Mungkan Hte San San Nga Lu Na Lam

1. Yesu gaw shi n si shi ai hpang jahtum shana hta gara lam hpe ahkyak shatai tsun wa ai kun?

YESU gaw shinggyim masha hku nna shi a hpang jahtum shana hta, sape ni a htawm hpang hte seng nna myit tsang ai lam madun wa ai. Dai hte seng nna shi gaw “ndai ni hpe mungkan ga na htawt la na, ngai hpyi nngai n rai, n shawp n kap ai hta na shanhte hpe makawp maga na she, ngai hpyi nngai. Ngai gaw mungkan ga na n rai nngai hte maren, ndai ni mung mungkan ga na n rai ma ai” nga nna Kawa kaw akyu hpyi wa ai. (Yawhan 17:15, 16) Dai akyu hpyi ga hta Yesu gaw shi a sape ni hpe grai tsawra ai lam mu lu ai. De a shawng hta mung sape nkau mi hpe, “nanhte chyawm gaw mungkan ga hte seng ai ni n rai myit dai” ngu tsun nna dai ga kade daram ahkyak ai hpe shi madun dan wa ai. (Yawhan 15:19) Dai majaw shi a sape ni mungkan hte san san nga ai gaw Yesu a matu grai ahkyak ai hpe mu lu ai.

2. Yesu tsun wa ai “mungkan” ngu ai gaw hpa hpe tsun mayu ai kun?

² Yesu tsun wa ai “mungkan” ngu ai gaw Karai Kasang hte tsan nga nna Satan uphkang ai npu hta nga nga ai shinggyim masha ni hpe tsun mayu ai re. Shanhte hta Satan a myit jasat re ai tingkyeng myit hte gumrawng ai myit jasat rawng nga ai. (Yawhan 14:30; Ehpesu 2:2; 1 Yawhan 5:19) “Mungkan ga hpe jinghku hku ai myit gaw, Karai Kasang hpe n dawng n yawt ai myit rai nga ai” gaw teng sha re. (Yaku 4:4) Karai Kasang a n-gaw nwai ai myit hta nga mayu ai ni gaw mungkan ntsa hta nga taw ai raitim, ndai mungkan hte gara hku san san nga lu na kun? Lam manga hpe hkaja mat na re. Dai ni gaw, Karai Kasang a mungdan hpe matut sadi dung nna mungkan a mung masa lam hta lapran nga ai lam, mungkan myit jasat hpe ninghkap ai lam, sari rawng ai mawn sumli ai lam, myi hpe asan sha tawn ai lam hte wenyi hpyen hking hpe bu hpun ai lam ni rai nga ai.

MATUT SADI DUNG NNA LAPRAN NGA AI LAM

3. (a) Yesu gaw shi prat na mung masa lam hta hpa majaw n lawm wa ai kun? (b) Namman chya hkrum ai Yesu a sape ni gaw sumtsan salang ni hku nna magam gun ai ngu hpa majaw lu tsun ai kun? (Lawu matsing hpe mung yu u.)

³ Yesu gaw shi a prat hta, mung masa lam hta n lawm ai sha Karai Kasang mungdan lam hkaw tsun ai lam hpe myit maju jung wa ai. Shi gaw htawm hpang sumsing asuya a aya tang hkrum ai hkawhkam re. (Daniela 7:13, 14; Luka 4:43) Dai majaw munggyi Puntu Pilat a shawng hta “nye a mungdan gaw ndai mungkan ga na n rai li ai” nga nna Yesu lu tsun wa ai. (Yawhan 18:36) Yesu hpe kasi la ai hku nna, shi a sape ni gaw mungdan lam hkaw tsun ai, Hkristu hte shi a mungdan hpe sadi dung ai. (Mahte 24:14) Dai majaw, “Hkristu a lam htinglet ya ai kasa [sumtsan salang, NW] ni anhte rai nga ga ai; Karai Kasang hte htinglu htinglai mu, ngu nna Hkristu a jaw e anhte hpyi nem ga ai” nga nna kasa Pawlu ka wa ai.a​—2 Korinhtu 5:20.

