Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni

FEBRUARY 4-10

Wenyi Sut Gan Ni Hpe Sawk Sagawn Ai Lam

(Roma 3:4) Shing n rai law: Na a ga hta nang ding hpring nga n ga hte, Tara dara na du yang, nang awng wa n ga, nga nna laika hta rawng nga ai hte maren, masha yawng masu matsa ai ni tai wa ti mung, Karai Kasang gaw teng man nga u ga.

w08 6/15 30 ¶5

Roma Laika Kaw Na Dan Dawng Ai Lam Ni

3:4. Masha a ga gaw, Karai Kasang a Mungga hte nhtan shai wa ai shaloi, anhte gaw Chyum Laika a shiga hpe kamhpa nna, Karai Kasang myit ra ai hte maren, galaw hkawm sa ai hku nna, “Karai Kasang gaw teng man” ai hpe madun ai. Karai Kasang a Mungdan kabu gara shiga hkaw tsun ai hte, sape shatai ai bungli hta myit rawt let shang lawm ai hku nna, Karai Kasang teng man ai lam kaga masha ni mu lu hkra, anhte karum ya lu ai.

(Roma 3:24, 25) jahpu n ya ai sha, shi a chyeju hte, Yesu Hkristu a htingrai htingra ya ai a gawp e, ding hpring ai gaw du lu na ma ai. ²⁵ Karai Kasang gaw myit sharang nga nna moi shawng na yubak mara ni hpe shalai dat kau ai majaw, shi a ding hpring ai lam hpe shadan dan u ga;

w08 6/15 29 ¶6

Roma Laika Kaw Na Dan Dawng Ai Lam Ni

3:24, 25, NW​—⁠“Yesu Hkristu a gawng malai jahpu” gaw, dai hpe n jaw shi ai kaw nna, “moi shawng na yubak mara ni hpe” gara hku nna shalai dat kau ya ai kun? Hpun dung hta Yesu sat hkrum ai shaloi, Ningpawt 3:15 hta lawm ai Meshia hte seng ai shawng nnan na myihtoi ga gaw, A.D. 33 hta hpring tsup wa ai. (Gal 3:13, 16) Raitim, dai myihtoi ga hpe Yehowa tsun ai aten hta, gawng malai jahpu hpe jaw ngut sai zawn shi mu ai. Hpa majaw nga yang, Karai Kasang yaw shada da ai lam ni n hpring tsup wa hkra, hpa mung n hkum pat lu ai majaw re. Dai majaw, htawm hpang hta Yesu Hkristu sak jaw na gawng malai hkungga hpe madung nna, dai ga sadi hpe kamsham ai lam madun ai, Adam a kashu kasha ni a yubak mara ni hpe, Yehowa raw ya lu ai. Gawng malai jahpu gaw, Hkristan prat n du shi ai aten kaw na masha ni hpe, bai hkrung rawt hkra mung galaw ya lu ai.​—⁠Kas 24:15.

