Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni
SEPTEMBER 2-8
Wenyi Sut Gan Ni Hpe Sawk Sagawn Ai Lam
(Hebre 8:3) Kaning rai nme law, hkinjawng agyi shagu gaw kumhpaw kumhpa hte shagu hkungga jaw ya na matu dang da nga ai; dai re ai majaw, ndai hkinjawng agyi wa mung, lama ma jaw ya lu na, ra nga ai.
w00 8/15 14 ¶11
Karai Kasang Ra Sharawng Ai Hkungga Ni
11 “Hkinjawng agyi shagu gaw kumhpaw kumhpa hte shagu hkungga jaw ya na matu dang da nga ai” ngu nna, kasa Pawlu tsun ai. (Hebre 8:3) Pawlu gaw, Israela ni a hkinjawng agyi jaw ai hkungga ni hpe “kumhpaw kumhpa” hte, “shagu hkungga” (sh) “mara raw hkungga” ni ngu hpan lahkawng garan nna, madun wa ai hpe sadi u. (Hebre 5:1) Masha ni gaw, hku hkau ai hte manu shadan ai lam ni hpe madun dan na matu hta n-ga, jinghku hku na matu, myiman lu na matu hte hkap la hkrum na matu kumhpaw kumhpa ni hpe jaw chye ma ai. (Ningpawt 32:20; Ga Shagawp 18:16) Dai zawn sha, Tara Ga Shaka hta masat da ai hkungga law law ni gaw, Karai Kasang hkap la na matu hte myiman pa na matu jaw ai, “kumhpaw kumhpa” ni ngu nna mu mada mai ai. Tara Ga Shaka hpe tawt lai ai masa hta nga yang, mara raw hkrum na matu bai wa ra ai majaw, dai hpe wa na matu, “mara raw hkungga” hpe nawng ya ra ai. Pentachyut Chyum Laika hta na, Pru Mat Wa Ai, Jaw Jau hte Bu Hkawm laika ni hta kumhpaw kumhpa hte shagu hkungga hpan amyu myu hpe madun da ai. Ahkri ahkrai lam yawng hpe chye nna matsing na matu gaw, anhte a matu grai yak na raitim, shagu hkungga hpan amyu myu hte seng nna, madung lam nkau mi hpe myit maju jung ging ai.
(Hebre 8:13) Ya, ga shaka ningnan, nga nna shi tsun ai gaw, shawng na ga shaka hpe ningsa shatai kau wu ai; ningsa hte aprat kaba ai arai chyawm gaw, wai mat magang nga ai.
it-1-E 523 ¶5
Ga Shaka
Tara ga shaka gaw gara hku nna “ningsa shatai” kau hkrum ai kun?
Karai Kasang gaw, ga shaka nnan nga na lam myihtoi Yeremia hpe ndau shana shangun ai shaloi, Tara ga shaka gaw “ningsa shatai” kau hkrum wa ai. (Yer 31:31-34; Heb 8:13) A.D. 33, wudang ntsa hta Hkristu si hkam ai hta madung nna, Tara ga shaka gaw dawm kau hkrum sai. (Kol 2:14) Dai shara hta ga shaka nnan gaw malai shang wa ai.—Heb 7:12; 9:15; Kas 2:1-4.
Chyum Hti Lamang
(Hebre 7:1-17) Abraham gaw hkawhkam ni hpe sat kau ai kaw na bai wa yang, shi hpe sa tau nna shaman ya wu ai hte, Abraham mung lanep yawng hta na htam shi hta htam mi karan sak wu ai Melhkizedek ngu ai wa chyawm gaw: 2 Salem hkawhkam hte tsaw htum ai Karai Kasang a hkinjawng wa rai nga ai rai nna, ga lachyum hku hkan yang, shawng na gaw, dinghpring ai a Hkawhkam, bai, Salem hkawhkam ngu ai gaw, ngwi pyaw ai a Hkawhkam, ngu ai rai nga ai: 3 shi gaw kawa n nga, kanu n nga, ahtik labau ngu ai n nga, nhtoi ladaw nhpang mung, asak aprat htum ai mung n ngu lu ai majaw, Karai Kasang a Kasha hte bung hkra tai wa ai rai nna, dinggrin a nga nga ai hkinjawng rai nga ai. 4 Wa daju Abraham e, reng htum ai lanep hta na, htamshi hta htammi karan sak ya ai wa gaw, gade galu kaba nga ai hpe, myit sumru yu mu. 5 Hkinjawng aya lu la ai Lewi a kashu kasha ni gaw, Abraham a nshang na hkrat ai ni, ngu ai, tinang a hpunau ni kaw na, tara hte maren htamshi hta htammi, hta sha na ahkang lu ma ai. 6 Rai ti mung shanhte hte ahtik labau n rum ai wa gaw, Abraham kaw na htam shi hta htam mi hkam la nna, ga ndat ni lu la ai wa hpe nan, shaman ya dat wu ai. 7 Grau kaba ai wa mahtang, kaji ai wa hpe shaman ya ga ai gaw, hpa ndang shara n nga ai. 8 Nang e gaw, si chye ai ni htam shi hta htam mi, hkam la ma ai; wo nang chyawm gaw, sakse nga ai hte maren ahkrung nga ai wa gaw, hkam