4. Karai Kasang Mungdan hpe sadi dung ai lam, jet ai Hkristan ni yawng gara hku madun ma ai kun? (Shawng Nnan Na Hkristan Ni Lapran Nga Ai Lam ngu ai lawk hpe yu u.)

⁴ Sumtsan salang ni gaw shanhte mungdan asuya a malai hku nna kaga mungdan hta sa nga ai. Dai majaw, shanhte du taw ai mungdan a mung masa lam hta n shang lawm ai. Raitim, shanhte malai hkam la da ai asuya hpe gaw madi shadaw ma ai. “Sumsing lamu mung chying sha ni” re ai namman chya hkrum ai Hkristu a sape ni mung dai hte maren sha re. (Hpilipi 3:20, JCLB) Shanhte gaw mungdan a lam myit rawt let hkaw tsun nna, Hkristu a wan hku law ai “sagu kaga” ni hpe “Karai Kasang hte htinglu htinglai” na matu karum ya ma ai. (Yawhan 10:16; Mahte 25:31-40) Dai “sagu kaga” ni gaw, namman chya hkrum ai Yesu a hpunau ni hpe madi shadaw let, Hkristu a dat kasa ni hku nna magam gun ma ai. Dai hpung lahkawng yan gaw, Meshia Mungdan hpe madi shadaw ai kahkyin gumdin ai sagu hpung langai hku nna mungkan a mung masa lam hta lapran nga ma ai.​—Esaia 2:2-4 hpe hti u.

5. Ya aten na jet ai Hkristan ni gaw moi prat na Karai Kasang a masha ni hte gara hku shai ai lam nga ai kun? Dai hpe jet ai Hkristan ni gara hku madun mai na kun?

⁵ Jet ai Hkristan ni, mung masa hta n lawm ai gaw Hkristu hpe sadi dung mayu ai majaw sha n re. Moi prat na Karai Kasang a masha ni gaw mungdan langai hta sha nga wa ai. Raitim, ya aten hta anhte ni gaw mungdan shagu hta nga ai mungkan grup hpunau nauna ni re. (Mahte 28:19; 1 Petru 2:9) Mung masa pati ni hpe madi shadaw taw ai nga yang, Karai Kasang a mungdan sha anhte a matu kaja htum re ai ngu hkaw tsun lu na n re. (1 Korinhtu 1:10) Dai hta n-ga, lama na majan byin ai nga yang, tinang hte gasat ra ai mungdan hta nga ai anhte tsawra ai hpunau nauna ni hpe gasat ra na re. (Yawhan 13:34, 35; 1 Yawhan 3:10-12) Dai majaw, Yesu gaw shi a sape ni hpe nhtu n lang na matu tsun wa ai. Shanhte a hpyen ni hpe pyi tsawra na matu tsun wa ai.​—Mahte 5:44; 26:52; “Ngai Gaw Lapran Nga Ai Wa Rai Kun?” ngu ai lawk hpe yu u.

6. Karai Kasang hpe ap nawng da ai gaw Kehta hte matut mahkai ai lam hta gara hku karum ya lu ai kun?

⁶ Jet ai Hkristan ni gaw marai langai ngai, uhpung (sh) mungdan langai ngai hpe n re ai sha, Karai Kasang hpe ap nawng da ai ni re. 1 Korinhtu 6:19, 20 hta “nanhte gaw tinang hkum hpe pyi up lu ai n rai; nanhte jahpu manu daw nna mari da sai ni rai nga myit dai” nga nna tsun da ai. Dai majaw, Yesu hpang hkan ai ni gaw “Kehta” ngu ai asuya ni lu la ging ai hkungga lara ai lam, hkansi ni zawn re ai ni hpe jaw nna npu taw tim, “Karai Kasang hte seng ai hpe mung Karai Kasang hpe ya” ma ai. (Marku 12:17; Roma 13:1-7) Dai hta nawku daw jau ai lam, sadi dung let madat mara ai lam ni lawm ai. Dai hta n-ga, ra wa yang Karai Kasang a matu tinang a asak hpe pyi asum hkam na matu jin jin rai nga ma ai.​—Luka 4:8; 10:27; Kasa 5:29 hte Roma 14:8 hpe hti u.

