Hkristan Prat Hte Magam Zuphpawng Shaman Laika Buk A Matu Lakap Da Ai Lam Ni

JANUARY 6-12

Wenyi Sut Gan Ni Hpe Sawk Sagawn Ai Lam

(Ningpawt 1:1) Shawng ningpawt e Karai Kasang gaw sumsing lamu hte ginding aga hpe hpan da wu ai.

w15 6/1 5

Hpungtang Hpaji Gaw Na A Prat Hpe Akyu Jaw

Ninggawn Tawa Hte Ginding Aga Nga Wa Ai Shaning

Ginding aga nga ai aten gaw, shaning wan hkying 4 daram rai nna, ninggawn tawa nga ai aten gaw wan hkying 13, 14 daram rai sai ngu nna, hpungtang hpaji du ni sawn maram ma ai. Ninggawn tawa hpe hpan ai nhtoi hpe, Chyum Laika hta tup hkrak n tsun da ai. Dai majaw, ginding aga nga ai aten gaw shaning hkying hku sha rai shi ai, ngu nna gaw n mai tsun ai. Chyum Laika a shawng nnan na Chyum daw hta: “Shawng ningpawt e Karai Kasang gaw sumsing lamu hte ginding aga hpe hpan da wu ai” ngu nna hti lu ai. (Ningpawt 1:1) Dai hku tsun da ai majaw, hpungtang hpaji du ni hku nna tup hkrak re ai hpungtang hpaji npawt tara lam ni hte maren, ginding aga nga wa ai shaning ni hpe lu sawn yu wa ai.

(Ningpawt 1:26) Bai Karai Kasang gaw, Anhte gaw, anhte a hkrang sumla hte anhte a asam hte bung ai, shinggyim masha hpan ga: shanhte gaw, nammukdara hta rawng ai nga ni a ntsa e mung, lamu kata na ntsa malen e pyen ai u ni a ntsa e mung, yam nga ni a ntsa e mung, ga ting a ntsa e mung, ga ntsa e gumrawt hkawm ai baw mahkra a ntsa e mung up nga mu ga, nga ai.

it-2-E 52

Yesu Hkristu

Hpan Madu N Re. Hpan da ai bungli hta Yesu shang lawm ai majaw, Hpan Madu byin mat ai n re. Hpan lu ai atsam gaw, Karai Kasang a shamu shamawt ai n-gun atsam (sh) chyoi pra ai wenyi kaw nna lu wa ai re. (Nin 1:2; Shk 33:6) Yehowa gaw asak yawng a Npawt rai nna, hkrung mahkrung yawng, myi hte mu lu ai, n mu lu ai ni yawng a asak ni hpe madu ai. (Shk 36:9) Yesu gaw, Hpan Madu n re ai sha Kasha hku nna, Hpan Madu Yehowa a bungli ni hta galaw karum ya ai (sh) shingdep shingtau hku nna madi shadaw ya ai sha re. Chyum Laika hta tsun da ai hte maren, Karai Kasang gaw Hpan Madu re ai lam, Yesu nan mung shakawn shagrau wa ai.​—Mat 19:4-6.

