Prat Hte Magam Zuphpawng Shaman Laika Buk A Matu Lakap Da Ai Lam Ni
JANUARY 3-9
KARAI A MUNGGA KAW NA SUT GAN NI | TARA AGYI 15-16
“Sadi Run Ai Gaw Grai Kaya Hpa Re!”
w12-BU 4/15 9 ¶4
Sadi Run Ai—Hpang Jahtum Nhtoi A N Kaja Htum Lamik Kumla!
4 Langai gaw, tara agyi Samson tsawra ai tingkyeng myit nga ai Delila re. Samson gaw Karai a masha ni hpe woi awn nna, Hpilisti masha ni hpe gasat na matu lajang da ai. Hpilisti hkawhkam marai 5 gaw, Samson hpe Delila sadi dung let tsawra na n re ai lam chye da na masa nga ai. Dai majaw, Samson ndai daram ting n-gun ja ai gaw hpa majaw kun, ngu ai hpe chye lu yang gumhpraw law law jaw na re ngu, Delila hpe hkalem wa ai. Rai yang she Samson hpe sat lu na re. Gumhpraw mak ai Delila gaw shanhte tsun ai hpe hkap la ai. Delila masum lang shakut tim n awng dang wa ai. Shani shagu “aput shatsang ai majaw” Samson si na daram myit ru wa ai. Dai majaw, shi a kara hpe kalang mi mung n rep yu ai, rep kau jang shi a n-gun atsam ni htum mat na re ngu tsun dan ai. Dai shaloi, Delila gaw Samson shi a lahpyen kaw yup nga ai shaloi, masha langai hpe shaga nna kara ni rep shangun ai. Dai hpang, Samson hpe kam ai hku galaw na matu hpyen ni a lata de ap kau ai. (Trg 16:4, 5, 15-21) Shi a arawn alai gaw grai nan nhkru dik ai! Delila gaw gumhpraw ra marin ai majaw, shi tsawra ai wa hpe sadi run wa ai.
w05-BU 1/15 27 ¶4
Tara Agyi Laika Kaw Na Dan Dawng Ai Lam Ni
14:16, 17; 16:16. Hkrap nna tsun ai, aput shatsang ai (sh) aput angun nna shadut ai lam gaw, hku hkau lam hpe jahten shangun chye ai.—Ga Shagawp 19:13; 21:19.
w12-BU 4/15 11-12 ¶15-16
Sadi Run Ai—Hpang Jahtum Nhtoi A N Kaja Htum Lamik Kumla!
15 Dinghku num la ni gaw, tinang a ningrum ningtau ntsa gara hku sadi dung nga lu ai kun? Karai a Mungga hta ndai hku tsun ai: “Na a ram prat na madu jan [(sh) madu wa] hte rau pyaw nga u,” “nang tsaw ra ai madu jan [(sh) madu wa] hte rau, na a prat htum hkra ngwi pyaw ai hte nga sha nga u.” (Gsh 5:18; Hpj 9:9) Madu jan hte madu wa yan gaw, asak kaba wa ai majaw myit hte hkum hkrang lam ni hta sindun sumri ngang hkra galaw na matu, dang lu ai made shakut ra na re. Hpa hpe tsun mayu ai? Dinghku num la ni gaw shada da tsawra myit madun ai hku nna, langai hte langai hku hku hkau hkau nga ra na, langai hte langai a ra kadawn ai lam ni hpe lanu lahku ya ra na, langai hte langai aten jaw ra na re. Shanhte a dinghku hte shanhte nan a Yehowa hte hku hkau lam hpe makawp maga na matu shakut ra na re. Dai hku galaw ai shaloi, rau Chyum Laika Hkaja na matu, hkaw tsun bungli hta rau shang lawm na matu, Yehowa a shaman chyeju lu na matu rau akyu hpyi ai ni galaw ra ai.
YEHOWA HPE SADI DUNG U
16 Nawku hpung hta, mara kaba tawt lai ai majaw laja lana sharin shaga hkrum ai ni nga ai. Dai gaw ‘makam masham hta san seng nga na matu, shanhte hpe aja awa daru sharin” ai re. (Tit 1:14) Nkau mi gaw shanhte a akyang lailen a majaw nawku hpung kaw nna shapraw hkrum ai. “Sharin hkam sha ai ni a matu” daru sharin ai lam gaw Karai Kasang hte shanhte a hku hkau lam hpe grau kaja wa shangun lu ai. (Heb 12:11) Shapraw da hkrum ai jinghku (sh) grai hkau ai manang langai nga yang gara hku galaw na? Shapraw da hkrum ai wa hpe sadi dung na kun? (sh) Karai Kasang hpe sadi dung na kun? ngu nna chyam dinglik hkrum ai shaloi, anhte gara hku galaw na? Yehowa hpe sadi dung ging ai. Shapraw da hkrum ai ni hte hkum kanawn ngu ai, Karai a tara hpe hkan sa nga ai kun, ngu ai hpe Karai Kasang yu nga ai.—1 Korinhtu 5:11-13 hpe hti u.
