Myit Mada Lam​—Anhte A Prat Hpe Akyu Jaw Ai Kun?

ASAK 10 ning sha naw re ai Deniye gaw, mawng ana hkamsha nga ai laning mi na sai. Shi hta myit mada lam n nga sai majaw, sarawun ni hte nta masha yawng asum jaw kau sai. Raitim, Deniye gaw asum n jaw ai. Shi kaba wa yang, sawk sagawn ninghkrin byin hkra galaw nna, mawng tsi lu shapraw hkra galaw na ngu dawdan da ai. Shi hpe tsi tsi ya ai sarawun sa yu na shani hpe myit mada let ala nga ai. Raitim, dai shani hta lamu marang grai sawng ai majaw n lu sa mat ai. Daniye grai myit daw mat ai. Lahkawng ya na ai hpang shi n nga mat ai.

Myit mada lam gaw, hkamja lam ntsa akyu shabyin ya lu ai lam hkaja wa ai, hkam kaja lam dap na marai langai gaw, Daniye a mabyin hpe tsun dan ai. Dai zawn mabyin hpe nang mung na ga na re. Ga shadawn, asak hti hkyen ai asak kaba ai ni gaw, shi tsawra ai ni du wa na matu (sh) hkungran ladu hkrum poi galaw na matu myit mada nga chye ai. Shi myit mada ai hku byin ngut ai hpang kade n na yang n nga mat ai. Ndai mabyin ni hta, hpa hpe sadi hkrup ai kun? Myit mada lam gaw anhte hpe kaja wa akyu shabyin ya lu ai kun?

Myit mada lam, kaja ai ningmu ni nga ai gaw ngwi pyaw shangun nna, hkamja shangun ai ngu tsi hpaji du ni tsun ma ai. Dai hpe masha yawng myit hkrum yang she hkrum na re. Hpaji du nkau mi chyawm gaw hpungtang hpaji hte n htap htuk ai majaw n hkap la ma ai. Machyi makaw lam a majaw sha, hkamja lam hkra machyi wa ai re ngu sawn la ma ai.

Myit mada lam hte seng ai ahkyak ai lam hpe n hkap la ma ai gaw mau hpa n re. Lai wa sai shaning hkying hku na sai aten kaw na Garik myit sawn hpaji du Aritsatawte gaw, myit mada lam ngu ai gaw “yup mang san san sha re” ngu tsun wa ai. Amerikan ningbaw Benjamen Hparan Kalin gaw, “myit mada lam hte sha asak hkrung lu na nga yang, lu sha gam nna si mat na” ngu tsun ai.

Rai yang, myit mada lam hte seng ai teng man ai lam gaw hpa rai kun? Myit simsa lam lu na matu hkrang shapraw nna myit mang ai hpe sha tsun ai rai kun? Ngwi pyaw hkamja na matu myit mada lam gaw n nga n mai ra ahkyak ai ngu lu tsun ai lam nga ai kun?

Hpa Majaw Myit Mada Lam Ra Ai Kun?

LAMA na, shawng na sumhpa hta lawm ai, mawng ana hkamsha nga ai Deniye gaw myit mada lam ngang kang nga yang gaw taw? Mawng ana mat mat na kun? Dai ni du hkra asak naw hkrung nga na kun? Myit mada lam gaw shamai ya lu ai ngu tsun ai ni pyi mahtai n lu jaw ma ai. Myit mada lam gaw mawng ana mat ai tsi n re ai majaw, kamhpa lai ai baw gaw n byin ging ai.

CBS shiga dap na hkrum san shaga langai hta, machyi sawng ai ni hpe tsi tsi ai shaloi, myit mada lam a atsam hpe grai shagrau yang shoihpa nga chye ai lam sarawun Netan Chani ndai hku tsun ai: “Myit simsa hkra n shakut ai, kaja ai ningmu nan n nga ai ngu madu jan ni hpe mara shagun ai madu wa ni nga ga ai. Mawng ana grau sawng wa ai gaw shanhte n hkang ai majaw re ngu machyi masha hpe myit wa shangun ai. Dai gaw n byin ging ai lam re.”

Machyi sawng nga ai masha gaw ana a majaw grai hkamsha nna pu ba nga ai. Mara nga ai ngu ai myit a majaw, grau lit li mat ai baw byin shangun mayu na n re. Rai yang, myit mada lam gaw akyu n rawng ai ngu ai lachyum kun?