Chyum Hti Lamang

(Roma 1:1-17) Yesu Hkristu a mayam hte, kasa aya hta dang da nna, dai chyoi pra ai Chyum laika ni hta ² Karai Kasang gaw moi moi shi a myihtoi ni e ndat da ai, shi a Kasha a lam ngu ai, Karai Kasang a kabu gara shi ga a jaw e san da hkrum ai, ngai Pawlu gaw, ³ Karai Kasang a tsaw ra ai ni hte, chyoi pra ai masha tai mu ga shaga tawn da ai, Roma mare na yawng hte hpe, ga shana dat nngai. ⁴ Dai kasha gaw masha labau hku gawn yang, Dawi a aru arat rai nga ai; si mat ai ni kaw na bai hkrung rawt wa ai a majaw, Karai Kasang a Kasha nan shi rai nga ai gaw, chyoi pra rawng ai Wenyi hte aja awa shadan dan nga ai; anhte a Madu Yesu Hkristu nan shi rai nga ai rai nna, ⁵ shi mying ningsang a marang e, amyu baw shagu dai kam sham ai lam hpe madat mara mu ga she, shi kaw nna chyeju hte kasa aya hpe anhte hkam la lu sa gaw ai: ⁶ Yesu Hkristu e shaga la ai ni rai nga myit dai majaw, nanhte mung dai ni hta lawm nga myit dai. ⁷ Anhte a Wa Karai Kasang hte, Madu Yesu Hkristu kaw na, chyeju hte ngwi pyaw ai gaw, nanhte hta e anga nga ma lit ga law. ⁸ Nanhte a kam sham ai gaw mungkan ting chyam hkra kajai gumhkawng wa sai majaw, Yesu Hkristu a jaw e, nanhte mahkra a matu mara, nye a Karai Kasang hpe, ngai shawng shakawn kungdawn nngai. ⁹ Kaning rai nme law, nye a akyu hpyi ai ga hta e ngai nanhte hpe n sim n sa adum nga nna, ¹⁰ Karai Kasang myit ai hku rai yang gaw, ya gade n na yang nanhte hpang de du lu na ahkang lu la n ga, tut nawng e ngai a hpyi nga nngai gaw, Kasha a kabu gara shi ga hta, nye a wenyi hte ngai daw nga ai Karai Kasang gaw, nye a sakse rai nga ai. ¹¹ Nanhte ngang hkang nga myit ga, wenyi kumhpa langai ngai nanhte hpe karan jaw lu n ga, nanhte hte hkrum na ngai katu nga nngai: ¹² shing ngu ma de ai gaw, nanhte hte nye a kam sham ai lam a marang e, nanhte hte ngai, shangwi shapyaw ai hkam la lu n ga, ngu ai rai nga ai. ¹³ Dai hta kaga, hpu nau ni e, maigan amyu kaga ni hta akyu hkam la lu nngai hte maren, nanhte hta na mung langai ngai lu la n ga, nanhte hpang de sa du na law law lang a myit lu nga nngai rai ti mung, ya du hkra hkum shadang ai hkrum nngai hpe, nanhte n chye nga na ngai n ra nngai. ¹⁴ Heleni amyu ni, karing karang amyu ni, hpaji rawng ai ni, hpaji n rawng ai ni hte, hka kap ai wa ngai rai nga nngai, ¹⁵ Dai rai nna, nanhte Roma ni hpe mung dai kabu gara shi ga hkaw tsun dan na, ngai mahtang myit hkut da ni ai. ¹⁶ Kaning rai nme law, dai kabu gara shiga hta ngai kaya shara rawng ai n rai: dai gaw shawng nnan e Yuda ni, dai hpang e Heleni masha ni hta kam sham ai ni kadai hpe mung hkye hkrang la shangun lu ai Karai Kasang a atsam rai nga ai. ¹⁷ Dai hta kaga, Ding hpring ai wa gaw kam sham ai hte hkrung nga lu na ra ai, nga nna ka da nga ai hte maren, kam sham ai hte lu la nna kam sham ai de ang wa ai, Karai Kasang a ding hpring ai lam hpe, dai hta e shadan dan nga ai.

FEBRUARY 11-17

Wenyi Sut Gan Ni Hpe Sawk Sagawn Ai Lam

(Roma 6:3-5) Dai hta kaga, Hkristu Yesu hta e baptisma hkam ai ni anhte nlang hte gaw, shi a si hkam ai hta baptisma hkam nga ga ai hpe, nanhte n chye nga myit ni? ⁴ Dai re ai majaw, Hkristu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e rawt hkawm wa lu hkra, dai baptisma hkam ai hta e, anhte si hkam nna shi hte rau lup makoi ai hkrum sa ga ai. ⁵ Kaning rai nme law, anhte a si hkam ai gaw shi a si hkam ai hte baw sha rai nga ai majaw, anhte nhpang sha tai nga ga yang gaw, bai hkrung rawt ai hta e mung, anhte shi hte nhpang rum na ga ai.