la nu ai. 9 Dai re ai majaw, htam shi hta htam mi hkam sha ai Lewi amyu mung, Abraham a lata hte htam shi hta htam mi jaw nu ai, ngu mai nga ai: 10 kaning rai nme law, Melhkizedek gaw Abraham hpe tau la ai shaloi e, Lewi gaw shi kawa a nshang e naw rai nga ai. 11 Bai, lam mi gaw, Lewi a amyu hkinjawng ni a aprat e, mung masha ni gaw dai jep ai tara hpe lu la ma ai rai nna, dai hkinjawng aya a gawp e hkum tsup re ai lam dep la lu ai teng yang gaw, Arun a hkringhtawng lam hte maren n re ai sha, Melhkizedek a hkringhtawng lam hte maren re ai hkinjawng wa kaga gaw, hpa majaw paw pru shara naw nga a ta? 12 Kaning rai nme law, dai hkinjawng amyu galai mat lu yang gaw, dai jep ai tara mung n galai ai, nga lu na n rai: 13 ning ngu tsun ai gaw, ndai ga matsun hte seng ang ai wa gaw, amyu kaga hta lawm nga ai rai nna, dai amyu hta na kadai mung, tawn hkungri hta daw jau yu ai n rai, 14 Gaja wa, anhte a Madu, Yuda amyu hta na paw pru wa sai gaw, dan dan leng leng rai nga ai; dai amyu hpe hkinjawng aya a lam Mawshe gaw hpa mung n tsun da wu ai. 15 Dai hta n-ga, Melhkizedek a hkringhtawng lam hte maren hkinjawng kaga paw pru nga ai teng yang gaw, hkinjawng amyu galai mat sai gaw, grau nna dan leng wa sai: 16 shi gaw hkumshan hte seng ai tara matsun hte maren dang da hkrum ai wa n rai, galoi n mat chye ai asak a atsam hte maren, dang da hkrum ai wa rai nga ai; 17 kaning rai nme law, Nang gaw Melhkizedek a hkringhtawng lam hte maren, Htani htana hkinjawng rai nga ndai, nga nna shi a lam sakse hkam ya nga ai.
SEPTEMBER 9-15
Wenyi Sut Gan Ni Hpe Sawk Sagawn Ai Lam
(Hebre 9:16, 17, JCLB) Sali wunli hte seng ai ga ndat hpe shabyin na matu gaw, ga madat da ai wa kaja wa si sai lam sakse madun lu ra nga ai. 17 Hpa majaw nga yang, ga madat tsun da ai wa naw hkrung nga yang gaw ga madat garai n tai mai nga ai. Ga madat tsun da ai wa si jang she grin lu nga ai.
w92 3/1 31 ¶4-6
Laika Hti Ai Ni Hpang De Na Ga San
Karai Kasang hte masha ni a lapran, ga shaka ni hpe shagrin na matu, si hkam ra ai lam Pawlu tsun wa ai. Tara ga shaka gaw ga shadawn langai re. Karai Kasang hte Israela amyu ni a lapran, n dai ga shaka nga wa na matu, hting lu hting lai ya ai wa gaw Mawshe re. Dai majaw, Mawshe gaw ahkyak ai daw hpe galaw ya ai. Ga shaka npu hta du wa ai Israela masha ni hte matut mahkai ai wa mung re. Dai majaw, Yehowa hte galaw ai ga shaka laika hta ga shaka tawn ya ai wa gaw, Mawshe re ai ngu nna sawn la mai ai. Raitim, Tara ga shaka hpe shagrin na matu, Mawshe a asai hpe ru hkaw ra ai kun? N ra ai. De a malai, dusat hkungga ni hpe nawng ya nna, dusat ni a asai gaw Mawshe sai a malai rai sai.—Hebre 9:18-22.
Yehowa hte ga shadawn Israela ni tawn ai ga shaka nnan gaw gara hku kun? Yesu gaw, Yehowa hte ga shadawn Israela amyu ni a lapran hta Hting Lu Hting Lai Ya Ai Wa hku nna ahkang lu da ai. Ndai ga shaka hpe Yehowa nan galaw hpang wa ai raitim, Yesu Hkristu gaw madung re. Hting Lu Hting Lai Ya Ai Wa hta n-ga, ndai ga shaka hta shawng nnan shang lu ai ni hte Yesu gaw ding tawk kanawn mazum lu ai wa mung re. (Luka 22:20, 28, 29) Dai hta n-ga, ga shaka hpe tara shang byin lu hkra, ra ai shagu hkungga hpe nawng ya na matu mung, Yesu atsam hpring wa ai. Dai shagu hkungga gaw, dusat hkungga daram sha n re, hkum tsup ai masha a asak re. Dai majaw, Hkristu hpe ga shaka nnan a shinggyim masha ga shaka tawn ya ai wa ngu nna, Pawlu tsun wa ai re. “Hkristu gaw . . . anhte a matu mara Karai Kasang a man e dan dan pya nga na nga, sumsing lamu kata de nan shang wa” ai hpang ga shaka nnan gaw tara shang grin wa sai.—Hebre 9:12-14, 24.