Wenyi Sut Gan Ni
w05-BU 3/15 27 ¶6
Yehowa Jaw Ai N-Gun Atsam Hte Samson Awng Padang Hkam!
Samson gaw Hpilisti masha ni hpe gasat na ngu ai shi a yaw shada lam hte maren galaw wa ai. Gaza mare hta nga ai shawa num langai a nta kaw nga ai gaw, Karai Kasang a hpyen ni hpe ninghkap gasat na matu re. Hpyen ni a mare hta lana mi manam lu na matu gaw, shawa num a nta hta sha manam mai na re. Akyang hten na matu Samson n myit wa ai. Shana yup tung hta shawa num nta kaw na pru nna mare chyinghka ni hpe hkadun lahkawng hte htinggrang pawn malawk la nna, lahpa hta mara hpai nna, deng 37 daram tsan ai Hebron mare makau na bum jinghkang kaw wa tawn kau ai. Dai hku galaw na matu Karai Kasang ra sharawng ai majaw, Samson hpe n-gun atsam jaw wa ai.—Tara Agyi 16:1-3.
JANUARY 10-16
KARAI A MUNGGA KAW NA SUT GAN NI | TARA AGYI 17-19
“Karai A Tara Hpe N Hkan Sa Ai Gaw Manghkang Byin Shangun”
it-2-E 390-391
Mihka
1. Ehprim masha langai re. Shi gaw Jep Ai Tara a 8 ngu na lam (Pru 20:15) hpe tawt lai nna, shi kanu a gumhpraw 1,100 hpe lagu wa ai. Hpang de, shi gumhpraw lagu ai ngu tsun dan nna bai jaw ai shaloi, kanu gaw ndai hku tsun ai: “Nye a kasha ntsa e hkrat wa ai matsa ga jahkring kau na matu gumhpraw dai hpe ngai nan dai Madu kaw dagam let ap nawng da se ai. Gumhpraw hte sup ai hpun hpara sumla langai galaw ai hta dai hpe lang na rai nga ai. Dai rai nna ya ngai nang hpe dai gumhpraw bai nhtang jaw na de ai.” Kanu mung gumhpraw lahkawng tsa la nna ‘hpara sumla hpe hpun hte tawk nna gumhpraw hte jaw ai sumla’ galaw ai janghkam wa hpe sa jaw wu ai. Dai sumla ni hpe Mihka a nta hta tawn da ai. Mihka gaw shi a hpara jawng hta, hkinjawng palawng hte terahpim sumla galaw nna tawn da ai. Shi a kasha langai mi hpe hkinjawng aya tang tawn da ai. Ndai gaw Yehowa hpe shagrau ai zawn raitim, sumla hkum nawku ngu ai tara hpe tawt lai ai lam re majaw, tsep kawp n galaw ging ai lam re. (Pru 20:4-6) Dai sha n-ga, Yehowa a nawku sum hte hkinjawng lamang hpe n hkungga ai lam re. (Trg 17:1-6, JCLB; Trj 12:1-14) Hpang de, Mihka gaw Mawshe a kashu Gershom a kasha Yonahtan hpe shi nta hta shaga da ai. Dai Lewi lasha gaw shi a matu hkinjawng galaw ya ai. (Trg 18:4, 30) Mihka gaw ndai zawn galaw shut ai lam hpe myit dik nna, “Yehowa ngai hpe chyeju jaw na ni ai, ngai chye nngai” ngu nna tsun ai. (Trg 17:7-13) Raitim, Yonahtan gaw Arun a lakung n re ai majaw hkinjawng n galaw ging ai. Dai majaw, Mihka gaw mara langai bai galaw ai hpe chye lu ai.—Bhk 3:10.
