HKAJA 2

Ga Shaga Ai Zawn Tsun Ai Lam

2 Korinhtu 2:17

KADUN DAWK: Nang tsun mayu ai lam hte madat nga ai ni a ntsa, na a hkam sha lam hpe dan dawng shangun u. Myit madung hte ga shaga ai zawn tsun u.

Akyu hpyi nna atsawm hkyen lajang u. Tinang hpe n re ai sha, tinang tsun ai lam hpe myit maju jung wa hkra akyu hpyi u. Madung lam ni hpe asan sha chye na hkra shakut u. Tinang htuk manu ai ga hku tsun u; laika pa hta ka da ai ga si ni hpe hti dan ya ai zawn hkum galaw.

Chyum Laika (sh) kaga laili laika kaw nna hti dan mayu yang, hti na lam ni hpe atsawm chye da ai gaw, nang hti ai shaloi grau htuk manu hkra karum ya na re. Ga shaga ai lam ni lawm yang, hkam sha lam hte ga shaga ai zawn sha hti dan u.
Myit kraw kata kaw na tsun u. Ndai shiga hpe masha ni na na matu, hpa majaw ahkyak ai lam myit yu u. Shanhte hpe myit maju jung u. Rai yang, na a tsap ai, dung ai, lata kumla hte myiman nsam ni gaw, myit madung hte hku hkau ai lam madun na re.

Ga shaga ai zawn tsun ai shaloi, n hkungga ai hku n byin hkra sadi u. Chye na loi ai ga ni hte tup hkrak jaw ai hku tsun nna, manu dan ai shiga byin hkra galaw u.
Madat nga ai ni hpe yu u. Madat nga ai ni hpe myi hte matut mahkai galaw u. Mungga htawn ai shaloi, shawa hpawng ting hpe ntsa lam sha yu shalai kau na malai, langai hpra hpe chyahkring mi daram yu na matu shakut u.