w08 6/15 29 ¶7

Roma Laika Kaw Na Dan Dawng Ai Lam Ni

6:3-5​—⁠Hkristu Yesu hta e baptisma hkam ai hte shi a si hkam ai hta baptisma hkam ai gaw hpa lachyum kun? Yehowa gaw Hkristu a hpang hkan ai ni hpe chyoi pra ai wenyi hte namman chya dat ya ai shaloi, shanhte gaw Yesu hte rau kahkyin gumdin rai wa nna, Hkristu a hkum re ai nawku hpung masha ni byin wa ai. Hkristu gaw, nawku hpung a baw re. (1Ko 12:12, 13, 27; Kol 1:18) Dai gaw, Yesu Hkristu hta hkalup hkam ai re. Namman chya hkrum ai Hkristan ni gaw, “[Hkristu a] si hkam ai hta” baptisma hkam ai ngu tsun ai shaloi, shanhte gaw tinang akyu n tam ai prat hte asak hkrung nna, mungkan ntsa htani htana asak hkrung na ngu ai, myit mada lam yawng hpe, tawn kau ai hpe tsun mayu ai re. Dai majaw, shanhte a si ai lam hta gawng malai hkungga a jahpu n lawm tim, shanhte a si ai lam gaw Yesu zawn sha shagu hkungga langai re ai. Hkristu a si ai hta hkam ai ndai hkalup gaw, shanhte si nna lamu de hkrung rawt ai aten hta hpring tsup mat ai.

(Roma 6:6) Si mat ai wa gaw yubak hta na lawt pru nga ai majaw,

w14 6/1 11 ¶1

Si Mat Ai Jiwoi Jiwa Ni A Matu Hpa Myit Mada Lam Nga Ai Kun?

N dinghpring ai ni bai hkrung rawt wa ai shaloi, shanhte n si shi yang galaw wa ai ni hta madung nna, tara jeyang na kun? N re ai. Roma 6:6 hta: “Si mat ai wa gaw yubak hta na lawt pru nga ai” nga nna tsun da ai. N dinghpring ai ni gaw, shanhte a yubak mara a matu si ngut sai. Dai majaw, n si shi ai aten na galaw wa ai lam ni hta n re ai sha, asak bai hkrung rawt wa ai shaloi, galaw ai lam ni hta madung nna tara jeyang na re ai. Shanhte hpa akyu lu la na kun?

Chyum Hti Lamang

(Roma 4:1-15) Dai she rai yang gaw, anhte a wa daju Abraham gaw, gawng shing-yan a atsam hte hpa akyu mu la a ta? ² Abraham gaw magam bungli hte ding hpring ai lu la a yang gaw, gumrawng gumtawng shara nga lu ti mung, Karai Kasang a man e n rai. ³ Dai Chyum Laika mahtang gaw kaning nga a ta? Abraham gaw Karai Kasang hpe kam sham nga ai rai nna, dai hpe ding hpring ai rai nga ai, shi a matu ngu ya wu ai, nga ai. ⁴ Magam bungli shachyen ai wa chyawm gaw, chyeju hku hte shabrai lu la ai n rai, hkam ging ai majaw sha lu la lu ai. ⁵ Magam bungli n shachyen ai sha, tara tawt lai ai ni hpe ding hpring lu shangun ai madu hpe kam sham nga ai wa gaw, shi a kam sham ai hpe gaw, ding hpring ai, ngu ya wu ai. ⁶ Dai hte maren, Karai Kasang gaw magam bungli hpe n tau yu ai sha, ding hpring ngu ya wu ai wa hpe, Dawi mung shaa nga nna tsun ai gaw: ⁷ Tara shut hpyit ai hta na raw dat ai hte, Yubak hpe makoi kau ya ai hkrum ai ni gaw, a nga ma ai; ⁸ Madu e yubak n shagun ai wa gaw a nga ai, nga ai. ⁹ Shing nga shaa ai gaw, matu gadoi hkam ai ni hpe sha, shing n rai, matu gadoi n hkam ai ni hpe mung, shaa nga mu ni? Kaning rai nme law, kam sham ai gaw Abraham hta ding hpring ai ngu ya wu ai, nga nna anhte tsun ga ai. ¹⁰ Dai rai yang gaw, kaning rai ngu ya wu ta? Matu gadoi hkam ngut sayang, shing n rai, garai n hkam yang re ai, ngu ya nga wu ni? Matu gadoi hkam la ai hpang e n rai, garai n hkam yang she, rai nga sai. ¹¹ Dai hta kaga, matu gadoi n hkam la ai sha, kam sham ai a majaw ding hpring ngu ya hkrum ai nlang hte a kawa mung; ¹² matu gadoi hkam ai ni hta lawm ma ai rai nna, matu gadoi hkam ai hta n-ga, anhte a wa Abraham gaw matu gadoi garai n hkam kaw nna rawng nga sai makam masham a hkang hta e a hkan nang nga ai ni a kawa mung shi tai nga u ga, matu gadoi garai n hkam kaw nna, ding hpring nga ai makam masham a dazik ngu ai, matu gadoi ai kumla gaw, shi hkam la nu ai. ¹³ Dai hta n-ga, mungkan ga a sali wunli tai na, nga nna Abraham hte shi a aru arat kaw pru ai ga ndat gaw, dai jep ai tara kaw na pru ai n rai, makam masham a ding hpring ai hte sha lu la lu ai. ¹⁴ Kaning rai nme law, jep ai tara hta lawm ai ni, sali wunli hkam la ai ni rai nga ma yang gaw, makam masham gaw kaman lila rai mat wa ai hte, ga ndat mung hpoi mat sai. ¹⁵ Jep ai tara gaw pawt sindawng ai shapraw wu ai; jep ai tara n nga yang gaw, yubak mara mung n nga na re ai.

