Prat Hte Magam Zuphpawng Shaman Laika Buk A Matu Lakap Da Ai Lam Ni

MARCH 1-7

KARAI A MUNGGA KAW NA SUT GAN NI | BU HKAWM 7-8

“Israela Ni A Dap Dabang Kaw Na Sharin La Lu”

it-1-E 497 ¶3

Zuphpawng Ai

Israela ningbaw ni gaw, masha yawng a matu lit la galaw ya ra ai. (Ezr 10:14) Dai majaw sumpan sum hpe gap ngut ai hpang, “amyu langai hte langai a du ni” woi awn galaw ya wa ai. (Bhk 7:1-11) Dai hta n-ga, Nehemia a prat hta “ga shaka” hta dazik shakap ai ni gaw, Lewi masha ni, hkinjawng ni hte “du salang ni” re. (Neh 9:38–10:27) Israela ni nam mali hta bu hkawm nga ai laman, Arun hte Mawshe hpe gumlau ai Kora, Dahtan, Abira hte Ona ni hte pawng wa ai masha marai 250 kaw, “shawa hpung hta arawng sadang lu ai hte, dai hpung hta lawm ai, hpung agyi ngu na, lsraela kashu kasha” ni lawm ai. (Bhk 16:1-3) Mawshe gaw “ndai amyu a lit” hpe shi hkrai n dang wa ai majaw, shi hpe karum na matu agyi salang 70 hpe lata ai shaloi, Yehowa a lam matsun ni hte maren, Israela ningbaw ni kaw na lata wa ai. (Bhk 11:16, 17, 24, 25) Jaw Jau 4:15 hta “shawa hpung na agyi salang ni” ngu tsun da ai. Shanhte gaw amyu lakung ni a ningbaw ni, agyi salang ni, tara agyi ni hte ningtau ningbaw ni rai na re.​—Bhk 1:4, 16; Ysh 23:2; 24:1.

it-2-E 796 ¶1

Rubin

Israela ni dap jahkrat ai shaloi Rubin a dinghku ni gaw, Simun, Gad dinghku ni hte rau sumpan sum a dingda maga de ang ai. Dap hpe zing nna pru hkawm ai shaloi, Rubin woi awn ai amyu lakung masum gaw, Yuda, Yishahka, Zebulun lakung ni pru ai hpang she hkan pru ai. (Bhk 2:10-16; 10:14-20) Sumpan sum hpe apnawng ai shani hta, jaw ai alu rai ni hpe mung, dai lamang hte maren jaw ai.​—Bhk 7:1, 2, 10-47.

w04-BU 8/1 25 ¶1

Bu Hkawm Laika Kaw Na Dan Dawng Ai Lam Ni

8:25, 26. Lewi masha ni a bungli ni hpe htuk ai hku galaw lu na matu, asak hpe myit tau ya ai hku nna asak kaba sai la ni gaw, shanhte a lit kaw nna hkring na matu matsun hkrum ai. Raitim, shanhte gaw kaga Lewi masha ni hpe shawang myit hte karum ya mai ai. Dai ni aten na Karai a Mungdan shiga hpe hkaw tsun ai marai langai a matu, hkring sa lu sai ngu ai lam n nga ai raitim, ndai jep ai tara a npawt tara gaw, grai manu dan ai lam langai hpe sharin ya ai. Hkristan langai gaw, asak grai kaba wa ai majaw, lit langai ngai hpe tup hkrak n lu gun mat tim, tinang dang lu ai lit hpe galaw mai ai.

Wenyi Sut Gan Ni

it-1-E 835

Kasha Alat, Dusat Alat

Israela amyu hta, kasha alat ni gaw kun dinghku ni a ningbaw tai wa ai zawn, amyu ting a malai hku nna mung ahkaw ahkang lu da ai. Yehowa gaw, Abraham ga shaka hta, shawng nnan na amyu masha re ai Israela ni hpe kasha “alat” ngu nna tsun wa ai. (Pru 4:22) Kasha alat ni a asak hpe Yehowa hkye la wa ai majaw, “lsraela kashu kasha ni hta na, shinggyim masha rai ti mung, yam nga rai ti mung, shawng hkrat ai kasha alat nlang hte hpe nye a matu shachyoi shapra da mu; dai gaw nye a rai li ai” ngu tsun wa ai. (Pru 13:2) Dai majaw, kasha alat ni gaw Karai Kasang laksan madu ai ni re.

MARCH 8-14

KARAI A MUNGGA KAW NA SUT GAN NI | BU HKAWM 9-10

“Yehowa Gaw Shi A Masha Ni Hpe Woi Awn Ai Lam”

