Prat Hte Magam Zuphpawng Shaman Laika Buk A Matu Lakap Da Ai Lam Ni

NOVEMBER 1-7

KARAI A MUNGGA KAW NA SUT GAN NI | YAWSHU 18-19

“Lamu Ga Garan Ai Hta Yehowa A Nyan Hpaji Mu Lu”

it-1-E 359 ¶1

Lamu Ga Jarit

Israela lakung ni gaw, lam lahkawng hta madung nna lamu ga hpe garan la ai. Hpaida da la ai, masha law ai n law ai hta hkan nna garan la ai. Amyu lakung langai hpra lu da ai sali wunli ga ni hta na, garan la ai mai byin ai. Dai majaw sali wunli ga ni a jarit ni hpe tsun ai shaloi, panglai hkin-gau pa layang a, bum marawn ni a dingdung maga, dingda maga, sinpraw maga, sinna maga du hkra ngu nna tsun da ai. Hpaida da nna lu ai dawdan lam hpe, Yehowa kaw na re ai ngu hkam la ai majaw, amyu lakung shada da manawn ai, ga law hkat ai lam n nga ai. (Gsh 16:33) Dai ladat hte Karai Kasang woi awn nga ai majaw, Ningpawt Ninghpang 49:1-33 hta lawm ai, jiwoi jiwa Yaku n si shi yang tau hkrau myihtoi da ai hte maren, amyu lakung langai hpra hta hpring tsup wa ai.

it-1-E 1200 ¶1

Sali Wunli

Sali wunli lamu ga ni. Ga Sadi Tawn Ai Mungdan a lamu ga jarit hte seng nna Mawshe hpe tsun dan ai Madu Yehowa gaw, Israela lakung ni hpe sali wunli lamu ga jaw ai re. (Bhk 34:1-12; Jos 1:4) Mawshe gaw Gad lakung, Rubin lakung hte Manashe lakung chyen mi hpe, sali wunli lamu ga garan jaw da sai re. (Bhk 32:33; Ysh 14:3) Ngam ai amyu lakung ni gaw, Yawshu yan Eleaza a lam matsun ai hte maren, hpaida da nna sali ga garan ya ai hpe lu la ai. (Ysh 14:1, 2) Ningpawt Ninghpang 49:5, 7 hta na Yaku a myihtoi ga hte maren, Simun yan Lewi gaw lamu ga a kahtawng san san n lu la wa ai. Simun lu ai sali wunli lamu ga (mare ni hte hpawn) gaw, Yuda a sali ga hta lawm nga ai (Ysh 19:1-9), Lewi chyawm gaw Israela mung ting hta mare 48 hpe lu la ai. Lewi ni gaw chyoi pra ai gawk hta magam gun ai majaw, shanhte a sali wunli gaw Yehowa nan re ai ngu tsun lu ai. Shanhte gaw dai hku magam gun ai majaw htamshi alu hpe sali wunli lu ai re. (Bhk 18:20, 21; 35:6, 7) Kun dinghku nta masha ni gaw, shanhte a lakung ni a lamu ga hta sali wunli lu ai. Dinghku hta nta masha law wa ai majaw, kashu kasha ni hpe sali wunli garan ra ai majaw, sali wunli ga hpe kachyi kachyi garan ya wa ai.

it-1-E 359 ¶2

Lamu Ga Jarit

Amyu lakung langai a matu, lamu ga man masa hta hkan nna hpaida da dawdan ngut ai hpang, lahkawng ngu na lam hpe bai galaw ai. Ginra a dam ai lam hta hkan nna, hkrak hkrak garan la ai. “Amyu bawsang hte lakung lama dap hkan nna hpaida da nhtawm lamu ga karan la na rai myit dai; law ai lakung lama ni hpe law ai sali ga, n law ai lakung lama ni hpe n law ai sali ga jaw na rai myit dai.” (Bhk 33:54, NWT) Hpaida da nna dawdan da ai lamu ga man masa hpe shagrin da sai raitim, sali wunli lu ai lamu ga dam lada ai lam hpe gaw, bai galai shai mai ai. Dai majaw, Yuda a lamu ga grai dam ai majaw, Yuda a lamu ga kaw na Simun a kashu kasha ni a matu sali wunli ga garan ya wa ai.​—Ysh 19:9.

Wenyi Sut Gan Ni

it-1-E 359 ¶5

Lamu Ga Jarit

Yawdan Hka a sinna maga na lamu ga garan ya ai labau hta, Yuda lakung a matu hpaida da nna garan ya ai lam hpe shawng nnan tsun dan da ai. (Ysh 15:1-63) Dai hpang Yosep (Ehprim) hte (Ysh 16:1-10), Manashe lakung chyen mi hpe Yawdan Hka a sinna maga hta (Ysh 17:1-13) lamu ga jarit masat ya wa ai. Shanhte a lamu ga hte mare ni a lam hpe langai hpang langai tsun dan da ai. Dai hpang, Israela dap dabang ni hpe Gilgala kaw nna Shilo de htawt ra ai majaw, lamu ga garan ai lam hpe matut nna n lu galaw wa ai. (Ysh 14:6; 18:1) Aten kade daram na hkra n galaw mat ai hpe gaw n tsun da ai. Raitim, ngam nga ai amyu lakung 7 gaw, ngam taw ai lamu ga hpe garan la na matu aten garawt nga ai majaw, Yawshu gaw shanhte hpe bai shadum ya wa ai. (Ysh 18:2, 3) Amyu lakung 7 dai hku aten garawt ai hte seng nna, masha ni gaw amyu myu tsun ma ai. Hpaji du nkau mi tsun ai gaw, majan gasat nna arung arai law law zing la lu wa ai majaw hte ndai laman Hkanan masha ni sa gasat na shoihpa nau n nga sai majaw, ngam nga ai lamu ga ni hpe kalang ta n zing la ra shi ai ngu hkamsha wa ai byin mai ai. N-gun ja ai hpyen loi mi hpe n kam gasat ai majaw, aten garawt nga ai mung byin mai ai. (Ysh 13:1-7) Ngut nna, zing la da ai lamu ga ni a lam hpe chye ai raitim, ngam nga ai lamu ga ni a lam hte seng nna gaw atsawm n chye ai byin mai ai.