Chyum Hti Lamang

(Ningpawt 1:1-19) Shawng ningpawt e Karai Kasang gaw sumsing lamu hte ginding aga hpe hpan da wu ai. ² Ginding aga chyawm gaw akrin ayang re ai hte asan awan rai nga ai; nsin mung sung ai shara e sin up nga ai rai nna, Karai Kasang a Wenyi gaw hka hpung ni a ntsa e a hpum nga ai. ³ Shaloi Karai Kasang gaw, Ahtoi tai wa u ga, ngu wu ai rai nna, ahtoi tai wa ai. ⁴ Dai ahtoi kaja nga ai gaw Karai Kasang mu wu ai: shaloi Karai Kasang gaw ahtoi hte nsin hpe karan jahka wu ai. ⁵ Karai Kasang gaw dai ahtoi hpe, Shani, dai nsin hpe, Shana, ngu nna, shamying wu ai. Shaloi shana hte jahpawt gaw, nhtoi langai ngu na hta tai ma ai. ⁶ Bai Karai Kasang gaw, Hka hpungnung a kaang e lamu madin din nna, hka hte hka karan u ga, nga ai. ⁷ Shaloi Karai Kasang gaw dai lamu madin galaw wu ai rai nna, lamu madin a kata e nga ai hka hte lamu madin ntsa e nga ai hka hpe karan da wu ai: dai mung shing rai nga ai. ⁸ Karai Kasang gaw dai lamu madin hpe, Sumsing lamu, ngu nna shamying wu ai. Shaloi shana hte jahpawt gaw, ni ni nhtoi hta tai ma ai. ⁹ Bai Karai Kasang gaw, Lamu kata e nga ai hka hpung ni, shara mi hta shinggyin hpawng nga nna hkarang ga dawng pru u ga, nga ai: dai mung shing rai nga ai. ¹⁰ Karai Kasang gaw dai hkarang hpe, Aga, shinggyin hpawng nga ai hka hpung ni hpe, Nammukdara, ngu nna shamying wu ai: dai kaja nga ai gaw Karai Kasang mu wu ai: ¹¹ Shaloi Karai Kasang gaw, Aga gaw, tsingdu tsingman hpe mung, nsi naisi li rawng ai nai mam chyakai hpe mung, ga ntsa e tinang nang a nli rawng ai hte tinang amyu a asi si ai namsi namsaw hpun hpe mung shatut u ga, nga ai: dai mung shing rai nga ai. ¹² Shaloi dai aga gaw, tsingdu tsingman hpe mung, tinang amyu hta nli rawng ai nai mam chyakai hpe mung, tinang amyu hta nli rawng nna si si chye ai hpun hpe mung shatut wu ai: dai kaja nga ai gaw Karai Kasang mu wu ai. ¹³ Shaloi shana hte jahpawt gaw masum ya nhtoi hta tai ma ai. ¹⁴ Bai Karai Kasang gaw, Shani hte shana hpe karan ginhka na matu, sumsing lamu a madin hta e ahtoi hkum tai nga mu ga; dai ni gaw kumla tai na matu mung, duhkra ladaw a matu mung, shani ninghtoi hte shaning ninghtoi a ladaw langa matu mung, tai nga mu ga; ¹⁵ ginding aga ntsa e htoi ya nga na matu, dai ni gaw sumsing lamu a madin hta e ahtoi hkum tai nga mu ga, nga ai: dai mung shing rai nga ai. ¹⁶ Shing rai Karai Kasang gaw, dai ahtoi hkum kaba lahkawng galaw wu ai: ahtoi hkum kaba gaw shani hpe up na matu, ahtoi hkum kaji gaw shana hpe up na matu rai nga ai. ¹⁷ Shagan ni hpe mung shi galaw wu ai. Ga ningtsa e htoi ya nga na matu mung, shani hte shana hpe up nga na matu mung, ahtoi hte nsin hpe karan ginhka na matu mung, ¹⁸ Karai Kasang gaw dai ni hpe sumsing lamu a madin hta e tawn da wu ai: dai kaja nga ai gaw Karai Kasang mu wu ai. ¹⁹ Shaloi shana hte jahpawt gaw mali ya nhtoi hta tai ma ai.

JANUARY 13-19

Wenyi Sut Gan Ni Hpe Sawk Sagawn Ai Lam

(Ningpawt 4:23, 24) Htubala Ka-in kajan gaw Nama rai lu ai. Ya Lamek gaw shi a madu jan yan hpe, Ada yan Zila e, nye a nsen madat mu, Lamek a num yan e, nye a ga matsing mu: Ngai hpe nsam dat ai majaw masha langai mi e, Ngai hpe n-gung hkang shakap ai majaw shabrang langai mi hpe, ngai sat kau lu se ai: ²⁴ Ka-in hpe shut ai wa, yubak matai htang sanit hkrum yang gaw, Gaja nan Lamek hpe shut ai wa gaw, yubak matai htang sanit shi sanit hkrum lu na ra ai, ngu nna tsun wu ai.