it-1-E 398 ¶3

Dap Dabang

Shara mi kawn shami hta dap jung ai lam gaw, (shara 40 daram dap jung wa ai lam hpe Bu Hkawm 33 hta Mawshe tsun da) mau na zawn rai hkra, atsawm hpawng de da ai hpe mu lu ai. Sumpan sum a ntsa sumwi hkring nga jang, dai shara kaw sha nga ra ai. “Yehowa hkang dat ai hte maren lsraela kashu kasha ni hkawm sa wa ma ai; Yehowa hkang dat jang shanhte but de ma ai.” (Bhk 9:15-23) Yehowa matsun ai lam ni hpe, gumhpraw pahke lahkawng dum nna shana ya ai. (Bhk 10:2, 5, 6) Sumwi hpe shalun, jahkrat ai hku nna dap jung na, zing na hpe sadi jaw ai. ‘Lahkawng ning shaning [B.C. 1512], shata lahkawng a nhtoi hkun ya du ai shani hta’ shawng nnan lang sadi jaw ai. Dai shaloi, ga shaka sumpu hpe shawng hpai mat ai. Dai hpang, Yuda dap woi awn nna, Yishahka dap, Zebulun dap ni lawm ai amyu lakung masum pru ai. Shanhte a hpang, Gershon hte Merari a kashu kasha ni gaw, sumpan sum run la nna htaw pru ai. Dai hpang, Rubin dap woi awn nna, Simun dap, Gad dap ni lawm ai amyu lakung masum bai pru ai. Shanhte a hpang, Kohat a shadang sha ni gaw, chyoi pra ai gawk a arung arai ni hpe hpai pru ai. Dai hpang, Ehprim dap woi awn nna, Manashe dap, Ben-yamin dap lawm ai amyu lakung masum pru ai. Hpang jahtum, Dan dap woi awn nna Ashe dap, Naphtali dap ni gaw, dap yawng a jahtum hta hkan ai. Dai majaw, n-gun ja htum, atsam kaba htum dap lakung lahkawng gaw, shawng kaw langai hpang kaw langai nga nna, makawp maga ya ai.​—Bhk 10:11-28.

w11-BU 4/15 4-5

Karai Kasang Woi Awn Nga Ai Hpe Mu Ai I?

Karai Kasang woi awn ya ai hpe, gara hku chyeju dum na? Kasa Pawlu ndai hku tsun ai: “Nanhte a lam woi ningshawng ni a ga madat mara nna, shanhte a npu e taw nga mu.” (Heb 13:17) Loi na gaw n re. Ga shadawn, nang gaw Mawshe aten na Israela amyu masha langai re ngu myit yu u. Nhtoi law law lam hkawm ngut ai hpang, sumwi shadaw hkring mat ai. Dai shara kaw kade daram na na kun? Lani mi kun? Bat mi kun? Shata law law kun? ‘Rai ni hpe shaw ra na kun?’ ngu nna nang myit hkrup na re. Shawng nnan, ya hkyak hkyak lang ra ai rai ni hpe sha shaw na re. Raitim, nhtoi loi na ai hpang rai ni tam la ra ai hpe myit n galu ai majaw, yawng shaw kau ai. Rai ni shaw kau ngut yang she, sumwi bai lung mat ai majaw, nang gaw rai ni hpe bai zing bang la ra ai. Dai hku galaw na matu n loi ai. Raitim, Israela amyu masha ni gaw, kalang ta bu hkawm wa ai.​—Bhk 9:17-22.

Anhte mung Karai Kasang a lam matsun ni lu ai shaloi, gara hku bai htang ai? Kalang ta hkan sa ai kun? Tinang galaw nga ai hku sha, matut galaw nga ai kun? Chyum ga sharin galaw ai, kaga amyu ga shaga ai ni hpe hkaw tsun ai, dinghku nawku ayan galaw ai, tsi rung matut mahkai komiti ni hte rau jawm galaw ai, zuphpawng kaba ni hta htap htuk ai arawn alai madun ai, dai zawn re ai ni hte seng ai, hpang jahtum lam matsun ni hpe chye ai kun? Lam matsun ni hpe hkap la nna, Karai Kasang woi awn nga ai hpe chyeju dum ai lam madun mai ai. Ahkyak ai dawdan lam ni jahkrat ai shaloi, tinang a nyan hpe n kamhpa ai sha, Yehowa hte shi a uhpung a lam matsun ni hpe tam ai. Nbung laru ru ai aten, makawp maga hkrum na matu kanu kawa kaw gat sa mat ai ma langai zawn, anhte mung laru hte bung ai mungkan a manghkang ni hkrum ai shaloi, Yehowa a uhpung kaw makawp maga lam tam ai.