N re. Ga shadawn, sarawun Netan gaw yawga ana hte machyi hkamsha lam hpe tsi tsi ya ai ninghkrin mung re. Dai ladat gaw ana hpe madung tawn tsi tsi nna asak hpe gang da na malai, machyi masha a jahtum aten du hkra angwi apyaw nga lu na matu karum ya ai tsi ladat re. Sarawun Netan zawn kaga sarawun ni mung myit pyaw hkra karum ya ai tsi ladat gaw, machyi sawng nga ai wa a matu pyi, akyu rawng ai ngu kam ma ai. Myit mada lam nga yang, nga pyaw shangun nna akyu nga ai madi madun lam ni nga ai.

Myit Mada Lam A Atsam

“Myit mada lam gaw atsam rawng ai tsi ladat re” nga nna tsi hte seng ai hpaji du sarawun W. Gehpejung tsun ai. Machyi sawng ai ni hpe myit n-gun ja wa hkra karum ya ai a akyu hpe chye na matu, sawk sagawn lam amyu myu galaw wa ai. Machyi masha hpe myit n-gun ja wa hkra karum ya ai shaloi, kaja ai ningmu hte myit mada lam grau nga wa ai. 1989 na sawk sagawn lam langai hku nga yang, myit ja ai machyi masha ni gaw, grau asak galu ai lam chye wa ai. Dai lam hpe dai ni aten na sawk sagawn ai lam nkau gaw n hkap la ma ai. Raitim, myit hte seng ai karum shingtau lu ai wa gaw, n lu ai wa hta myit daw ai lam, machyi ai lam nau n law ai ngu nna sawk sagawn ai lam ni gaw madi madun nga ai.

Kaja ai ningmu hte n kaja ai ningmu gaw, salum ana a ntsa akyu shabyin ai lam nga ai hpe mung sawk sagawn wa ai. Tinang a prat hpe kaja ai ningmu nga ai, n nga ai hte seng nna masha 1,300 jan lawm ai sawk sagawn lam langai galaw wa ai. 10 ning na ai hpang, masha tsa lam shadang 12 jan gaw, salum ana hkamsha nga ai lam tam mu wa ai. Masha 1,300 jan hta chyen mi daram gaw, n kaja ai ningmu nga ai ni byin nga ai. Habat Mung Shawa Tsi Jawng kaw na, hpaji du Lawra Hkazansaki ndai hku tsun ai: “Kaja ai ningmu nga ai gaw, hkamja lam a matu akyu nga ai hpe, moi gaw masha ni tsun ai sha na ga ai. Ya, ndai sawk sagawn lam a majaw, salum ana a matu akyu nga ai lam hpe madi madun lu sai.”

Ga tsi ngut ai hpang, ngai hkam kaja sai ngu sawn la ai ni gaw hkamja lawan ai. Hkam n kaja ai ngu sawn la ai ni gaw, hkam kaja wa na matu aten grai na ai. Asak galu ai lam hte kaja ai ningmu gaw matut mahkai lam nga ai. Asak kaba ai hte seng nna kaja ai ningmu nga ai, n nga ai gaw, asak kaba ai ni a ntsa akyu shabyin ya ai hpe sawk sagawn ai lam galaw wa ma ai. Asak kaba ai ni gaw, nyan hpaji, mahkrum madup ni rawt jat wa ai ngu ai lam ni hpe shanhte lu hti ai shaloi, n-gun atsam hpring let lam atsawm lu hkawm wa ai hpe mu lu ai. Dai gaw bat 12 hkum hkrang shamu shamawt ai hte bung ai.

Kaja ai ningmu nga ai hte myit mada lam nga ai gaw hkamja lam a matu hpa majaw akyu nga ai kun? Hpungtang hpaji du ni, sarawun ni gaw, masha a myit hte hkum hkrang a lam hpe atsawm n chye na shi ai majaw, tup hkrak n lu htai ya ma ai. Dai hte seng nna hkaja ai ni gaw, mahkrum madup, nyan hpaji hta madung nna sawn la ma ai. Bawnu, lasa hte seng ai hpaji du langai ndai hku tsun ai: “Myit mada lam nga nna, myit pyaw nga yang myit tsang lam ni yawm na. Myit tsang lam yawm yang hkamja wa na. Dai gaw, hkamja hkra tinang nan lu galaw ai lam langai re.”

Ndai lam gaw sarawun ni, myit hte seng ai hpaji du ni, hpungtang hpaji du nkau a matu mauhpa zawn rai nga na re. Raitim, Chyum Laika hkaja ai ni a matu gaw mauhpa n re. Lai wa sai shaning 3,000 daram hta, Hkawhkam Shawlumon gaw “kabu gara ai myit hkam kaja ai tsi rai nga ai; Gawng run ai chyawm gaw, nrut n ra ni hpe jahkraw kau nga ai” ngu ka wa ai. (Ga Shagawp 17:22) Dai ga ni gaw rap ra ai lam nga ai hpe sadi yu u. Kabu gara ai myit gaw, ana yawng mayawng hpe shamai ya ai ngu n tsun ai sha, “hkam kaja ai tsi” ngu nna tsun da ai.

