Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni
JUNE 3-9
Wenyi Sut Gan Ni Hpe Sawk Sagawn Ai Lam
(Galati 4:6) Ya nanhte gaw kashu kasha rai nga myit dai majaw, Karai Kasang gaw, Aba Wa e, nga nna shaga chye nga ai, shi a Kasha a Wenyi hpe anhte a kraw lawang de shangun dat nu ai.
Nang Chye Ai Kun?
Yesu akyu hpyi ai shaloi Yehowa hpe “Aba Wa” ngu nna hpa majaw shaga wa ai kun?
Aramaic ga si ʼab·baʼʹ ngu ai gaw “wa” (sh) “Wa E” ngu ai lachyum nga ai. Chyum Laika hta dai ga si masum lang lawm ai. Dai masum lang hte gaw, akyu hpyi ai lam hta lawm ai rai nna, sumsing lamu Kawa Yehowa hpe tsun mayu ai re. Dai ga si a lachyum gaw hpa rai kun?
Laika buk langai (The International Standard Bible Encyclopedia) hta ndai hku tsun da ai: “Yesu aten na shani shagu tsun ai ga hta ʼabbāʼ ngu ai ga si gaw, madung hku nna kasha ni shanhte a kawa hpe, hkungga lara hte shaga ai ga si re.” Ndai gaw, kawa hpe tsawra ai majaw shaga ai ga si rai nna, ma langai shawng nnan chye tsun ai ga si hta lawm ai. Yesu gaw kawa hpang myit rawt let ahkyu hpyi ai aten hta, dai ga si hpe lang wa ai. Shi si na aten du wa maw ai shaloi, Getsemane sun kaw akyu hpyi ai aten hta Yehowa hpe “Aba Wa e” nga nna shaga wa ai.—Marku 14:36.
Lahta kaw tsun da ai laika buk hta ndai hku matut tsun da ai, “Karai Kasang hpe ʼAbbāʼ nga nna shaga ai ga si hpe, Greek hte Roma prat na Yuda laili laika ni hta n lang ai. Hpa majaw nga yang, dai zawn Karai Kasang hpe hku hku hkau hkau shaga ai gaw, hkungga lara ai lam n ngai ai hte bung ai majaw re.” Raitim “Yesu akyu hpyi ai shaloi . . . dai ga si hpe lang ai gaw Karai Kasang hte grai hku hkau ai ngu ai Yesu a ga teng ai hpe madun ai.” Kasa Pawlu ka wa ai Chyum Laika ni hta “Aba” ngu ai ga si lahkawng lang lawm ai gaw, tsaban langai na Hkristan ni mung, akyu hpyi yang dai ga si hpe lang wa ai lam madun nga ai.—Roma 8:15; Galati 4:6.
(Galati 6:17, NW) Ya kaw nna ngai hpe kadai mung hkum sharu shatsang manu. Hpa majaw nga yang, nye a hkum hta Yesu a mayam ngu ai masat dingsat hpe shakap da sai.
w10 11/1 15
Nang Chye Ai Kun?
Shi a hkum hta “Yesu a mayam ngu ai masat dingsat hpe shakap da sai” ngu kasa Pawlu tsun ai shaloi, hpa hpe tsun mayu ai kun?—Galati 6:17, NW.
▪ Tsaban langai na masha ni gaw Pawlu a ga hpe lachyum amyu amyu hte chye na ai mai byin ai. Ga shadawn, moi prat na bawng masha ni, nawku htingnu hta kashun kashe galaw ai ni, hprawng ga ai mayam ni hpe ginhka lu hkra shanhte a hkum hta wan ju jahkyeng da ai hpri hte kaba ya nna dasik shakap ya ma ai. Dai zawn dazik shakap hkrum ai ni hpe arawng n nga ai ni hku nna masat da ma ai.
