Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni

NOVEMBER 4-10

Wenyi Sut Gan Ni Hpe Sawk Sagawn Ai Lam

(1 Yawhan 2:​7, 8) Tsaw ra ai ni e, ningnan hkang da ai ga nrai, shawng npawt kaw nna nanhte lang nga ai hkang da ai ga ningsa hpe, ngai nanhte hpe ka dat nngai: nanhte na yu ma nu ai mungga gaw, dai hkang da ai ga ningsa rai nga ai. ⁸ Bai maga mi de, hkang da ai ga ningnan ngai nanhte hpe ka dat nngai: dai gaw shi hta e mung, nanhte hta e mung, teng nga ai: kaning rai nme law, dai nsin gaw hkoi mat wa nna, dai teng man ai nhtoi gaw, ya e pyi htoi tu nga ai.

w13 9/15 10 ¶14

Yehowa A Sadi Jaw Ga Ni Gaw Kamhpa Mai

¹⁴ Hkristan Greek Chyum Laika hta, shada da tsawra mu ngu ai sadi jaw ga ni grai lawm ai. Nambat lahkawng kaba htum tara gaw, “Na a htingbu wa hpe, na a hkum hte maren nang tsaw ra lu na” ngu ai tara re ai lam Yesu tsun wa ai. (Mat 22:39) Yesu a kanu bung kanau Yaku gaw, tsawra myit hpe “hkawhkam tara” nga nna shaga wa ai. (Yak 2:8) Kasa Yawhan gaw, “Tsaw ra ai ni e, ningnan hkang da ai ga nrai, shawng npawt kaw nna nanhte lang nga ai hkang da ai ga ningsa hpe, ngai nanhte hpe ka dat nngai” nga nna tsun wa ai. (1Yh 2:​7, 8) “Hkang da ai ga ningsa” ngu tsun ai shaloi, Yawhan hpa hpe tsun mayu ai kun? Tsawra myit tara hpe tsun nga ai re. Ndai tara gaw hpa majaw ningsa re ai nga yang, Yesu gaw ndai tara hpe lai wa sai shaning law law, “shawng npawt kaw nna” jaw wa ai majaw re. Raitim ndai tara gaw ningnan mung re ai. Hpa majaw nga yang, sape ni gaw masa ningnan ni hta tinang akyu n tam ai tsawra myit hpe madun ra na majaw re. Yesu a sape ni re ai anhte ni gaw, ndai mungkan hta na masha ni madun ai tingkyeng myit n nga na matu, sadi jaw ga ni lu ai majaw chyeju dum ga ai. De a malai anhte gaw tinang akyu n tam ai tsawra myit hpe madun nga ai.

(1 Yawhan 5:​16, 17) Kahpu kanau langai ngai nsi ging ai yubak galaw nga ai hpe, marai la­ngai ngai mu hkrup a yang gaw, shi akyu hpyi mai ai rai nna, n si ging ai yubak galaw ai ni hta lawm ai rai yang, Karai Kasang gaw dai wa hpe asak jaw na ra ai. Si ging ai yubak mung rai nga ai: de a matu mara hpyi nem na ngai n tsun nngai. ¹⁷ N ding n hpring ai amu nlang hte gaw, yubak rai nga ai: rai ti mung, n si ging ai yubak mung rai nga ai.