Mawshe hte Yesu hpe ga shaka tawn ya ai ni ngu Pawlu tsun ai majaw, ga shaka langai hpra hpe shanhte nan galaw hpang wa ai ngu tsun mayu ai n re. Karai Kasang nan galaw hpang ai she re. Raitim, shan gaw hting lu hting lai ya ai ni hku nna, ga shaka langai hpra hpe shagrin ai lam hta shang lawm lu wa ai. Langai hpra hta asak si hkam ra ai. Mawshe a malai dusat ni si ra ai. Ga shaka nnan hta lawm ai ni a matu gaw, Yesu a sai hpe nawng ya wa ai.
(Hebre 10:5-7) Dai re ai majaw, Hkristu gaw ndai mungkan ga de du sa yang, Hkungga hte kumhpa hpe nang n ra nga ndai, Nang nye a matu hkum hkrang lajang da nit dai; 6 Hkum dingyawng nat ai shagu hkungga hte Mara raw ai hkungga hpe, nang n sharawng ndai: 7 Shaloi e, Laika shabawn hta nye a lam ka da nga ai gaw, Yu u, Karai Kasang e, nang myit ra ai hku hkan galaw na, ngai du sa ring ngai, ngu we ai, nga nna tsun ai.
it-1-E 249-250
Hkalup
Yesu gaw shi hkalup hkam ai aten hta akyu hpyi wa ai lam Luka tsun wa ai. (Luk 3:21) Hebre laika hpe ka ai wa gaw, Yesu Hkristu “mungkan ga de du sa yang” (ndai gaw, shi shangai ai aten, laika n lu hti, ga n chye shaga ai aten hpe tsun ai n re. Hkalup hkam nna magam gun hpang wa ai aten hpe tsun ai re.) ngu tsun ai shaloi, Shakawn Kungdawn 40:6-8 hpe la kap nna tsun ai re: “Hkungga hte kumhpa hpe nang n ra nga ndai, Nang nye a matu hkum hkrang lajang da nit dai; . . . Yu u, nang myit ra ai hku hkan galaw na, ngai du sa (laika shabawn hta nye a lam ka da) ring ngai.” (Heb 10:5-9) Karai Kasang hte Tara ga shaka tawn da ai Yuda amyu lakung hku nna Yesu shangai wa ai. (Pru 19:5-8; Gal 4:4) Dai majaw, Yesu gaw Yawhan kaw hkalup hkam na matu sa ai shaloi, Yehowa Karai Kasang hte hku hkau lam ga shaka gaw nga chyalu rai sai. Yesu gaw, Tara npu hta shi hpe hpyi shawn da ai hta grau nna galaw wa ai. Tara ga shaka hta nga ai dusat hkungga nawng ya ra ai hpe shaprai kau nna, “lajang” da ai shi a hkum hpe shagu hkungga hku nna jaw na ngu ai, Kawa Yehowa “myit ra ai” lam galaw lu na matu shi hkum shi, Kawa kaw nawng ya ai lam re. Kasa Pawlu ndai hku tsun wa ai: “Dai myit ra ai hku a gawp e, Yesu Hkristu a hkum hkrang hpe lang lata sha nawng ya ai a marang e, anhte gaw shachyoi shapra ai hkrum sa gaw ai.” (Heb 10:10) Kawa a myit ra ai lam gaw, Mungdan hte matut manoi ai lam hta Yesu shang lawm nna, Kawa a malai dai magam bungli hpe Yesu galaw ai lam mung re. (Luk 4:43; 17:20, 21) Yehowa gaw, shi a Kasha hpe hkap la ai lam, chyoi pra ai wenyi ru jaw nna “Nang gaw nye tsaw ra ai Kasha rai nga ndai; nang hta ngai sharawng awng nngai” ngu tsun wa ai.—Mrk 1:9-11; Luk 3:21-23; Mat 3:13-17.
Chyum Hti Lamang
(Hebre 9:1-14) Dai shawng na ga shaka hta pyi, nawku htung hte seng ai arawn alai ni hte, mungkan ga na chyoi pra ai nta lawm ga ai. 2 Kaning rai nme law, shawng na ngu ai naw ku sum la ngai mi lajang da nga ai rai nna, dai hta e pyengdin shadun, muk mara ai ku hte madun dan ai muk ni rawng nga ai; dai hpe Chyoi pra ai shara, ngu nna shamying wu ai. 3 Bai, lahkawng na nba grang kata maga de, Chyoi pra htum ai shara, ngu ai sum, rai nga ai rai nna, 4 dai hta e manam pyaw ai baw nat ai aja hkungri hte, hkum ting ja sup ai ga shaka sumpu rawng nga ai: dai sumpu kata e, manna rawng ai ja di mung, apu pu ai Arun a dawhkrawng mung, ga shaka lungpa yan mung, rawng nga ai; 5 de a ntsa e mung hpung shingkang a Hkerubim lahkawng gaw dai chyeju magap hpe ka-up nga ma ai: dai hte a ga lachyum langai hte langai hpe, ya tsun