Nat Hpaji Gaw Shoihpa Nga Ai Kun?

Nang gara hku shadu ai kun?

• Gumhpan hpan chye ai wa, min la shaga chye ai wa, myihtoi htoi chye ai wa hte bawngban ai lam gaw shoihpa n nga ai kun?

• Nat maumwi mausa ni gaw kaja ai, n kaja ai daram sha rai kun? Dai hta grau ai kun?

Nat hpaji gaw myit lawm na zawn raitim, sadi ging ai lam hpe ndai sumhpa hta san jep mat wa na re.

• Hpa majaw myit lawm na zawn rai kun?

• Hpa majaw sadi ra ai kun?

• Hpa galaw mai ai kun?

• Ramma shada tsun ai lam

Hpa majaw myit lawm na zawn rai kun?

Shangwi shapyaw ai bungli ni gaw nat hpaji hpe ahkyak shatai ai sumla hkrung, TV lamang, video game ni hte laika buk ni hpe shapraw na matu arang bang ma ai. Dai majaw, gumhpan hpaji, nat, sai chyup hpuk, hpyi ni a lam hpe ramma law malawng myit lawm wa ma ai. Hpa majaw kun? Lawu na lam ni a majaw re:

• Chye mayu ai myit: Nat mungkan teng sha nga n nga hpe chye na matu

• Myit shang sha ai: Htawm hpang hta byin na lam ni hpe chye na matu

• Matut mahkai ai: Si mat sai tsawra ai ni hte matut mahkai lu na matu

Ndai lam ni gaw shut ai zawn gaw n re. Ga shadawn, htawm hpang hte seng nna chye mayu ai, si mat ai ni hpe myit dum ai gaw kadai mung byin chye ai. Raitim, sadi ra ai shoihpa ni gaw nga ai.

Hpa majaw sadi ra ai kun?

Nat hpaji hte seng ai lam yawng hpe ninghkap na matu, Chyum Laika asan sha sadi jaw da ai. Ga shadawn:

“Tinang a shayi shadang sha hpe wan hta nat nawng ai wa, shaba wawt ai wa, myihtoi htoi ai wa, lawng dat chye ai wa, mandan bau chye ai wa, ahkyu hkyu chye ai wa, atsu hte shaga chye ai wa, shung sha chye ai wa hte gumhpan hpan ai wa langai mi muk nanhte hta nga lu na n rai. Kaning rai nme law, ndai lam galaw ai wa kadai mung Yehowa man e matsat shabat rai nga ai: dai matsat shabat lam a majaw, na a Karai Kasang Yehowa dai amyu ni hpe na a man na shachyut kau wu ai.”​—Tara Jahprang 18:10-​12.

Chyum Laika gaw hpa majaw nat hpaji hpe n hkap la na matu dingtawk tsun ai kun?

• Nat hpaji hkan sa ai gaw nat ni hte kanawn mazum ai hte bung ai. Lamu kasa nkau mi gaw Karai Kasang hpe ninghkap nna Karai a hpyen ni byin mat ai lam Chyum Laika hta tsun da ai. (Ningpawt 6:2; Yuda 6) Dai nhkru ai lamu kasa ni hpe nat ni ngu shaga ai. Nat ni gaw, nat shung ai ni, lata kumla yu ya ai ni, myihtoi chye htoi ai ni, pungding maka yu ya ai ni hpe akyu jashawn nna, masha ni hpe masu hkalem nga ai. Dai hpaji ni hpe hkan sa ai gaw Karai Kasang a hpyen ni hte kanawn nga ai re.

• Masha nkau gaw myihtoi htoi lu ai ngu shut ai hku hkap la wa hkra, nat hpaji gaw shadut ya nga ai. Raitim, Karai Kasang langai sha ndai hku tsun lu ai: “Ngai gaw npawt kaw nna jahtum du hkra mung, moi chyaloi nhkoi kaw nna garai n byin ai amu ni hpe mung, shapraw dan nngai.”​—Esaia 46:10; Yaku 4:13, 14.

• Nat hpaji gaw si mat ai ni hte matut mahkai lu ai ngu shut ai hku hkap la wa hkra shadut ya ai. Chyum Laika hta ndai hku tsun ai: “Si mat ai ni chyawm gaw hpa n chye ma ai. . . . katsan ga hta e, amu bungli, maw mawn ai, chye chyang ai hte hpaji hparat hpa mung n nga ai.”​—Hpaji 9:​5, 10.

Dai lam ni a majaw, Yehowa Sakse ni gaw nat hpaji hte seng ai lam ni hpe koi yen ga ai. Dai hta n-ga, sai chyup hpuk, hpuk shang ai wa (sh) shingra tara hta jan ai lam ni hpe madun da ai ban sa lam ni hpe mung koi ai. “Nat hpaji hte seng ai lam lama ma lawm yang, n yu ging sai” ngu nna shayi sha Maria tsun ai.a

Hpa galaw mai ai kun?

• Nat hpaji hte seng nna galaw ai lam, shangwi shapyaw ai lam ni hpe koi yen ai hku nna, Yehowa shawng hta “myit mang san pra nga lu” hkra dawdan da ra ai.​—Kasa 24:16.

• Nat hpaji hte seng ai lam yawng hpe kabai kau u. Kasa 19:19-20 hpe hti nna, tsa ban langai hta na Hkristan ni a kasi kaja hpe hkan sa u.

Ndai lam hpe myit dum u. Nat hpaji hte seng nna galaw ai lam, shangwi shapyaw ai lam ni hpe nang koi yen ai gaw Yehowa maga tsap nga ai re. Dai gaw Yehowa hpe myit pyaw shangun ai.​—Ga Shagawp 27:11.