MUNGKAN A MYIT JASAT HPE NINGHKAP AI LAM

7, 8. “Mungkan a myit jasat” ngu ai gaw hpa rai kun? Dai myit jasat gaw madat mara ai lam n nga ai ni hta gara hku “ahkrung” nga ai kun?

⁷ Mungkan a n hkru ai myit jasat hpe ninghkap ai hku nna mung Hkristan ni mungkan hte san san nga ma ai. “Anhte chyawm gaw mungkan ga a wenyi [myit jasat, NW] hpe hkam la saga ai n rai; . . . Karai Kasang kaw na Wenyi hpe anhte hkam la saga ai” nga nna Pawlu ka wa ai. (1 Korinhtu 2:12) Ehpesu masha ni hpe mung shi ndai hku tsun ai: “Dai aten hta nanhte gaw ndai mungkan a prat hkrun lam hte maren hkan sa nna anhte a makau grup yin hta nga ai nbung a ahkang aya hte bung ai myit jasat hpe hkang ai wa a myit ra ai hku hkan sa wa ma ai. Dai myit jasat gaw madat mara ai lam n nga ai ni hta ahkrung nga ai.”​—Ehpesu 2:2, 3, NW.

⁸ Ndai mungkan a “nbung” (sh) myit jasat gaw n mu lu ai n-gun atsam rai nna Karai Kasang a ga n madat na matu shadut ya ai. “Hkum shan kayut ai lam, myit marin ai lam” ni hpe grau nga hkra sharawt ya ai. (1 Yawhan 2:16; 1 Timohti 6:9, 10) Mungkan a myit jasat gaw masha ni mara galaw mayu ai myit nga hkra shadut ya ai hku nna mungkan hta “ahkang aya” lu nga ai. Nbung zawn shara shagu hta chyam bra nga ai. Dai hta n-ga, tingkyeng myit rawng ai, gumrawng ai, lawhpa ai, myit tsaw myit dap ai, akyang lailen hte seng nna tinang ra ai hku galaw mayu ai hte, ninghkap mayu ai myit jasat ni nga wa ai hku nna, madat mara ai lam n nga ai ni hta “ahkrung” nga ai.b Ndai mungkan myit jasat gaw masha langai a myit masin hta Satan a akyang lailen ni angwi ngwi nga wa hkra shadut ya ai.​—Yawhan 8:44; Kasa 13:10; 1 Yawhan 3:8, 10.

9. Na a myit masin hta mungkan a myit jasat gara hku kap wa chye ai kun?

⁹ Mungkan a myit jasat gaw na a myit masin hta ru jung wa chye ai kun? Nang hta sadi ai lam n nga yang ru jung wa chye ai. (Ga Shagawp 4:23 hpe hti u.) Anhte gaw, Yehowa hpe n nawku ai marai langai ngai hte kanawn na nga yang, shanhte gaw kaja ai masha zawn raitim, dai myit jasat gaw anhte n chye dat ai sha anhte hta nga wa chye ai. (Ga Shagawp 13:20; 1 Korinhtu 15:33) Dai hta n-ga, n kaja ai laika ni, nse nsa sumla ni, makam masham htak mat ai ni a internet website ni, akyu n jaw ai shangwi shapyaw ai lam ni hte laja lana shingjawng ra ai ginsup ai lam ni kaw nna dai myit jasat kap wa chye ai. Satan hte shi mungkan a myit jasat nga ai kadai kaw nna raitim, gara lam kaw nna rai ti mung dai myit jasat kap wa chye ai.

