpe n dang kau u ga; mai kaja ai hte n hkru n hkra ai hpe dang kau u.” (Roma 12:21) Chyam dinglik ai lam hta n hkrat sum ra ai ngu tsun nga ai re. Jaw ai lam hpe galaw na matu nang lata mai ai.

Myit yu u: Shut ai lam hpe galaw na matu chyam dinglik hkrum yang, kaja ai hpe sha galaw na matu myit hpe gara hku hkang na kun?

“Chyam dinglik hkrum ai shaloi, hkan galaw yang hpa byin na hpe myit yu ai. Pyaw mat na kun? Chyahkring mi gaw pyaw na re. Raitim, myit n pyaw ai gaw grau na na re. Dai majaw n hkan galaw ra ai.”—Sohpia.

Chyum Laika kasi: Pawlu. Shi mung n kaja ai hpe galaw mayu ai myit nga wa ai ngu tsun tim, myit hpe hkang wa ai. “Nye a hkum hpe ngai htwi kau nna, dai hpe shagrit da we ai” ngu shi ka wa ai.—1 Korinhtu 9:27.

Madung Lam: Chyam dinglik ai lam hpe gara hku hparan na ngu dawdan ai wa gaw nang sha re.

Chyam dinglik ai lam gaw chyahkring mi sha re ai hpe dum u. Asak 20 ning rai sai Milisa ndai hku tsun ai: “Lahta tsang jawng lung ai shaloi, lam law law gaw chyam dinglik kaba ni re. Ya chyawm hpa n rai mat sai. Dai hpe chye da ai majaw, ya hkrum nga ai chyam dinglik ai lam hpe tawt lai lu ai. Lani mi hta bai n htang yu yang, chyam dinglik lam hpe ninghkap wa ai majaw grai kaja ai ngu tsun lu na re.”

Ramma shada tsun ai lam

“Dawdan lam galaw nna, dai hte maren gwi gwi galaw na nga yang, chyam dinglik ai lam hpe ninghkap lu na re. Ga shadawn, lama ma hpe n galaw na ngu dawdan ngut yang, dai hpe n galai shai sai. Bai n myit yu sai. Kaga langai ngai a majaw mung dawdan lam hpe n galai shai sai.”—Oliva.

“Ramma law malawng gaw pati poi sa na matu, dai hta tsa chyaru, nanghpam tsi hte ngang kayut na matu shadut hkrum ma ai. Ndai lam ni hpe Nu yan Wa hte atsawm tsun shaga wa ai gaw grai akyu nga ai. Hkring sa la ai aten ni hta mung galaw ra na lam ni nga ai gaw kaja ai. Rai yang, shut ai lam galaw hkrup hkra shadut ai hpe ninghkap lu na re.”—Jeret.

“Kaga ni a matu n shut tim, nye a matu n kaja ai ngu shadu ai shangwi shapyaw ai lam hpe ningdang kau na matu grai yak ai. Dai zawn chyam dinglik ai lam hpe ninghkap na matu tinang hkap la da ai lam hpe atsawm chye hkra galaw da ra ai.”—Meyen.

“Chyam dinglik hkrum yang, tinang hkum tinang dingman ra ai. Internet hta gara shara gaw chyam dinglik ai lam grau law ai kun? Akyang hten ai lam ni grau law ai kun? ngu ai hpe chye da ra ai. Hkrum katut wa yang gara hku galaw na hpe mung dawdan da ra ai. Chyam dinglik ai mahkam hta n hkrat sum na matu, tau hkrau lajang da ra ai.”—Julian.