FEBRUARY 18-24

Wenyi Sut Gan Ni Hpe Sawk Sagawn Ai Lam

(Roma 8:6) Hkum shan myit gaw si mat ai lam rai nga ai; Wenyi a myit chyawm gaw, hkrung ai lam hte ngwi pyaw ai lam rai nga ai.

w17.06 3

Nang Matsing Ai Kun?

“Hkum shan myit” hte “wenyi a myit” lahkawng a lapran hta hpa shai ai lam nga ai kun? (Rom 8:6)

Hkum shan a myit hte seng ai lam ni hpe galaw ai wa gaw, n hkum tsup ai hkum shan a myit marin ai ni hpe myit maju jung nna, aten shagu shakawn shagrau tsun nga ai. Wenyi a myit hte seng ai lam ni hpe galaw ai wa gaw, prat hta Karai Kasang hte seng ai lam ni, Karai Kasang a myit sumru ai lam ni hpe madung da ai. Dai zawn re ai Hkristan langai gaw, chyoi pra ai wenyi a shing kang ka-up ai hpe hkam la ai. Hkum shan myit hte seng ai lam gaw si shangun ai. Karai Kasang hte seng ai lam gaw, asak hte ngwi pyaw lam lu shangun ai.​—⁠w16.12, laika man 15-17.

w09 11/15 7 ¶20

Na A Akyu Hpyi Ga Ni Gaw Na A Lam Hpa Madun Ai Kun?

²⁰ Kalang lang, anhte akyu hpyi ai shaloi gara lam ni tsun na hpe n chye ai sha byin chye ai. Pawlu gaw ndai hku ka wa ai: “Akyu hpyi mai ai hte maren anhte n chye hpyi nga ga ti mung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai; kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai.” (Rom 8:26, 27) Yehowa gaw, akyu hpyi ga law law hpe Chyum Laika hta matsing da shangun wa ai. Yehowa gaw, Chyum Laika hta lawm ai hpyi nem ai ga law law hpe, anhte a akyu hpyi ga ni ngu hkap la nna, dai hpe htai ya ai. Karai Kasang gaw, anhte hpe chye ai hta n-ga, Chyum Laika ka ai ni hpe shi a chyoi pra ai wenyi shadut ya ai hku nna ka ai majaw, dai lam ni a lachyum hpe mung chye ai. Chyoi pra ai wenyi gaw, anhte a matu “hpyi” ya ai shaloi, anhte a hpyi nem ai akyu hpyi ga ni hpe Yehowa mahtai jaw ai. Raitim, anhte ni gaw Chyum Laika hte grau hkau chyap wa ai hte maren, anhte hpyi shalawm ging ai lam ni gaw, myit hta shi hte shi pru wa na re.

