Chyum Laika Gaw Aten Shagu Akyu Rawng

Moi prat na sumla ni hpe madun da ai madun gawk hta hkan yu nga ai ngu shingran yu u. Sumla law malawng gaw, daw hten nga nna nsam ni mung mut taw ai. Hkrang n hkum sai sumla ni mung nga ai. Langai mi chyawm gaw, akaja sha naw rai taw ai. Ahkri ahkrai re ai lam ni kaw na hkawt naw lawm taw ai. “Ndai sumla gaw nau n na shi ai i?” ngu san yu ai shaloi, sumla hkan madun ai wa gaw, “N re. Ndai gaw kaga sumla ni hta na aten grau na sai. Mi na ta re” nga nna bai tsun ai. “Rai yang, atsawm yu lajang da ai majaw kun?” ngu san ai shaloi, “N re. Ndai gaw lamu marang hkra dik htum sumla she re. Lata gasup ai ni mung, dai hpe jahten na matu galaw wa ma ai” ngu tsun ai. Nang grai mau nna, “hpa hte wa mi galaw da ai kun?” ngu myit hkrup na re.

Chyum Laika mung, dai laklai ai sumla hte bung ai. Laika buk law malawng hta na grau na sai, moi prat na laika buk re. Moi prat na kaga laika buk ni mung nga ai. Raitim, daw hten nga ai hkrang shachyaw sumla ni zawn, moi prat na laika buk law malawng gaw, aten na wa ai hte maren hten mat ma ai. Ga shadawn, moi prat na hpung tang hpaji du ni tam mu wa ai lam ni gaw, madi madun lam nga ai nnan bai mu wa ai lam ni hte tsep kawp n bung taw ai. Tsi hte seng ai moi na hpaji jaw ga ai gaw, anhte hpe n karum ya lu ai sha n-ga, shoihpa pyi byin shangun lu ai. Moi prat na laili laika law malawng gaw, adaw achye ni hku nna nga taw ai. Mat mat ai, hten mat ai ni mung nga ai.

Chyum Laika chyawm gaw laklai ai. Lai wa sai shaning 3,500 jan hta ka wa ai raitim, akaja sha naw nga taw ai. Tsaban shaning ni hta dai hpe wan nat ai, hkum pat ai, yu kaji hkrum ai lam ni hpe chyahkring hkring hkrum wa tim, chyum mungga ni gaw mi na ta naw nga taw ai. Bai tam mu wa ai lam nnan ni a majaw, prat n dep mat na malai, Chyum Laika hta madun da ai lam ni gaw, mau na daram nan prat a shawng hta du nga ai.

Dai Ni Aten Hta Hkan Sa Ra Na Tsang Madang Ni

‘Chyum Laika hta sharin ya ai lam ni gaw, ya prat a matu tatut naw re ai kun?’ ngu nang myit hkrup na re. Mahtai lu na matu, ‘Ya prat hta masha ni hkrum nga ai sawng dik htum manghkang ni gaw hpa ni kaw? Gara manghkang gaw hkrit hpa rai dik htum kun?’ ngu ai hpe tinang hkum tinang san yu u. Majan, hka hte n bung n san mat ai lam, ru hka amu, akyang lailen hten za ai lam ni hpe nang myit hkrup na re. Chyum Laika sharin ya ai lam nkau hpe myit yu ga. Myit yu let, ‘Chyum Laika tsang madang ni hte maren masha yawng hkan sa na nga yang, mungkan ga gaw grau nga pyaw wa na kun?’ ngu na tinang hkum tinang san yu u.

Simsa Ai Hpe Ra Sharawng Ai Lam

“Shangwi shapyaw chye ai ni gaw, a lu ma ai: kaning rai nme law, shanhte hpe, Karai Kasang a kasha ni, ngu nna shamying na ma ru ai.” (Mahte 5:9) “Nanhte rai lu myit dai daram, masha nlang hte hte myit hkrum nna hkau chyap nga mu.”​—Roma 12:18.

Matsan Dum Ai Lam, Mara Raw Ya Ai Lam

“Matsan chye dum ai ni gaw, a lu ma ai: kaning rai nme law, shanhte matsan dum la ai hkrum na ma ra ai.” (Mahte 5:7) “Shada da hkam mana ai hte, mara langai ngai nga yang gaw, shada da raw dat kau hkat nga mu: dai Madu [Yehowa]a nanhte a mara hpe raw dat kau ya ai hte maren, nanhte mung galaw nga mu.”​—Kolose 3:13.

Amyu Ru Sai N Ginhka Ai Lam

“Dinghta ga e nga pra na matu, masha amyu danghta hpe daju langai hte sha hpan tawn da” ai. (Kasa 17:26) “Karai Kasang masha myi man n tau ai gaw, ya ngai gaja wa chye se ai: amyu baw shagu hta shi hpe hkrit hkungga ai hte ding man ai amu galaw ai wa gaw, shi kaw myi man pa nga ai.”​—Kasa 10:34, 35.

Mungkan Ga Hpe Manu Shadan Ai Lam

“Yehowa Karai Kasang gaw dai masha hpe woi la nna, Edin sun hpe yu lajang na hte sin nga na matu, tawn da wu ai.” (Ningpawt 2:15) Karai Kasang gaw “lamu ga jahten shabyak kau ai ni hpe bai jahten shabyak kau na.”​—Shingran 11:18.