Myit mada lam gaw hkam kaja ai tsi kaba rai yang, sarawun ni n matsun ai sha nga na n re. Dai hta n-ga, myit mada lam gaw, hkam kaja shangun ai hta n-ga akyu rawng ai.

Kaja Ai Ningmu, N Kaja Ai Ningmu Hte Na A Prat

Kaja ai ningmu nga ai gaw, lam amyu myu hku nna akyu nga ai hpe, sawk sagawn ai ni tam mu wa ai. Kaja ai ningmu nga ai ni gaw jawng, bungli, ginsup lam hpe atsawm lu galaw ma ai. Ga shadawn, num ni a atsam hpe sawn maram na matu, anum kagat gumhtawn uhpung hpe sara ni sawn maram ma ai. Num ni mung shanhte a atsam hte seng nna kade daram myit mada da ai hpe sawn maram ra ai. Shanhte a myit mada lam gaw sara ni a sawn maram ai lam hta grau jaw ai hpe tam mu wa ai. Myit mada lam gaw hpa majaw grai atsam nga ai kun?

N kaja ningmu a akyu hpe mung sawk sagawn wa ma ai. Ga shadawn, masha nkau hpe, grai garu ai nsen hpe hpaw da nna, gara hku pat ra na hpe sharin da ya ai. Shanhte nsen chye pat mat ai majaw, garu ai nsen zim mat ai.

Kaga masha nkau mi hpe mung dai zawn galaw na matu sharin ya tim, nsen n pat ai majaw garu zim hkra n lu galaw ai. Kaga lam hku chyam yu yang mung bai htang ai lam hpa n nga ai, bai kaja wa na n re ai majaw, byin wa ai hku sha hkam la sana ngu dawdan da ma ai. Raitim, shanhte kaw na kaja ai ningmu nga ai ni gaw, n lu galaw sai ngu nna asum jaw kau ai lam n nga ma ai.

Sawk sagawn lam galaw lu na matu karum ya wa ai Dawkta Matin Seleman gaw, kaja ai ningmu hte n kaja ai ningmu hte seng nna laksan hkaja wa ai. Karum shingtau n nga ai ngu hkamsha nga ai ni a ningmu hpe atsawm hkaja ai. N kaja ai ningmu nga ai majaw, masha ni gaw shakut shaja ai lam n nga wa ai. Shani shagu galaw ra ai bungli ni hpe pyi n kam galaw mat ai lam hpe Dawkta Matin tam mu wa ai. N kaja a ningmu hte seng nna kadun dawk ndai hku tsun da ai: “25 ning daram hkaja ngut ai hpang ngai chye na dat ai gaw, tinang a majaw jamjau hkrum ai, matut naw hkrum na re, hpa mi galaw tim laklai wa na n re ngu nna n kaja ai hku sha mu mada ai ni zawn akyang nga yang, grau nna jamjau hkrum chye ai lam re.”

Dai lam gaw dai ni aten hta, kaga masha ni a matu laklai nga na re. Raitim, Chyum Laika hkaja ai ni gaw, “ru yak hkrum ai shani e myit htum wa yang, N-gun ja ai wa ngu na, n rai” ngu nna chye da ngut chyalu re. (Ga Shagawp 24:10) Myit daw ai aten ni hta n kaja ai ningmu nga yang, hpa mung galaw mayu ai myit nga sana n re. Rai yang, n kaja ai ningmu hpe hkap shingdang nna myit mada lam hte kaja ai ningmu nga hkra hpa gaw karum ya lu na kun?

[Sumla]

Myit mada lam nga yang akyu law law lu shangun

N Kaja Ai Ningmu Hpe Gasat Awng Dang Lu

NANG hkrum sha nga ai yakhkak jamjau lam hte seng nna gara hku mu mada ai kun? Dai ga san a mahtai hta madung nna nang gaw kaja ai ningmu nga ai wa kun? N kaja ai ningmu nga ai wa kun? ngu ai hpe ginhka lu ai nga nna hpaji du ni hkam la da ma ai. Anhte yawng gaw mayak mahkak amyu myu hkrum nga ai. Grau sawng ai ni mung nga ai. Nkau mi gaw yakhkak jamjau lam ni hpe tawt lai ngut ai hpang, prat hpe nnan bai hpang nna shakut na matu hpa majaw jin jin rai nga ai kun? Nkau mi chyawm gaw hpa n re ai mayak mahkak a majaw hpa majaw asum jaw kau ma ai kun?