Raitim, ju jahkyeng da ai hpri hte kaba nna, dazik shakap hkrum shagu arawng n nga ai ni ngu ayan na masat ai gaw n re. Moi na masha ni gaw, shanhte gaw gara amyu lakung kaw na re ai, gara hpung kaw na re ai hpe madun na matu, dai zawn dazik ni hpe lang wa ma ai. Ga shadawn, Chyum Laika ga htai chyum (Theological Dictionary of the New Testament) hta, “Suri masha ni gaw Hardet hte Atagetit nat hpara ni hpe nawku ai ni re ai lam madun na matu, shanhte a lata (sh) du kaw ju jahkyeng da ai hpri hte kaba nna dazik shakap ma ai . . . Greek nat hpara Daiyanitset hpe nawku ai ni rai yang gaw, wutdek nta kaw noi abya nga ai namlap langai a sumla hte dazik shakap da ai” lam tsun da ai.
Kasa Pawlu gaw, shi a Hkristan sasana galaw ai laman, zingri zingrat hkrum ai aten hta lu wa ai ningma hkang ni hpe, tsun mayu ai rai na re nga nna, dai ni aten na Chyum Laika hpe ga lachyum hpaw ai ni sawn la ma ai. (2 Korinhtu 11:23-27) Raitim, Pawlu gaw shi Hkristan langai re ai hpe, hkum hta ningma hkang masat dingsat shakap dan ai hku n re ai sha, shi a asak hkrung lam hte madun ai hpe tsun mayu ai rai na re.
Chyum Hti Lamang
(Galati 4:1-20) Bai ngai tsun nngai gaw, sali wunli hkam ang ai ma gaw, arai yawng mayawng a madu rai nga ti mung, ma naw rai nga a yang, mayam wa hte hpa n shai nga ai: 2 kawa madat da ai nhtoi du hkra, bau sin ai wa hte, nta up ai wa a npu e, shi naw rawng nga ai. 3 Dai hte maren, anhte ma naw rai nga ga yang, mungkan ga a hkang ai tara npu e anhte naw yam nga ga ai. 4 Rai ti mung, aten ladaw gu jang, dai jep ai tara npu e rai nga ai ni hpe hkrang shaw la nna, anhte kasha yin la ai chyeju hkam la lu u ga, 5 numsha hta shangai wa nna, jep ai tara npu e prat wa ai, shi a Kasha hpe nan, Karai Kasang gaw shangun dat wu ai. 6 Ya nanhte gaw kashu kasha rai nga myit dai majaw, Karai Kasang gaw, Aba Wa e, nga nna shaga chye nga ai, shi a Kasha a Wenyi hpe anhte a kraw lawang de shangun dat nu ai. 7 Dai rai nna nang gaw, mayam naw rai nga ndai n rai, kasha nan rai nga nit dai: kasha nan rai nga nit yang gaw, Karai Kasang a marang e sali wunli hkam la ai wa mung, nang rai nga ndai. 8 Rai ti mung, dai aten e nanhte Karai Kasang hpe n chye nga myit dai majaw, hking madung hku yu yang, Hpara n mai ngu ai ni a npu e, nanhte yam nga myit dai. 9 Ya chyawm nanhte gaw Karai Kasang hpe chye nga ai hta n-ga, Karai Kasang gaw nanhte hpe chye sayang me, n-gun kya ai hte matsan mayan re ai hkang ai tara hpang de, nanhte hpa rai bai nhtang nna, de a mayam bai tai mayu nga myit hka? 10 Nanhte gaw nhtoi, shata, aten ladaw hte shaning hte hpe matsing nga myit dai. 11 Ngai gaw nanhte kaw kaman lila sha shakut sharang kau nga nngai nhten, ngu nna nanhte a lam ngai myit tsang nga nngai. 12 Hpunau ni e, nanhte zawn ngai rai nga nngai majaw, nanhte mung ngai zawn rai nga mu, ngu nna ngai nanhte hpe hpyi nem ma de ai. 13 Nanhte ngai hpe hpa n shut n hpyit yu myit dai: dai hta n-ga, shawng nnan e dai kabu gara shi ga nanhte hpe hkaw dan ma de yang, ngai hkum hkrang machyi makaw hkrum ai majaw hkring nna hkaw dan ma de ai gaw, nanhte chye nga myit dai; 14 Nye a hkum shan a majaw nanhte hta nkaw n law shara tai nga rai ti mung, nanhte ngai hpe matsat kau ai hte ban kau mi ai n re ai sha, Karai Kasang a lamu kasa hpe zawn, gaja wa, Yesu Hkristu hpe zawn, ngai hpe hkap hkalum la mi ai. 15 Dai rai yang gaw, nanhte tinang hkum shaa ai gaw ya kanang rai nga ma lit ta? Kaning rai nme law, nanhte gaw tinang a myi malawk la nna, ngai hpe jaw lu taw gaw, jaw na pyi gwi myit dai hpe, ngai nanhte a lam sakse hkam nga nngai. 