NOVEMBER 8-14

KARAI A MUNGGA KAW NA SUT GAN NI | YAWSHU 20-22

“Chye Na Shut Ai Lam Kaw Nna Sharin Ya Ai Lam Ni”

w06-BU 4/15 5 ¶3

Ningrum Ningtau Hte Tsun Shaga Ai Hta Ra Ai Ahkyak Ai Lam Ni

Dan dan leng leng tsun shaga ai gaw, chye na shut ai lam ni, sawn la htai la shut ai lam ni n byin hkra karum ya ai. Israela ni a labau shawng daw hta, Yawdan Hka sinpraw maga nga ai Rubin amyu, Gad amyu hte Manashe amyu chyen mi gaw Yawdan Hka makau kaw, “dan hkung ai tawn hkungri kaba” gaw da ai. Shanhte dai hku galaw ai hpe, kaga amyu lakung ni gaw chye na shut ai. Yawdan hka maga mi kaw nga ai ni gaw, shanhte makam masham htak mat sai ngu sawn la nna, sinna maga de nga ai amyu lakung ni gaw, dai “gumlau” ni hpe majan gasat na matu hkyen ai. Raitim, n sa gasat shi yang, sinpraw maga nga ai amyu lakung ni hte matut mahkai na matu, dat kasa hpung hpe shanhte hpang de shangun dat ai. Hpaji rawng ai lam re! Yawdan hka sinpraw maga nga ai ni gaw wan nat hkungga hte hpawn, shagu hkungga ni nawng na matu tawn hkungri gaw de ai n re. Hpang de, kaga amyu lakung ni shanhte hpe: “Nanhte gaw Yehowa hte hpa n daw myit dai” ngu tsun hkrum na hpe tsang ai majaw, dai zawn galaw wa ai re ai hpe shanhte chye lu wa ai. Tawn hkungri gaw, Yehowa hpe shanhte nawku dawjau ai hpe sakse madun ai re. (Yawshu 22:10-29) Yehowa sha, shanhte a Karai Kasang re ai hpe, tawn hkungri gaw sakse madun nga ai majaw, dai tawn hkungri hpe Eda (Hebre hku sakse ngu lachyum nga) ngu shamying wa ai.​—Yawshu 22:34.

w08-BU 11/15 18 ¶5

“Simsa Lam Nga Shangun Ai Lam Ni Galaw Na Matu Shakut Nga U”

Mara galaw da ai sakse mung nga sai. Akajawng sha sa gasat yang, nau n si na re ngu, Israela nkau mi sawn la na re. Raitim, lawan ladan bai htang na malai, Yawdan Hka sinna maga na lakung ni gaw, shanhte a kahpu ni hte manghkang hpe bawngban na matu, dat kasa ni shangun dat ai. Shanhte ndai hku san ai: “Nanhte dai ni Yehowa hpe gumlau na nga tawn hkungri gaw da nna, Yehowa a lam hpe dai ni kau da ai hte lsraela Karai Kasang hpe tawt lai myit dai gaw, hpa lam rai nga malit ta?” Teng sha nga jang, tawn hkungri galaw ai amyu lakung ni gaw, sadi n dung ai hku galaw ai n re. Raitim, shanhte n teng n man tsun hkrum ai hpe gara hku bai htang na kun? N teng ai hku tsun ai ni hte ga law hkat ai (sh) hpa n kam shaga ai ngu bai htang ai kun? Shanhte tawn hkungri galaw ai gaw, Yehowa hpe nawku dawjau mayu ai myit a majaw re ai lam, sumnung shingdi ai hte bai tsun dan ai. Sumnung ai hte tsun ai gaw, Karai Kasang hte shanhte a hku hkau lam hpe makawp maga ya nna, asak law law hpe hkye hkrang ya wa ai. Myit azim sha hte bawngban ai gaw, manghkang ni hpe hparan lu nna simsa lam bai lu shangun ai.​—Ysh 22:13-34.