10. Mungkan a myit jasat hpe anhte gara hku ninghkap lu na kun?

¹⁰ Anhte gaw mungkan myit jasat hpe gara hku ninghkap nna, Karai Kasang a n-gaw nwai ai myit hta a nga nga lu na kun? Yehowa hkyen lajang ya ai wenyi malu masha ni hpe hkam la nna, chyoi pra ai wenyi lu na matu nsim nsa akyu hpyi ai hku nna re. Yehowa gaw Satan hte shi a lata npu hta nga ai n hkru ai mungkan hta na grau atsam kaba ai. (1 Yawhan 4:4) Dai majaw, akyu hpyi ai hku nna Yehowa hte nihtep hkra nga na matu grai ahkyak ai.

SARI RAWNG AI MAWN SUMLI LAM

11. Mawn sumli ai tsang madang ni hta mungkan a myit jasat gara hku ka-up nga ai kun?

¹¹ Marai langai a mawn sumli lam hte hkum hkrang san seng ai lam hpe yu nna shi a myit masin hpe ntsa lam chye lu ai. Mungdan law law hta mawn sumli ai tsang madang grai n kaja wa ai. TV lamang langai hta, kade n na yang shawa num ni hpun na palawng n nga sana re ngu tsun ai. Asak shi masum ning n hpring shi ai numsha ni pyi “law law hpaw madun, kachyi sha magap” ai lam ni galaw nga sai nga nna shiga langai hta tsun ai. Kaga lam langai gaw hkrup mara bu hpun ai lam re. Dai gaw ninghkap ai myit jasat hpe madun nga ai sha n-ga, sari n rawng ai hte tinang hkum tinang hkungga ai lam n nga ai hpe madun ai re.

12, 13. Anhte a mawn sumli lam hte seng nna gara tara ni hpe hkan sa ra ai kun?

¹² Yehowa a mayam ni hku nna anhte gaw kaja ai hkrang nsam nga mayu ga ai. Tsun mayu ai gaw san seng ai, yu htuk ai, sari rawng ai, aten ahkying hte htuk ai mawn sumli ai lam hku nna re. Anhte a hkrang nsam gaw “sari sadang” nga ai hpe aten shagu dan dawng ging ai. “Nawku htung tara atsawm sha hkan shadik ai” num, la ni hta nga ai “kaja ai arawn alai” hte htap htuk nga ra ai. Anhte a ahkyak ai madung lam gaw tinang hpe myit maju jung na matu n re ai sha, “Karai Kasang a n-gaw nwai ai myit hta a nga nga” na matu re. (1 Timohti 2:9, 10, JCLB; Yuda 21) “Karai Kasang a man e hpu ging ai, myit masin hta makoi nga ai masha” hpe grai tsawm hkra anhte mawn sumli mayu ga ai.​—1 Petru 3:3, 4.

¹³ Kaga ni gaw anhte a mawn sumli ai lam hpe yu nna anhte a nawku daw jau ai lam ntsa kaja ai (sh) n kaja ai mu mada lam nga wa na re. “Sari sadang” ngu ga gale da ai Greek ga si gaw, kaga ni a hkamsha lam (sh) mu mada lam hpe hkungga nna, myit tau ya ai lam madun ra ai lachyum mung lawm ai. Dai majaw, anhte gaw tinang ra ai hta kaga ni a myit nsam hpe tau ya nna mawn sumli ging ai. Yehowa hte hpunau nauna ni hpe anhte shagrau mayu ga ai. “Nga manga hta Karai Kasang a hpung shingkang tam let, galaw” ai hku nna anhte ni gaw Karai Kasang a magam gun ni re ai lam madun mayu ga ai.​—1 Korinhtu 4:9; 10:31; 2 Korinhtu 6:3, 4; 7:1.