16 Ya chyawm ngai gaw nanhte hpe dai teng man ai lam tsun dan ma de ai majaw, nanhte a hpyen wa tai wa ni ai kun? 17 Shanhte gaw nanhte a lam tsang ma ti mung, mai kaja ai hku tsang ma ai n rai; nanhte gaw shanhte a lam tsang nga myit ga, shanhte gaw nanhte hpe hkum shadang mayu da myit dai. 18 Ngai nanhte hte rau nga nga yang sha, kaja ai lam hpe myit tsang mai na n rai; galoi rai ti mung kaja ai lam hpe myit tsang nga na, mai kaja nga ai. 19 Nye a ma kaji ni e, Hkristu a shing-yan nanhte hta hkum wa ai du hkra, shangai wa ai shinggyim machyi hpe ngai nanhte a matu naw hkam nga nngai. 20 Nanhte a lam ngai myit law la nga nngai majaw, ya nanhte hte rau nga nga lu nna, nye a nsen galai lu na hpe, ngai ra nga nngai.
JUNE 10-16
Wenyi Sut Gan Ni Hpe Sawk Sagawn Ai Lam
(Ehpesu 3:13) Dai re ai majaw, nanhte a matu mara ngai hkam ai tsin-yam tsindam hta nanhte myit n hten u ga, ngai hpyi nem nga nngai: dai tsin-yam gaw nanhte a arawng sadang rai nga ma lit dai.
w13 2/15 28 ¶15
Nang Arawng Sadang N Nga Mat Hkra Hpa Hpe Mung Ahkang Hkum Jaw
15 Yehowa myit ra ai hpe shakut shaja let galaw ai gaw, kaga ni arawng sadang nga na matu karum ya nga ai re. Ehpesu hta nga ai nawku hpung de Pawlu ndai hku laika ka wa ai: “nanhte a matu mara ngai hkam ai tsin-yam tsindam hta nanhte myit n hten u ga, ngai hpyi nem nga nngai: dai tsin-yam gaw nanhte a arawng sadang rai nga ma lit dai.” (Ehp 3:13) Pawlu a tsin-yam tsindam ni gaw, gara hku nna Ehpesu kaw nga ai Hkristan ni a matu “arawng sadang” re ai kun? Pawlu gaw mayak mahkak ni nga tim, magam gun hpai nna Hkristan ni a prat hta manu dan dik htum gaw, Karai Kasang a magam gun ai lam re, ngu ai hpe chye hkra shanhte hpe madun wa ai. Shi gaw, mayak mahkak ni hkrum ai shaloi, asum jaw nna n galaw mat sai nga yang, Yehowa hte shanhte a hku hkau lam, shanhte a magam bungli hte myit mada lam ni gaw n ahkyak ai ngu shanhte sawn la mat na re. Pawlu gaw, hkamjan lu ai kasi ningli hku nna, Hkristu a sape langai byin na matu gara sak jaw ai lam hpe mi raitim, galaw ging ai lam hpe madun wa ai.
(Ehpesu 3:19) Karai Kasang a hkum tsup ai lam ting hte hkum tsup lu myit ga, chye chyang ai myit hte n dang chye ai Hkristu a tsaw ra ai lam hpe, nanhte chye na lu na, ngai hpyi nga nngai.
cl 299 ¶21
‘Hkristu A Tsaw Ra Ai Lam Hpe Chye Na Lu’
21 “Chye na lu” ngu nna ga gale da ai Greek ga si gaw “tinang hkrum lai wa ai mahkrum madup” kaw na chye la ai ngu ai lachyum re. Yesu zawn anhte ni tsawra myit madun ai shaloi, kaga ni akyu lu na matu tinang hkum tinang sak jaw na, shanhte ra kadawn ai lam ni hpe tsawra myit hte jaw na, myit masin kraw lawang kaw na shanhte a mara ni hpe raw dat ya na nga yang, Yesu a hkamsha lam ni hpe anhte atsawm chye wa na re. Dai lam ni hku nna, anhte nan ‘chye chyang ai myit hte n dang chye ai Hkristu a tsaw ra ai lam hpe chye na lu” na re. Hkristu hte anhte bung wa magang, Yesu tup hkrak kasi la wa ai tsawra myit rawng ai Karai Kasang Yehowa hte mung, anhte grau nna ni htep wa magang re ai hpe galoi mung n malap ga.