Ga shadawn, nang gaw bungli tam nga ai ngu saga. Nang hpe hkrum san shaga ngut ai hpang, nyet kau ai nga yang gara hku hkamsha ai kun? Nang hpe n ra nna nyet kau ai majaw, ‘ngai hpe kadai mung bungli jaw sana n re. Prat tup bungli lu sana n re’ ngu myit wa chye ai. Grau sawng ai gaw, tinang a prat hta dai zawn sha byin na re ngu shadu mat chye nna, ‘ngai gaw atsam n nga ai, akyu mung n rawng ai’ ngu ai myit ni shang wa chye ai. Dai myit ni gaw n kaja ai ningmu nga wa shangun ai.

N Kaja Ai Ningmu Hpe Gasat U

N kaja ai ningmu hpe gara hku gasat awng dang lu na kun? Ahkyak htum gaw tinang hta n kaja ai ningmu nga wa sai hpe yin la ra ai. Kahtap bai galaw ra na gaw, dai myit hpe gasat ra ai. Nang hpe hpa majaw nyet kau ai hpe myit yu u. Ga shadawn, nang hpe bungli n kam jaw ai majaw nyet kau ai kun? Bungli madu ra sharawng ai atsam ningja nang hta n nga ai majaw kaga langai hpe tam ai rai kun?

Atsawm bai myit yu yang, n kaja ai ningmu gaw myit kahpra ai lam hpe n hkang lu ai majaw byin wa ai re. Nyet kau hkrum ai hte sha tsep kawp akyu n rawng ai wa byin mat sai kun? Nang awng dang nga ai lam ni hpe myit yu mai na kun? Ga shadawn, Karai Kasang hte hku hkau lam, nta masha ni, manang ni hte hku hkau ai lam ni hpe re. Hpa mi galaw law, hpa mi byin byin, awng dang na n re ngu ai n kaja ai ningmu hpe gasat awng dang lu hkra shakut u. Galoi mung bungli lu na n re ngu nna hkum myit. N kaja ai ningmu hpe gasat awng dang lu ai lam ni naw nga ai.

Bandung Du Na Ngu Ai Kaja Ai Ningmu

Kade n na shi ai shaning ni hta, myit mada lam ngu ai ga si a lachyum hpe sawk sagawn ai ni myit lawm wa ma ai. Myit mada lam hta, jahkrat da ai bandung hte maren galaw lu na ngu ai kam ai myit mung lawm ai ngu shanhte sawn la ma ai. Gaja nga yang, myit mada lam a lachyum gaw hpang na sumhpa hta mu lu na hte maren grai dam lada ai. Raitim, ya tsun ai lachyum mung akyu grai jaw lu ai. Bandung hte maren galaw lu na ngu myit mada da yang, kaja ai ningmu ni, bandung hpe myit maju jung lu ai atsam ni nga wa na re.

Bandung hte maren galaw lu na ngu kam ai myit nga na matu, bandung ni hpe ngai galaw lu wa ai ngu ai kam ai myit nga na matu ahkyak ai. Dai zawn kam ai myit n nga yang, tinang jahkrat na bandung ni hpe atsawm bai myit yu ra ai. Shawng nnan, tinang hta bandung nga ai kun? Prat hta hpa byin mayu ai, hpa gaw ahkyak ai ngu ai hpe aten la nna n myit yu yang, shani shagu na bungli ni hpe sha galaw hkrup nga chye ai. Shawng galaw ra ai ni hpe tup hkrak chye na matu, moi grai na sai aten kaw nna, Chyum Laika hta ndai hku hpaji jaw da ai: ‘Grau ahkyak ai hpe chye ginhka u.’—Hpilipi 1:10, NWT.

Prat hta madung da ra ai lam ni hpe masat dat yang, wenyi lam, kun dinghku, bungli, jawng hpaji hte seng ai lam ni hta, ahkyak ai bandung ni jahkrat na matu loi mat na re. Raitim, shawng nnan hta, bandung law law n jahkrat na matu ahkyak ai. Tinang galaw na bandung ni hpe shawng jahkrat u. Bandung hte maren n lu galaw wa yang, myit daw nna asum jaw kau hkrup chye ai. Dai majaw, yak ai aten galu bandung ni hpe aten kadun bandung hku garan nna galaw ai gaw grau kaja ai.

“Myit yang mang ai, galaw yang dang ai” ngu ai ga malai hte maren, ahkyak ai bandung ni hpe jahkrat ngut yang, dai bandung ni hpe shakut nna galaw mayu ai myit, ngang kang ai dawdan lam nga ra ai. Tinang bandung a manu, dai bandung jahkrat ai majaw lu wa na akyu ni hpe sawn sumru ai hku nna dawdan lam hpe ngang kang hkra galaw lu ai. Pat shingdang ai lam ni hkrum na gaw teng ai. Raitim, dai pat shingdang lam ni a majaw asum jaw na malai, awng dang lu hkra shakut ra ai.