shara n nga ai. 6 Shingrai yawng hte hpe lajang ngut jang, hkinjawng ni gaw daw jau ai amu gun hpai na matu, shawng na sum kata de tut nawng e shang nga lu ma ai: 7 lahkawng na shara kata de chyawm gaw, dai hkinjawng agyi wa hkrai sha, tinang a matu mara mung, masha ni a shut hpyit ai a matu mara mung, nawng ya ai asai lang let, laning mi hta e, lang mi sha, shang lu ai: 8 dai rai nna, shawng na sum naw grin nga dingsa, chyoi pra ai shara de shang lu na lam garai n dan pru nga ai nga nna, Chyoi pra ai Wenyi gaw dai lam hte madun dan wu ai; 9 dai gaw ndai prat na matu kasi kanan rai nga ai rai nna, de a htung hte maren, kumhpaw kumhpa hte shagu hkungga jaw ya lu nga ai, rai ti mung, daw jau ai wa a myit masin hpe dai hte jahkum shatsup ya lu ai n rai: 10 dai lam ni gaw, shahpa, luhpa hte kashin kamun ai lam amyu myu hte nawng, htung nnan shashawn na aprat garai n du laman e, gan tawn da ai, hkumshan hte seng ai ahtung ahki sha rai nga ai. 11 Hkristu chyawm gaw, lata hte n gap tawn ai rai nna, ndai hpan tawn da ai mungkan ga hte n seng ai grau kaba nna hkum tsup re ai naw ku sum hta, du na ra ai ngamu ngamai ai lam ni a hkinjawng agyi tai na matu, du sa ai re ai majaw, 12 bainam hte dumsu kasha a asai hte n rai, shi hkum nan a asai hte, dai chyoi pra ai shara kata de, lang lata sha shang nna, htani htana hkrang shaw la ai lam lu la nu ai. 13 Kaning rai nme law, bainam sai, usu sai, nga upra a wan wu hte awu asin hkrum ai ni hpe lapri ya yang, hkumshan hpe san seng hkra shachyoi shapra ya lu ai teng yang gaw, 14 htani htana Wenyi hte Karai Kasang kaw, shi hkum dai hpe ra n rawng ai sha nawng ya ai Hkristu a asai gaw, ahkrung nga ai Karai Kasang hpe daw jau lu hkra, nanhte a myit masin hpe si ging ai arawn alai hta na, grau nna shachyoi shapra ya lu ai, n rai ni?
SEPTEMBER 16-22
Wenyi Sut Gan Ni Hpe Sawk Sagawn Ai Lam
(Hebre 11:4) Kam sham ai hte Abela gaw Ka-in hta grau kaja ai hkungga Karai Kasang hpe nawng ya wu ai rai nna, Karai Kasang mung shi a kumhpa ni a lam sakse hkam ya wu ai majaw, shi ding hpring nga ai, nga nna de a gawp e sakse hkam ya ai lu la wu ai: dai hpe yu yang, shi si mat sai rai ti mung, ga naw a tsun nga ai.
it-1-E 804 ¶5
Makam Masham
Makam Masham A Moi Prat Na Kasi Ningli Ni. Pawlu gaw, ‘sumwi zawn law la ai sakse ni’ (Heb 12:1) hta na langai hpra gaw, ngang kang ai makam masham nga ai lam tsun wa ai. Ga shadawn, Abela gaw “lapu” a baw hpe “a myu matu” abrep ya na Karai Kasang a ga sadi hte seng nna, atsawm chye da ai. Shi gaw, Edin sun hta kanu yan kawa hpe Yehowa tsun wa ai lam ni teng sha byin wa ai lam hpe shi mu wa ai. Edin sun shinggan hta aga gaw dagam hkrum ai majaw, ju hpun ni hte tsing ni tu nna, Adam hte shi a nta masha ni gaw, myi man kaw na salat pru ai du hkra malu masha hpe galaw sha ra ai. Dai hte maren, Ewa gaw shi a madu wa hta myit manoi nga nna, Adam mung shi a madu jan hpe up ai lam hpe Abela mu wa na re. Kanu gaw ma gun nna shinggyim hkum machyi ai lam shi hpe teng sha tsun dan wa na re. Dai hta n-ga, Edin sun chying hka hpe hkerub ni hte shi chyu nwat shadang chye ai wan nhtu ni hte sin da ai hpe mung mu wa na re. (Nin 3:14-19, 24) Ndai lam yawng gaw, “garai n mu yu ai arai ni a lam tau chye” ai hku nna, amyu matu ga sadi gaw teng sha byin wa na lam hpe Abela kamsham wa ai. Dai majaw, shi gaw makam masham hte kalang ta, ‘Karai Kasang hpe hkungga nawng ya’ ai hku nna Ka-in hta grau kaja ai lam madun lu wa ai re.—Heb 11:1, 4.