Chyum Hti Lamang
(Ehpesu 1:1-14) Karai Kasang a myit ra ai a majaw, Hkristu Yesu a kasa rai nga ai, ngai Pawlu gaw, Ehpesu mare hta e nga ai chyoi pra ai ni hte, Hkristu Yesu hta kangka rai nga ai ni hpe, ga shana dat nngai. 2 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga ma lit ga law. 3 Anhte a Madu Yesu Hkristu a Kawa rai nga ai Karai Kasang gaw, a nga u ga law: shi gaw sumsing lamu lahta tang hta e, Wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai: 4 anhte gaw tsaw ra ai myit hte, shi a man e chyoi pra ai ni hte mara n rawng ai ni tai wa u ga, ginding aga garai n lat yang nna, shi anhte hpe Hkristu hta e lata la ma ni ai. 5 Tsaw ra htum ai Kasha a marang e, anhte hpe jaw dat mi ai hpung shingkang rawng ai chyeju a lam hpe shakawn kungdawn u ga, 6 shi a shawang myit sharawng awng nga ai hte maren, Yesu Hkristu a jaw e, kasha yin la na chyeju hkam la lu u ga, shi anhte hpe shawng nnan e san da ma ni ai. 7 Shi a n taw n tsang ai chyeju a majaw mung, tsaw ra htum ai Kasha a asai hta nan, htingrai htingrat na lam hte, yubak hpe raw dat kau na akyu, anhte lu la sa gaw ai: 8 shi a shawang myit na sung htum ai lam anhte hpe shadan dan yang, 9 dai chyeju gaw hpaji byeng-ya hte kung hpan ai lam nlang hte hte, anhte hta e law htam wa sai: 10 dai sung htum ai lam chyawm gaw, shi a sharawng awng ai myit hku hkan nna, Hkristu hta e myit shatawng da sai hte maren, madat da ai aten ladaw du wa yang, sumsing lamu tang na arai hpe mung, ginding aga na arai hpe mung, nga manga hte hpe Hkristu hta e gumhpawn tawn da na ru ai lam, rai nga ai. 11 Rai sa, shi hta e gumhpawn da na ru ai: shingrai Hkristu hta e shawng myit mada nga ai ni anhte gaw, shi a hpung shingkang hpe shakawn kungdawn nga lu u ga, 12 shi a shawang myit bawng hkut ai lam hte maren, yawng mayawng shabyin da ai wa a myit shatawng da nna, anhte hpe shawng nnan e san da ma ni ai majaw, shi hta e mung anhte sali wunli tai wa sa ga ai. 13 Nanhte mung, nanhte hpe hkye hkrang la sai kabu gara shi ga ngu ai teng man ai mung ga hpe na yu nna, shi hta e kam sham ngut yang, ndat da ai Chyoi pra ai Wenyi hte dazik kap ai, hkrum ma nit dai: 14 Wenyi chyawm gaw, Karai Kasang a hpung shingkang shakawn kungdawn na lam a matu, shi mari da sai ni gaw htingrai htingrat ai chyeju lu la hkra, anhte a sali wunli a masat dingsat rai nga ai.
JUNE 17-23
Wenyi Sut Gan Ni Hpe Sawk Sagawn Ai Lam
(Ehpesu 4:30) Hkye hkrang la hkrum ai nhtoi du hkra, nanhte hpe dazik shakap ai Karai Kasang a Chyoi pra ai Wenyi hpe, myit hkum shayawn myit.