Chyum Hti Lamang

(Roma 7:13-25) Dai rai yang gaw, mai kaja ai baw nye a matu si lam tai wa sa ni? Shing n rai u ga. Dai mai kaja ai baw ngai hta si mat ai shabyin let, yubak majing shadan dan nna, dai ga matsun hte yubak gaw nachying n hkru ai yubak tai u ga she, yubak mahtang nye a si lam tai wa sai. ¹⁴ Dai hta kaga, jep ai tara gaw wenyi tara rai nga ai anhte chye ga ai; ngai mahtang hkum shan myit sha rawng nna, yubak e mari ai mayam rai nga nngai. ¹⁵ Ngai shachyen ai bungli hpe ngai n chye nngai; ngai n galaw mayu ai lam galaw nga nngai; ngai n dawng n yawt ai bungli sha a galaw nga nngai. ¹⁶ Rai ti mung, n galaw mayu ai hpe ngai galaw yang gaw, jep ai tara gaw kaja nga ai, ngai dai hte myit hkrum nngai. ¹⁷ Dai rai nna, ya ngai nan dai hpe n galaw nngai, ngai hta rawng ai yubak she dai hpe galaw nga ai. ¹⁸ Kaning rai nme law, nye a kraw e, rai sa, nye a shinggyim hkum shan myit hta, kaja ai baw n rawng li ai, ngai chye nga nngai: galaw mayu ai myit ngai hta a rawng nga ti mung, mai kaja ai hku galaw na ngai n mu lu we ai. ¹⁹ Galaw mayu ai mai kaja ai hpe ngai n galaw ai wa, n galaw mayu ai n hkru n hkra dai hpe ngai galaw nga nngai. ²⁰ Shing rai ngai n galaw mayu ai hpe ngai a galaw nga ai gaw, ngai nan dai hpe n galaw nngai, ngai hta rawng ai yubak she dai hpe galaw nga ai. ²¹ Dai re ai majaw, mai kaja galaw mayu ai ngai hkum lala, n hkru n hkra hte ginrun nga ai, ngu ai tara hpe ngai mu hkrup nngai. ²² Kaning rai nme law, nye kraw lawang myit hte Karai Kasang a tara hta e ngai kabu gara nga nngai; ²³ rai ti mung, nye a daw shan ni hta e tara kaga gaw, nye myit mang hta rawng ai tara hte gasat hkat nga ai rai nna, nye daw shan ni hta e rawng ai yubak a tara hta e ngai hpe bawng dung shangun nngai, ngai mu ni ai. ²⁴ Chyum sha hkrum ai ngai wa e, ndai si shangun ai hkum hkrang hta na, ngai hpe kadai wa mawai la na law e? ²⁵ Anhte a Madu Yesu Hkristu a marang e, Karai Kasang hpe ngai shaa nga nngai. Dai rai nna nye a myit mang hte ngai hkum nan Karai Kasang a tara hpe a daw nga nngai; hkum shan hte mahtang gaw yubak a tara hpe ngai a daw nga nngai.