Lawhpa Ai, Akyang Hten Ai Hpe N Ju N Dawng Ai Lam

“Nammak lawhpa lam yawng hta na myit hpe shim shadang nna koi gam mu: kaning rai nme law, sut gan law htam wa ai hta, masha asak rawng ai n rai.” (Luka 12:15) “Hpye ai amu, n san n seng ai yawng hte hte, nammak lawhpa ai hpe nanhte hta e ga hte pyi n shamying u ga; dai lam gaw chyoi pra ai ni a matu sut nga ai.”​—Ehpesu 5:3.

Dinghpring Ai, Bungli Shakut Ai Lam

“Lam shagu hta arawn alai kaja hkan mayu ga ai.” (Hebre 13:18) “Lagu ga ai wa gaw, bai hkum lagu u ga; kadawn nga ai ni hpe karan jaw lu hkra, tinang a lata hte mai kaja ai shachyen let, magam bungli galaw nga u ga.”​—Ehpesu 4:28.

Ra Kadawn Nga Ai Ni Hpe Karum Ya Ai Lam

“Myit kaji nga ai ni hpe shalan shabran nga mu, gawngkya ai ni hpe shadaw shangang nga mu, masha yawng hte hpe galu kaba ai myit madun nga mu.” (1 Htesaloni 5:14) ‘Ru tsang kyindut hkrum ai jahkrai nmai ni hte, gaida gaina ni hpe kawan katsan yu u.’​—Yaku 1:27.

Chyum Laika hta dai tsang madang ni hpe madun da ai sha n-ga, manu shadan nna prat hkrun lam hta tatut hkan sa na matu mung sharin ya ai. Lahta hta tsun wa ai lam ni hpe tatut hkan sa yang, manghkang law law hpe koi lu na re. Teng sha nga yang, Chyum Laika tsang madang ni gaw, tatut rai nna akyu jaw nga ding yang re. Ya aten hta Chyum Laika sharin achyin ya ai lam ni gaw, nang hpe gara hku akyu jaw lu ai kun?

Ya Aten Hta Nang Hpe Akyu Jaw Lu Ai Lam

Hpaji rawng ai la langai ndai hku tsun wa ga ai: “Hpaji byeng-ya chyawm gaw teng man nga ai lam hpe, dai hpaji ni a majaw byin wa ai akyu ni e sakse hkam ya nga ma ai.” (Mahte 11:19, JCLB) Nang myit hkrum ai n re i? Tatut hkan sa ai shaloi akyu nga yang she, teng man ai hpaji byeng-ya ngu lu tsun ai. ‘Chyum Laika gaw teng sha tatut re ai nga yang, nye prat a matu akyu rawng ai n re i? Ya hkrum nga ai manghkang ni hpe hparan na matu gara hku akyu rawng ai kun?’ ngu nna myit hkrup na re. Ga shadawn langai hpe myit yu u.

Dehpanib gaw hkum tsup ai aprat hpe lu da ai. Raitim, n myit mada ai sha mayak manghkang langai hpang langai hkrum wa ai. Kasha si mat ai. Dinghku hka mat ai. Hpaga lam hten mat ai. “Kasha n nga, madu wa n nga, nta mung n nga, hpa nan n nga mat sai. Asak hkrung nga ai gaw lachyum n rawng ai ngu pyi hkamsha wa ai” ngu tsun dan ai.

“Anhte a aprat a nhtoi ni sanit shi ning rai nga ai; Kalang lang, n-gun ja ai a majaw matsat shi ning du rai ti mung, De a gumrawng shara gaw, amu hte yawn hkyen ai hkrai rai nga ai: Dai gaw alawan lai wa nna, anhte pyen mat nga ga ai” ngu ai Chyum mungga gaw grai teng ai hpe Dehpani shi nan hkrum wa ai.​—Shakawn 90:10.

Dehpani gaw mayak manghkang ni hkrum nga ai shaloi, Chyum Laika kaw na karum shingtau lam lu wa ai. Shi lu wa ai karum shingtau lam gaw grai laklai ai. Mayak manghkang ni hkrum ai shaloi, Chyum Laika sharin achyin ya ai lam ni kaw na lak lak lai lai karum shingtau lam lu wa ai ni a lam hpe, hpang na sumhpa 3 hta madun da ai. Shanhte a matu Chyum Laika gaw, sumhpa a shawng hta tsun wa ai sumla hte bung ai. Prat n dep mat ai laika ni hte mung tsep kawp n bung ai. Chyum Laika gaw hpa majaw laklai ai kun? Masha ni a sawn sumru ai lam n re ai sha, Karai a sawn sumru ai lam ni lawm nga ai majaw kun?​—1 Htesaloni 2:13.

Anhte a prat gaw chyahkring sha rai nna manghkang ni hte hpring nga ai hpe nang mung myit hkrum na re. Manghkang ni hkrum wa ai shaloi, shalan shabran lam hte kam mai ai hpaji jaw ga ni hpe gara kaw na lu mai na kun?

Chyum Laika gaw tatut re ai lam ni hte karum ya ai madung lam 3 hpe yu yu ga. Chyum Laika gaw

1. manghkang ni hpe dang lu ai daram koi lu ai lam

2. hkrum wa ai manghkang ni hpe hparan lu ai lam

3. koi yan n mai ai manghkang ni hpe hkamjan lu na lam ni hpe sharin ya ai.

Ndai lam 3 hpe hpang na sumhpa ni hta sanglang da ai.