Wenyi Sut Gan Ni

it-1-E 402 ¶3

Hkanan

Hkanan masha law malawng gaw Israela ni a lata kaw na lawt nna, shanhte a shingkang ka-up ai hpe mung n hkam wa ai. Raitim, ndai hku lu tsun ai: “Yehowa shanhte a kaji kawa ni hpe shaka da ai mung dan yawng mayawng, Israela kashu kasha ni hpe jaw nu ai,” “grup yin shara shagu hta ban sa shangun mu ai,” “Yehowa lsraela masha ni hpe tsun da ai chyeju lam langai mi muk yawm ai n rai: yawng mayawng byin tup wa sai.” (Ysh 21:43-45) Israela ni a grup-yin na hpyen ni gaw shanhte hpe hkrit ai majaw, sa jahkrit ai baw n galaw gwi ai. Masha n nga ai mung hta, nam na matse labye ni law wa na hpe tsang ra ai majaw, Hkanan masha ni hpe “yat yat” gawt shapraw na ngu, Karai Kasang tau hkrau tsun wa ai. (Pru 23:29, 30; Trj 7:22) Hkanan masha ni hta, nhtu shakap da ai gumra hpyen leng ni, grai kaja ai laknak ni nga ai raitim, ginwang nkau mi hpe Israela ni n zing la lu ai gaw, Yehowa maga na sadi n dung wa ai gaw n re. (Ysh 17:16-18; Trg 4:13) De a malai, Israela ni mahtang sadi n dung ai majaw re ai hpe, Chyum Laika labau hta tsun da ai.​—Bhk 14:44, 45; Ysh 7:1-12.

NOVEMBER 15-21

KARAI A MUNGGA KAW NA SUT GAN NI | YAWSHU 23-24

“Amyu Masha Ni A Matu Yawshu A Hpang Jahtum N-gun Jaw Ga”

it-1-E 75

Mungdan Jinghku Hku Ai

Ga Sadi Tawn Ai Mungdan, Hkanan de Israela ni shang ai shaloi na masa hte gaw n bung ai. Awm Dawm Madu Karai Kasang gaw, Israela kaji kawa ni hpe jaw da ai ga sadi hte maren, dai mung hpe Israela ni tsep kawp madu hkra galaw ya wa ai. Dai majaw, shanhte ni gaw maigan masha ni hku nna dai mungdan de shang ai n re. Yehowa gaw shanhte hpe dai mungdan hta nga ai shut shai ai amyu masha ni hte jinghku n hku na matu hkum pat da ai. (Pru 23:31-33; 34:11-16) Israela ni gaw shanhte gawt kau ra ai masha ni a upadi ni hpe n re ai sha, Karai a upadi ni hpe sha hkan sa ra na re. (Jaw 18:3, 4; 20:22-24) Grau nna gaw, dai amyu masha ni hte mayu dama shaw hkat ai baw n galaw na matu sadi jaw da ai. Dai zawn jinghku hku ai gaw, maigan madu jan ni hte sha n-ga, shanhte a jinghku jingyu ni, shut shai ai nawku htung ni hte htung lailen ni hta lawm hkrup chye ai. Dai gaw makam masham htak shangun chye nna, mahkam byin mat chye ai.​—Trj 7:2-4; Pru 34:16; Ysh 23:12, 13.

w07-BU 11/1 26 ¶19-20

Yehowa A Mungga Gaw N Byin Wa Ai N Nga

¹⁹ Anhte a myi hte mu ai lam ni a majaw, ndai hku lu tsun na re: ‘Karai Kasang Yehowa nanhte a matu tsun da ai chyeju lam langai mi mung n yawm ai sha, nlang hte hpring tup wa sai gaw, nanhte nan . . . chye nga myit dai.’ (Yawshu 23:14) Yehowa gaw shi a mayam ni hpe hkye hkrang la ai, makawp maga ai, madi shadaw ya ai. Shi masat da ai aten hta n hpring tsup wa ai ga sadi langai mi hpe, nang madun dan lu ai kun? Lu madun na n re. Anhte gaw kam ging ai Karai a Mungga hpe, hpaji rawng let kam ai.

²⁰ Htawm hpang hte seng nna gaw gara hku? Anhte hta law malawng gaw, ngwi pyaw ai hparadisu tai wa na mungkan ga hta, asak hkrung na matu myit mada mai ai ngu, Yehowa tsun da ai. Anhte hta hpa myit mada lam nga tim, Yawshu zawn matut ngang ngang kang kang tsap nga lu ai lam law law nga ai. Anhte a myit mada lam teng sha byin na aten hta, byin wa na re. Dai aten hta, Yehowa galaw ya wa ai ga sadi yawng hpe bai yu ai shaloi, ‘yawng hpring tup wa sai’ ngu anhte lu tsun na re.

Wenyi Sut Gan Ni

w04-BU 12/1 12 ¶1

Yawshu Laika Kaw Na Dan Dawng Ai Lam Ni

24:2​—Abraham a kawa, Htera gaw sumla ni hpe nawku ai wa kun? Shawng daw hta, Htera gaw Yehowa hpe nawku dawjau ai wa n re. Shi gaw, Ura mare na masha law law nawku ai shata-hpara Sin hpe nawku wa ai rai na re. Yuda htung hta hkan nna, Htera gaw sumla ni hpe galaw ai wa byin mai ai. Raitim, Karai a lam matsun hte maren, Ura mare kaw nna Abraham pru mat ai shaloi, Tera gaw Hkanan mare de, Abraham hte rau hkan nang mat wa ai.​—Ningpawt 11:31.