Wenyi Sut Gan Ni

it-1-E 199 ¶3

Zuphpawng Kaba

Zuphpawng A Ahkyak Ai Lam. Yehowa hte hku hkau lam nga na matu, shi lajang da ya ai zuphpawng kaba ni kaw nna, akyu hpring tup la na matu ahkyak ai hpe, shaning shagu galaw ai Shalai Wa Ai Poi ni hte seng ai lamang ni gaw madun nga ai. Marai langai gaw, san seng nga ninglen bu n hkawm ai, shalai wa ai hkungga n jaw ai nga yang, si dam jaw hkrum na re. (Bhk 9:9-14) Hkawhkam Hezekia gaw, Yuda hte Israela mung kaw na mung masha ni hpe, Yerusalem mare kaw Shalai Wa Ai Poi sa lung na matu saw shaga ai. Saw shaga laika hta ndai hku tsun da ai: “Isaraela kashu kasha ni e, . . . Karai Kasang Yehowa kayin wa u ga, nanhte mung shi hpang de myit kayin wa mu law. . . . Nanhte a nji nwa ni zawn du ja ai amyu hkum tai myit; Yehowa man e myit nem nna, shi a pawt sindawng kahtet ai myit gaw, nanhte kaw na lai mat wa u ga, shi prat dingsa e shi a matu shachyoi shapra da ai naw ku Htingnu de shang nna, nanhte a Karai Kasang Yehowa hpe daw jau mu. . . . Yehowa gaw myit galu kaba hte matsan dum nga ai majaw, nanhte shi hpang de kayin wa myit yang, shi a myi man nanhte kaw na kayin wa na, n rai.” (2Hl 30:6-9) Poi hpe dingsang n lung ai gaw, Karai Kasang hpe kau da ai hte bung ai. Shalai Wa Ai Poi ni zawn re ai poi ni hpe, Hkristan ni n galaw mat sai raitim, ayan na zuphpawng ai lamang ni hpe galaw na matu, n-gun jaw wa ai gaw htap htuk nga ai. “Tsaw ra ai myit rawng wa na hte kaja ai amu bungli byin wa na matu, shada shingjawng hkat lu hkra, langai hte langai myit tau myit htang nga ga: nkau mi wa htung nga ai zawn, anhte gaw tinang a zup hpawng ai lam hpe n koi n kau ai sha, shada da hpe shadum shahprang nga ga: dai nhtoi du magang ra ai hpe, nanhte chye myit dai majaw, shing rai shadum shahprang shara grau nna rai nga ai.”​—Heb 10:24, 25.

MARCH 15-21

KARAI A MUNGGA KAW NA SUT GAN NI | BU HKAWM 11-12

“Aput Angun Chye Ai Myit Jasat Hpe Hpa Majaw Koi Ra?”

w01-BU 6/15 17 ¶20

Madat La Nna Hkum Malap Kau

²⁰ Hkristan law malawng gaw, ngang akyang hten shangun ai lam ni hpe, galoi asum n jaw ai. Raitim, Karai a myiman hpe sum shangun chye ai, aput angun tsun ai lam ni hpe n galaw na matu sadi ra ai. Pawlu gaw ndai hku sadi jaw ai: “Shanhte nkau mi [Israela ni] dai Madu hpe chyam dinglik nna, lapu ni e kawa sharum ai zawn, anhte gaw dai Madu hpe n chyam dinglik ga. Shanhte nkau mi put ngun nna, jahten ai wa a lata e hten byak hkrum ma ai zawn, nanhte gaw put ngun hkum rai myit.” (1 Korinhtu 10:9, 10) Israela ni gaw, mauhpa lam hte lajang ya ai manna muk hte seng nna, Mawshe hte Arun hpe sha n-ga, Karai Kasang hpe mara shagun nna aput angun tsun wa ai. (Bu Hkawm 16:41; 21:5) Yehowa gaw shanhte a aput angun tsun ai lam hpe, hpye ai amu galaw ai mara daram n sawn la ai sha tawn da ai kun? Chyum Laika labau hpe bai yu yang, aput angun tsun ai masha law law gaw, lapu achye hkrum nna si mat ai lam tsun da ai. (Bu Hkawm 21:6) Shawng e mung, aput angun tsun nna gumlau ai majaw, marai 14,700 jan sat hkrum wa ai. (Bu Hkawn 16:49) Dai majaw, Yehowa lajang da ya ai lam ni hpe, n gawn n sawn galaw nna, shi a myit galu ai lam hpe n chyam dinglik ga.

w06-BU 7/15 15 ¶7

‘Aput Angun Tsun Ai Hpe Koi U’

⁷ Israela ni a myit jasat grai galai shai mat ai! Shawng nnan, Egutu mung kaw na shanhte lawt wa ai majaw, chyeju dum ai myit hte Yehowa hpe mahkawn shakawn wa ai. (Pru Mat 15:1-21) Raitim, nam mali hta atsawm n nga lu ai hte Hkanan masha ni hpe hkrit wa ai majaw, Karai hpe chyeju dum ai myit mat mat nna, aput angun tsun wa ai. Shang lawt lu ai majaw, Karai Kasang hpe chyeju dum na malai, shanhte atsawm n nga lu ai ngu sawn shut nna, Karai Kasang hpe mara shagun wa ai. Aput angun tsun ai gaw, Karai Kasang lajang da ya ai lam ni hpe, chyeju dum ai myit n nga ai hpe madun ai lam re. Dai majaw Yehowa gaw: “Ngai hpe aput apai nga ai, ndai n hkru ai shawa hpung hpe, galoi du hkra ngai sharang nga na rai ta?” ngu nna tsun wa ai gaw, mau hpa n re.​—Bu Hkawm 14:27; 21:5.

it-2-E 719 ¶4

Mara Tam Ai

Aput Angun Tsun Ai. Aput angun tsun ai gaw, myit daw nna n-gun yawm shangun ai. Israela ni gaw, Egutu mung hpe bai dum taw ai daram sha n re. Karai Kasang aya tang da ai Mawshe hte Arun a woi awn ai lam hpe mara tam nna, Yehowa hpe aput angun tsun wa ai. (Pru 16:2, 7) Hpang e, shanhte aput angun tsun ai lam a majaw, Mawshe si mayu ai du hkra myit daw wa ai. (Bhk 11:13-15) Aput angun tsun ai gaw, tsun ai wa hpe mung grai hkra machyi shangun ai. Mawshe hpe shanhte aput angun tsun nga ai raitim, Yehowa gaw shi a woi awn ai lam hpe aput angun tsun ai ngu sawn la ai. (Bhk 14:26-30) Mara tam aput angun tsun ai a majaw, masha law law asak sum wa ai.