(Hebre 11:5) Kam sham ai a majaw Enuk gaw si hkrung si htan n hkrum lu hkra, htawt la ai hkrum wu ai; Karai Kasang shi hpe jahtawt la wu ai majaw, shi n nga sai: kaning rai nme law, shi gaw Karai Kasang a sharawng awng ai wa rai nga ai, nga nna jahtawt la ai garai n hkrum yang, sakse hkam ya ai, lu la wu ai:
wp17.1 12-13
“Karai Kasang A Sharawng Awng Ai Wa”
Enuk gaw gara hku nna “jahtawt la” ai hkrum wa ai kun? Yehowa gaw Enuk hpe tsin-yam tsindam n hkrum ai sha, asak hkrung ai kaw nna si ai de angwi sha htawt kau ya ai mai byin ai. Raitim, “Karai Kasang a sharawng awng ai wa” ngu ai sakse hpe, n htawt la kau hkrum shi yang lu wa ai. Gara hku lu wa ai kun? Shi n si shi yang Karai Kasang kaw na, shingran langai hpe lu wa ai rai na re. Shingran hta mungkan ting gaw, tsawm htap la ai sun byin nga na re. Karai Kasang sharawng awng ai hpe madun ai dai sakse hpe lu ai hpang, si ai hta shi yup pyaw mat ai. Kasa Pawlu gaw, Enuk hte kaga sadi dung ai num la ni hte seng nna, shanhte gaw “dai makam masham hta si wa ma sai” ngu nna tsun da ai. (Hebre 11:13) Dai hpang, hpyen ni gaw shi a hkum tsawp hpe tam yang tam na re. Raitim, shanhte tam n mu ma ai. Yehowa Karai Kasang gaw, shi a hkum tsawp hpe hpyen ni n jahten sharun lu na matu (sh) dai hpe lang nna, shut shai ai nawku htung langai hpe n galaw hpang na matu pat shingdang ai hku nna, shi a hkum tsawp hpe shamat kau ai masa re.
Chyum Hti Lamang
(Hebre 11:1-16) Makam masham ngu ai gaw, myit mada ai arai ni a lam myit mu myit hkut nga ai hte, garai n mu yu ai arai ni a lam tau chye tawn lu ai hpe, ngu ai, rai nga ai: 2 de a majaw mung, moi na ni gaw, sharawng awng ai sakse hkam ya ai, lu la ma ai. 3 Nga yawng nga pra gaw Karai Kasang a mungga hte hpajang tawn da nga ai rai nna, mu lu ai arai ni gaw, dan dawng nga ai arai ni hta na n byin wa ai hpe, kam sham ai hte anhte dum chye ga ai. 4 Kam sham ai hte Abela gaw Ka-in hta grau kaja ai hkungga Karai Kasang hpe nawng ya wu ai rai nna, Karai Kasang mung shi a kumhpa ni a lam sakse hkam ya wu ai majaw, shi ding hpring nga ai, nga nna de a gawp e sakse hkam ya ai lu la wu ai: dai hpe yu yang, shi si mat sai rai ti mung, ga naw a tsun nga ai. 5 Kamsham ai a majaw Enuk gaw si hkrung si htan n hkrum lu hkra, htawt la ai hkrum wu ai; Karai Kasang shi hpe jahtawt la wu ai majaw, shi n nga sai: kaning rai nme law, shi gaw Karai Kasang a sharawng awng ai wa rai nga ai, nga nna jahtawt la ai garai n hkrum yang, sakse hkam ya ai, lu la wu ai: 6 makam masham n rawng yang gaw, shi a man e sharawng awng ai lu la na n rai; kaning rai nme law, Karai Kasang kaw sit shang ai wa gaw, Karai kasang nga nga ai mung, shi e hkan tam ai ni hpe chyeju htang jaw lu ai mung, kam sham lu na rai nga ai. 7 Kam sham ai hte Noa gaw garai n mu yu ai arai ni a lam shadum shahprang ai hkam la lu ai rai nna, shi a nta masha ni hpe hkye hkrang la na matu hkrit hkungga ai myit hte shanghpaw li shachyaw wu ai: shingrai kam sham ai hte shi mungkan ga hpe jeyang nna, makam masham hte seng ai ding hpring ai a sali wunli hkam la ai wa, rai wa ai. 8 Abraham gaw, sali wunli hkam la lu na ra ai mung de pru hkawm wa na lam shaga la ai hkrum yang, gade sa wa ai shi n chye timung, kam sham ai hte madat mara nna pru hkawm wa ai. 9 Ga ndat hte seng ai mung hta e, masha tsasam a mung hta zawn, kam sham ai hte shi manam sa tai nga ai rai nna, ga ndat lam la ngai sha hta Sali wunli jawm hkam la lu ai Isak yan Yaku hte rau, sum hta sha rawng nga ma ai: 10 kaning rai nme law, npawt nhpang grin nga ai hte, Karai Kasang de da ai shachyaw ngut sai mare hpe, shi myit mada nga ai. 11 Kam sham ai hte Sara pyi, prat lai mat sa yang, na-um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna myit la wu ai. 12 Dai re ai majaw, la chyasi zawn re ai wa la ngai hta na sha, sumsing lamu a shagan ni hte, nammukdara makau na n dang hti ai zaibru made, law htam wa ai kashu kasha ni pra wa masai. 13 Ndai ni nlang hte gaw, ga ndat hte seng ai sali wunli n hkam la lu ai hte, tsan kaw na dai hpe tau mu nna shaga gintan let, ndai ga ntsa e tsasam hte malet, nhprang manam sha tai nga ai hpe yi la nna, dai makam masham hta si wa masai. 14 Shingrai yin la ai ni gaw, tinang nga na bu ga tam nga ma ai hpe, leng leng madun dan nga ma ai. 15 Shanhte pru kau da ai buga hpe nan, bai dum ma ai rai yang gaw, nhtang wa lu na aten naw nga ma lu ai. 16 Ya chyawm gaw, dai hta grau ai, sumsing lamu na bu ga ngu ai hpe, shanhte marit nga ma ai: dai re ai majaw Karai Kasang gaw, shanhte a Karai Kasang ngu na hpe, kaya wu ai n rai; kaning rai nme law, shanhte a matu mara shanu nga na mare, shi lajang da nu ai.