it-1-E 862 ¶5

Mara Raw Ya Ai Lam

Kaga ni a matu, nawku hpung ting a matu pyi mara raw ya na matu, Yehowa kaw akyu hpyi ai gaw htap htuk nga ai. Mawshe gaw, Israela amyu ting a yubak hpe yin la nna, mara raw ya na matu hkungga let tsun ai shaloi, Yehowa gaw dai ga hpe madat ya wa ai. (Bhk 14:​19, 20) Shawlumon mung, nawku htingnu apnawng ai aten hta, shi a amyu masha ni yubak galaw yang, shut ai lam kaw nna bai nhtang wa yang, mara raw ya na matu Yehowa kaw akyu hpyi wa ai. (1Hk 8:​30, 33-40, 46-52) Ezra gaw, mungdan de bai nhtang wa ai Yuda masha ni a yubak mara ni a malai, shawa hpawng man hta akyu hpyi tawngban ya wa ai. Shi a myit masin ma­hkra hte hpyi ai ga hte shadut ya ai majaw, akyu hku nna masha ni gaw Yehowa kaw na mara raw hkrum na matu galai shai wa ai. (Ezr 9:13–10:​4, 10-19, 44) Wenyi lam hta machyi nga ai wa gaw, nawku hpung kaw na myitsu salang hpe shaga nna, shi hpe akyu hpyi ya na matu Yaku n-gun jaw wa ai. Rai yang ‘yubak galaw hkrup ti mung, raw dat kau ai hkrum na ra ai.’ (Yak 5:​14-16) Raitim, “si ging ai yubak”, chyoi pra ai wenyi hpe shut hpyit ai yubak gaw, ding sang galaw ai yubak re ai majaw, mara raw hkrum na n re. Hkristan ni gaw, dai zawn mara galaw ai ni a matu akyu n hpyi ya ging ai.​—1Yh 5:16; Mat 12:31; Heb 10:​26, 27.

Chyum Hti Lamang

(1 Yawhan 1:1–2:6) Shawng npawt kaw nna nga ai rai nna, anhte na yu ai hte, anhte a myi hte mu yu ai hpe, anhte mada yu ai hte anhte a lata hte hkra ai, asak hkrung ai Mungga a lam, anhte nanhte hpe gawn dan ga ai; ² Dai asak gaw dan pru wa ai rai nna, Kawa hte rau nga nga yu sai hte, nanhte kaw dan pru wa sai, htani htana na asak hpe, anhte mu yu nna, de a lam nanhte hpe sakse hkam ya ai hte gawn dan ga ai; ³ Rai sa, nanhte mung anhte hte kanawn mazum lu myit ga, anhte mu yu ai hte na yu ai lam hpe, anhte nanhte hpe mung gawn dan ga ai: anhte chyawm gaw, dai Kawa hte shi a Kasha Yesu Hkristu hte ka­nawn mazum nga ga ai. ⁴ Anhte a kabu gara ai lam dik wa ma li ga, ndai hte gaw anhte ka ya dat ga ai. ⁵ Karai Kasang gaw nhtoi rai nga ai hte, shi hta nsin hpa mung n rawng nga ai, da ndai gaw, shi kaw na anhte na yu ai hte, nanhte hpe gawn dan ai shi ga rai nga ai. ⁶ Anhte shi hte kanawn mazum ai ni rai nga ga ai, nga ninglen nsin hta hkawm nga yang gaw, anhte masu ga ai rai nna, teng man ai amu hpe n galaw nga ga ai. ⁷ Shi gaw dai nhtoi hta rawng nga ai hte maren, anhte mung dai nhtoi hta hkawm nga yang gaw, anhte la­ngai hte langai kanawn mazum ai ni rai nga ga ai hte, shi a Kasha Yesu a asai gaw, anhte hta na yubak nlang hte hpe jasan jaseng kau ya mi ai. ⁸ Anhte yubak n rawng ga ai, nga nna tsun ga yang gaw, anhte hkum hpe anhte hkalem kau ga ai rai nna, teng man ai myit anhte hta n rawng sa ga ai. ⁹ Anhte a yubak hpe anhte madun nem ga yang gaw, anhte a yubak hpe raw dat kau na hte n ding n man ai nlang hte hta na, anhte hpe jasan jaseng mi ga, shi kangka nga ai hte ding hpring ai wa rai nga ai. ¹⁰ Anhte yubak n-galaw saga ai, nga nna tsun ga yang gaw, anhte shi hpe masu ai wa shadu nna, shi a mungga anhte hta n rawng ga ai.