Wenyi Sut Gan Ni

it-2-E 309

Manna

Hkrang Shapraw Ai Lam. Manna muk gaw “hpakgyi tum zawn rai nna ahpraw” htoi htoi nsam nga ai. Pale din hte bung nna, Bedela hpun naw zawn manam pyaw ai. Namchyim gaw “lagat jahku hte kayau ai muk pa zawn dwi” ai (sh) “sau hte kabaw ai muk zawn mu” ai ngu shingdaw da ai. Manna muk hpe htumrin hta rin ai (sh) kaihtum hta htu la nna, di hte shadu ai, muk tawng galaw ai, ka-kang mayu ai ni gaw ka-kang sha ai.​—Pru 16:23, 31; Bhk 11:7, 8, JCLB.

MARCH 22-28

KARAI A MUNGGA KAW NA SUT GAN NI | BU HKAWM 13-14

“Makam Masham Gaw Nden Marai Nga Shangun”

w06-BU 10/1 16-17 ¶5-6

Makam Masham Hte Karai Hpe Hkrit Hkungga Ai Gaw Nden Marai Lu

⁵ Kin-yu lahkawng re ai Yawshu hte Hkalep gaw, Ga Sadi Tawn Da Ai Mung de grai shang mayu nna, ndai hku tsun wa ai: “Dai mung na masha ni hpe mung hkum hkrit myit; shanhte gaw anhte a shat sha tai na ra ai: shanhte hta makawp maga n nga malu ai; anhte hpang de chyawm gaw Yehowa nga nga ai.” (Bu Hkawm 14:9) Yawshu hte Hkalep gaw ladu lai kaja mu taw ai rai kun? N re! Yehowa gaw ari zinli 10 hte, n-gun ja ai Egutu mung hte shanhte a nat hpara ni hpe gaya jahkrum kau ai lam hpe, Yawshu hte Hkalep mu wa na re. Dai hpang, Hpara-u hte shi a hpyen luksuk ni hpe, Nawng Hkyeng Hka hta shalim sat kau ai hpe mung mu wa ai. (Shakawn 136:15) Dai majaw, kin-yu 10 a ga hpe madat nna hkrit mat ai gaw, mara raw ya na lam n nga ai. “Shanhte hta ngai madun ai lamik kumla ni hpe mu lu ninglen gaten du hkra ngai hpe naw n kam na ma ta?” ngu, grai myit machyi let Yehowa tsun wa ai.​—Bu Hkawm 14:11.

⁶ Masha hpe hkrit ai a madung lam gaw, makam masham n nga ai majaw re ngu Yehowa tsun wa ai. Teng ai, makam masham hte nden marai gaw matut manoi nga ai majaw, Hkristan nawku hpung hte de a wenyi majan a lam, kasa Yawhan ndai hku ka wa ai: “Mungkan ga hpe anhte padang dip lu ai lam gaw anhte a makam masham a majaw rai nga mali ai.” (1 Yawhan 5:4, JCLB) Ya aten hta mung, Yawshu hte Hkalep zawn makam masham nga ai, asak kaji kaba, hkamja ai, n kaja ai Yehowa Sakse wan kru jan gaw, mungkan ting hta Karai Kasang a Mungdan kabu gara shiga hpe hkaw tsun nga ai. N-gun ja nna nden marai rawng ai shanhte hpe, gara hpyen wa mung zim mat hkra n lu galaw ai.​—Roma 8:31.

Wenyi Sut Gan Ni

it-1-E 740

Israela Ni Hpe Karai Kasang Jaw Ai Mungdan

Israela ni hpe Karai Kasang jaw ai mungdan gaw, grai kaja ai mungdan re. Ga Sadi Tawn Da Ai Mungdan hpe sa yu na matu, kin-yu ni hpe Mawshe dat nna, dai mung na pru ai nsi naisi ni la wa na matu mung tsun ai. Shanhte bai wa ai shaloi, hkainu si hte mai hpang si nkau mi la wa ai. Tsabyi si sumbaw lakung mi mung dan wa ai. Dai tsabyi si sumbaw mi gaw, grai kaba ai majaw marai lahkawng hpai ra ai. Raitim, makam masham n nga nna hkrit nga ai ni pyi ndai hku tsun ai: “Gaja wa dai mung gaw nga chyu hte lagat jahku lawi ai mung nan rai nga ai.”​—Bhk 13:23, 27.

MARCH 29–APRIL 4

KARAI A MUNGGA KAW NA SUT GAN NI | BU HKAWM 15-16

“Gumrawng Ai Hte Tinang Hkum Tinang Ladu Lai Kam Ai Myit Hpe Sadi U”

w11-BU 9/15 27 ¶12

Nang Hpe Yehowa Chye Ai Kun?