it-1-E 1128 ¶3
Chyoi Pra Ai
Chyoi pra ai wenyi. Yehowa gaw, shi a shamu shamawt ai n-gun atsam (sh) wenyi hpe lang nna, yaw shada lam galoi mung hpring tsup wa hkra galaw ai. Dai gaw chyoi pra ai, sanseng ai, grau htum nna Karai Kasang a mai kaja ai lam ni a matu lang ai. Dai majaw “chyoi pra ai Wenyi” hte “chyoi pra rawng ai Wenyi” ngu nna shaga ai re. (Shk 51:11; Luk 11:13; Rom 1:4; Ehp 1:13) Masha langai hpe chyoi pra wa hkra (sh) sanseng hkra, chyoi pra ai wenyi gaw karum ya ai. N sanseng ai lam ni (sh) n kaja ai arawn alai ni gaw, chyoi pra ai wenyi hpe ninghkap ai (sh) shayawn ai baw byin chye ai. (Ehp 4:30) Chyoi pra ai wenyi gaw, marai hkum langai n raitim, Karai Kasang a atsam ningja langai re ai majaw, hkamsha chye ai. N kaja ai hpe galaw ai lam ni yawng gaw “chyoi pra ai wenyi wan hpe sat kau” ai re. (1Ht 5:19, NW) Dai zawn n kaja ai lam ni hpe, matut nna galaw na nga yang, Karai a chyoi pra ai wenyi hpe “shayawn” ai majaw, dai wa gaw Karai Kasang hpe gumlau ai hpyen langai byin mat na re. (Esa 63:10) Chyoi pra ai wenyi hpe shayawn ai wa gaw, dai wenyi hpe shatan nhkan ga tsun ai zawn byin mat chye ai. Dai zawn mara gaw, ndai prat hta raitim, htawm hpang prat hta raitim, yubak mara raw dat kau ya ai hkrum na n re ai lam Yesu Hkristu tsun wa ai.—Mat 12:31, 32; Mrk 3:28-30.
(Ehpesu 5:5) Kaning rai nme law, hpye ai wa, n san n seng ai wa hte, gawngngu sumla naw ku ai wa rai nga ai nammak lawhpa ai wa kadai rai ti mung, Hkristu yan Karai Kasang a mungdan hta sali wunli hpe n lu nga ai gaw, nanhte nan chye na myit dai.
it-1-E 1006 ¶2
Nammak Lawhpa Ai
Galaw Ai Lam Ni Hta Dan Dawng Wa. Lawhpa ai myit gaw ladu lai ra marin ai myit hte shut shai ai lam hpe galaw ai ni hku nna, dan dawng wa ai. Shut shai ai ra marin ai myit gaw na-um nasin rai wa nna, yubak hpe shangai dat ai, nga nna Chyum Laika ka ai wa Yaku tsun ai. (Yak 1:14, 15, NW) Dai majaw, nammak lawhpa ai wa hpe shi galaw ai lam ni hku nna chye lu ai. Nammak lawhpa ai wa gaw, gawng-ngu sumla nawku ai wa re ai lam, kasa Pawlu tsun wa ai. (Ehp 5:5) Dai ra marin ai myit hpe karai langai zawn shatai kau nna, Hpan Madu hpe nawku ai, magam gun ai lam ni hpe ahkyak n shatai mat sai.—Rom 1:24, 25.
Chyum Hti Lamang
(Ehpesu 4:17-32) Dai rai nna, dai Madu a ahkang hte ndai lam ngai tsun nna sakse hkam nngai: maigan masha ni gaw tinang a kaman lila myit hte hkawm nga ma ai hte maren, nanhte gaw naw hkum hkawm nga myit: 18 shanhte a nyan sin mak nga nna, shanhte hta rawng ai n chye n chyang ai myit hte, shanhte a kraw lawang ja nga ma lu ai majaw, Karai Kasang hte seng ai asak a shinggan de, shanhte rai nga ma ai: 19 shanhte gaw hpa hkrit kaya ngu ai n dum ai majaw, nammak lawhpa ai hta n san n seng ai bungli amyu myu shachyen hkra, tinang a hkum hpe ngang kayut ai hta, nawng kau mu ai. 20 Nanhte mahtang Hkristu a lam hpe shing rai sharin la yu ma nit dai n rai: 21 nanhte shi a ga na yu