2 Ngai shu ngai sha ni e, nanhte yubak n-galaw myit ga, ndai hte gaw ngai nanhte hpe ka dat nngai. Rai ti mung, masha langai ngai yubak galaw hkrup a yang gaw, dai Kawa a man e, htinglu htinglai ya ai wa, Yesu Hkristu ngu ai ding hpring ai Madu gaw, anhte lu ga ai: ² shi gaw, anhte a yubak a matu mara gawng malai hkungga rai nga ai; anhte a yubak a matu mara sha n rai, mungkan ting a matu mara mung rai nga ai. ³ Shi a hkang da ai ga hte hpe anhte hkan nang ga yang gaw, anhte shi hpe chye chyap nga ai hpe, anhte chye ga ai. ⁴ Ngai shi hpe chye chyap nngai, nga nna marai langai ngai tsun a ti mung, shi a hkang da ai ga hpe n hkan nang a yang gaw, dai wa gaw masu ai wa rai nga ai hte, dai teng man ai gaw shi hta n rawng nga ai. ⁵ Kadai rai ti mung shi a mungga hpe hkan nang a yang gaw, Karai Kasang a tsaw ra ai lam, dai wa hta e kaja wa teng teng dik wa sa lu ai: anhte shi hta rawng nga ga ai gaw, ndai lam majaw anhte chye lu ga ai. ⁶ Shi hta de nga nngai, nga nna tsun ai wa gaw, shi rai nga ai hte maren, dai wa mung rai nga u ga.

NOVEMBER 11-17

Wenyi Sut Gan Ni Hpe Sawk Sagawn Ai Lam

(Yuda 4) Kaning rai nme law, tara n hkungga ai, anhte a Karai Kasang a chyeju hpe mak kayut ai amu hte galai kau ma ai rai nna, anhte a Hpareng wa hte Madu shingtai ngu ai Yesu Hkristu hpe nyet kau nhtawm, ndai daw dan ai hkrum na matu, moi chyaloi nhkoi kaw nna, ka matsing da ai masha nkau mi gaw, anhte kaw e mayun shang wa ma sai.

(Yuda 12) Shanhte gaw, nanhte hte rau poi galaw sha ai shaloi jang, nanhte a tsaw ra poi ni hta makoi nga ai lungbra ni, rai nga ma ai: hpa n hkrit kaya let, tinang hkum sha jau la ai sagu rem ai ni mung, rai nga ma ai: nbung e shapoi nna marang n rawng ai sumwi; la­hkawng lang si mat nna, ri hte nawng baw kau ai, asi n si ai ginhtawng jaga na hpun.

it-2-E 279

Tsaw Ra Poi Ni

Ndai tsaw ra poi ni gara hku galaw ai lam, kade lang galaw ai lam ni hpe Chyum Laika hta n tsun da ai. (Yuda 12) Madu Yesu Hkristu (sh) shi a kasa ni mung matsun da ai lam n nga ai. Ndai poi hpe n galaw n mai ai (sh) galoi mung galaw ra na ngu n mai sawn la ai. Arung arai lusu ai Hkristan ni gaw, matsan ai hpunau ni hpe saw shaga nna, lusha poi galaw ai re ngu masha nkau mi tsun ai. Malu masha grai law htam hkra shajin da ai lu sha poi hta, kawa n nga ai ni, gaida ni, karum shingtau ra ai ni hte lusu ai ni gaw, malu masha ni hpe tsawra myit hte rau sha let kanawn mazum ma ai.

it-2-E 816

Lungbra

Kaga Greek ga si, spi·lasʹ ngu ai gaw hka kata na n mu lu ai lung rawk ni (sh) lungbra hpe tsun mayu ai. Yuda gaw dai ga shadawn hpe, n kaja ai yaw shada lam hte Hkristan nawku hpung de, mayun shang wa ai ni hte shing daw nna tsun wa ai. Dai n mu lu ai lung rawk ni gaw, sang­hpaw li ni hpe shoihpa jaw chye ai zawn, dai masha ni mung nawku hpung na ni hpe shoi­hpa jaw chye ai lam tsun wa ai. Dai masha ni hte seng nna ndai hku tsun wa ai: “Nanhte hte rau poi galaw sha ai shaloi jang, nanhte a tsaw ra poi ni hta makoi nga ai lungbra ni, rai nga ma ai.”​—Yuda 12.