¹² Ga Sadi Tawn Ai Mungdan de sa ai lam hta, Israela ni hpe woi awn ai ladat gaw shut nga ai ngu, Kora sawn la wa ai. Israela amyu a du salang marai 250 mung, Kora maga tsap nna, galai shai lam ni galaw na matu shakut wa ai. Kora hte dai masha ni gaw, shanhte hkum shanhte Yehowa hte hku hkau lam nga ai ngu, hkamsha nga ai. “Nan gaw nau wa rai myit dai; dai shawa hpung ting na ni chyawm gaw chyoi pra ai hkrai rai nga ma ai; Yehowa mung shanhte hte rau rai nga ai.” (Bhk 16:1-3) Dai gaw, tinang hkum tinang ladu lai kam nna, gumrawng ai lailen re. Mawshe gaw shanhte hpe ndai hku tsun ai: “Kadai wa Yehowa a masha re ai mung, . . . hpawt de Yehowa madun na ra ai.” (Bu Hkawm 16:5 hpe hti u.) Hpang shani hta, Kora hte shi hpang lawm ai gumlau ai ni yawng si mat ai.​—Bhk 16:31-35.

w11-BU 9/15 27 ¶11

Nang Hpe Yehowa Chye Ai Kun?

¹¹ Mawshe hte Kora gaw, Yehowa a lamang hte dawdan lam ni hpe hkungga ai lam n bung wa ai. Shan a arawn alai hta hkan nna, Yehowa a ningmu mung shai mat ai. Kora gaw Lewi amyu Kohat lakung rai nna, Karai a magam hta laksan ahkaw ahkang lu da ai wa re. Shi gaw, Nawng Hkyeng Hka kaw nna, Israela ni lawt wa ai hpe mu wa ai, Sina Bum hta madat mara lam n nga wa ai Israela ni hpe tara jeyang ai aten ni hta, Yehowa maga tsap wa ai ni hta lawm wa na masa nga ai. Ga shaka sumpu hpe htaw na lit mung lu da ai. (Pru 32:26-29; Bhk 3:30, 31) Kora gaw, shaning law law Yehowa hpe sadi dung wa ai wa rai nna, Israela masha law law a hkungga ai lam lu wa ai masa nga ai.

Wenyi Sut Gan Ni

w98-BU 9/1 20 ¶1-2

Ahkyak Shatai Ra Ai Hpe Ahkyak Shatai U!

Yehowa gaw ndai lam hpe grai ahkyak ai ngu mu ai. Chyum Laika kaw ndai hku tsun ai: “Shaloi Yehowa Mawshe hpe, Dai wa gaw teng teng sat kau ai hkrum na rai nga ai.” (Bu Hkawm 15:35) Yehowa gaw, dai hku galaw ai wa hpe hpa majaw dai daram ahkyak la ai kun?

Masha ni gaw hpun hta ai hte hpawn, ra rawng ai malu masha ni hpe tam na matu nhtoi kru ya lu da ai. Sanit ya ngu na nhtoi hpe gaw, wenyi lam a matu san san tawn da ra ai. Hpun hta ai gaw n shut tim, Yehowa hpe nawku daw jau na matu, san da ra ai aten hta galaw ai majaw shut ai lam re. Hkristan ni gaw, Mawshe a Tara npu kaw n nga sai raitim, ndai mabyin gaw anhte ahkyak shatai ging ai ni hpe, ahkyak shatai na matu sharin ya ai.​—Hpilipi 1:10, NW.

APRIL 5-11

KARAI A MUNGGA KAW NA SUT GAN NI | BU HKAWM 17-19

“Ngai Gaw . . . Na A Sali Wunli Rai Nga Nngai”

w11-BU 9/15 13 ¶9

Yehowa Hpe Na A Sali Wunli Ngu Sawn La Ai Kun?

⁹ Sali wunli n lu ai Lewi masha ni a lam hpe myit yu u. Chyoi pra ai nawku dawjau lam a matu magam gun ra ai majaw, shanhte gaw malu masha a matu, “Ngai gaw . . . na a sali wunli rai nga nngai” ngu tsun wa ai Yehowa hpe kamhpa wa ai. (Bhk 18:20) Anhte gaw hkinjawng ni, Lewi masha ni zawn, nawku htingnu hta magam n gun ai raitim, anhte hpe Yehowa madi shadaw ya nga ai hpe, kam ai myit madun nna shanhte a myit jasat hpe kasi la mai ai. Jahtum nhtoi a jahtum daw de du wa ai hte maren, matse labye a “dazik” hpe nyet kau nna, mungkan hte san san nga na matu, grau yak wa ai. Dai majaw, Karai Kasang a karum lu ai atsam hpe kamhpa na matu, grau ahkyak ai.​—Shr 13:17.