nna, dai teng man ai ga Yesu hta e nga nga ai hte maren, shi hta e sharin achyin hkam myit taw gaw, 22 shawng na nanhte a arawn alai hte maren, marin marit nna hkalem hkalau ai hte hten mat wa ai gawng shing-yan dingsa hpe raw kau nhtawm; 23 nanhte a myit mang na wenyi hta ningnan wa tai nna, 24 teng man ai hte seng ai dinghpring ai hte chyoi pra re ai Karai Kasang hpan tawn da ai gawng shing-yan ningnan hpe dagraw lu myit ga, nanhte sharin achyin hkam la ma nit dai, rai nga ai. 25 Dai rai nna, masu matsa ga hpe kau da nhtawm, langai hte langai tinang a htingbu wa hpe teng man ai ga sha tsun nga mu: kaning rai nme law, anhte shada da a daw shan ni rai nga ga ai. 26 Myit kahtet ti mung, yubak hkum galaw myit: nanhte myit naw kahtet bu nga yang, jan hkum shadu myit: 27 nat hpe mung shang shara hkum yen mu. 28 Lagu ga ai wa gaw, bai hkum lagu u ga; kadawn nga ai ni hpe karan jaw lu hkra, tinang a lata hte mai kaja ai shachyen let, magam bungli galaw nga u ga. 29 N se ai ga hkaw mi mung nanhte a n-gup na hkum pru u ga; madat mara nga ai ni a matu akyu byin hkra, ra nga ai hte maren shadaw shalan na matu, mai kaja ai ga sha a tsun nga mu. 30 Hkye hkrang la hkrum ai nhtoi du hkra, nanhte hpe dazik shakap ai Karai Kasang a Chyoi pra ai Wenyi hpe, myit hkum shayawn myit. 31 Myit gadun ai, sindawng katawt ai, masin pawt ai, ga law ga la ai, shatan nhkan ai amyu myu hte, n hkru n hkra ai yawng hte nawng, nanhte hte tsan gang nga u ga. 32 Nanhte shada da mai kaja ai, matsan dum ai myit madun hkat nna, Karai Kasang gaw Hkristu hta e nanhte a mara raw dat kau ya ma nit dai hte maren, nanhte mung shada da a mara raw dat kau nga mu.
JUNE 24-30
Wenyi Sut Gan Ni Hpe Sawk Sagawn Ai Lam
(Hpilipi 2:17, NW) Nanhte a makam masham a majaw nawng ai hkungga hte magam gun ai bungli hta, tinang hkum tinang ru hkaw kumhpa zawn ru jaw lu na rai yang pyi, ngai myit pyaw ai. Nanhte yawng hte arau kabu gara ai.
it-2-E 528 ¶5
Hkungga Ni
Ru hkaw kumhpa. Israela masha ni Ga Sadi Tawn Da Ai Mungdan de shang ngut ai hpang, ru hkaw hkungga sha n-ga, kaga hkungga ni hpe mung, nawng jau wa ma ai. (Bhk 15:2, 5, 8-10) Madung hku nna, tsabyi jahku (“nang ai baw” ntsin) hpe tawn hkungri ntsa ru jaw ai re. (Bhk 28:7, 14; Pru 30:9 hte shingdaw; Bhk 15:10.) Hpilipi mare hta nga ai Hkristan ni hpang de kasa Pawlu ndai hku ka wa ai: “Nanhte a makam masham a majaw nawng ai hkungga hte magam gun ai bungli hta, tinang hkum tinang ru hkaw kumhpa zawn ru jaw lu na rai yang pyi, ngai myit pyaw ai. Nanhte yawng hte arau kabu gara ai.” Ndai hta, shi gaw ru hkaw kumhpa ngu ga shadawn tsun ai shaloi, hpunau nauna ni akyu lu na matu, shi hkum shi sharawng awng let sak jaw wa ai hpe tsun mayu ai re. (Hpl 2:17, NW) Shi si wa mahka hta Timohti hpang de ndai hku ka wa ai: “Kaning rai nme law, ya e pyi hkungga zawn nawng kau ai ngai hkrum nna, ngai pru lai mat wa na aten du magang ra ai.”—2Tm 4:6.