FEBRUARY 25–MARCH 3

Wenyi Sut Gan Ni Hpe Sawk Sagawn Ai Lam

(Roma 9:21-23) Di bu sama gaw kagam ga hpe madu lu nna, ga gumdin langai sha hta na, chyen mi hte reng ai di langai mi, bai chyen mi hte n reng ai di langai mi, galaw lu ai n rai ni? ²² Dai zawn Karai Kasang gaw, shi a pawt sindawng madun nna, shi a atsam hpe chye wa shangun mayu let, hten mat na matu hkyen da ai pawt ging ai di ni hpe galu kaba sumnung ai myit madun nna shakut sharang nga nga ai hte; ²³ hpung shingkang a matu shawng e lajang da ai chyeju di ngu ai, Yuda ni hta sha n rai, maigan amyu ni hta na mung,

w13 6/15 25 ¶5

Yehowa Hkrang Shachyaw Ai Hpe Hkap La U

⁵ Shinggyim masha ni gaw, di bu sama Yehowa a hkrang shachyaw ai hpe, n hkap la ai sha baw ja let nyet kau ai nga yang gara hku kun? Dai shaloi, di bu sama Yehowa gaw, tinang a ahkaw ahkang hpe gara hku jailang ai kun? Kagam ga hpe ra ai hku galaw na matu, yak taw ai ngu myit yu u. Di bu sama gaw, kaga di bu myu mi hpe galaw na matu dawdan mai ai. Shing nrai, dai kagam ga hpe kabai kau mai ai. Di bu sama gaw, jaw ai ladat hte hkrang shachyaw nna n galaw ai nga yang, dai hku byin chye ai. Raitim, anhte a di bu sama re ai Yehowa gaw, shinggyim masha ni hpe galoi mung jaw ai ladat hte sha hkrang shachyaw ai. (Trj 32:4) Masha langai gaw, Yehowa a hkrang shachyaw ai hpe n hkap la ai nga yang, dai gaw shi a mara re ai. Yehowa gaw, masha ni a bai htang ai lam hta madung nna, tinang a hkrang shachyaw ai ladat hpe galai shai ai. Masha ni gaw, Yehowa a ga madat ai nga yang, shanhte gaw Yehowa a matu akyu rawng ai ni byin wa ai. Ga shadawn, namman chya hkrum ai Hkristan ni gaw, “reng ai di” ni hku nna, hkrang shachyaw hkrum da ai “chyeju di” ni re ai. Raitim, Karai Kasang a hpaji jaw ga hpe n hkap la ai ni gaw “hten mat na matu hkyen da ai pawt ging ai di” ni re ai.​—⁠Rom 9:19-23.

(Roma 10:2) Kaning rai nme law, Karai Kasang a lam shanhte grai myit maju jung nga ma ai hpe, ngai shanhte a lam sakse hkam ya nngai: rai ti mung, chye chyang ai nyan hte n re ai sha,

it-1-E 1260 ¶2

Manawn Ai, Manawn Ai Myit

Shut Ai Hku Myit Rawt. Masha langai gaw, lama ma hte seng nna, myit madung hte myit rawt let galaw ai, manawn ai raitim, Karai Kasang n ra ai lam rai nga chye ai. Tsaban langai na Yuda masha ni dai hku byin wa ai. Shanhte gaw, Mawshe a tara hte maren hkan sa ai hku nna, dinghpring wa na matu shakut wa ai. Raitim, shanhte a myit rawt ai lam gaw, tengman ai machye machyang hku n re ai majaw shut nga ai ngu Pawlu tsun wa ai. Dai majaw, shanhte gaw Karai Kasang kaw na tengman ai dinghpring ai lam hpe n lu ma ai. Jep ai tara a jeyang ai kaw nna lawt lu hkra, dinghpring ai lam lu na matu, shanhte a mara ni hpe yin la nna, Hkristu kaw nna Karai Kasang hpang de kayin wa ra ai. (Rom 10:1-10) Tarshu masha, Shawlu a mabyin hpe yu yu ga. Yuda nawku htung a matu shi a myit rawt ai lam gaw, grai nchyun shanang wa ai. Dai majaw, ‘Karai Kasang a Hpung hpe nachying ladu lai hkra zingri zingrat’ wa ai. Shi gaw, Jep Ai Tara hpe hkan sa shadik nna, “dinghpring ai hpe lu la” na matu shakut wa ai. (Gal 1:13, 14; Hpl 3:6, JCLB) Raitim, Yuda nawku htung a matu, shi a myit rawt ai lam gaw shut wa ai. Shi hta dingman ai myit nga ai majaw, Yehowa gaw Yesu Hkristu kaw nna tsawra matsan dum myit madun ai hku nna, teng man ai nawku hpung de shaga la wa ai.​—⁠1Tm 1:12, 13.