(Yuda 14, 15) Adam kaw na prat sanit hta du ai Enuk mung, shanhte hpe myihtoi ga tsun mu ai rai nna, Yu mu, yawng mayawng hte hpe tara dara na ma ra ai rai nna, ¹⁵ tara n hkungga ai ni nlang hte gaw, tara n hkungga ai myit hte galaw dan ai tara n hkungga ai amu mahkra a matu mara mung, tara n hkungga ai yubak galaw ai ni, shi a lam tsun dan mu ai n hkru ai ga mahkra a matu mara mung, shanhte hpe madun daw dan mu ga, dai Madu gaw, shi a chyoi pra ai luksuk mun sen ni hte, du sa ra ai, nga ai.

wp17.1 12 ¶1

“Shi Gaw Karai Kasang A Sharawng Awng Ai Wa”

Enuk gara lam myihtoi wa ai kun? “Yu mu, yawng mayawng hte hpe tara dara na ma ra ai rai nna, tara n hkungga ai ni nlang hte gaw, tara n hkungga ai myit hte galaw dan ai tara n hkungga ai amu mahkra a matu mara mung, tara n hkungga ai yubak galaw ai ni, shi a lam tsun dan mu ai n hkru ai ga mahkra a matu mara mung, shanhte hpe madun daw dan mu ga, dai Madu gaw, shi a chyoi pra ai luksuk mun sen ni hte, du sa ra ai” ngu ai hpe myihtoi wa ai. (Yud 14, 15) Dai ga hte maren kaja wa byin wa na hpe Enuk tsep kawp kam wa ai. Shi a matu gaw, dai myihtoi ga hta lawm ai ga ni hte maren, Karai Kasang galaw ngut sai zawn pyi rai nga sai. Tsun mayu ai gaw, kaja wa teng teng byin wa na re ai majaw, byin ngut sai zawn pyi shi lu tsun nga ai re.​—Esa 46:10.

wp17.1 12 ¶3

“Shi Gaw Karai Kasang A Sharawng Awng Ai Wa”

Enuk a makam masham gaw, dai ni aten na mungkan hpe Karai Kasang mu ai zawn, anhte mu nga ai kun ngu nna, tinang hkum tinang san yu na matu shadut ya ai. Shi nden marai hte htawn tsun wa ai shiga gaw, shi a prat hte mung dai ni na aten hte mung seng nga ai. Shi sadi jaw wa ai hte maren, Yehowa gaw, tara n lang ai dai mungkan hpe Noa prat hta hka sha-u ing nna jahten wa ai. Ndai gaw du na ra ai aten hta byin wa na, jahten sharun na lam a kasi kamang re. (Mat 24:​38, 39; 2Pe 2:​4-6) Dai prat na zawn dai ni aten hta mung, Karai Kasang gaw tara n lang ai ndai mungkan hpe, tara jeyang na matu chyoi pra ai lamu kasa ni hte jin jin rai nga sai. Dai majaw, anhte yawng Enuk a sadi jaw ga hpe myit sa­lum hta bang da nna, kaga masha ni hpe tsun dan ra ai. Dai aten hta nta masha ni hte jinghku ni gaw, tinang hpang maga de tsap yang she tsap na. Ngai hkrai sha re nga nna kalang lang hkamsha wa chye ai. Raitim, Yehowa gaw, Enuk hpe n kau da wa ai zawn, dai ni aten na sadi dung ai mayam ni hpe, galoi mung kau da na n re.