14. Anhte a mawn sumli ai lam hte seng nna tinang hkum tinang gara ga san ni san ra ai kun?

¹⁴ Hkaw tsun bungli hta shang lawm nga ai aten (sh) zuphpawng lung ai aten ni hta, anhte a mawn sumli lam hte san seng ai lam gaw grau ahkyak ai. Dai majaw tinang hkum tinang ndai hku san yu u: ‘Nye a mawn sumli lam gaw masha ni grai sadi hkrup ai du hkra lai lai jan jan byin nga ai kun? Kaga ni a myit hpe dingbai dingna jaw ai kun? Nawku hpung hta gun hpai ai lit ni a matu atsam hpring na hta, ngai ra ai hku galaw na gaw grau ahkyak ai kun?’​—Hpilipi 4:5; 1 Petru 5:6.

15. Mawn sumli ai, san seng ai hte seng nna Chyum Laika hta ahkri ahkrai ka da ai tara ni hpa majaw n nga ai kun?

¹⁵ Chyum Laika hta mawn sumli ai lam, hkum hkrang san seng ai lam hte seng nna Hkristan ni a matu ahkri ahkrai ka da ai tara ni n nga ai. Yehowa gaw anhte a wanglu wanglang lata lu ai ahkang hte sawn dinglik lu ai atsam ni hpe jailang shangun mayu ai. Chyum Laika tara ni hpe sawn dinglik nna “kaja ai hte n kaja ai hpe chye ginhka lu hkra, tinang a myit mang ai lam hpe len shaman ai hte shakung jahpan chye” ai kung hpan ai ni byin shangun mayu ai. (Hebre 5:14) Ahkyak htum gaw, Karai Kasang hte masha shada hpe tsawra nna, dai tsawra myit a lam matsun ya ai hte maren galaw na matu mung Karai Kasang ra sharawng ai. (Marku 12:30, 31 hpe hti u.) Karai Kasang ra sharawng ai mawn sumli hkrang amyu myu nga ai. Mungkan ting hta galaw ai Yehowa Sakse Ni a zuphpawng kaba ni hta dai zawn mawn sumli ai hkrang amyu myu hpe mu lu ai. (Laika man 58 na sumla hpe yu u.)

PRAT HPE ASAN SHA TAWN AI LAM

16. Mungkan a myit jasat hte Yesu a lam matsun gaw gara hku n htan shai ai kun? Tinang hkum tinang gara gasan ni san ra ai kun?

¹⁶ Mungkan a myit jasat gaw hkalem chye nna, gumhpraw hte arung arai ni nga yang, ngwi pyaw na ngu masha law law kam hkra galaw nga ai. Raitim Yesu ndai hku tsun ai: “sutgan law htam wa ai hta, masha asak rawng ai n rai.” (Luka 12:15) Tinang hkum tinang ladu lai hkra sharam nga na matu mung, Yesu tsun nga ai n re. “Wenyi lam hta ra rawng ai hpe chye” ai ni, prat hpe asan sha tawn ai ni, wenyi lam hpe sha myit maju jung ai ni gaw, asak hte teng man ai ngwi pyaw lam lu la na ngu ai hpe shi sharin ya nga ai re. (Mahte 5:3, NW; 6:22) Tinang hkum tinang ndai hku san u: ‘Yesu sharin ya ai lam hpe teng sha ngai kam ai kun? shing nrai “masu magaw ai a kawa” Satan gaw ngai hpe shingkang ka-up taw ai kun? (Yawhan 8:44) Nye a tsun shaga ai lam, bandung ni, shawng tawn ai lam ni hte nye a prat hkrun lam gaw hpa hpe madun nga ai kun?’​—Luka 6:45; 21:34-36; 2 Yawhan 6.