SEPTEMBER 23-29
Wenyi Sut Gan Ni Hpe Sawk Sagawn Ai Lam
(Hebre 12:1) Ya ndai hte wa law la ai sakse ni gaw, anhte hpe sumwi zawn wang kawan da mi ai majaw, anhte mung, numdaw numdan re ai lit nlang hte hte, kap loi la ai yubak hpe kau da nna, makam masham a npawt nhpang hte jahkum shatsup ya ai wa Yesu hpe azi yu let, anhte gat na matu san da ai lam hpe shakut sharang rai, gat shadu wa ga:
w11 9/15 17-18 ¶11
Shakut Sharang Rai Gat Shadu
11 Hkristan prat n du shi yang, asak hkrung wa ai Yehowa a sadi dung ai mayam ni hpe, Pawlu gaw “law la ai sakse ni gaw, anhte hpe sumwi zawn wang kawan da mi ai” ngu nna tsun wa ai. Shanhte gaw, asak gat shing jawng poi hta sadi dung let jahtum du hkra gat wa ai ni re ai majaw, Hkristan ni mung grai yak ai masa ni hta pyi, Yehowa a ntsa matut nna sadi dung lu ai hpe, shanhte a kasi ningli gaw madun nga ai. “Law la ai sakse” ni gaw gat shing jawng poi hpe, bandung shang ai du hkra kagat wa ai ni hte bung ai. Shanhte a kasi ningli gaw kaga masha ni hpe mung, gat shing jawng poi hta matut kagat na matu n-gun jaw lu na re. Lama na, anhte gaw gat shing jawng poi hta shang lawm nga ai, grai ningtawn ai kagat masha ni mung poi hpe yu nna n-gun jaw nga ai hpe chye yang, bandung du hkra anhte shakut shaja let gat nga na re. Dai majaw, Hebre Hkristan ni mung, Yehowa a moi na mayam ni a kasi ningli hpe myit sumru ra ai. Shanhte a kasi ningli gaw “shakut sharang rai, gat shadu” lu hkra n-gun jaw lu na re. Anhte hpe mung, dai zawn sha akyu jaw lu na re.
(Hebre 13:9) Sharin shaga ai lam tsasam amyu myu de hkum htawt hkum hkan myit: hkan nang ai ni a matu hpa akyu n shabyin ya lu ai sha hpa lam hte n rai, chyeju lam hte she myit masin hpe shangang shakang lu na, mai kaja nga ai.
w89 12/15 22 ¶10
Yehowa Sharawng Awng Ai Hkungga Hpe Nawng Ya
10 Hebre masha ni gaw, Yuda htung hkan ai ni a “sharin shaga ai lam tsasam amyu myu de” hkan ai hpe koi ra ai. (Galati 5:1-6) Dai zawn sharin shaga ai hku n re ai sha, ‘Karai Kasang a n-gaw nwai tsawra myit gaw, ngang kang ai myit masin jaw lu’ ai majaw, teng man ai tara hta matut nna ngang kang nga ra ai. Malu masha hte hkungga nawng ai lam hta nkau mi n dang kalang hkat ai hte seng nna, Pawlu gaw “sha hpa lam hte n rai chyeju lam hte she myit masin hpe shangang shakang” ya lu ai ngu tsun wa ai. Karai Kasang hpe daw jau ai lam, gawng malai jahpu hpe manu shadan ai lam ni kaw nna sha, wenyi akyu ni hpe lu la ai. Malu masha sha ai hte shani shagu na nga sat nga sa ni gaw anhte hpe dinghpring shangun ai n re. (Roma 14:5-9) Grau nna gaw, Hkristu a hkungga gaw shagu hkungga hku nna akyu nga wa sai.—Hebre 9:9-14; 10:5-10.
