HKAJA 10

Nsen Galai Shai Ai Lam

Mahte 20:31

KADUN DAWK: Tsun mayu ai lam hpe asan sha tsun dan nna, myit sharawt ya lu na matu na a nsen hpe shayawm shaja, nem tsaw hte lawan la-nyan galai shai u.

GALAW MAI AI LAM:

Nsen shayawm shaja galai shai u. Madung lam dan dawng na matu hte madat nga ai ni hpe myit shadut ya na matu, nsen shaja nna tsun u. Chyum daw hta na, tara jeyang ai lam ni hpe dai zawn hti u. Nang hpa tsun na hpe myit mada nga na matu (sh) hkrit ai lam, myit tsang ai lam hpe tsun dan na matu, nsen hpe shayawm nna tsun u.

Daru nga ai ngu madat ai ni hkam sha mat ai du hkra, nsen hpe n mai shaja ai. Nang hpe sha myit maju jung wa hkra, kamung naura zawn tsun shaga ai hpe koi u.
Nsen nem tsaw galai shai u. Nang sharin ya mayu ai lam hpe, hkam sha lam hte tsun dan lu na matu, nsen nem tsaw galai shai nna tsun u. Ga shadawn, myit kahpra ai, myit tsang ai, yawn hkyen ai lam ni hpe re.
Nsen lawan la-nyan galai shai u. Myit rawt ai lam hpe madun na matu, loi mi lawan ai hku tsun u. Ahkyak ai lam ni hpe tsun hpang ai shaloi gaw, la-nyan ai hku tsun u.

Na a nsen hpe akajawng sha galai shai nna, madat nga ai ni hpe kajawng shangun ai lam ni hpe koi u. Nang lawan wan tsun yang, hpa tsun mat ai hpe madat nga ai ni n chye na mat ai baw byin chye ai.