Chyum Hti Lamang

(2 Yawhan 1-13) Ndai salang, ngai gaw, teng man ai lam hta e ngai tsaw ra nga ai, lata la ai majan hte shi a kashu kasha ni hpe, ga shana dat nngai; ngai chyu sha tsaw ra nga ma we ai n rai, anhte hta e a nga nga ai rai nna, ² prat dingsa e anhte hta e a nga nga lu na teng man ai ga a majaw, dai teng man ai lam hpe chye chyang ai ni nlang hte mung, shanhte hpe tsaw ra mu ai. ³ Kawa Ka­rai Kasang kaw nna mung, dai Kawa a Kasha Yesu Hkristu kaw nna mung, teng man ai hte tsaw ra ai lam hta e, chyeju matsan dum ai hte ngwi pyaw ai gaw, anhte hte rau a nga nga na ra ai. ⁴ Dai Kawa kaw nna hkang da ai ga hpe anhte lu la sa gaw ai hte maren, na a nshu nsha ni nkau mi, dai teng man ai lam hta e hkan nang nga ma ai hpe, ngai mu hkrup nngai majaw, ngai ja ja kabu gara nga nngai. ⁵ Ya chyawm gaw, majan e, hkang da ai ga nnan hte n rai, shawng npawt kaw nna anhte lu la sa gaw ai ga hte ngai nang hpe ka dat nna, anhte shada da tsaw ra nga u ga, nang hpe hpyi dat de ai. ⁶ Shi a hkang da ai ga hte maren, anhte hkan galaw ga yang gaw, dai gaw tsaw ra ai lam rai nga ai. Nanhte shawng npawt kaw nna na yu ma nit dai hte ma­ren, nanhte mung hkan galaw mai ai hkang da ai ga gaw, ndai ga rai nga ai. ⁷ Kaning rai nme law, Yesu Hkristu gaw masha a hkum shan hpe dagraw nna du sa ai hpe, ndang kau ai hkalem ai masha law law wa mungkan ga de pru sa ma ra ai. Dai wa gaw, dai hkalem ai wa hte antihkristu mung rai nga ai. ⁸ Anhte galaw da ai amu hpe nanhte n shamat kau myit dai sha, nanhte hkum hkum re ai shabrai hpe hkam la lu myit ga, tinang dai sadi nga mu. ⁹ Hkristu a sharin shaga ai lam hpe tawt lai ai hte n hkan nang ai wa kadai rai ti mung, Karai Kasang hte n seng nga ai; dai sharin shaga ai lam hta e a hkan nga ai wa chyawm gaw, Kawa yan Kasha hte seng nga ai. ¹⁰ Marai langai ngai nanhte kaw sa du nna, dai sharin shaga ai ga hpe n lang a yang gaw, dai wa hpe nta kata de hkum shashawn mu; shi hpe hkum hkap shachyen nga mu: ¹¹ ka­ning rai nme law, dai wa hpe hkap shachyen ai masha gaw, shi a n kaja ai hpai lau hta e lawm mat wa ai. ¹² Ngai nanhte hpe ka dat na lam law law nga rai ti mung, maisau hta laika tsi hte ka da mayu nngai n rai: nanhte a kabu gara ai lam dik wa lu myit ga nanhte hpang de sa du nhtawm, n-gup ga hte tsun chyai lu na, ngai myit mada nga nngai. ¹³ Na a lata la ai, ning na a kashu kasha ni gaw, nang hpe shakram dat ma ai law.

NOVEMBER 18-24

Wenyi Sut Gan Ni Hpe Sawk Sagawn Ai Lam

(Shingran 1:7) Yu mu, shi gaw sumwi hte du sa wa nna, myi yawng mayawng mung, shi hpe galun baw ai ni mung, shi hpe hkap mu na ma ra ai rai nna, dinghta ga na amyu nlang hte gaw, shi a majaw sharung shayawt na ma ra ai. Rai sa, Amen.

kr 226 ¶10

Karai Kasang A Mungdan Gaw Hpyen Ni Hpe Awng Padang Dip

¹⁰ Tara jeyang na lam hpe ndau shana. Ka­rai Kasang Mungdan a hpyen ni gaw, grai hkrit tsang hpa mabyin langai hpe mu lu na re. “Masha Kasha gaw daru magam hte hpung shingkang kaba hte nawng sumwi ni hta e du sa ai hpe, shanhte mu na ma ra ai” nga nna Yesu tsun wa ai. (Mrk 13:26) Hpung dagu madun ai shingra tara hta lai ai ndai mabyin gaw, tara je­yang na lam hpe ndau shana na matu, Yesu du wa sai lam hpe madun nga ai. Hpang jahtum na aten hte seng ai, ndai myihtoi ga a hpang na daw langai hta, Yesu gaw ndai aten hta ndau shana na tara jeyang na lam hpe, ahkri ahkrai madun wa ai. Dai lam hpe bainam hte sagu ga shadawn hta mu lu ai. (Mahte 25:​31-33, 46 hpe hti u.) Karai Kasang a Mungdan hpe sadi dung let madi shadaw ai ni gaw, “sagu” hku nna tara jeyang hkrum na re. Shanhte gaw, “hkrang shaw la ai lam du na ni wa ra ai” hpe chye ai majaw “baw sharawt” nga na ra ai. (Luk 21:28) Mungdan hpe ninghkap ai ni gaw, “bainam” hku nna tara jeyang hkrum na re. Shanhte gaw, “n htum n wai ari de shang wa na” hpe chye ai majaw “sharung shayawt” nga na re.​—Mat 24:30; Shr 1:7.