NOVEMBER 22-28

KARAI A MUNGGA KAW NA SUT GAN NI | TARA AGYI 1-3

“Nden Marai Hte Zai Ladat Shaw Ai Labau”

w04-BU 3/15 31 ¶3

Dip Rip Ai Lam Kandang Hpe Ehuda Jahten Kau Ya

Ehuda a lamang awng dang wa ai gaw, shi a kung kyang lam a majaw, hpyen ni atsam n rawng ai majaw n re. Karai a yaw shada lam awng dang ai gaw, shinggyim masha ni hta n madung ai. Ehuda awng ai a madung lam gaw, Karai a amyu masha ni lawt na matu, kadai mung hkum pat n mai ai. Karai a myit ra ai lam hte maren galaw ai shaloi, Karai a madi shadaw lam hpe shi lu ai majaw, awng dang ai re. Ehuda paw pru wa hkra, Karai Kasang galaw nna: “Yehowa [gaw tinang a amyu masha ni] a matu tara agyi paw pru shangun yang, dai wa hte rau shi nga nga” ai.​—Tara Agyi 2:18; 3:15.

w04-BU 3/15 30 ¶1-3

Dip Rip Ai Lam Kandang Hpe Ehuda Jahten Kau Ya

Ehuda a nambat langai lahkam hta, nhtu hpe shajin da ai. Dai nhtu gaw, shi a hpun palawng hta makoi lu ai, nshan lahkawng dai ai nhtu kadun langai re. Shi kaw laknak lawm n lawm sawk sadawn hkrum chye ai. Hkra maga kung ai ni gaw, laknak hpe kalang ta shaw la nna lang mai ai pai maga kaw shakap da chye ai. Ehuda gaw pai kung ai wa re majaw, shi a laknak hpe Hkawhkam a hpyen la ni nau n tam chye ai “hkra magyi na labu kata e tsat tawn” da ai. Dai majaw, hkum pat ai lam n nga ai sha “Moba hkawhkam Eglon kaw jahkawn shang sak wu ai.”​—Tara Agyi 3:16, 17.

Eglon a hkawhkam htingnu de, nnan shang ai shaloi na mabyin ni hpe n tsun da ai. Chyum Laika hta: “Jahkawn sak da ngut jang, jahkawn gun sa ai ni hpe dat dat mu ai” ngu nna, asan sha tsun da ai. (Tara Agyi 3:18) Jahkawn hpe sak jaw ngut ai hpang, Ehuda gaw Eglon a hkawhkam htingnu hte tsan ai shimlum ai masa nga ai shara de, jahkawn sak jaw ai ni hte rau bai wa ai. Dai hpang, shanhte hpe wa shangun kau nna, hkawhkam htingnu de bai sa mat ai. Hpa majaw, jahkawn sak jaw ai ni lawm wa ai kun? Shi hpe makawp maga ya na matu, shanhte hte arau nga nga ai rai kun? (sh) mungdan shada jinghku hku ai hta galaw ai htung re ai majaw kun? (sh) shanhte gaw jahkawn hpe hpai ai ni ngu ai daram sha kun? Dai hta n-ga, shi a lamang hpe awng dang hkra n galaw shi yang, shanhte hpe shimlum ai shara de du shangun mayu ai majaw kun? Shi gara hku myit ai raitim, Ehuda gaw nden marai hte langai hkrai bai sa ai.

“[Ehuda] chyawm gaw Gilgala shara makau na nlung mahtan du jang, bai nhtang sa nhtawm, hkawhkam hpe, Hkawhkam wa e, ngai nang hpe lagyim tsun na ga lu nngai, ngu wu ai.” Eglon a shawng de, shi gara hku bai lu du ai hpe Chyum Laika hta n tsun da ai. Sin langa ni shi hpe ntsen wa ai kun? Israela langai gaw hkawhkam a man de shang ai gaw, shanhte a madu hkawhkam a matu shoihpa n nga ai ngu, sawn la wa ai kun? Ehuda langai sha bai sa wa ai gaw, shi amyu masha hpe sadi n dung mat ai re ngu, shadu hkra galaw dat ai rai kun? Gara hku mi raitim, Ehuda gaw hkawhkam hte lahkawng hkrai mu na lam tam ai gaw, awng dang wa ai.​—Tara Agyi 3:19.

Wenyi Sut Gan Ni

w05-BU 1/15 24 ¶7

Yawshu Laika Kaw Na Dan Dawng Ai Lam Ni

2:10-12. ‘Yehowa a chyeju yawng hte hpe n malap kau’ na matu, Chyum Laika hkaja ai lamang ayan galaw ra ai. (Shakawn 103:2) Kanu kawa ni gaw Karai a Mungga kaw na teng man lam ni hpe, kashu kasha ni a myit masin de shang hkra sharin ya ra ai.​—Tara Jahprang 6:6-9.

NOVEMBER 29–DECEMBER 5

KARAI A MUNGGA KAW NA SUT GAN NI | TARA AGYI 4-5

“Yehowa Gaw Num Lahkawng Hpe Akyu Jashawn Nna Shi A Masha Ni Hpe Hkye La”

w15-BU 8/1 13 ¶1

Israela Ni A Kanu Zawn Ngai Byin Wa

Sisera ngu ai mying hpe, Israela ni na dat ai hte kalang ta grai kajawng mat ai. Ma ni hpe wan hta nat nawng nna, nawku htingnu hta shawa bungli ni nga ai du hkra, Hkanan mung a nawku htung hte htung lailen ni gaw, nhkru nna zai ai. Hkanan hpyen du Sisera hte shi a hpyen dap gaw, mungdan hpe adip arip uphkang ai majaw, gara masa byin mat ai kun? Mung kata bu hkawm na matu pyi hkrit nga nna, mare ni hta kadai mung n nga gwi mat ai ngu, Debora ka shalat ai mahkawn hta tsun da ai. (Tara Agyi 5:6, 7) Masha ni gaw bunghku n nga ai mare ni hta, hkai lu hkai sha ra na hpe hkrit ai majaw, bum ni, nam ni hta makoi nga ra na, kashun kashe ai lam hkrum na, kashu kasha ni hpe atik anang shaga mat na, madu jan ni hkum shan roi rip hkrum na hpe tsang ai majaw, bu hkawm n gwi ai hpe shingran yu u.