(Hpilipi 3:11, NW) Rai yang she, ngai gaw shawng nnan na bai hkrung rawt ai lam hta lawm lu na lam nga na re.
w07 1/1 26-27 ¶5
“Shawng Na Ngu Ai Bai Hkrung Rawt Wa Ai Lam”—Ya Nan Byin Nga
5 Hpang langai gaw, “Karai Kasang a Israela amyu” re ai namman chya hkrum ai Hkristan ni gaw, Madu Yesu Hkristu hte rau sumsing lamu hpung shingkang lu na matu, “Madu hte rau tut nawng e a nga nga” ra ai. (Galati 6:16; 1 Htesaloni 4:17) Dai aten ladaw hpe “shawng nnan na bai hkrung rawt ai lam” (sh) “shawng na ngu ai bai hkrung rawt wa ai lam” ngu nna shaga ai. (Hpilipi 3:10, 11, NW; Shingran 20:6) Dai bai hkrung rawt ai lam ngut mat yang, wan hku law ai masha ni gaw, Hparadisu hta htani htana asak hkrung na matu, mungkan ga ntsa hta bai hkrung rawt wa na re. Dai majaw, anhte a myit mada lam gaw sumsing lamu hta raitim, ginding aga hta raitim “shawng na ngu ai bai hkrung rawt wa ai lam” hpe grai myit lawm ging ai. Dai gaw, kaning re ai bai hkrung rawt ai lam rai kun? Gara aten hta byin wa na kun?
Chyum Hti Lamang
(Hpilipi 4:10-23) Ya e mung nanhte nye a lam bai rawt tsang wa nga myit dai majaw, ngai dai Madu hta nachying kabu nga nngai; shawng e mung nanhte myit tsang myit dai rai ti mung, nanhte rai lu na n tai myit dai. 11 Shing rai ngai tsun nngai gaw, kadawn nga nngai majaw, ngai tsun nngai n rai: kaning rai nme law, ngai hkrum mahkrum hta myit dik nga u ga, ngai sharin la nngai. 12 Shagrit kau ai hpe ngai chye nngai, n taw n tsang ai hpe mung ngai chye nngai: lam shagu hte shara shagu hta hkru kat na hte kawsi hpang gara ai rai ti mung, n taw n tsang ai hte kadawn hkrum na hpe rai ti mung, ngai sharin hkrup nngai; 13 ngai hpe n-gun lagaw shaja ya ai wa a majaw, lam shagu hpe ngai hkam lu nngai. 14 Rai ti mung, ngai nni nkri hkrum ai hta ngai hte kanawn mazum ai gaw, nanhte mai kaja ai hku galaw ai rai nga myit dai. 15 Dai hta kaga, Hpilipi masha ni e, dai kabu gara shi ga hkaw hpang nna, Makedoni mung na pru wa yang, dai galaw jaw ai hte hkam la ai lam hta, nanhte sha n rai yang gaw, Hpung kaga langai mi mung ngai hte kanawn mazum nga ai n re ai hpe, nanhte nan chye nga myit dai: 16 ngai Htesaloni mare e nga nga yang pyi, nanhte lang lahkawng lang ngai ra ai lam a matu, shagun jaw mi ai. 17 Shing rai ngai tsun nngai gaw, kumhpaw kumhpa hpe ngai tam nngai n rai, nanhte a akyu a matu mara, law htam wa na asi hpe sha ngai tam nga nngai. 18 Ya e ngai hpa mung hkum ai hta n-ga, jan hkra lu nga nngai: manam pyaw ai bat hte Karai Kasang a matu htuk htap nna sharawng awng ram ai hkungga ngu ai, nanhte shagun dat ai, Epahprodi a lata na ngai lu la ai kumhpa majaw, ngai hpring chyat nga nngai. 19 Nye a Karai Kasang chyawm gaw, shi sut gan su nga ai hte maren, Hkristu Yesu hta e hpung shingkang hte nanhte a ra mara hte hpe jahkum shatsup na ma rin dai. 20 Ya, anhte a Wa ngu ai Karai Kasang kaw, htani htana prat dingsa e, hpung shingkang a nga nga u ga law. Amen. 21 Hkristu Yesu hta e nga ai chyoi pra ai ni nlang hte hpe shakram dat mu. Ngai hte rau nga ai hpu nau ni gaw nanhte hpe shakram dat ma ai. 22 Chyoi pra ai ni nlang hte gaw nanhte hpe shakram dat ma ai: Kehta hkawhkam a htingnu na ni gaw grau nna shakram dat ma ai. 23 Madu Yesu Hkristu a chyeju gaw, nanhte a wenyi hte rau a nga nga u ga law.