Chyum Hti Lamang

(Roma 10:1-15) Hpu nau ni e, shanhte gaw hkye hkrang la ai kaw du lu mu ga, shanhte a matu mara nye kraw lawang hta myit ndawt la nna, Karai Kasang hpe ngai akyu hpyi nga nngai. ² Kaning rai nme law, Karai Kasang a lam shanhte grai myit maju jung nga ma ai hpe, ngai shanhte a lam sakse hkam ya nngai: rai ti mung, chye chyang ai nyan hte n re ai sha, ³ Karai Kasang a ding hpring ai lam hpe n chye n chyang ma ai rai nna, tinang a ding hpring ai lam hpe shagrin da na chyam yu ma ai majaw, shanhte Karai Kasang a ding hpring ai lam a npu e n taw ma ai. ⁴ Kaning rai nme law, ding hpring ai kaw du lu mu ga, Hkristu gaw kam sham ai ni mahkra a matu mara, jep ai tara a chyahtum rai nga ai. ⁵ Mawshe chyawm gaw, Tara hku hkan galaw ai wa gaw de a majaw asak hkrung nga lu na ra ai, nga nna jep ai tara hte seng ai ding hpring ai lam ka da nu ai. ⁶ Kam sham ai hte seng ai ding hpring ai lam mahtang gaw, Lamu de kadai lung wa lu na kun? Sung htum ai shara de kadai yu wa lu na kun? nga nna na a kraw lawang e nang tsun lu na n rai, nga ai: ⁷ Shing nga ai gaw, Hkristu hpe yu wa shangun na, lamu de kadai lung wa lu na kun? bai, Hkristu hpe si mat ai ni kaw na sharawt la na, sung htum ai shara de kadai yu wa lu na kun? nga ai rai nga ai. ⁸ Shaloi kaning rai tsun na law? Dai mungga gaw nang hte htep rai nga ai; dai gaw na a n-gup hte na a kraw lawang hta e rai nga ai: dai gaw, anhte hkaw tsun dan ai kam sham ai hte seng ai mungga rai nga ai: ⁹ Shing rai, Yesu gaw Madu rai nga ai, nga nna na a n-gup ga hte tsun gara nna, Karai Kasang gaw si mat ai ni kaw na shi hpe hkrung sharawt la ai hpe, na a myit masin hta kam sham n yang gaw, nang hkye hkrang la ai hkrum na rin dai. ¹⁰ Kaning rai nme law, masha gaw ding hpring ai lu la hkra, myit masin hte kam sham nna, hkye hkrang la ai lu la hkra, n-gup hte tsun gara nga ai. ¹¹ Dai Chyum Laika mung, Shi hpe kam sham ai ni yawng mayawng hte gaw kaya kahpa n hkrum na ra ai, nga ai. ¹² Kaning rai nme law, Yuda ni hte Heleni masha ni hpe lachyen lahka n nga ai sha, dai Madu gaw yawng mayawng a ntsa na Madu langai sha rai nga ai rai nna, shi hpe shaga ai ni yawng mayawng hte hta chyeju hpring nga ai. ¹³ Shing rai dai Madu a amying nsang hpe shaga ai masha kadai mung, hkye hkrang la ai kaw du lu na ra ai. ¹⁴ Dai rai nna, garai n chye kam ai Madu hpe, kaning rai shaga lu na ma ta? garai n na yu ai wa hpe, kaning rai kam sham lu na ma ta? hkaw tsun dan ai wa n nga yang gaw, kaning rai na la lu na ma ta? ¹⁵ n shangun dat yang gaw, shanhte kaning rai hkaw tsun dan lu na ma ta? Dai hte maren, Mai kaja ai lam kabu gara shi ga hkaw tsun dan ai ni a sat lagaw ni gaw, gade wa tsawm nga ma lu hka! nga nna ka da nga ai.