w15-BU 8/1 13 ¶2

Israela Ni A Kanu Zawn Ngai Byin Wa

Baw ja ai Israela masha ni gaw shaning 20 ning daram, grai adip arip hkrum ai hpang she shanhte a myit masin galai shai mayu wa ai hpe, Yehowa Karai Kasang chye mat ai. Dai majaw, ‘Ngai Debora . . . Israela ni a kanu’ zawn paw pru wa ai ngu, Debora hte Barak ni a mahkawn hta ka matsing da ai. Lapidat ngu ai wa a madu jan Debora gaw, teng sha ma kanu re ai kun ngu ai hpe n chye lu tim, Chyum Laika hta gaw shi hpe kanu hku nna shagrau da ai. Gaja nga jang, Israela ni hpe kanu zawn makawp maga ya na matu, Debora hpe Yehowa Karai Kasang lit jaw wa ai re. N-gun atsam kaba ai sadi dung ai tara agyi kaba Barak hpe shaga nna, Sisera hte majan gasat ra na lam, Karai Kasang gaw Debora hpe tsun shangun ai.​—Tara Agyi 4:3, 6, 7; 5:7.

w15-BU 8/1 15 ¶2

Israela Ni A Kanu Zawn Ngai Byin Wa

Yaela gaw lawan ladan galaw wa ai. Sisera hpe hkring sa la na shara jaw dat ai. Sisera mung, marai langai ngai shi hpe sa san jang n nga ai ngu tsun shangun ai. Sisera yup nga ai aten, Yaela gaw nba hpun ya nna, hka hpyi ai shaloi nga chyu jaw lu dat ai. Dai hpang, Sisera grai yup pyaw mat ai. Sum gap ai hta lang ai, num ni atsawm chye lang ai, sum mailak hte batbau la nna, Sisera hpang de azim sha sit sa ai. Yehowa a masha hku nna hkrit tsang hpa bungli langai hpe, Yaela galaw sana re. Aten garawt taw na, hkrit nga na rai jang, tsin-yam hkrum na re. Karai a amyu masha ni a lam, shaning law law dusat ni zawn n tara ai hku zingri wa ai, dai wa a lam hpe Yaela myit nga na kun? Shing nrai, Yehowa a maga tsap na ahkaw ahkang hpe myit nga na kun? Chyum Laika labau hta hpa n tsun da ai. Anhte chye lu ai gaw, Yaela gaw galaw ra ai hpe lawan ladan galaw wa ai majaw, Sisera si mat ai re.​—Tara Agyi 4:18-21; 5:24-27.

Wenyi Sut Gan Ni

w05-BU 1/15 25 ¶5

Tara Agyi Laika Kaw Na Dan Dawng Ai Lam Ni

5:20​—Shagan ni gaw Barak hpe sumsing lamu kaw nna, gara hku majan gasat karum wa ai kun? Lamu kasa karum ya wa ai rai kun? Shagan ni hkrat ai hpe Sisera a hpyen du ni gaw, namik n kaja ai ngu hti wa ai rai kun? Shing nrai, Sisera a matu shata shagan yu nna gumhpan hpan ai lam shut mat ai rai kun? ngu ai hpe Chyum Laika hta gaw n tsun da ai. Raitim, Karai Kasang gaw lam langai ngai hte lapran shang nna karum ya wa ai gaw teng sha re.

DECEMBER 6-12

KARAI A MUNGGA KAW NA SUT GAN NI | TARA AGYI 6-7

“Nang Hta Nga Ai N-gun Atsam Hte Sa U”

w02-BU 2/15 6-7

Chyum Laika Npawt Tara Ni Gaw Akyu Jaw

Tinang hkum hpe htap htuk ai hku sawn la nna, tinang a manu hpe jaw ai hku jep yu ai masha langai gaw, moi prat na Hebre masha tara agyi Gidon re. Shi gaw Israela ni a ningbaw byin na matu n shakut wa ai. Raitim, ningbaw aya tang hkrum ai shaloi, Gidon gaw tinang hte n gingdan ai ngu ai hpe sha, myit maju jung wa ai. Shi ndai hku sang lang dan ai: “Nye a amyu lakung gaw, Manashe amyu hta matsan grau ai lakung rai nga ai; ngai hkum mung, anhte dap hta n tai htum ai wa rai nga ai.”​—Tara Agyi 6:12-16.

w05-BU 7/15 16 ¶3

‘Yehowa Hte Gidon A Nhtu!’

Midian masha ni hkrit gari nga ai! Di bu 300 ga ai nsen, pahtau 300 dum ai nsen hte masha 300 marawn jahtau ai nsen ni gaw, zim taw ai shara hpe akajawng sha jahten kau ya ai. Grau nna gaw, ‘Yehowa hte Gidon a nhtu!’ ngu ai marawn jahtau ai nsen a majaw, Midian masha ni gaw, u chyasi zawn tai mat nna shanhte mung jahtau wa ai. Ndai hku kasu kabrawng byin nga ai shaloi hpyen ni, jinghku ni ngu nna n lu ginhka sai. Masha 300 gaw hpyen ni shada da gasat hkat na matu Karai Kasang galaw ai shaloi, shanhte a shara hta tsap nga ai. Midian ni a hpyen dap jahten hkrum ai hpang, shanhte gaw hprawng na lam n nga ai majaw, tsep kawp jahten kau hkrum ai. Ya she, dai zawn laja lana re ai prat htum mat sai.​—Tara Agyi 7:19-25; 8:10-12, 28.