Bandung hte maren galaw lu na matu, tatut re ai lam ni hpe myit ra ai. Myit mada lam a manu hpe atsawm hkaja wa ai laika ka sara C. R. Sanaida gaw, bandung langai de du na matu, lam amyu myu hku nna myit yu, sawn yu ra ai ngu hpaji jaw da ai. Ladat langai hte n awng dang yang, kaga ladat langai hpe akyu jashawn ra ai.

Bandung langai hpe kaga langai hte gara aten malai bang ra na hpe chye hkra galaw na matu mung, Sanaida hpaji jaw da ai. Bandung hpe n lu galaw ai majaw masin pawt na nga yang, myit daw wa chye ai. Tinang galaw lu na bandung langai hpe malai galaw kau yang awng dang na matu myit mada lam lu wa na re.

Dai lam hte seng nna Chyum Laika hta kasi ningli kaja langai nga ai. Hkawhkam Dawi gaw, Yehowa a matu nawku htingnu grai gap ya mayu tim, dai ahkaw ahkang hpe shi a kasha Shawlumon sha lu na re ngu nna Karai Kasang tsun ai. Dai shaloi, Dawi gaw masin pawt na malai, galaw mayu ai hpe shanang nna galaw na malai, bandung hpe galai shai kau ai. Gawgap bungli masing hpe Shawlumon ngut kre hkra galaw lu na matu, ra ai ja gumhpraw hte arung arai ni hpe mahkawng ya ai hta, Dawi shakut nna maju jung galaw wa ai.—1 Hkawhkam 8:​17-​19; 1 Hkawhkam Labau 29:​3-7.

N kaja ai ningmu hpe gasat awng dang nna, kaja ai ningmu hpe shalat ai hku nna myit mada lam matut nga ai rai yang pyi, kalang lang myit mada lam mat mat chye ai. Tinang n hkang lu ai mungkan a masa lam ni a majaw myit mada lam n nga ai mung rai chye ai. Matsan ai lam, majan, n tara ai lam, machyi makaw lam, si hkrung si htan zawn re ai yawn hpa lam ni a lapran, kaja ai ningmu hte myit mada lam matut nga hkra gara hku galaw lu na kun?

[Sumla]

Tinang galaw mayu ai bungli nyet kau hkrum ai majaw, prat tup bungli lu sana n re ngu hkam la kau sana kun?

[Sumla]

Hkawhkam Dawi gaw masa lam hta hkan nna bandung ni hpe jahkrat wa

Jet Ai Myit Mada Lam Hpe Gara Kaw Mu Tam Lu Na Kun?

NANG na nayi hten mat sai. Gara kaw gram na kun? Dai hpe myit ra sana re. Nayi gram ai hte seng ai ndau shana ai lam ni gaw grai law ai. Ndau shana da ai lam ni hta, gram ya lu ai ngu tsun da tim, langai hte langai tsun ai lam n bung nga ai. Lai wa sai shaning ni hta, dai nayi hpe shalat wa ai htingbu langai gaw manu n jaw ra ai sha gram ya na ngu tsun yang gara hku hkamsha na kun? Shi hpe sha gram shangun na n re i?

Na a myit mada lam hpe mung dai nayi hte shingdaw mai ai. Yakhkak hkrum ai aten hta, masha law malawng zawn, nang mung myit mada lam n nga ai zawn byin nga yang, gara kaw na karum shingtau lu na kun? Manghkang ni hpe hparan ya lu ai ngu masha law law hpaji jaw chye ma ai. Raitim, dai hpaji jaw ga gaw shuk nna langai hte langai mung n bung ai. Rai yang, myit mada lam jaw lu ai atsam nga ai Karai kaw na karum n hpyi ging ai kun? Dai Karai gaw ‘anhte kadai hte mung n tsan’ ai sha n-ga, karum ya mayu ai myit mung nga ai ngu Chyum Laika hta tsun da ai.​​—⁠Kasa 17:27; 1 Petru 5:7.

Myit Mada Lam Ngu Ai Ga Si A Sung Htum Ai Lachyum

Ya prat na sarawun ni, hpungtang hpaji du ni, myit hpaji du ni gaw, myit mada lam hte seng nna tsun chye ai. Raitim, Chyum Laika hta lawm ai myit mada lam a lachyum gaw, dam lada nna lachyum sung ai. Madung amyu ga hta, “myit mada lam” ngu ai hpe sharawng awng let ala nga ai, kaja ai lam hpe myit mada ai ngu lachyum hpaw da ai. Myit mada lam ngu ai hta daw lahkawng lawm ai. Kaja ai hpe ra marin ai lam hte dai hte maren byin wa na ngu kam mai ai lam ni re. Chyum Laika hta lawm ai myit mada lam gaw, byin mayu ai myit daram sha n re. Gaja wa byin wa na ngu ai madi madun lam nga ai.