it-2-E 192 ¶5

Lamek

Lamek gaw, madu jan ni a matu ka wa ai ga shagawp hta, (Nin 4:23, 24) dai aten na nhkru nhkra ai lam ni hpe mu lu ai. Lamek gaw ndai hku ga shagawp da ai: “Ada hte Zila yan e, nye a ga madat mu; Shabrang langai mi ngai hpe gamai ai majaw ngai shi hpe sat kau ni ai. Ka-in hpe sat ai wa yubak matai htang sanit hkrum ai rai yang; Ngai hpe sat ai wa kadai rai ti mung, yubak matai htang sanit shi sanit hkrum lu na ra ai.” Lamek gaw, Ka-in zawn dingsang sang masha sat dat ai n re ai lam, tinang hkum tinang makawp maga ai hku nna tsun nga ai re. Shi hpe sa gamai nna sa sat ai wa hpe, tinang hkum tinang makawp maga ai hku nna sat hkrup ai ngu tsun ai re. Dai majaw, shi a ga shagawp gaw tinang hpe gasat ai wa hpe, bai sat kau hkrup ai kadai hpe mung, shalawt ya na matu lam langai rai wa ai.

(Ningpawt 4:26) Shet mung shadang sha langai mi lu wu ai rai nna, shi hpe Enusha, ngu nna shamying wu ai: dai prat kaw nna Yehowa a mying ningsang hpe nnan shaga hpang ma ai.

it-1-E 338 ¶2

Karai Kasang Hpe Jahpoi Asawng

Hka sha-u garai n ing shi ai aten, Enusha a prat kaw nna “Yehowa a mying ningsang hpe nnan shaga hpang ma ai.” Dai aten na masha ni gaw Karai Kasang a mying hpe dingman ai hku kaja ai myit jasat hte lang wa ai n re. Raitim, Abela chyawm gaw Yehowa a mying hpe dingman ai hku shaga wa ai gaw teng sha re. (Nin 4:26; Heb 11:4) Chyum hpaji du nkau mi gaw ndai hku tsun wa ai: Karai Kasang a mying hpe shut ai hku shaga ai, shinggyim masha ni a matu (sh) gawng-ngu sumla ni a matu Karai Kasang a mying hpe lang ai gaw n htap htuk ai. Dai gaw Karai Kasang hpe jahpoi asawng ai lailen re.

Chyum Hti Lamang

(Ningpawt 4:17–5:8) Bai Ka-in gaw shi a madu jan hte kanawn nna, shi gaw na-um nasin rai nhtawm Enuk hpe shangai wu ai: mare mung shi de wu ai rai nna, dai mare hpe, kasha a mying hku hkan nna Enuk ngu shamying wu ai. ¹⁸ Ya Enuk gaw kasha Irad hpe shaprat wu ai; Irad gaw Mahuyala hpe shaprat wu ai; Mahuyala gaw Mahtushaela hpe shaprat wu ai; Mahtushaela gaw Lamek hpe shaprat wu ai. ¹⁹ Lamek chyawm gaw num lahkawng la wu ai; langai mi a amying gaw Ada, langai mi a amying gaw Zila rai lu ai. ²⁰ Ada gaw Yabala hpe shangai wu ai: dai wa gaw janghpang sum hta nga nna, yam nga rem sha ai ni a kawa rai nga ai. ²¹ Shi kanau a mying gaw Yubala rai lu ai: dai wa gaw tingse hte sumpyi chye dum ai ni mahkra a kawa rai nga ai. ²² Zila mahtang gaw Htubala Ka-in hpe shangai wu ai: dai wa gaw, magri hte hpri arai dai ai baw amyu myu a ndup sama rai nga ai: ²³ Htubala Ka-in kajan gaw Nama rai lu ai. Ya Lamek gaw shi a madu jan yan hpe, Ada yan Zila e, nye a nsen madat mu, Lamek a num yan e, nye a ga matsing mu: Ngai hpe nsam dat ai majaw masha langai mi e, Ngai hpe n-gung hkang shakap ai majaw shabrang langai mi hpe, ngai sat kau lu se ai: ²⁴ Ka-in hpe shut ai wa, yubak matai htang sanit hkrum yang gaw, Gaja nan Lamek hpe shut ai wa gaw, yubak matai htang sanit shi sanit hkrum lu na ra ai, ngu nna tsun wu ai. ²⁵ Ya Adam gaw shi a madu jan hte bai kanawn wu yang, Ewa gaw shadang sha shangai nna, shi hpe Shet ngu nna shamying wu ai; kaning rai nme law, Ka-in sat kau ai Abela a malai, amyu matu langai mi Karai Kasang gaw ngai hpe tawn da ya ni ai, nga ai. ²⁶ Shet mung shadang sha langai mi lu wu ai rai nna, shi hpe Enusha, ngu nna shamying wu ai: dai prat kaw nna Yehowa a mying ningsang hpe nnan shaga hpang ma ai.