Wenyi Sut Gan Ni

w05-BU 1/15 26 ¶6

Tara Agyi Laika Kaw Na Dan Dawng Ai Lam Ni

6:25-27. Gidon gaw shi hpe ninghkap ai ni hpe, majoi mi masin n pawt wa hkra, hpaji rawng ai hku galaw wa ai. Anhte a kabu gara shiga hkaw tsun ai shaloi, anhte tsun ai ga a majaw kaga masha ni hpe, myit dingbai dingna n jaw hkrup hkra, sadi ra ai.

DECEMBER 13-19

KARAI A MUNGGA KAW NA SUT GAN NI | TARA AGYI 8-9

“Gumrawng Ai Htan Shagrit Shanem Ai Gaw Grau Kaja”

w00-BU 8/15 25 ¶3

Myit N Hkrum Ai Lam Ni Hpe Gara Hku Hparan Na?

Gidon gaw, Midian ni hpe gasat ai hta magrau grang let shang lawm wa ai. Ehprim masha ni a karum shingtau hpyi wa ai. Raitim, majan ngut ai hpang Ehprim masha ni gaw, Gidon hpe masin pawt nna, shawng nnan na gasat ai majan hta shanhte hpe n shaga ai majaw, grai mara shagun wa ai. Shanhte gaw “aja awa mara shagun mu ai” ngu, labau kaw tsun da ai. Gidon chyawm gaw: “Nanhte di lu ai hta ngai hpa jan di lu a ta? Abiezra tsabyi si shu ai hta, Ehprim nlim gut ai mahtang grau sai n rai ni? Karai Kasang gaw nanhte a lata hta Midian du Oreb yan Zeeb hpe ap kau nu ai: nanhte di lu ai zawn ngai hpa di lu a ta?” ngu tsun ai. (Tara Agyi 8:1-3) Gidon a myit azim sha hte atsawm lata nna tsun ai ga ni a majaw, amyu masha shada da byin na majan n byin hkra, koi lu wa ai. Ehprim masha ni gaw, shanhte gaw ahkyak ai ngu myit nna, gumrawng ai manghkang nga wa na re. Dai majaw, Gidon gaw simsa lam nga na matu n shakut ai sha n nga wa ai. Anhte mung dai hte maren galaw lu na kun?

w17.01-BU 20 ¶15

Npu Taw Ai Myit Nga Na Matu Hpa Majaw Ahkyak

¹⁵ Gidon gaw npu taw ai myit hpe kaja htum kasi madun wa ai. Shi kaw Yehowa a lamu kasa shawng nnan sa wa ai shaloi, tinang a grit nem ai shingdu labau hte masa hpe hkap la wa ai. (Trg 6:15) Yehowa jaw ai lit hpe hkap la ngut ai hpang, hpa galaw ra na hpe asan sha chye hkra galaw wa ai. Lam matsun a matu Yehowa hpe myit mada wa ai. (Trg 6:36-40) Gidon gaw nden marai nga tim gwi gwi hte, hpaji rawng ai hku galaw wa ai. (Trg 6:11, 27) Lit hpe madung tawn nna, gumhkawng na matu n shakut ai. Lit gun hpai ngut ai hte kalang ta, mi na shara de bai wa mat ai.​—Trg 8:22, 23, 29.

w08-BU 2/15 9 ¶9

Yehowa A Lam Hta Hkawm Nga U

⁹ Yehowa a jinghku byin na matu, anhte “myit shagrit shanem” ra ai. (1Pe 3:8, NWT; Shk 138:6) Tara Agyi daw kaba 9 hta, shagrit shanem ai lam gaw ahkyak ai hpe tsun dan ai. “Moi lang mi, hpun ni tinang hpe up na matu hkawhkam lata nna aya dang na nga pru sa ma ai” ngu, Gidon a kasha Yohtam tsun ai. Tsanlun hpun, mai hpang hpun, tsabyi hpun ni a lam shi tsun dan ai. Dai hpun ni gaw, Israela ni hpe uphkang ging tim, n uphkang ai amyu ai ni hpe ga shadawn ai. Wan ju na hpun hku nna sha akyu rawng ai ju hpun ni gaw, gumrawng nna kaga masha ni hpe uphkang mayu ai myit nga nna masha sat ai Abimelek a uphkang lam hpe ga shadawn ai. Abimelek gaw “lsraela masha ni hpe masum ning up lu wu ai.” Raitim, aten n du shi yang, si ra wa ai. (Trg 9:8-15, 22, 50-54) Dai majaw, “myit shagrit shanem ai” gaw kaja htum re!

Wenyi Sut Gan Ni

it-1-E 753 ¶1

Hpa Hkai Palawng, 1

Gidon gaw Israela ni hpe Yehowa awng dang lam lu shangun ai hpe myit dum nga na matu, Karai Kasang hpe shagrau na matu, ndai hpa hkai palawng hpe kaja ai yaw shada lam hte galaw wa ai. Raitim, Israela ni gaw ndai hpa hkai palawng hpe nawku nna Karai hpe sadi n dung wa ai majaw, “dai gaw Gidon hte shi a dinghku masha ni a matu mahkam tai nga malu ai.” (Trg 8:27, JCLB) Dai hpa hkai palawng hpe Gidon nawku wa ai ngu nna gaw Chyum Laika hta n tsun da ai. De a malai, kasa Pawlu gaw Hkristan prat garai n du shi yang, “sumwi zawn” law ai Karai a sadi dung ai sakse ni hta Gidon hpe mying hte hpawn tsun da ai.​—Heb 11:32; 12:1.