Kam loi ai n re ai sha, gaja wa nga ai ngu kam ai makam masham hte, myit mada lam gaw bung ai zawn gaw re. (Hebre 11:1) Raitim, Chyum Laika hta, makam masham hte myit mada lam hpe ginhka nna tsun da ai.—1 Korinhtu 13:13.

Ga shadawn, manang langai hpe nang karum hpyi ai ngu saga. Shi karum ya na re ngu nang myit mada da ai. Dai zawn myit mada ai gaw, shi hpe kam nna hku hkau ai majaw sha n re. Shi gaw tsawra matsan dum chye ai, gam jaw gam ya chye ai ngu ai madi madun lam nga ai majaw re. Ndai lam hta mu lu ai hte maren, makam masham hte myit mada lam gaw matut mahkai lam nga tim, n bung ai. Karai Kasang hpe mung dai zawn myit mada mai ai kun?

Myit Mada Mai Ai Lam Ni

Jet ai myit mada lam hpe Karai Kasang sha jaw ya lu ai. Chyum Laika prat hta, Yehowa hpe “Israela amyu a myit mada” lam ngu shaga da ai. (Yeremia 14:8) Israela ni gaw, Karai Kasang kaw na jet ai myit mada lam lu da ai majaw, Karai Kasang gaw shanhte a myit mada lam byin wa ai. Karai jaw ai myit mada lam gaw, byin mayu ai myit daram sha n re. Ngang kang ai madi madun lam nga ai. Tsaban shaning law law hta, Israela ni hpe Karai Kasang gaw ga sadi ni jaw wa nna, dai hte maren mung galaw ya wa ai labau ni nga ai. Shanhte a ningbaw Yawshu ndai hku tsun ai: “Karai Kasang Yehowa nanhte a matu tsun da ai chyeju lam langai mi muk n yawm ai sha, nlang hte hpring tup wa sai.”—Yawshu 23:⁠14.

Shaning ni grai na mat tim, dai hpring tsup wa ai ga sadi ni gaw naw hpring tsup nga ai. Chyum Laika hta, Karai Kasang jaw da ai ga sadi ni grai law hkra nga ai sha n-ga, ga sadi ni hpring tsup wa ai labau ni hpe mung ka da ai. Chyum Laika hta lawm ai n hpring tsup shi ai ga sadi ni hpe mung kam mai ai. Hpa majaw nga yang, dai ga sadi ni hpe jaw ai shaloi, hpring tsup ngut mat sai zawn ka matsing da ai majaw re.

Dai majaw, Chyum Laika hpe myit mada lam jaw ai laika buk ngu nna tsun yang mung n shut ai. Shinggyim masha hte Karai Kasang matut mahkai wa ai labau hpe hkaja yang, Karai Kasang ntsa myit mada lam grau ngang kang wa na re. “Anhte shakut sharang nga lu nna, Chyum Laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai” ngu nna kasa Pawlu ka wa ai.—Roma 15:4.

Anhte Hpe Hpa Myit Mada Lam Karai Kasang Jaw Da Ai Kun?

Gara aten hta myit mada lam ra dik htum rai kun? Si hkrung si htan hkrum ai aten hta re. Ga shadawn, masha law law gaw tsawra ai marai langai n nga mat ai shaloi, myit mada lam gaw hpa re ai hpe n chye ma ai. Si hkrung si htan daram myit mada lam n nga ai lam hpa n nga ai. Si hkrung si htan hpe kadai mung tawt lai n lu ai. Lani ni hta yawng hkrum nan hkrum ra na re. Dai majaw, Chyum Laika hta si hkrung si htan hpe “hpang jahtum na hpyen” ngu nna tsun da ai.—1 Korinhtu 15:26.

Si hkrung si htan hte seng nna hpa myit mada shara nga ai kun? Hpang jahtum na hpyen gaw, “yeng kau ai hkrum na” ngu dai Chyum daw hta sha tsun da ai. Yehowa Karai Kasang hta, si hkrung si htan hpe yeng seng kau lu ai atsam nga ai. Si mat ai ni hpe asak bai jahkrung ya ai hku nna sakse madun wa ai. Si mat ai marai 9 hpe asak bai hkrung wa hkra, Karai Kasang galaw ya wa ai hpe Chyum Laika hta ka da ai.

Si mat ai 4 ya na sai Lazaru hpe asak bai hkrung hkra, galaw ya na matu Kasha Yesu hpe Yehowa atsam jaw wa ai. Yesu gaw masha law law a man hta, Lazaru hpe bai jahkrung ya wa ai.—Yawhan 11:38-​48, 53; 12:​9, 10.