w11-BU 9/15 7-8 ¶4

Yehowa Gaw Nye A Sali Wunli Re

⁴ Lewi masha ni hpe Yehowa lata dat ai shaloi, shi gaw gara hku nna shanhte a sali wunli tai mat ai kun? Shanhte gaw sali wunli ga a malai, grai manu dan ai magam gun lu ai ahkaw ahkang apnawng hkrum ai hku nna, Yehowa gaw shanhte a sali wunli tai wa ai. “Yehowa a hkinjawng” tai lu ai gaw, shanhte a matu sali wunli re. (Ysh 18:7) Bu Hkawm 18:20 a lawu lahta ga ni hpe yu yang, shanhte ni gaw arung arai lam hta, ra kadawn ai lam n nga ai hpe chye lu ai. (Bu Hkawm 18:19, 21, 24 hpe hti u.) Lewi masha ni gaw shawa sum hta magam gun ai majaw, ‘shanhte a sali wunli matu Israela kashu kasha ni kaw na htam shi hta htam mi lu Ia” na re. Israela amyu a hkau na ni kaw na pru ai nsi naisi hte nta rem u wa yamnga ni kaw na, tsa lam shadang kaw na 10% hpe lu na re. Lewi masha ni mung, shanhte lu ai kaw na kaja htum htam shi hta na htam mi hpe, hkinjawng ni hpe bai jaw ra ai. (Bhk 18:25-29) Hkinjawng ni gaw, Israela ni jaw ai “kumhpa shagu hta na, kaja htum ai hte chyoi pra” ai kumhpa ni hpe mung lu ai. Yehowa karum madi shadaw ya na hpe mung, hkinjawng ni kam ma ai.

Wenyi Sut Gan Ni

g03-BU 6/8 14 ¶2

Jum​—Manu Dan Ai Rai

Jum gaw, galoi mung agrin nga ai, n hten mat ai ngu ai a masat dingsat langai mung re. Dai majaw, Chyum Laika hta agrin nga ai ga shaka hpe “jum hte shangang da ai htani htana ga shaka” ngu shaga ai. Dai lam jaw ai hpe shagrin na matu, ga shaka kaw lawm ai ni gaw, jum lawm ai malu masha rau jawm sha ra ai htung nga ai. (Bu Hkawm 18:19) Mawshe a Tara npu hta, hkungri hta nawng na hkungga ni hpe jum mun ra ai. Dai gaw, htenza ai (sh) yat mat ai lam n nga ai ngu lachyum nga na gaw, teng sha nan re.

APRIL 12-18

KARAI A MUNGGA KAW NA SUT GAN NI | BU HKAWM 20-21

“Atik Anang Shadut Hkrum Yang Sumnung Ai Myit Matut Nga U”

w19.02 12 ¶19

Myit Sumnung Nna Yehowa A Myit Shapyaw Ya U

¹⁹ Shut ai lam galaw hkrup ai hpe koi lu na. Mawshe a lam bai myit yu ga. Shi gaw, shaning ladaw law law myit sumnung wa nna Yehowa a myit shapyaw ya wa ai. Raitim, nam mali hkrun lam hkawm ai 40 ning daram du wa ai aten hta sumnung ai myit n lu madun mat ai. Egutu mung hta shi a asak hpe hkye la wa ai rai na masa nga ai kana gaw, Kadesha shara hta n nga mat ai. Makoi mayang ngut nna kade nna yang, Israela ni gaw shanhte hpe atsawm yu lanu lahku ai lam n nga ai ngu nna aput angun bai tsun ai. Hka n nga ai majaw, “Mawshe hte ndang kalang hkat” ma ai. Mawshe gaw tingkyeng akyu n tam ai sha, mauhpa amu ni galaw let aten grai na hkra woi awn wa tim, shanhte gaw aput angun tsun wa ai. Hka n nga ai majaw sha n-ga, Mawshe galaw shut ai lam a majaw, lu hka n nga ai ngu aput angun tsun ma ai.​—Bhk 20:1-5, 9-11.

w19.02 13 ¶20-21

Myit Sumnung Nna Yehowa A Myit Shapyaw Ya U

²⁰ Mawshe grai masin pawt wa ai majaw sumnung ai myit n nga mat sai. Yehowa a lam matsun hte maren, kam sham let lunghkrung hpe ga shaga na malai, masha ni hpe asung arung tsun nna mauhpa lam shi galaw ya na ngu tsun wa ai. Dai hpang lunghkrung hpe lahkawng lang kayat dat ai majaw hka law law pru wa ai. Gumrawng nna masin pawt ai myit gaw, mara kaba hpe galaw hkrup mat shangun ai. (Shk 106:32, 33) Chyahkring chyahkra sumnung ai myit n nga mat ai majaw, Ga Sadi Tawn Da Ai Mungdan de shang lu na ahkang Mawshe n lu mat ai.​—Bhk 20:12.

²¹ Dai mabyin kaw nna manu dan ai lam sharin la lu ai. Langai, sumnung ai myit ayan na nga na matu shakut ra ai. Chyahkring chyahkra mat mat yang pyi, gumrawng ai myit nga wa nna angawk ai hku tsun wa chye ai, galaw wa chye ai. Lahkawng, myit tsang lam ni gaw anhte hpe gawng kya shangun chye ai. Dai majaw, gara hku mi shadut hkrum tim, sumnung ai myit matut nna nga ra ai.