17. Prat hpe asan sha tawn ai ni lu la ai shaman chyeju nkau mi hpe tsun dan u.

¹⁷ “Dai mungga hpe . . . hkan galaw ai ni nan, a tai nga mu” nga nna Yesu tsun ai. (Yaku 1:22) Prat hpe asan sha tawn ai ni hkam la lu ai akyu nkau mi hpe hkaja yu ga. Shanhte ni gaw Mungdan magam hta teng man ai ngwi pyaw simsa lam lu la ma ai. (Mahte 11:29, 30) Myit tsang hpa ni hpe koi yen lu ai majaw, myit hte seng ai ana ahkya ni hpe n hkam sha lu sai. (1 Timohti 6:9, 10 hpe hti u.) Shanhte a prat hta nga ai hte sha myit dik ai majaw, kun dinghku hte Hkristan manaw manang ni a matu aten grau lu jaw ai. Ngwi pyaw let mung yup pyaw lu ai. (Hpaji 5:12) Shanhte dang lu ai daram gam jaw gam ya ai majaw grai kabu ma ai. (Kasa 20:35) Shanhte gaw “kamsham ai lam hta” hpring tsup nga ai majaw, simsa lam hte myit dik lam lu ma ai. (Roma 15:13; Mahte 6:31, 32) Dai ni gaw grai manu dan ai shaman chyeju ni re.

“HPYEN HKING NLANG HTE HPE” BU HPUN AI LAM

18. Anhte a hpyen, shi a ladat ni hte anhte a “gasat gala ai” lam hte seng nna Chyum Laika hta gara hku tsun da ai kun?

¹⁸ Karai Kasang a n-gaw nwai ai tsawra myit hta nga mayu nna shakut ai ni gaw, Satan gasat ai kaw nna makawp maga lam lu ma ai. Satan gaw Hkristan ni a ngwi pyaw lam hpe sha n-ga, htani htana asak hpe mung sum shangun mayu ai. (1 Petru 5:8) “Anhte a gasat gala ai [kamu hkat ai, NW] gaw, asai yan ashan hpe n re ai sha, du agyi ni hpe mung, ahkang aya lu ai ni hpe mung, ndai sin mak nga ai mungkan a hpung dagu rawng ai ni hpe mung, sumsing lamu lahta tang e nga ai, n hkru n hkra ai nat a luksuk ni hpe mung, gasat gala nga ga ai” nga nna Pawlu tsun wa ai. (Ehpesu 6:12) Ndai kaw tsun da ai “gasat gala ai” ngu ai gaw myi man hkrum, lata hte gasat ai lam re. Hpyen ni hte nhkun kata kaw na gasat ai zawn tsan tsan kaw na sanat hte gasat ai lam n re ai. “Du agyi ni,” “ahkang aya lu ai ni,” “hpung dagu rawng ai ni” ngu ai ga si gaw nat ni kaw nna zai ladat hte tau hkrau lajang da ai lam hku sa gasat ai hpe tsun mayu ai re.

19. Hkristan ni a wenyi hpyen hking ni hpe tsun dan u.

¹⁹ Anhte hta n hkum tsup ai lam ni, gawng kya ai lam ni nga tim awng dang lu ai. Gara hku nna kun? “Karai Kasang a hpyen hking nlang hte hpe lang dagraw” ai hku nna re. (Ehpesu 6:13) Dai hpyen hking hpe Ehpesu 6:14-18 hta ndai hku tsun da ai: “Nanhte a nshang hpe tengman ai hte kyit nna, ding hpring ngu ai sinda magap hpe dagap nhtawm, ngwi pyaw shabyin ai kabu gara shi ga hkaw tsun na jin jin rai nga u ga, lagaw hta kyepdin din let, lahpran tsap nga mu. Dai hta n-ga, n hkru n hkra ai wa a wan pala nlang hte hpe sat dang kau lu na, makam masham ngu ai n-gang hpe lang kahtap nga mu. Hkye hkrang la ngu ai hpri gup chyawp hpe chyawp nna, Karai Kasang a mungga ngu ai Wenyi a ntawng nhtu hpe, a hpye nga mu. Ahkying ladaw shagu hte hta e, akyu hpyi nna hpyi nem ai amyu myu hte, dai Wenyi hta hpyi nga nna, a maja nga let chyoi pra ai ni nlang hte a matu mara n-gun n yaw ai sha, tut tut akyu a hpyi nga mu.”