it-2-E 391 ¶2
Mihka
Dai hpang kade nna yang, Mihka hte shi a masha ni gaw Dan amyu masha ni hpang de hkan ai. Shanhte hte hkrum ai shaloi Mihka gaw, ‘Ngai galaw ai Hpara ni hte dai hkinjawng wa hpe, nanhte la kau myit htawm e, ngai hta hpa nga sa ta?’ ngu nna san wa ai. Dai shaloi, Dan masha ni gaw, shanhte a hpang de matut hkan nna mara tam jang, sat hkrum na ngu jahkrit shama wa ai. Dan masha ni gaw shanhte htan grau n-gun ja ai hpe mu ai majaw, Mihka gaw nta de bai wa mat ai. (Trg 18:22-26) Dan masha ni gaw Lisha mare hpe gasat nna wan nat kau ai. Ngut nna dai shara hta Dan mare hpe hpawng de wa ai. Yonahtan hte shi a kashu kasha ni gaw, Dan masha ni a matu hkinjawng ni galaw ya ai. “Karai Kasang a naw ku nta gaw, Shilo mare e naw nga nga ai prat e ting, Mihka galaw ai tawk ai sumla mung, [Dan masha ni] shadun jau nga ma ai.”—Trg 18:27-31.
Wenyi Sut Gan Ni
w15-BU 12/15 11 ¶6
Asan Sha Hte Chye Na Loi Ai Karai A Mungga
6 Karai Kasang a mying hpe lang ging ai hte seng nna madi madun lam ni hpe, dai ni aten hta grau nna mu lu ai. 2013 hta bai gram ai Mungkan Nnan Ga Gale Chyum Laika hta Karai Kasang a mying hpe 7,216 lang shalawm da ai. Dai gaw, 1984 ning hta shapraw ai Mungkan Nnan Ga Gale Chyum Laika htan 6 lang law ai. Dai 6 lang kaw na 5 lang hpe 1 Samuela 2:25; 6:3; 10:26; 23:14, 16 hta mu lu ai. Dai zawn 5 lang bai jat bang ai gaw, Panglai Si Laika Katsu ni hta na dai chyum daw a daw kaji ni hta, Karai Kasang a mying lawm nga ai majaw re. Kru lang ngu na chyum daw gaw Tara Agyi 19:18 re. Kamhpa ging ai moi aten na lata hte ka ai hkrang re ai Chyum Laika ni hpe kahtap htap hkaja ai shaloi, Karai Kasang a mying hpe dai chyum daw hta bai mu ai majaw re.
JANUARY 17-23
KARAI A MUNGGA KAW NA SUT GAN NI | TARA AGYI 20-21
“Yehowa Hpe Hpaji Hpyi Nga U”
w11-BU 9/15 32 ¶2
Mayak Mahkak Ni Hkrum Ai Shaloi Hpineha Hpe Kasi La Lu Na Kun?
Lewi masha a num kaji hpe si ai du hkra roi rip wa ai Ben-yamin lakung Gibea mare masha ni hpe, kaga amyu lakung ni gaw majan gasat na matu hkyen ai. (Trg 20:1-11) Shanhte gaw majan gasat n sa shi yang, Yehowa hpang de akyu shawng hpyi ai. Raitim, lahkawng lang ting hkra machyi let sum wa ai. (Trg 20:14-25) Dai hku sum wa ai majaw shanhte myit daw wa na masa nga ai. Shanhte a akyu hpyi ai ga hpe Yehowa n madat ya ai, dai mara galaw ai ni hpe ari jaw na matu Yehowa shanhte hpe akyu n kam jashawn ai rai na re ngu myit hkrup chye ai.
w11-BU 9/15 32 ¶4
Mayak Mahkak Ni Hkrum Ai Shaloi Hpineha Hpe Kasi La Lu Na Kun?
Ndai lam kaw nna anhte hpa sharin la lu ai? Nawku hpung kata na manghkang nkau mi gaw, myitsu salang ni shakut shaja akyu hpyi tim n lu hparan ai byin mai ai. Dai rai yang, myitsu salang ni gaw Yesu a ga hpe dum ging ai: “Hpyi mu, shaloi nanhte lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai.” (Luka 11:9) Mahtai n lu ai zawn rai nga yang pyi, Yehowa gaw masat da ai aten hta htai ya na ngu ai hpe myitsu salang ni kam mai ai.
Wenyi Sut Gan Ni
w14-BU 5/1 11 ¶4-6
Nang Chye Ai Kun?
Moi prat na majan ni hta lakli ni hpe gara hku akyu jashawn ai kun?
Lasha Dawi gaw hkum gawng shingyan kaba ai Goliat hpe lakli hte sha sat kau ai. Dawi gaw lakli hpe sagu rem ai aten kawn, atsawm chye lang hkra sharin la da ai rai na re.—1 Samuela 17:40-50.