Chyum Hti Lamang
(Hebre 12:1-17) Ya ndai hte wa law la ai sakse ni gaw, anhte hpe sumwi zawn wang kawan da mi ai majaw, anhte mung, numdaw numdan re ai lit nlang hte hte, kap loi la ai yubak hpe kau da nna, makam masham a npawt nhpang hte jahkum shatsup ya ai wa Yesu hpe azi yu let, anhte gat na matu san da ai lam hpe shakut sharang rai, gat shadu wa ga: 2 dai madu gaw, shi a man e ang wa ai kabu gara ai lam majaw, kaya kahpa hkrum ai hpe hpa zawn n nawn ai sha, wudang lam hpe hkam nu ai rai nna, Karai Kasang a tingnyang hkra maga de wa dung nga sai. 3 Nanhte a myit masin gawng run ai hte hki ba ai n hkrum malit ga, yubak kap ai ni a lata hte dai hte wa ndang kalang di kau hkrum sha ai wa hpe, myit dum nga mu. 4 Nanhte gaw yubak hpe katut gasat na matu asai pru hkra garai n hkap daw yu myit dai: 5 dai hta kaga, Ngai sha e, dai Madu sharin ai hpe n gawn n sawn hkum rai et; Shi nang hpe daru yang gawng hkum run et; 6 Madu gaw tsaw ra ai wa hpe sharin ga ai, Hkap la ai kasha nlang hpe kayat ga ai, nga nna ma hpe sharin ai zawn, nanhte hpe shadum shahprang ai ga hpe nanhte malap kau ma nit dai. 7 Daru sharin ya ai akyu lu la na matu, hkam sharang nga mu: Karai Kasang gaw nanhte hpe kasha zawn woi di da myit dai: kaning rai nme law, kawa e n daru sharin ai kasha, kanang nga a ta? 8 Yawng mayawng hkam ga ai daru sharin la ai nanhte n hkrum myit yang gaw, nanhte kasha majing n rai, n-gyi sha rai nga myit dai. 9 Bai lam mi gaw, anhte hpe daru sharin ya na matu, hkumshan hte seng ai kanu kawa anhte lu ga ai rai nna, anhte shanhte hpe hkungga lara di ga ai: dai hta grau nna, asak hkrung nga lu hkra, wenyi ni a Kawa npu e anhte mai taw nga ga ai, n rai ni? 10 Shanhte gaw tinang ra ai hku hte maren tawng marang mi sha daru sharin ya lu mi ai; shi chyawm gaw, shi a chyoi pra ai anhte hkam la lu u ga, anhte a akyu matu daru sharin nga ai. 11 Daru sharin ya ai lam magup gaw hkam sha ai shaloi e, pyaw hpa zawn n rai, yawn hpa zawn rai nga ai: rai ti mung, dai gaw htawm hpang e she dai hta sharin hkam sha ai ni a matu mara, ding hpring ngu ai ngwi pyaw ai asi si shapraw ya nga ai. 12 Dai re ai majaw, kya noi nga ai lata ni hte lapyin n rawng ai lahput ni hpe sharawt da ting mu; 13 lagaw hten ai ni hkrihkraw n kashai ai sha, shamai ai hkrum lu mu ga, nanhte sa wa na matu, ding ai lam masun lajang mu. 14 Masha yawng mayawng hte ngwi pyaw lu hkra mung, chyoi pra ai hpe dep lu hkra mung, hkan tam nga mu; chyoi pra ai n rawng yang gaw, kadai mung dai Madu hpe mu lu na n rai. 15 Nanhte hta na langai ngai, Karai Kasang a chyeju hkam la ai hta n yet mat myit ga mung, nanhte hpe sharu shatsang lu hkra, hka la ai ru tu pru nna, law malaw hpe awu asin di kau ai n hkrum myit ga mung, 16 shat ma mi a matu sha hte kasha alat a akyu dut kau ai Esaw zawn, shut hpyit ai hte tara n hkungga ai wa n rawng nga ma lit ga mung, hkap yu sadi nga mu: 17 kaning rai nme law, hpang e dai shaman ya ai akyu lu la mayu yang, shi shinggan kau ai hkrum nga ai hpe, nanhte chye nga myit dai: myi prwi pru ai hte myit malai shara nhtang tam katu ti mung, kanang na n mu la nu ai.
SEPTEMBER 30–OCTOBER 6
Wenyi Sut Gan Ni Hpe Sawk Sagawn Ai Lam
(Yaku 1:17) Kaja ai kumhpaw nlang hte hte, hkum hkum re ai kumhpa yawng hte gaw, ntsa de nna rai nga ai hte, nhtoi hkum ni a Kawa kaw na yu hkrat wa ai rai nna, shi hta e gale galau re ai hte kayin kaye re ai shingnip rawng nga lu ai n rai.
it-2-E 253-254
Nhtoi
Yehowa gaw, “nhtoi hkum ni a Kawa” re. (Yak 1:17) Shi gaw, “shani e htoi ya na matu ajan, shana e up na matu shata hte shagan ni hpe tawn da” ai daram sha n re. (Yer 31:35) Shi gaw, teng man ai tara a chye chyang ai nhtoi yawng a npawt mung re. (2Ko 4:6) Shi a tara, jeyang ai dawdan lam ni hte mungga ni gaw, lam madun ya na matu tinang hkum hpe ahkang jaw ai ni a matu nhtoi re. (Shk 43:3; 119:105; Gsh 6:23; Esa 51:4) Shakawn Kungdawn sara gaw, “na a nhtoi majaw anhte nhtoi mu lu na ga ai” ngu nna tsun wa ai. (Shk 36:9; shingdaw Shk 27:1; 43:3.) Jan a nhtoi gaw “nhtoi leng hkra ahtoi ahkung wa nga” ai zawn, dinghpring ai wa mung Karai Kasang hpe chye chyang ai lam hta, grau grau nna htoi leng wa ai. (Gsh 4:18) Yehowa a lam matsun hpe hkan sa ai gaw shi a nhtoi hta hkawm nga ai re. (Esa 2:3-5) Maga mi hta gaw, marai langai gaw nhkru ai (sh) n san seng ai lam ni hpe yu nga ai rai yang, shi a wenyi lam gaw grai sin mak nga ai re. Yesu tsun wa ai hte maren re: “na a myi n kaja nga yang gaw, na a hkum ting a sin nga ai: nang hta rawng ai nhtoi gaw, nsin tai mat yang gaw, dai nsin gaw gade htat nga a hka!”—Mat 6:23; shingdaw Trj 15:9; 28:54-57; Gsh 28:22; 2Pe 2:14.