‘Si mat sai masha hpe hpa majaw bai jahkrung sharawt ya ai kun? Shanhte asak kaba wa nna, hpang jahtum gaw bai si ra ai sha n re i?’ ngu nna nang myit hkrup na re. Re, shanhte bai si mat ai. Raitim, bai hkrung rawt wa ai ngu ai madi madun lam a majaw, si mat ai tsawra ai ni hpe bai hkrung rawt shangun mayu ai myit sha n-ga, kamhpa mai ai lam mung nga wa ai. Shanhte bai hkrung rawt wa na re ngu ai hpe kam mai ai madi madun lam ni nga wa ai. Maga mi hku tsun na nga yang, jet ai myit mada lam nga wa ai.

“Ngai gaw bai hkrung rawt ai lam hte asak hkrung ai lam rai nga nngai” ngu Yesu tsun wa ai. (Yawhan 11:25) Mungkan ting na si mat ai masha ni hpe asak bai hkrung hkra, Yesu galaw ya lu na matu Yehowa shi hpe atsam jaw na re. “Lup ni hta rawng nga ai ni nlang hte gaw shi [Hkristu] a nsen na nna, pru lu na ahkying du na ra ai” ngu nna Yesu tsun ai. (Yawhan 5:​28, 29) Lup hta yup pyaw nga ai ni yawng, mungkan Hparadisu hta asak bai hkrung lu na myit mada lam nga ai.

Myihtoi Esaia gaw bai hkrung rawt wa na lam hte seng nna ndai hku tsun da ai: “Na a si ai masha ni bai hkrung na ma ra ai; nye a moi mang ni bai rawt na ma ra ai: ga nhpu hta shanu nga ai ni e, hprang nna mahkawn mangoi mu; kaning rai nme law, nang hta hkrat ai mari gaw, namlaw namlap hta hkrat ai mari hte bung nna, lamu ga gaw si mat ai ni hpe bai shapraw na ra ai.”—Esaia 26:19.

Dai ga sadi gaw nang hpe shalan shabran ya ai n rai? Kanu a hkritung hta shimlum nga ai ma langai zawn, si mat ai ni mung shimlum dik htum shara kaw nga nga ai hpe shingran yu mai ai. Lup hta rawng nga ai ni yawng gaw, atsam kaba dik htum Karai a matsing nyan hta nga nga ai. (Luka 20:37, 38) Ma chyangai langai shangai wa ai shaloi, nta masha yawng hkap tau la ai zawn, kade nna yang mungkan hta, asak bai hkrung wa na si mat ai ni hpe mung hkap tau lu na re. Dai majaw, si hkrung si htan hkrum wa yang pyi myit mada lam nga ai.

Myit Mada Lam Gaw Nang Hpe Hpa Galaw Ya Lu Na Kun?

Myit mada lam gaw kade daram ahkyak ai lam Pawlu tsun wa ai. Karai Kasang lajang ya ai sinda magap hta, hpri gup chyawp hpe myit mada lam hte shingdaw da ai. (1 Htesaloni 5:⁠8) Chyum Laika prat hta, hpyen la ni gaw, shan hpyi gup chyawp ntsa, hpri gup chyawp chyawp ma ai. Baw hpe hkra shangun chye ai laknak law malawng kashawt mat hkra re. Si na daram re ai ana lu na n re. Hpri gup chyawp gaw, baw hpe makawp maga ya ai zawn, myit mada lam mung sawn sumru ai lam ni hpe makawp maga ya lu ai ngu nna Pawlu tsun mayu ai re. Nang gaw Karai Kasang jaw ai myit mada lam hpe kamsham na nga yang, mayak mahkak ni hkrum wa ai shaloi hkrit gari nga na n re. Myit simsa nga na re. Dai majaw, anhte yawng hta hpri gup chyawp zawn myit mada lam nga na matu ahkyak ai.

Karai Kasang jaw ai myit mada lam hte seng nna Pawlu ndai hku tsun ai: “Dai myit mada shara chyawm gaw, anhte a myit masin a matu hpri chyinghkyi tai nga ai rai nna, dai gaw ngang mung ngang, grin mung grin rai nga ai.” (Hebre 6:19) Sanghpaw hten ai kaw na lawt wa ai Pawlu gaw, hpri chyinghkyi a ra ahkyak ai lam hpe atsawm chye da ai. Nbung laru kaba ru wa ai shaloi, sanghpaw la ni gaw hpri chyinghkyi hpe panglai de jahkrat kau ai. Panglai htumpa de hpri chyinghkyi shang mat yang, nbung laru hkrum tim sanghpaw gaw shoi hpa n nga ai sha waw nga na re. Dai hku n galaw yang gaw, lung rawk ni hte adawt nna htenza mat chye ai.