5 Ya ndai gaw Adam a labau lasang ni a lam rai nga ai. Karai Kasang gaw shinggyim masha hpe hpan tawn da ai nhtoi hta shi Karai Kasang a hkrang sumla hte maren shi hpe galaw wu ai; lasha hte numsha hpe hpan da wu ai. ² Dai yan hpe shi shaman ya nna, shan hpe hpan da ai nhtoi hta shinggyim masha ngu nna shamying wu ai. ³ Adam gaw latsa e sumshi ning rai sa yang, shi a hkumhkrang hte shi a asam hte bung ai shadang sha shaprat wu ai. ⁴ Shet hpe shaprat wu ai hpang, Adam a nhtoi gaw matsat tsa ning rai lu ai: shadang sha hte shayi sha hte hpe shi shaprat da wu ai. ⁵ Dai ra nna Adam hkrung nga ai nhtoi mahkra hte gaw, jahku tsa e sumshi ning rai lu ai: shaloi shi si mat ai. ⁶ Shet gaw latsa e manga ning du jang, Enusha hpe shaprat wu ai. ⁷ Enusha hpe shaprat wu ai hpang, Shet gaw matsat tsa e sanit ning naw hkrung nga nna, shadang sha hte shayi sha hte shaprat da wu ai. ⁸ Shet a nhtoi mahkra hte gaw jahku tsa e shi lahkawng ning rai lu ai: shaloi shi si mat ai.

JANUARY 20-26

Wenyi Sut Gan Ni Hpe Sawk Sagawn Ai Lam

(Ningpawt 7:2) Ga ningtsa e nli tai nga na matu, seng ai ashu ashan amyu shagu hta na ayi ala sanit nit; n seng ai ashu ashan hta na gaw ayi ala lahkawng hkawng:

w04 1/1 29 ¶7

Ningpawt Ninghpang Laika Kaw Na Dan Dawng Ai Lam Ni​—I

7:2​—San seng ai dusat hte n san seng ai dusat ngu ai hpe, gara kaw madung nna ginhka wa ai kun? Gara dusat gaw sha mai ai, n sha mai ai ngu ai hta madung ai n re. De a malai, nawku dawjau ai lam hta shagu hkungga hku nna lang mai ai n lang mai ai ngu ai hta sha madung wa ai. Hka sha-u garai n ing shi yang gaw, dusat ni a shan hpe masha ni n sha ai. Mawshe a Tara nga wa ai aten hta she, sha na matu “san seng” ai “n san seng ai” hpe masat wa ai. Dai tara yen kau hkrum ai shaloi, dai masat da ai lam gaw n nga mat sai. (Kasa 10:9-16; Ehpesu 2:15) Yehowa hpe nawku dawjau ai shaloi, gara shagu hkungga gaw htap htuk ai hpe Noa chye da ai zawn re. Noa gaw, sanghpaw li kaw na pru wa ai shaloi, “Yehowa a matu tawn hkungri galaw nhtawm seng ai yam nga amyu shagu hta na hte seng ai u amyu shagu hta na lata la nna dai tawn hkungri ntsa e wan nat hkungga nawng wu ai.”​—Ningpawt 8:20.

(Ningpawt 7:11) Noa a asak kru tsa du ai shaning, shata lahkawng hta, dai shata shi sanit ya nhtoi hta e nan, ja ja sung ai hka htung hka hku ni kapaw pru wa ai hte, sumsing lamu na hkuwawt hku ni hpaw malang mat wa ai rai nna,

w04 1/1 29 ¶8

Ningpawt Ninghpang Laika Kaw Na Dan Dawng Ai Lam Ni​—I

7:11​—Mungkan ting hka sha-u ing ai shaloi na hka ni gaw gara kaw nna du wa ai kun? Hpan da ai nhtoi lahkawng ya shani hta lamu ga a “madin” hpe hpan dat ai. “Lamu madin a kata” hte “lamu madin ntsa” hta hka ni nga wa ai. (Ningpawt 1:6, 7) Ga “kata” hta hka ni nga da chyalu re. Lamu “ntsa” hta nga ai hka ni gaw, ‘kaba la ai hka hpawk ni’ hku nna hpawng chyawm taw nga ai. Dai hka ni gaw Noa aten hta mungkan ga de htu hkrat wa ai.