DECEMBER 20-26

KARAI A MUNGGA KAW NA SUT GAN NI | TARA AGYI 10-12

“Yephta​—Karai Hpe Tsawra Ai Wa”

w16.04-BU 5 ¶9

Makam Masham Nga Hkra Galaw Ai Gaw Karai A Myiman Lu

⁹ Yosep a kasi gaw Yephta hpe karum ya wa ai zawn re. Tinang hpe n ju “n dawng ai” kahpu ni hpe pyi, Yosep tsawra myit gara hku madun ai hpe Yephta chye wa na re. (Nin 37:4; 45:4, 5) Dai kasi ningli hpe myit ai gaw, Yehowa sharawng awng ai hku bai htang na matu, Yephta hpe karum ya wa ai byin mai ai. Kanau ni galaw ai lam ni a majaw, Yephta grai hkra machyi wa ai raitim Yehowa a mying hte shi a amyu masha ni a matu gasat ai lam gaw, kanau ni hte n simsa ai lam ni htan grau ahkyak ai. (Trg 11:9) Dai majaw, Yehowa hpe matut kamhpa na matu shi dawdan da ai. Dai myit jasat a majaw, shi nan hte kaga masha ni mung Yehowa a shaman chyeju hkamsha lu wa ai.​—Heb 11:32, 33.

it-2-E 27 ¶2

Yephta

Kang ka ai ningbaw re ai Yephta gaw aten n garawt ai sha alawan galaw wa ai. Shi gaw Amon hkawhkam hpang de shiga sa dat nna, Amon masha ni shawng, Israela ni a lamu ga de shang gasat ai lam tsun dat ai. Raitim, hkawhkam gaw Isaraela ni nan dai lamu ga hpe Amon masha ni kaw na kashun la ai re ngu bai tsun ai. (Trg 11:12, 13) Dai shaloi tinang gaw hpa n chye ai hpyen la, nhkru ai masha n re ai sha, labau ni a lam, laksan hku nna shi a mayu masha ni hte Karai Kasang gara hku kanawn mazum wa ai lam hpe atsawm chye da ai wa re ai hpe madun wa ai. Shi gaw Amon ni a n teng n man tsun ai ga ni hpe ndai hku bai ninghkap wa ai. (1) Israela ni gaw Amon, Moba, (sh) Edom ni hpe gin jang ai lam n galaw wa ai (Trg 11:14-18; Trj 2:9, 19, 37; 2Hl 20:10, 11); (2) Ya manghkang byin nga ai lamu ga hpe Israela ni zing la ai shaloi, dai hpe Amon ni madu ai n re. Dai lamu ga hpe Hkanan amyu Amori masha ni madu ai rai nna, shanhte a hkawhkam Sihon hte lamu ga hpe Karai Kasang gaw Israela ni hpe ap ya wa ai re. (3) Dai lamu ga hta shaning 300 daram Israela ni nga wa ai aten, Amon ni gaw hpa manghkang n tam wa ai. Dai majaw, ya she hpa majaw manghkang sa tam ai kun?​—Trg 11:19-27.

it-2-E 27 ¶3

Yephta

Ndai manghkang gaw nawku dawjau lam hte madung hku nna matut mahkai nga ai hpe, Yephta chye na da ai. Ndai lamu ga hpe Israela ni a matu Yehowa jaw da ai majaw, shut shai ai hpara hpe nawku ai ni hpe lekma mi pyi n jaw lu ai ngu shi tsun wa ai. Hkemosha Hpara hpe Amon ni a hpara ngu nna tsun wa ai. Dai gaw shut ai ngu masha nkau shadu ma ai. Amon ni a hpara gaw Milhkom, Moba ni a hpara gaw Hkemosha raitim, jinghku re ai dai amyu masha ni gaw hpara law law hpe nawku ma ai. Shawlumon pyi, maigan madu jan ni a majaw Israela mung hta Hkemosha nawku htung hpe shawn wa ai. (Trg 11:24; 1Hk 11:1, 7, 8, 33; 2Hk 23:13) Dai hta n-ga, “Hkemosha” a lachyum gaw “Hkap Shingla Gasat Ai Wa, Awng Dang Ai Wa,” re ai ngu, hpaji du nkau tsun ma ai. Kaga mungdan ni hpe ‘hkap shingla gasat ai’ (sh) ‘awng dang ai’ gaw Hkemosha hpara a majaw re ai ngu, Amon masha ni shagrau ai majaw, Yephta gaw dai hpara a lam tsun wa ai mai byin ai.