20. Anhte a masa gaw hpyen la langai a masa hte gara hku shai ai kun?

²⁰ Wenyi hpyen hking gaw Karai Kasang hkyen lajang ya ai lam re ai majaw, anhte bu hpun nga ding yang makawp maga lu na gaw teng sha re. Hpyen la ni gaw majan n gasat ra ai aten hta simsa lu ai. Raitim, Hkristan ni gaw Satan a mungkan hpe Karai Kasang jahten nna, n hkru ai nat ni yawng hpe sung htum ai shara de jahkrat ai aten du hkra, wenyi majan hpe naw matut gasat ra ai. (Shingran 12:17; 20:1-3) Dai majaw, nang hta nga ai gawng kya lam ni, n kaja ai myit jasat ni hpe ninghkap taw ai nga yang asum hkum jaw. Hpa majaw nga yang anhte yawng gaw, Yehowa a ntsa matut sadi dung lu na matu tinang hkum tinang “gasat” nga ra ai. (1 Korinhtu 9:27) Dai majaw, anhte n gasat ai sha nga yang she myit tsang hpa re.

21. Wenyi majan hta gara hku awng dang lu na kun?

²¹ Anhte a atsam ningja hte sha dai majan hpe n awng dang lu ai. Dai majaw, Pawlu gaw Yehowa kaw “ahkying ladaw shagu” hta akyu hpyi ra ai ngu sadi jaw wa ai. Dai sha n-ga, majan hpe tinang hkrai gasat ra na n re ai majaw, “hpyen manang ni” hte kanawn ai hku nna, Chyum Laika hpe hkaja ai hku nna Yehowa a ga hpe madat ging ai. (Hpilemon 2; Hebre 10:24, 25) Dai lam ni hta sadi dung let galaw ai ni gaw awng dang na sha n-ga, mayak mahkak hkrum ai aten hta mung, shanhte a makam masham hpe atsawm makawp maga lu na re.

NA A MAKAM MASHAM HPE MAKAWP MAGA NA MATU JIN JIN RAI NGA U

22, 23. (a) Anhte a makam masham hpe makawp maga na matu hpa majaw jin jin rai ra ai kun? Tinang hkum tinang gara ga san ni san ging ai kun? (b) Hpang na daw hta gara lam ni hpe bawng ban na kun?

²² “Nanhte chyawm gaw mungkan ga hte seng ai ni n rai myit dai . . . mungkan ga gaw nanhte hpe n dawng n yawt” na nga nna Yesu tsun wa ai. (Yawhan 15:19) Dai majaw Hkristan Ni gaw, hkungga ai hte sumnung ai hku tinang a makam masham hpe makawp maga na matu jin jin rai ra ai. (1 Petru 3:15 hpe hti u.) Tinang hkum tinang ndai hku san u: ‘Law malawng hkap la ai lam langai hpe Yehowa Sakse Ni hpa majaw n hkap la ai hpe ngai chye na ai kun? Dai zawn masa ni hta, Chyum Laika hte sadi dung ai mayam tsun ai lam ni gaw, teng man ai ngu ai hpe ngai gaja wa kam ai kun? (Mahte 24:45; Yawhan 17:17) Yehowa a man hta teng man ai hpe galaw ai shaloi, kaga ni hte n bung na hpe n hkrit ai sha n-ga, de a matu arawng la ai kun?’​—Shakawn 34:2; Mahte 10:32, 33.

²³ Raitim, mungkan hte san san nga mayu ai anhte a myit jasat gaw, grai sumnung ai ladat hte chyam dinglik hkrum chye ai. Ga shadawn, lahta kaw tsun wa ai hte maren, Satan gaw mungkan a shangwi shapyaw ai lam hku nna, Yehowa a mayam ni mungkan de lawm mat na matu hkalem nga ai. Dai majaw, anhte hpe ngwi pyaw shangun nna, myit nsam hpe mung dingbai dingna n jaw ai shangwi shapyaw lam hpe gara hku lata mai na kun? Dai lam hpe hpang na daw hta bawng ban na re.