w09-BU 9/1 19 ¶5

Teng Man Ai Maga Ngang Ngang Tsap Ai Tara Agyi

Lam langai gaw, Yehowa gaw Mawshe hpe shi a amyu masha ni hpe gumlau ai ni ngu jeyang na matu ahkang n jaw da ai zawn, shanhte hpe shaga na matu mung n tsun da ai. Lahkawng gaw, Mawshe hte Arun gaw Karai Kasang hpe n shagrau hkrup wa ai. Karai Kasang gaw shan hpe: “Nan gaw ngai hpe . . . n shagrau ai.” (Daw Kaji 12, NW) “An nanhte a matu . . . ntsin shapraw jaw na” ngu tsun ai majaw, mauhpa lam hte hka jaw ai wa gaw Karai Kasang n re ai sha, shan jaw ai zawn tsun wa ai . Masum, ndai hku tara jeyang ai lam gaw, shawng de Karai Kasang a tara jeyang ai lam hte maren rai nga ai. (Bu Hkawm 14:22, 23) Mali, Mawshe hte Arun gaw Israela amyu ni a ningbaw yan re. Lit law law ap da hkrum ai ni gaw, Karai Kasang jeyang ai hpe grau hkrum na re.​—Luka 12:48.

Wenyi Sut Gan Ni

w14-BU 6/15 19 ¶12

Masha A Gawngkya Lam Hpe Yehowa Mu Ai Zawn Mu Ai Kun?

¹² Yehowa gaw, Arun galaw shut ai lam a matu kalang ta ari jaw mai ai. Raitim, Arun gaw gawngkya ai lam ni nga tim, nhkru ai wa n re ai hpe Yehowa chye ai. Yak ai masa ni a majaw, n kaja ai masha ni a majaw, Arun mara galaw hkrup wa ai. Raitim, Arun gaw shi a mara ni hpe yin la mayu ai myit nga ai. Yehowa sharin shaga ai hpe hkap la ai. (Pru 32:26; Bhk 12:11; 20:23-27) Yehowa gaw Arun a makam masham hte myit malai la ai lam ni hpe sha yu wa ai. Dai majaw shaning ni grai na ai du hkra, Arun hte shi a kun dinghku gaw Yehowa hpe hkrit hkungga ai mayam ni re ai hpe, masha ni myit dum nga ma ai.​—Shk 115:10-12; 135:19, 20.

APRIL 19-25

KARAI A MUNGGA KAW NA SUT GAN NI | BU HKAWM 22-24

“Yehowa Gaw Dagam Ai Ga Hpe Shaman Chyeju Shabyin”

bt-BU 53 ¶5

“Yesu A Lam Kabu Gara Shiga” Hpe Hkaw Tsun

⁵ Zingri zingrat ai lam gaw, tsa ban langai aten na zawn, dai ni aten hta mung hkaw tsun bungli hpe hkring mat hkra n lu galaw ai. Hkristan ni hpe htawng langai hpang langai (sh) mungdan langai hpang langai de, atik anang jahtawt kau ai gaw, dai shara nnan kaw mungdan shiga hkaw tsun lu shangun ai. Ga shadawn, Nambat Lahkawng Mungkan Majan laman, Yehowa Sakse Ni gaw Nazi zingri ai shara ni hta laklai ai hku sakse hkam lu wa ai. Htawng kaw Yehowa Sakse ni hte hkrum wa ai, Ju masha langai ndai hku tsun ai: “Yehowa Sakse htawng masha ni a ngang kang ai myit jasat a majaw, shanhte na makam masham gaw Chyum Laika hpe madung tawn ai ngu chye na kamsham wa ai hpang, ngai mung sakse hkam langai byin wa ai.”

it-2-E 291

Mana Bu Ai Lam

Mana Bu Nna Yehowa Hpe Ninghkap Ai Lam. Myihtoi Balam gaw, Moba hkawhkam Balak jaw ai gumhpraw hpe ra ai majaw, mana bu nna Israela ni hpe matsa na matu shakut wa ai. Raitim, shi hpe Yehowa hkum pat wa ai. Kasa Petru gaw Balam hte seng nna, “ga n chye tsun ai lawze gaw, masha a nsen hte shaga wa ai rai nna, dai myihtoi a n gring ai amu hpe kajet kau nu ai” ngu ka wa ai. Balam a mana bu ai lam hte seng nna, kasa Petru lang wa ai Grik gasi para.hparu.niya (pa·ra·phro·niʹa) gaw, “n dum n dam byin ai” ngu lachyum nga ai.​—2Pe 2:15, 16; Bhk 22:26-31.

Wenyi Sut Gan Ni

w04-BU 8/1 27 ¶2

Bu Hkawm Laika Naw Na Dan Dawng Ai Lam Ni

22:20-22​—Yehowa gaw Balam hpe hpa majaw masin pawt wa ai kun? Israela ni hpe n matsa na matu, myihtoi Balam hpe Yehowa tsun da ai. (Bu Hkawm 22:12) Raitim, Balam gaw Israela ni hpe matsa na matu yaw shada let, Balak a masha ni hte pru mat ai. Balam gaw Moba hkawhkam a myiman lu mayu ai, kumhpa ni lu mayu ai. (2 Petru 2:15, 16; Yuda 11) Balam gaw Israela masha ni hpe matsa na malai, shaman chyeju jaw ra mat ai. Dai shaloi, Bala nawku ai numsha ni hpe akyu jashawn nna, Israela la ni hpe gunglau na matu hpaji jaw nna, hkawhkam a myiman lu hkra shakut wa ai. (Bu Hkawm 31:15, 16) Dai majaw, Yehowa gaw myihtoi Balam a nhkru n kaja ai lawhpa myit hpe, masin pawt wa ai re.