(Yaku 2:8) Dai rai nna, Na a htingbu wa hpe na a hkum hte maren nang tsaw ra lu na ndai, nga nna Chyum laika hta rawng ai hkawhkam tara hpe, nanhte shatup mu yang gaw, nanhte mai kaja ai hpe galaw nga myit dai.
it-2-E 222 ¶4
Tara
“Hkawhkam Tara.” Masha yawng hta Hkawhkam gaw ahkaw ahkang nga ai zawn, masha shada da kanawn mazum ai lam hta “Hkawhkam Tara” gaw ahkyak htum hte shingkang ka-up lu dik htum re. (Yak 2:8) Tara ga shaka hta kaba htum gaw tsawra myit re. Bai nna, jep ai tara mahkra hte, myihtoi ni a ga madung re ai, nambat lahkawng tara hta “na a htingbu wa hpe, na a hkum hte maren nang tsaw ra” (hkawhkam tara) ra ai ngu tsun da ai. (Mat 22:37-40) Hkristan ni gaw, Tara ga shaka npu hta n nga sai raitim, Hkawhkam Yehowa hte shi a Kasha, Hkawhkam Yesu Hkristu hte seng ai ga shaka nnan hpe gaw madat mara ra ai.
Chyum Hti Lamang
(Yaku 2:10-26) Kadai rai ti mung tara ting hpe hkan shatup lu ti mung, dai hta na langai mi hpe kataw kau yang gaw, yawng hte hta ra ging ai wa rai nga ai. 11 Kaning rai nme law, Masha num hpe hkum shaw, nga nna hkang da ai wa gaw, Masha hpe hkum sat, nga nna naw tsun nga ai. Dai rai nna, masha a num hpe nang n shaw ti mung, masha hpe sat kau n yang gaw, dai tara hpe tawt lai ai wa nang rai nga ndai. 12 Dai re ai majaw, nanhte hpe shalawt lu na tara hte daw dan ai hkrum magang lu na ni zawn, ga a tsun nga mu; dai hte maren hkan galaw nga mu. 13 Kaning rai nme law, matsan dum na myit n rawng ai wa gaw, matsan dum ai hku n re ai sha, daw dan ai hkrum na ra ai. Matsan dum ai lam chyawm gaw, dawdan ai lam hta grau nna awng wa lu ai. 14 Nye a hpu nau ni e, marai langai ngai, Ngai gaw makam masham rawng nga nngai, nga nna tsun nga ti mung, magam bungli n shachyen nga a yang gaw, hpa akyu nga a ta? Makam masham gaw dai wa hpe hkye hkrang la lu na a ni? 15 Hpu nau wa langai ngai, shing n rai kajan langai ngai, singgu krin rai nga ma ai hte, shani shagu sha na lusha shahpa nhprut ma yang gaw, 16 nanhte hta na marai langai ngai, Ngwi pyaw ai hte wa ma sit; lum nga mu, hkru kat nga mu, ngu nna shan hpe tsun mu ti mung, hkum a matu ra nga ai hte maren, n jaw dat mu yang gaw, hpa akyu nga na a ta? 17 Dai hte maren, makam masham hta magam bungli n lawm yang gaw, tinang dai chyasi rai nga ai. 18 Bai lam mi gaw, Nang makam masham rawng nga ndai, ngai mahtang magam bungli rawng nga nngai, nga nna marai langai ngai tsun nga a yang gaw, magam bungli n lawm ai, na a makam masham gaw ngai hpe madun dan e, shaloi nye a magam bungli hte nye a makam masham, ngai nang hpe madun dan na de ai. 19 Karai Kasang gaw langai sha rai nga ai, nang kam nga n hka? Rai sa, mai kaja nga ndai: nat ni mung kam sham nga nna, hkrit gari nga ma ai. 20 Dai hta kaga, wa dan seng breng wa e, makam masham hta magam bungli n lawm yang gaw, kaman lila rai nga ai hpe, nang chye mayu da wu ni? 21 Anhte a wa Abraham dai hkungri ntsa e, shi a kasha Isak hpe hkungga shatai ai shaloi, magam bungli hte ding hpring wa lu ai, n rai ni? 22 Dai rai nna, dai kam sham ai gaw, shi a magam bungli hte rau shachyen nna, dai magam bungli a majaw, dai kam sham ai gaw tup wa lu ai hpe, nang mu lu ndai; 23 shingrai, Abraham gaw karai Kasang hpe kam sham wu ai rai nna, dai hpe ding hpring ai rai nga ai shi a matu ngu ya wu ai hte, Karai Kasang a jinghku wa shi hpe ngu da wu ai, nga nna tsun da ai laika gaw dik wa sai. 24 Dai rai nna, kam sham ai hte sha n rai, magam bungli hte masha gaw ding hpring wa lu nga ai hpe nanhte dum chye nga myit dai. 25 Dai hte maren, Rahab ngu ai shawa num gaw, kasa ni hpe hkap hkalum la nna, kaga lam hku e dat dat mu ai shaloi, magam bungli hte dinghpring wa lu ai, n rai ni? 26 Kaning rai nme law, dai hkum tsawp hta wenyi n rawng a yang gaw, chyasi rai nga ai zawn, dai makam masham hta mung, magam bungli n lawm yang gaw, chyasi rai nga ai.