Chyum Laika aten hta Egutu hte Asuri ni ka ai hkrang pan (sumla) ni hta lakli hpe mu lu ai. Lakli ngu ai gaw sumri lahkawng hpe shanhpyi sumbu (sh) sumpan sumbu hte arau gyit hkang da ai laknak re. Dai laknak hpe lang ai wa gaw, sumpan sumbu hta letma 2, 3 daram hte 9 awng-sa li ai apri rai nna din ai nlung hpe bang ai. Lakli hpe awat nna sumri maga mi hpe dat dat ai shaloi, nlung gaw gap mayu ai shara de laja lana sa hkra mat ai.
Moi aten majan ni hta lakli akyu jashawn ai shaloi na nlung din law law hpe, Sinpraw Ka-ang ginra ni hta htu shaw la lu wa ai. Kungkyang ai hpyen la ni gaw, dai nlung din ni hpe hkying hkum mi hta deng 100 kawn 150 madang hte gap lu ai. Lakli hte gap ai hte ndan hte gap ai gaw, gara mahtang grau nna tsan tsan de du ai hpe n chye lu ai raitim, lakli a majaw chyawm gaw masha si chye ai.—Tara Agyi 20:16.
JANUARY 24-30
KARAI A MUNGGA KAW NA SUT GAN NI | RUHTA 1-2
“Ngang Kang Ai Tsawra Myit Madun Nga U”
w16.02-BU 10 ¶5
Yehowa A Jinghku Ni Hpe Kasi La U
5 Ruhta a nta masha ni gaw Moba mung kaw nga ai. Shanhte hpang de bai wa yang shi hpe karum madi shadaw ya na re. Shi amyu masha, shi a amyu ga, htunghking lailen ni bung ai majaw re. Betlehem mare hta, dai ni hpe Ruhta lu na ngu nna Naomi ga sadi n lu jaw ai. Ruhta hpe dinghku bai n lu de ya na, nga shara n jaw lu na hpe Naomi myit tsang wa ai. Dai majaw Moba mung de wa na matu shadut wa ai. Chye lu ai gaw, Orpa chyawm gaw “tinang amyu, tinang Hpara hpang de bai wa” mat ai. (Rut 1:9-15) Raitim, Ruhta chyawm gaw shi amyu masha ni hte shanhte nawku ai shut shai ai hpara ni hpang de bai n wa na matu dawdan da ai.
w16.02-BU 10 ¶6
Yehowa A Jinghku Ni Hpe Kasi La U
6 Ruhta gaw shi a madu wa kaw na (sh) Naomi kaw na Yehowa a lam chye wa ai rai na re. Yehowa gaw Moba hpara ni hte n bung ai hpe Ruhta chye ai. Yehowa hpe shi tsawra ai. Shi a tsawra myit hte nawku dawjau lam hpe Yehowa lu ging ai hpe chye ai. Raitim, hpaji rawng ai daram hte n mai shi ai. Hpaji rawng ai hku dawdan wa ai. Ruhta gaw Naomi hpe: “Na a amyu gaw nye a amyu, na a Karai Kasang mung nye a Karai Kasang rai u ga” ngu nna tsun wa ai. (Rut 1:16) Naomi hpe tsawra ai Ruhta a tsawra myit hpe myit yu ai shaloi masin salum hpe hkra ya ai. Grau nna gaw Yehowa hpe tsawra ai Ruhta a tsawra myit re. Bua mung dai hpe yu kaba mat nna, Yehowa a singkaw n pu hta shingbyi ai lam tam wa ai Ruhta hpe shakawn wa ai. (Ruhta 2:12, NWT hpe hti u.) Bua tsun ai ga gaw, makawp maga la hkrum na matu kanu a singkaw npu kaw shingbyi ai u hkalung hpe shingran mu shangun ai. (Shk 36:7; 91:1-4) Dai u kanu zawn sha Yehowa mung Ruhta hpe tsawra myit hte makawp maga ya nna, shi a makam masham hpe shaman chyeju jaw wa ai. Ruhta a dawdan lam a matu myit malai lu na lam hpa n nga wa ai.