Chyum Hti Lamang

(Ningpawt 6:1-16) Ya ga ningtsa masha ni, law htam wa ma ai hte, shayi sha shaprat ya nga ma ai shaloi ² Karai Kasang a shadang sha ni gaw shinggyim masha ni a shayi sha ni tsawm htap nga ma ai hpe mu mu ai rai nna, tinang ra ai hte maren num lata la ma ai. ³ Yehowa chyawm gaw, Shinggyim masha ni, lam dam ai gaw, hkum shan sha rai nga ma ai majaw, nye a Wenyi shanhte hpe tut tut a daru nga na n rai: dai rai nna shi a asak gaw latsa e hkun ning sha rai na rai nga ai. ⁴ Dai aprat e Nehpelim ngu ai ni ga ningtsa e nga nga ma ai; Karai Kasang a shadang sha ni shinggyim masha ni a shayi sha ni hte nga nna, kashu kasha shaprat ya mu ai hpang e mung, dai ni gaw naw nga nga ma ai: shanhte gaw moi nna n-gun nsam kaba ai hte kajai gumhkawng ai ni rai nga ma ai. ⁵ Shinggyim masha ni a n hkru n hkra ai lam ga ningtsa e kaba la ai hte, shi a kraw lawang na myit maw mamaw gaw tut tut n shawp nga ai hpe Yehowa mu wu ai. ⁶ Dai majaw Yehowa gaw shinggyim masha ni e ga ningtsa e hpan tawn da ai hpe myit malai lu nna, shi a kraw lawang e yawn nga ai. ⁷ Dai rai nna Yehowa gaw, Ngai hpan tawn da ai shinggyim masha hpe ga ningtsa na atsai awai ngai di kau na we ai: masha kaw nna yam nga, gumrawt hkawm ai baw hte ntsa malen pyen ai u ni hpe du hkra shatsai kau na we ai: kaning rai nme law, dai ni hpe ngai hpan da we ai majaw myit malai lu nngai, nga ai. ⁸ Noa chyawm gaw Yehowa a man e myi man pa nga ai. ⁹ Ndai gaw Noa a maumawi lam rai nga ai: Noa gaw ding hpring ai hte, dai aprat na ni hta hkum tsup ai wa rai nga ai: Noa gaw Karai Kasang hte rau a hkawm a sa nga ai. ¹⁰ Noa gaw shadang sha masum shaprat wu ai: dai ni gaw, Shem, Ham, Yahpet hte rai ma ai. ¹¹ Ya, dai aga gaw Karai Kasang a man e n ding n man ai rai nga ai; dinghta ga gaw kashun kashe re ai hte hpring chyat nga ai. ¹² Shaloi Karai Kasang gaw dai aga hpe mada yu wu yang, yu u, dai gaw n ding n man rai nga ai: kaning rai nme law, dinghta hkum shan mahkra gaw, ga ningtsa e tinang lam hpe shabyak kau ai hkrai rai nga ai. ¹³ Shaloi Karai Kasang Noa hpe tsun wu ai gaw, Dinghta hkum shan yawng mayawng a chyahtum gaw nye a man e pru ra ai; kaning rai nme law, dai ni a majaw dinghta ga gaw kashun kashe re ai hte hpring chyat nga ai: dai rai nna, yu u, ga hte nawng, ngai shanhte hpe jahten kau na ma we ai. ¹⁴ Na a matu guhpra hpun hte shanghpaw li shachyaw u: dai shanghpaw li a kata e gawk kaji nang karan da na rai ndai; de a kata maga hte shinggan maga de mung, hpun naw nang chya na rai ndai. ¹⁵ Nang galaw na kasi gaw ning rai nga ai: dai shanghpaw li a galu maga dawng masum tsa, nda de dawng manga shi, tsaw de dawng sumshi rai na rai nga ai. ¹⁶ Dai shanghpaw li hta nhtoi shang na hku nang galaw nna, ntsa de na dawng mi jahka na hte magap shangut na rai nga ai: shanghpaw li a nhkrem maga de mung, chyinghka langai mi nang waw na rai ndai: kata tsang mi, lapran tsang mi, ntsa tsang mi di nna nang galaw na rai ndai.