(Shingran 2:7) Wenyi gaw Hpung ni hpe ka­ning nga tsun ai gaw, na tu ai wa gaw na la u ga. Dang lu ai wa hpe, Karai Kasang a Hpa­radisu e tu ai asak hkrung ai hpun a asi, sha lu na ahkang, ngai jaw na we ai.

w09 1/15 31 ¶1

Shingran Laika Kaw Na Dan Dawng Ai Lam Ni​—I

2:7​—“Karai Kasang a Hparadisu” gaw hpa rai kun? Dai ga ni gaw, namman chya hkrum ai Hkristan ni hpe tsun nga ai re ai majaw, ndai kaw lang da ai hparadisu gaw, Karai Kasang nan shanu nga ai sumsing lamu hparadisu hpe tsun ai rai na re. Sadi dung ai namman chya hkrum ai ni gaw, “asak hkrung ai hpun” a asi hpe sha lu na re. Shanhte gaw, n si chye ai masa hpe lu la na re.​—1Ko 15:53.

Chyum Hti Lamang

(Shingran 1:​1-11) Da ndai gaw, ahkying ladaw gade n na yang, byin wa na ra ai lam ni hpe, Hkristu a shangun ma ni e madun dan na matu, Karai Kasang gaw dai Madu hpe jaw dat ai, Yesu Hkristu a shingran ga rai nga ai; dai Madu gaw shagun dat nna shi a lamu Kasa a lata hte shi a shangun ma Yawhan hpe dai shingran ga shadan dan wu ai: ² Yawhan mung, Karai Kasang a mungga hte, Yesu Hkristu hte seng ai sakse a lam mu mamu hte hpe sakse hkam ya wu ai. ³ A­hkying ladaw ni wa magang ra ai majaw, ndai ga hpe hti dan ai wa hte, ndai myihtoi ga hte hpe madat mara nna dai hta ka da mada hpe hkan galaw ai ni gaw, a lu ma ai. ⁴ Ngai Yaw­han gaw, Asi a mung e nga ai Hpung sa­nit hte hpe, ga shana dat nngai: ndai aprat e, moi na aprat e a nga nga nna, htawm hpang e du na ra ai wa kaw nna mung; shi a tingnyang man e nga ai wenyi sanit kaw nna mung; ⁵ kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta a nga nga ma lit ga. Anhte hpe tsaw ra nna, shi hkum nan a asai hte anhte a yubak kaw na anhte hpe raw dat mi ai hte, ⁶ shi a Kawa Karai Kasang a matu anhte hpe mungdan amyu hte hkinjawng amyu shatai ai wa kaw, hpung shingkang hte daru magam ahkang gaw, htani htana e a nga nga u ga law. Amen. ⁷ Yu mu, shi gaw sumwi hte du sa wa nna, myi yawng mayawng mung, shi hpe galun baw ai ni mung, shi hpe hkap mu na ma ra ai rai nna, dinghta ga na amyu nlang hte gaw, shi a majaw sharung shayawt na ma ra ai. Rai sa, Amen. ⁸ Ngai gaw Alhpa mung rai nga nngai, Omega mung rai nga nngai, nga nna ndai aprat e, moi na aprat e a nga nga ai hte, htawm hpang du na ra ai wa, Chyahtum chyalai n-gun rawng ai Madu Ka­rai Kasang gaw tsun nga ai. ⁹ Yesu a nni nkri hta mung, mungdan hta mung, hkam sha­rang ai hta mung nanhte a kanawn manang rai nga ai, nanhte a hpu nau wa, ngai Yawhan gaw, Karai Kasang a mungga hte Yesu a sakse majaw, Patmu ngu ai zunlawng hta nga nga nngai. ¹⁰ Dai Madu a nhtoi hta e Wenyi hta ngai nawng mat wa ai rai nna, Nang mu ai hte maren laika hta ka la nhtawm, Ehpesu, Samurna, Pergamu, Htuatira, Sardi, Hpilade­hpi hte Ladoki mare ni hta nga ai, ¹¹ Hpung sanit hpang de shagun dat u, nga nna nye a shingdu de hpahtau zawn ngoi ai nsen kaba ngai na nngai.

