Machyi Galu Hkrum Ai Shaloi Chyum Laika Gaw Nang Hpe Karum Ya Lu Ai Kun?
Chyum Laika Mahtai
Karum ya lu ai. Karai Kasang gaw shi a mayam ni machyi makaw hkrum ai shaloi lanu lahku ai. Sadi dung ai mayam langai hte seng nna Chyum Laika hta ndai hku tsun da ai: “Machyi makaw hkrum yang, nang shi a yup ku galai ya na ndai.” (Shakawn 41:3) Nang gaw machyi galu hkrum taw ai rai yang, lawu na lam 3 gaw nang hpe shalan shabran ya lu ai:
Hkamjan lu na matu akyu hpyi u. “Chye chyang ai nyan yawng hta grau lai ai Karai Kasang a ngwi pyaw ai gaw” mayak mahkak ni nga tim, matut hkamjan lu na matu nang hpe karum ya lu ai.—Hpilipi 4:6, 7.
Kaja ai ningmu nga u. “Kabu gara ai myit hkam kaja ai tsi rai nga ai; Gawng run ai chyawm gaw, nrut n ra ni hpe jahkraw kau nga ai” ngu Chyum Laika hta tsun da ai. (Ga Shagawp 17:22) Pyaw pyaw nga chye hkra shakut u. Dai gaw myitru myit tsang ai hpe yawm shangun nna grau hkamja shangun ai.
Htawm hpang myit mada lam nga u. Tengman ai htawm hpang myit mada lam gaw, machyi galu hkrum tim ngwi pyaw shangun lu ai. (Roma 12:12) “Ngai machyi nga nngai, nga nna n tsun na” aten du wa na lam Chyum Laika hta tsun da ai. (Esaia 33:24) Dai ni aten na tsi ladat hte n tsi ya lu ai ana yawga ni hpe Karai Kasang tsi ya na re. Ga shadawn, asak kaba ai ni bai hkalung wa na lam Chyum Laika hta ndai hku tau hkrau tsun da ai: “shi a hkum shan gaw ma kaji a hkum shan zawn hkalung wa nna, shi gaw brang ram prat bai galai na ra ai.”—Yoba 33:25.
Sadi na matu: Yehowa Sakse Ni gaw Karai Kasang a karum shingtau lam hpe hkap la tim, machyi galu ai hte kaga yawga ni a matu tsi tsi ai hpe mung hkam la ga ai. (Marku 2:17) Raitim, tsi tsi ai ladat lama ma hpe grau nna n-gun jaw ai lam gaw n galaw ai. Dai hte seng nna, tinang nan dawdan ra ai ngu anhte sawn la ai.