JANUARY 27–FEBRUARY 2

Wenyi Sut Gan Ni Hpe Sawk Sagawn Ai Lam

(Ningpawt 9:20-22) Ya Noa gaw sun hkauna amu galaw sha ai rai nna, tsabyi sun hkai wu ai: dai tsabyi jahku hpe mung shi lu wu ai rai nna nang nga ai; ²¹ shing rai shi a sum kata e hpun nba n hpun ai taw nga ai. ²² Shaloi Hkanan a kawa Ham gaw shi a kawa a singgu krin hpe mu jang, shinggan e nga ai kahpu yan kanau hpe sa tsun wu ai.

(Ningpawt 9:24, 25) Ya Noa tsabyi nang ai bran nna hprang yang, shi a kasha kaji shi hpe kaning di ai mung shi chye wu ai. ²⁵ Dai majaw Noa gaw, Hkanan gaw dagam dala hkrum u ga, Kahpu kanau ni a mayam ni kaw manam tai nu ga, nga ai.

it-1-E 1023 ¶4

Ham

Hkanan gaw, ndai mabyin hpe shi nan mu wa ai mai byin ai. Shi kawa Ham mung shi hpe shading sharai ya ai lam n galaw wa ai. Shing nrai, Noa gaw Karai Kasang kaw na myihtoi ga hpe tsun wa ai rai na re. Ham a n kaja ai masa hpe tau hkrau chye nna, shi a kasha Hkanan hta mung dan dawng nga ai. Dai gaw Hkanan a aru arat ni hta sali wunli byin wa ai. Dai dagam ai ga gaw, Hkanan amyu ni hpe, Shem kaw na yu hkrat wa ai Israela masha ni gasat awng dang la ai shaloi hta mung hpring tsup wa ai. Hkanan amyu kaw na n jahten hkrum ai ni hpe Israela ni a mayam shatai la wa ai (ga shadawn, Gibeon masha ni [Ysh 9]). Tsaban shaning law law na ai hpang, Yahpet kaw na yu hkrat wa ai ni gaw, mungkan hta n-gun ja htum uphkang lam ni byin wa ai. Medi-Persi, Greece hte Roma ni hku nna, Ham a kasha Hkanan a aru arat ni hpe uphkang ai shaloi, dai dagam ai ga gaw grau nna hpring tsup wa ai.

(Ningpawt 10:9, 10) Yehowa a man e mung shi gaw jaugawng kaba rai nga ai rai nna, Nimrod zawn re ai Yehowa a man na jaugawng kaba wa, nga nna ga malai tsun ma ai. ¹⁰ Shi a mungdan a npawt gaw, Shina mung Babela, Erek, Ahkada, Hkalna ginwang ni rai lu ai.

it-2-E 503

Nimrod

Nimrod a mungdan gawde hpang ai shaloi, Shina mung na Babela, Erek, Ahkada, Hkalna ginwang ni lawm ai. (Nin 10:10) Dai majaw, Babela hte de a wahpang langchyi hpe gawgap ai shaloi shi woi awn matsun ai hte maren galaw ai rai na re. Yuda htung lailen ni mung, dai lam jaw ai hpe madi madun nga ai. Josihpat ndai hku ka wa ai: “Nimrod gaw nhkru ai uphkang du hku nna angwi ngwi uphkang wa ai. Karai Kasang hpe hkrit hkungga ai masha ni shi hpe sha matut kamhpa hkra galaw ai hku nna, Karai hte tsan gang mat hkra galaw na ngu myit wa ai. Lama na Karai Kasang gaw ginding aga hpe kalang bai hka sha-u ing wa yang, hka n lu du ai grai tsaw ai wahpang hpe gawgap nna, shi a jiwoi jiwa ni jahten kau hkrum ai lam hpe matai htang na matu, jahkrit shama wa ai. Karai a ga madat ai gaw mayam tai ai re ngu hkam la wa ma ai. Dai majaw, mung masha ni mung [Nimrod] a lam matsun hpe myit rawt let hkan sa ai. Shanhte gaw langchyi hpe gawgap wa ai. . . . shanhte sawn da ai hta grau lawan ai hku galaw lu wa ai.”​—Jewish Antiquities, 1, 114, 115 (4, 2, 3).