NOVEMBER 25–​DECEMBER 1

Wenyi Sut Gan Ni Hpe Sawk Sagawn Ai Lam

(Shingran 4:4) Dai tingnyang grup yin e tingnyang hkun mali naw nga nga ai; dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai.

(Shingran 4:6) Bai, dai tingnyang man e, pat seng nsan ai nawng ing nga ai; dai tingnyang a kata e mung, grup yin e mung, shingdu aman grup ting myi tu ai dusat amyu mali nga nga ma ai.

re 76-77 ¶8

Yehowa A Sumsing Lamu Tingnyang A Hkik Hkam Ai Lam

⁸ Moi na nawku sum hta magam gun na matu, hkinjawng agyi ni hpe aya tang da ai lam Yaw­han chye ai. Dai majaw, shi bai mu wa ai lam ni a majaw mau mat na re. Shi ndai hku tsun ai: “Dai tingnyang grup yin e tingnyang hkun mali naw nga nga ai; dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai.” (Shingran 4:4) Re ai. Hkinjawng agyi ni a malai, salang 24 gaw hkawhkam ni zawn, ja janmau hpe gup let hkaw dung nga ai. Ndai salang ni gaw kadai ni kun? Bai hkrung rawt nna Yehowa a ga sadi hte maren, sumsing lamu a­hkang aya hpe lu da ai, Hkristan nawku hpung kaw na namman chya hkrum ai ni hta lai nna, kaga ni gaw n mai byin ai. Anhte gara hku chye lu ai kun?

re 80 ¶19

Yehowa A Sumsing Lamu Tingnyang A Hkik Hkam Ai Lam

¹⁹ Ndai dusat ni gaw, hpa hpe ga shadawn tsun ai kun? Kaga myihtoi langai re ai Ezekela mu ai shingran gaw, mahtai lu na matu karum ya ai. Ezekela gaw, Yawhan tsun ai laklai ai hkrang nsam hte bung ai nsam lawm ai dusat ni hte shing grup let, sumsing lamu wanleng ntsa dung nga ai Yehowa hpe mu ai. (Ezk 1:​5-11, 22-28) Hpang hta Ezekela gaw, dusat ni shing grup nga ai dai wanleng hpe bai mu wa ai. Raitim, ndai kalang gaw dai dusat ni hpe hkerub ni ngu nna shi tsun ai. (Ezk 10:​9-15) Yawhan mu ai dai dusat mali gaw, Karai Kasang a law la ai hkerub ni​—wenyi uhpung uhpawng a madang tsaw ahkaw ahkang nga ai dusat ni​—hpe malai tsun ai rai na re. Hkerub ni gaw Yehowa a makau hta ndai da­ram ni htep let nga ai hpe Yawhan mu lu ai shaloi, mau na n re. Hpa majaw nga yang, moi na nawku sum lamang hta, Yehowa a tingnyang hpe malai tawn ai ga shaka sumpu magap ntsa hta ja hkerub lahkawng hpe madun da ai. Yehowa a nsen gaw, dai hkerub lahkawng a lapran kaw nna, Israela amyu ni hpe hkang da ai tara ni shapraw ya ai.​—Pru 25:22; Shk 80:1.

(Shingran 5:5) Dai rai nna, salang ni hta na langai mi gaw, Hkum hkrap et; yu u, Yuda amyu hta na hkanghkyi ngu ai Dawi a aru madung gaw, dai laika hte de a dazik sanit hpe hpaw lu hkra dang kau nu ai, nga nna ngai hpe tsun dan nngai.

cf 36 ¶5-6

“Yu U, Yuda Amyu Hta Na Hkanghkyi”

⁵ Hkanghkyi hpe nden marai hte shingdaw nna tsun tsun re ai. Nang gaw, asak ram sai hkang­hkyi ala langai a shawng hta tsap ga ai kun? Tsap ga yang gaw, dusat lawng hta na hkang­hkyi shawng hta rai na re. Dai rai yang pyi, nang grai hkrit wa na re. Hkum kaba nna n-gun grai ja ai dai dusat hpe nang yu dat ai hte shi mung nang hpe bai yu nga na re. Hkanghkyi gaw hkrit nna hprawng chye ai dusat n re. Chyum Laika hta “dusat yawng hta n-gun grau ja nna, Kadai hpe n yen ai, hkanghkyi” ngu nna tsun da ai. (Gsh 30:30) Hkristu a nden marai mung dai zawn sha re.