APRIL 26–MAY 2

KARAI A MUNGGA KAW NA SUT GAN NI | BU HKAWM 25-26

“Marai Langai Gaw Laklai Hkra Galaw Lu Ai Kun?”

lv 97 ¶1-2

“Hpye Ai Amu Hpe Koi Gam Nga Mu”

Masha langai gaw nga myek na matu nta kaw na pru wa ai. Shi a myit hta nga amyu mi hpe dawn mayu ai. Dai majaw, nga shat hpe lata nna, noi dat ai. Dai hpang, nga myek shingna hpe hka de jahkrat dat ai. Kade n na yang, sumri kang wa nna nga myek shingna li wa ai majaw, dai hpe ntsa de shalun dat ai. Shi hkwi mayu ai nga ra ai nga shat hpe lang nna, lu hkwi dat ai majaw grai pyaw mat ai.

² B.C. 1473 ning hta Balam ngu ai wa mung, mahkam hkam na matu myit wa ai. Shi hkam mayu ai gaw, Ga Sadi Tawn Da Ai Mungdan a ga jarit, Moba Pa Layang hta dap jung nga ai Karai Kasang a masha ni hpe re. Balam gaw tinang hkum tinang Yehowa a myihtoi nga nna tsun tim, gaja nga yang lawhpa ai wa re. Israela masha ni hpe matsa na matu shi hpe shap ai shaloi, hkap la ai. Raitim, Yehowa karum ya ai majaw Israela masha ni hpe shaman ai ga sha lu tsun ai. Dai majaw, mayun kumhpa lu mayu ai Balam gaw Israela ni hpe mara kaba galaw hkra gunglau lu yang, Karai Kasang nan shanhte hpe ari jaw na nga nna myit wa ai. Dai lam awng dang na matu, grai tsawm nna hkalem chye ai Moba numsha ni hpe asung jashawn nna shi mahkam hkam wa ai.​—Bu Hkawm 22:1-7; 31:15, 16; Shingran 2:14.

lv 98 ¶4

“Hpye Ai Amu Hpe Koi Gam Nga Mu”

⁴ Ndai zawn n kaja ai lam hpa majaw byin wa ai kun? Yehowa Karai Kasang hpe kau da nna n kaja ai myit masin nga wa ai majaw re. Gaja nga yang, Karai Kasang gaw shanhte hpe Egutu mung kaw nna hkye la ai, nam mali hta lusha jaw sha nna ga sadi tawn da ai mungdan de shim lum let du na matu lajang ya wa ai. (Hebre 3:12) Ndai lam hpe myit dum nna kasa Pawlu ndai hku ka ai: “Shanhte nkau mi hpye ai amu galaw nna, lani mi hta sha mun lahkawng e hkying masum rum mat ma ai zawn, anhte gaw hpye ai amu n galaw ga.”​—1 Korinhtu 10:8.

Wenyi Sut Gan Ni

it-1-E 359 ¶1-2

Lamu Ga Jarit

Israela lakung ni gaw, lam lahkawng hta madung nna lamu ga hpe garan la ai. Hpaida da la ai, masha law ai n law ai hta hkan nna garan la ai. Amyu lakung langai hpra lu da ai sali wunli ga ni hta na, garan la ai mai byin ai. Dai majaw sali wunli ga ni a jarit ni hpe tsun ai shaloi, panglai hkin-gau pa layang a, bum marawn ni a dingdung maga, dingda maga, sinpraw maga, sinna maga du hkra ngu nna tsun da ai. Hpaida da nna lu ai dawdan lam hpe, Yehowa kaw na re ai ngu hkam la ai majaw, amyu lakung shada da manawn ai, ga law hkat ai lam n nga ai. (Gsh 16:33) Dai ladat hte Karai Kasang woi awn nga ai majaw, Ningpawt Ninghpang 49:1-33 hta lawm ai, jiwoi jiwa Yaku n si shi yang tau hkrau myihtoi da ai hte maren, amyu lakung langai hpra hta hpring tsup wa ai.

Amyu lakung langai a matu, lamu ga man masa hta hkan nna hpaida da dawdan ngut ai hpang, lahkawng ngu na lam hpe bai galaw ai. Ginra a dam ai lam hta hkan nna, hkrak hkrak garan la ai. “Amyu bawsang hte lakung lama dap hkan nna hpaida da nhtawm lamu ga karan la na rai myit dai; law ai lakung lama ni hpe law ai sali ga, n law ai lakung lama ni hpe n law ai sali ga jaw na rai myit dai.” (Bhk 33:54, NW) Hpaida da nna dawdan da ai lamu ga man masa hpe shagrin da sai raitim, sali wunli lu ai lamu ga dam lada ai lam hpe gaw, bai galai shai mai ai. Dai majaw, Yuda a lamu ga grai dam ai majaw, Yuda a lamu ga kaw na Simun a kashu kasha ni a matu sali wunli ga garan ya wa ai.​—Ysh 19:9.