HKAJA 13

Tatut Akyu Lu Ai Hpe Tsun Dan U

Ga Shagawp 3:21

KADUN DAWK: Nang tsun ai lam gaw, prat hta gara hku akyu jaw ai lam, sharin la wa ai hpe gara hku tatut hkan sa lu na lam, madat nga ai ni chye na hkra karum ya u.

GALAW MAI AI LAM:

Madat nga ai ni a lam myit yu u. Nang tsun dan ai lam hpe, madat nga ai ni hpa majaw madat ra ai, shanhte hpe hpa gaw tatut karum ya lu na hpe myit yu u.
Nang hkaw tsun ai shaloi, madat nga ai ni hpa galaw ra na lam madun u. Tsun hpang ai aten kaw nna, madat nga ai ni langai hpra gaw, ‘ndai lam gaw ngai hpe karum ya na re’ ngu nna hkam la wa hkra shadut ya u. Madung lam langai hpra hpe tsun ai shaloi, dai hpe gara hku tatut hkan sa lu na lam tsun dan u. N dan n leng tsun ai hpe koi u.

Chyum Laika npawt tara ni a tatut akyu hpe tsun dan ai shaloi, tsawra myit hte myit tau ya ai lam madun u. Shanhte hpe mara shagun nna lit shali ya na malai, shanhte a tsawra myit hte makam masham hpe shangang ya nna, shanhte a myit masin gaw, jaw ai hpe sha galaw na hpe kam ai lam madun u.