⁶ Yesu gaw hkanghkyi zawn nden marai hpe lam masum hku nna madun wa ai lam bawngban mat ga. Dai lam masum hta, teng man ai lam hta tsap ai shaloi, tara rap ra ai hpe madi shadaw ai shaloi, ninghkap ai lam hpe hparan ai sha­loi nden marai hpe madun wa ai. Anhte yawng mung shangai ai kaw nna nden marai nga tim, n nga tim Yesu hpe kasi la nna, nden marai madun lu ai lam hpe mu lu na re.

Chyum Hti Lamang

(Shingran 4:​1-11) Dai hte byin ngut jang, ngai mu nngai, gaw, yu u, sumsing lamu e chying­hka hpaw malang nga ai rai nna, ngai na hkrup ai shawng na nsen gaw, hpahtau zawn ngoi nga ai hte, Nang de lung rit, htawm hpang e byin na ra ai lam hte hpe ngai nang hpe madun dan de ga, nga nna ngai hte ga tsun nga ai. ² Dai hte tsun ngut ai shaloi jang, wenyi hta ngai nawng mat wa nngai; shaloi, yu u, sumsing lamu hta e tingnyang dung nga ai rai nna, dai tingnyang hta marai langai mi dung nga ai. ³ Dung nga ai wa a ahpraw asam gaw, nagahtoi hte patemya lung seng zawn san nga ai rai nna, dai tingnyang grup yin e gaw, mya lung seng nsan ai n-goilatum jung nga ai. ⁴ Dai tingnyang grup yin e tingnyang hkun mali naw nga nga ai; dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai. ⁵ Dai tingnyang kaw na myi hprap gala ai, mahku ngoi ai nsen hte mu ngoi ai gaw, pru nga ai. Dai tingnyang a man e mung, Karai Kasang a wenyi sanit ngu ai, wan pyengdin sanit tu nga ai: ⁶ bai, dai tingnyang man e, pat seng nsan ai nawng ing nga ai; dai tingnyang a kata e mung, grup yin e mung, shingdu aman grup ting myi tu ai dusat amyu mali nga nga ma ai. ⁷ La­ngai ngu na dusat amyu gaw, hkanghkyi hte bung nga ai; la­hkawng ngu na dusat amyu gaw, dumsu kasha hte bung nga ai; masum ngu na dusat amyu gaw, shinggyim masha a myi man man nga ai; mali ngu na dusat amyu gaw, pyen nga ai langda hte bung nga ai. ⁸ Dai dusat amyu mali gaw singkaw kru hpra hpra tu nna, hkum grup e mung, kata e mung, myi hkrai pri rai nga ai: shanhte gaw shani shana n sim n sa, ning nga, Moi na aprat e, ya na aprat e, htawm hpang na aprat e dinggrin a nga nga ai, Chyahtum chyalai n-gun rawng ai Madu Karai Kasang gaw, chyoi pra, chyoi pra, chyoi pra a rai nga ai law, nga nna tsun nga ma ai. ⁹ Dai dusat amyu mali gaw, tingnyang hta dung ai htani htana prat dingsa a hkrung nga ai wa kaw, hpung shingkang, a­rawng sadang hte chyeju jaw ma ai shaloi e, ¹⁰ dai salang hkun mali mung, tingnyang hta dung nga ai wa a man e dingnyawm nna, htani htana prat dingsa a hkrung nga ai wa hpe naw ku let, dai tingnyang man e tinang ni a ja jan­mau ni hpe raw tawn da nna, ¹¹ Anhte a Madu Karai Kasang e, nga yawng nga pra hte hpe nang hpan tawn da nna, dai hte gaw na a myit ra ai hku jaw e tai ma ai hte hpan tawn da hkrum ma ai majaw, nang gaw hpung shingkang, arawng sadang hte hpung dagu lu la na ging dan nga ndai law, nga nna shakawn na ma ai.