Wenyi Sut Gan Ni

it-2-E 26

Yephta

Tara Shang Kasha Yephta. Yephta a kanu gaw “shawa num” re ai. Raitim, Yephta gaw shawa num galaw nna lu ai kasha (sh) n-gyi kasha gaw n re ai. Shi kanu gaw Gilead a nambat lahkawng madu jan hku nna n hkungran la hkrum shi yang, shawa num galaw wa ai re. Rahab mung shawa num langai rai wa tim, hpang de Salmun hte hkungran la wa ai. (Trg 11:1; Ysh 2:1; Mat 1:5) Gilead a shawng num hte lu ai kasha ni re ai Yephta a kawa bung kanu n bung kahpu ni gaw, shi hpe sali wunli n lu hkra gawt shapraw wa ai. Ndai lam gaw, Yephta gaw n-gyi kasha n re ai hpe sakse madun ai. (Trg 11:2) Dai hta n-ga, hpang de Yephta gaw Gilead la ni (shanhte hta Yephta a kawa bung kanu n bung kahpu ni gaw ningbaw rai na re) hkap la ai ningbaw tai wa ai. (Trg 11:11) Ngut nna, shi gaw nawku sum hta shagu hkungga nawng wa ai. (Trg 11:30, 31) N-gyi kasha langai gaw, dai lam ni langai hpe pyi n mai galaw ai. Jep ai tara hta ndai hku tsun da ai majaw re: “N-gyi ma kadai mung, Yehowa a shawa hpawng hta lawm lu na n rai: kasha prat shi du hkra Yehowa a shawa hpawng hta lawm lu na n rai.”​—Trj 23:2.

DECEMBER 27–JANUARY 2

KARAI A MUNGGA KAW NA SUT GAN NI | TARA AGYI 13-14

“Mano Hte Shi A Madu Jan Kaw Nna Kanu Kawa Ni Sharin La Mai”

w13-BU 8/15 16 ¶1

Kanu Kawa Ni​—Nanhte A Ma Ni Hpe Chyu Chyu Ai Aten Kaw Nna Sharin Ya U

Moi na Israela mungdan, Zora mare hta nga ai, Dan amyu masha Mano a lam hpe myit yu u. Yehowa a lamu kasa gaw Mano a maudung num kaw du nna, lasha langai shangai na ngu tsun wa ai. (Trg 13:2, 3) Dai lam hpe na ai shaloi, sadi dung ai Mano a madu jan gaw grai kabu wa na re. Raitim, myit tsang ai lam mung nga ai. Dai majaw Mano ndai hku akyu hpyi ai: “Madu e, nang shangun dat ai Karai Kasang a masha hpe, an hpang de bai shangun dat nna, ya shangai na ra ai ma hta na an kaning rai galaw na naw sa sharin ya mi.” (Trg 13:8) Mano hte shi a madu jan gaw, shan a ma hpe bau maka na matu myit tsang wa ai. Shanhte gaw kasha Samson hpe Karai a jep ai tara ni a lam, atsawm sharin ya wa na re. Shan a shakut shaja ai lam awng dang wa ai. ‘Yehowa a Wenyi gaw, shi hpe shadut’ ya wa ai ngu, Chyum Laika hta tsun da ai. Akyu hku nna, Samson gaw Israela tara agyi langai hku nna mauhpa lam law law hpe galaw ya wa ai.​—Trg 13:25; 14:5, 6; 15:14, 15.

w05-BU 3/15 25-26

Yehowa Jaw Ai N-gun Hte Samson Awng Dang!

Samson kaba wa ai hte maren, ‘Yehowa shi hpe shaman ya wa ai.’ (Tara Agyi 13:24) Lani mi hta, Samson gaw kanu kawa ni kaw sa wa nna: “Timna e Hpilisti num langai mi mu da se ai; nye matu hpyi ya mi,” ngu nna tsun wa ai. (Tara Agyi 14:2) Kanu yan kawa grai mau mat na re. Israela mungdan hpe adip arip galaw ai ni a lata na hkye la na malai, shanhte a kasha gaw dai masha ni hte jinghku hku mayu nga ai. Shut shai ai hpara ni hpe nawku ai masha hte dinghku de ai gaw, Karai a jep ai tara hte nhtan shai ai. (Pru Mat 34:11-16) Dai majaw, kanu kawa ni gaw ndai hku ningdang kau ai: “Matu n gadoi ai Hpilisti amyu num nang sa la na gaw, anhte amyu shada hta na, na a mayu kasha num langai mi mung n nga sa ni?” Dai raitim, Samson gaw: “Nan dai she hpyi ya mi, ngai grai ra da we ai” ngu nna atik anang tsun wa ai.​—Tara Agyi 14:3.

Wenyi Sut Gan Ni

w05-BU 3/15 26 ¶1

Yehowa Jaw Ai N-gun Hte Samson Awng Dang!

Hpilisti num hpe gara lam a majaw, Samson “yu sharawng” wa ai kun? Shi gaw “grai yu tsawm ai majaw n re ai sha, yaw shada lam langai hte matut manoi nga ai majaw re” ngu, Mekalintaw hte Sahtrau ni a Ga Htai Chyum langai hta tsun ai. Gara yaw shada lam kun? Tara Agyi 14:4 hta Samson gaw “Hpilisti masha ni hte jahte tam ai rai nga ai” lam tsun da ai. Dai yaw shada lam a majaw, dai num hpe Samson yu ra ai re. Samson asak ram wa ai shaloi, ‘Yehowa shi hpe shaman ya wa ai.’ (Tara Agyi 13:25) Dai rai nna, Samson a laklai ai hku num hpyi ai lam hta n-ga, Israela mung ntsa tara agyi hku nna lit gun ai aten ting hta, shi a shingdu kaw shadut ya nga ai n-gun atsam gaw, Yehowa a chyoi pra ai wenyi nan re. Samson ahkaw ahkang gaja lu wa ai kun? Shi hpe Yehowa karum madi shadaw ya na ngu, amahkam wa ai hpe shawng hkaja yu ga.