Dai zawn sha, Karai jaw ai ga sadi ni mung anhte a matu ngang kang ai myit mada lam byin nga yang, ndai mungkan hta byin nga ai lam ni hpe hkam sharang lu na matu karum ya na re. Majan, dawsa ai lam, yawn hkyen lam, si hkrung si htan n nga mat na aten, kade n nna yang du wa sana ngu Yehowa Karai Kasang ga sadi jaw da ai. (Laika man  10 na lawk hpe yu u.) Dai myit mada lam nga yang, shoihpa ni hpe koi yen lu na. Karai a tsang madang ni hte maren asak hkrung lu na. Ndai mungkan a akyang htenza lam ni hpe nyet kau lu na re.

Yehowa jaw ai dai myit mada lam gaw na a matu mung re. Masha amyu baw shagu hkye hkrang la hkrum na matu Karai Kasang ra sharawng ai. Hkye hkrang la hkrum na matu hpa galaw mai ai kun? Shawng nnan, tengman ai tara hpe tup hkrak chye na ra ai. (1 Timohti 2:4) Chyum Laika machye machyang hpe hkaja na matu n-gun jaw mayu ga ai. Karai Kasang jaw ai myit mada lam gaw, myit mada lam yawng hta grau ai.

Nang hta Karai jaw ai myit mada lam nga yang, karum shingtau lam n nga ai ngu nna galoi mung hkamsha na n re. Hpa majaw nga yang, Karai ra sharawng lam hte maren re ai bandung ni hpe galaw lu na matu, Karai Kasang n-gun lu jaw ai majaw re. (2 Korinhtu 4:7; Hpilipi 4:13) Dai myit mada lam lu na matu tam nga ai nga yang n-den marai nga u. Tam mu na gaw teng sha re.

[Lawk]

Myit Mada Lam Nga Shangun Ai Lam Ni

Lawu na lam ni gaw na a myit mada lam hpe shangang shakang ya na re:

Ngwi pyaw simsa ai htawm hpang myit mada lam Karai Kasang jaw da ai.

Ngwi pyaw simsa ai mungkan ga hta, kahkyin gumdin ai kun dinghku ni nga na ngu Chyum Laika hta tsun da ai.—Shakawn Kungdawn 37:11, 29; Esaia 25:8; Shingran 21:3, 4.

Karai Kasang gaw n chye masu ai.

Masu magaw ai lam hpe Yehowa n ju n dawng ai. San seng chyoi pra ai Karai Kasang gaw galoi mung masu na n re.—Ga Shagawp 6:16-19; Esaia 6:2, 3; Titu 1:3; Hebre 6:18.

Karai Kasang gaw atsam kaba dik htum madu re.

Yehowa chyu sha ninggawn tawa uphkang madu re. Ninggawn tawa hta Karai a ga sadi run mat hkra hpa mung n galaw lu ai.—Pru Mat Wa Ai 15:11; Esaia 40:25, 26.

Karai Kasang gaw nang hpe htani htana asak hkrung shangun mayu ai.

—Yawhan 3:16; 1 Timohti 2:3, 4.

Karai Kasang gaw anhte hpe myit mada da ai.

Karai Kasang gaw anhte a n hkum tsup ai lam ni hpe n yu ai sha, kaja ai lam, shakut shaja ai lam ni hpe sha maju jung ai. (Shakawn Kungdawn 103:12-14; 130:3; Hebre 6:10) Jaw ai hpe anhte galaw na ngu shi myit mada ai. Tengman lam galaw yang Karai Kasang myit pyaw ai.—Ga Shagawp 27:11.

Karai myit ra ai ban dung ni hpe dep lu hkra karum ya na ngu Karai Kasang ga sadi jaw da ai.

Yehowa hpe nawku ai ni gaw karum shingtau n nga ai ngu nna hkamsha ra na n re. Karai Kasang gaw atsam kaba dik htum re ai chyoi pra ai wenyi hpe nhpaw n ya jaw nna anhte hpe karum ya nga ai.—Hpilipi 4:13.

Karai Kasang hpe kamhpa ai gaw galoi mung n shut ai.

Karai Kasang gaw myit masin mahkra hte kamhpa ging ai wa re ai majaw, anhte myit daw ra na n re.—Shakawn Kungdawn 25:3.

[Sumla]

Hpri gup chyawp gaw baw hpe makawp maga ya ai zawn, myit mada lam mung myit hpe makawp maga ya

[Sumla]

Ngang kang ai myit mada lam gaw hpri chyinghkyi hte bung nna simsa lam lu shangun

[Credit Line]

Courtesy René Seindal/Su concessione del Museo Archeologico Regionale A. Salinas di Palermo