Chyum Hti Lamang

(Ningpawt 10:6-32) Ham a shadang sha ni gaw, Hkusha, Mizra-im, Hput, Hkanan hte rai ma ai. ⁷ Hkusha a shadang sha ni gaw, Seba, Hawila, Saphta, Rama, Sabhtahka hte rai ma ai. Rama a shadang sha gaw Sheba yan Dedan rai ma ai. ⁸ Hkusha gaw Nimrod hpe mung shaprat wu ai; dai wa gaw ga ningtsa e kaba hpang ai wa rai nga ai; ⁹ Yehowa a man e mung shi gaw jaugawng kaba rai nga ai rai nna, Nimrod zawn re ai Yehowa a man na jaugawng kaba wa, nga nna ga malai tsun ma ai. ¹⁰ Shi a mungdan a npawt gaw, Shina mung na Babela, Erek, Ahkada, Hkalna ginwang ni rai lu ai. ¹¹ Dai mung nna Ashuri mung de shi sa nna, Ninewe mare, Rehubut mare, Hkala mare hpe mung, ¹² Ninewe hte Hkala lapran e Resen mare hpe mung de wu ai: Resen mare gaw mare kaba rai nga ai. ¹³ Mizra-im gaw, Ludim, Anamim, Lehabim, Naphtuhim, Hpahtrusim, Hkasluhim, Hkaphturim amyu ni hpe shaprat wu ai: ¹⁴ Hpeliste masha ni gaw Hkasluhim amyu hta na rai ma ai. ¹⁵ Hkanan gaw shi a kasha alat Sidon hte Het, ¹⁶ Yebusi, Amuri, Girgashi, ¹⁷ Hiwi, Arki, Sini, ¹⁸ Arwadi, Zimari, Hamahti amyu ni hpe shaprat wu ai: dai hpang e Hkanan a amyu lakung ni gaw, langai hte langai ran mat wa ma ai. ¹⁹ Hkanan masha ni a lamu ga jarit chyawm gaw, Sidon mare kaw nna Gerara hku hprang, Gaza mare du hkra; bai Sodom, Gomora, Adma hte Zebuim mare ni hku hkrawn rai nna Lasha mare du hkra rai nga ma lu ai. ²⁰ Dai ni gaw lakung lama kaga ga, shaga ai ga kaga ga, mungdan ni kaga ga hte amyu baw ni kaga ga re ai, Ham a kashu kasha ni rai nga ma ai. ²¹ Yahpet a kahpu kaba, Ebera masha ni mahkra a kawa Shem mung kashu kasha shaprat wu ai. ²² Shem a shadang sha ni gaw, Elam, Ashura, Arhpaza, Luda, Aram hte rai ma ai. ²³ Aram a shadang sha ni gaw, Uza, Hula, Gehta, Masha hte rai ma ai. ²⁴ Arhpaza mung Shela hpe shaprat wu ai; Shela gaw Ebera hpe shaprat wu ai. ²⁵ Ebera mung shadang sha lahkawng shaprat wu ai: langai wa a amying gaw Hpelek rai lu ai: kaning rai nme law, dai wa a prat e lamu ga hpe karan la ma ai; kanau wa a mying gaw Yoktan rai lu ai. ²⁶ Yoktan gaw, Almoda, Shalep, Hazarmawet, Yarak, ²⁷ Hadoram, Uzala, Dikla, ²⁸ Ubala, Abimela, Sheba, ²⁹ Uhpira, Hawila, Yoba hte hpe shaprat wu ai: ndai hte mahkra gaw Yoktan a shadang sha ni rai ma ai. ³⁰ Shanhte a lamu ga gaw, Mesha mare kaw nna, sinpraw maga de Sahpara bum du hkra rai ma lu ai. ³¹ Dai ni gaw lakung lama kaga ga, shaga ai ga kaga ga, mungdan ni kaga ga, amyu baw ni kaga ga re ai Shem a kashu kasha ni rai nga ma ai. ³² Ndai hte gaw Noa a shadang sha ni hta na, tinang a lakung lama hkan nna, langai hte langai hkrat wa ai amyu baw ni a lam rai nga ai: dai shau ing ai hpang shanhte hta nna ga ningtsa e masha amyu ni bran wa ma ai.