Wenyi Sut Gan Ni
w05-BU 3/1 28 ¶3
Ruhta Laika Kaw Na Dan Dawng Ai Lam Ni
1:13, 21—Karai Kasang gaw Naomi a prat hpe nachying hka hkra galaw wa ai kun? N re. Naomi gaw Karai Kasang hpe mara n shagun wa ai. Raitim, shi hkrum wa ai lam ni a majaw, Yehowa a myiman n lu ai ngu sawn la wa na masa nga ai. Dai majaw grai yawn hkyen nna myit daw nga ai. Dai sha n-ga, dai aten hta kashu kasha shaprat ai lam hpe Karai a shaman chyeju, maudung dung ai hpe gaw dagam hkrum ai re ngu sawn la ai. Kashu n lu ai sha kasha lahkawng si mat ai majaw, Yehowa gaw shi hpe grai shagrit kau sai ngu sawn la na zawn rai nga ai.
JANUARY 31–FEBRUARY 6
KARAI A MUNGGA KAW NA SUT GAN NI | RUHTA 3-4
“Mying Kaja Nga Hkra Galaw Nna Dai Hpe Hkang Da U”
w12-BU 10/1 22 ¶5
“Sari Rawng Ai Num”
Bua gaw Ruhta hpe sumnung shingdi ai hte shalan shabran ya na hpe kam mai ai. Shi ndai hku tsun ai: “Ngai sha e, Yehowa nang hpe shaman ya nit ga law; nang sut su ai La shabrang, matsan ai La shabrang kadai hpe mung n myit ndai majaw, shawng na galaw jaw ai chyeju hta, hpang na chyeju grau kaba sa lit dai.” (Rut 3:10) “Shawng na galaw jaw ai chyeju” ngu ai gaw, Naomi hte arau Israela mung de Ruhta hkan wa nna Naomi hpe gawn lajang ya wa ai shi a ngang kang ai tsawra myit hpe tsun mayu ai re. “Hpang na chyeju” ngu ai gaw Ruhta a ya na masa hpe tsun nga ai re. Ruhta zawn asak naw kaji ai num langai gaw, shi hkungran na masha hpe matsan lusu n ginhka ai sha, shi hte asak ram ai ni kaw na aloi sha tam lu ai hpe Bua chye ai. Ruhta gaw Naomi hpe sha n-ga, Naomi a si mat ai kasha re ai shi a madu wa na mying hpe matut hkam la na matu karum ya mayu ai. Tinang a akyu hpe n tam ai Ruhta a myit jasat hpe Bua hpa majaw dai daram ting yu kaba ai hpe aloi sha chye lu ai.
w12-BU 10/1 23 ¶1
“Sari Rawng Ai Num”
Ruhta gaw Israela masha ni a lapran hta “sari rawng ai num” hku nna mying kaba ai ngu, Bua tsun wa ai hpe Ruhta bai myit yu nna grai kabu na re. Ruhta mying kaja lu ai gaw Yehowa Karai Kasang hpe chye chyang nna nawku dawjau mayu ai shi a myit rawt ai lam a majaw re. Dai sha n-ga, shi gaw Naomi hte shi amyu masha ni hpe grai tsawra nna myit tau ya chye ai, tinang n chye na ai htunghking lailen ni hte maren nga na matu ra sharawng wa ai. Ruhta a makam masham hpe anhte kasi la ai nga yang, kaga masha ni hte shanhte a htunghking lailen ni hpe hkungga na matu shakut na re. Rai yang, anhte mung mying kaja lu wa na re.
w12-BU 10/1 24 ¶3
“Sari Rawng Ai Num”
Bua hte Ruhta hkungran ai. Dai hpang Chyum Laika hta ndai hku hti lu ai: “Yehowa chyeju hte shi na-um nasin rai nhtawm shadang sha shangai ya wu ai.” Betlehem mare na num ni gaw Naomi hpe shaman ya nna, kasha 7 htan Naomi a ntsa grau kaja wa ai Ruhta hpe shakawn wa ai. Hpang de, Ruhta a kasha lasha gaw Hkawhkam Dawi a jiwoi jiwa byin wa ai. (Ruhta 4:11-22) Ngut nna, Dawi mung Yesu Hkristu a jiwoi jiwa byin wa ai.—Mahte 1:1.
Wenyi Sut Gan
w05-BU 3/1 30 ¶5
Ruhta Laika Kaw Na Dan Dawng Ai Lam Ni
4:6—Bai mari na ahkang nga ai jinghku wa gaw, sali ga hpe bai mari la yang, gara lam hku nna sali ga hpe “jahten” ai hte bung ai kun? Masha langai gaw matsan ai majaw sali ga hpe dut wa ai rai yang, bai mari na ahkang nga ai wa gaw hpang kalang na Jubali shaning du hkra, ngam nga ai shaning ni hte maren lamu ga a manu hpe sawn yu nna gumhpraw jaw ra na re. (Jaw Jau 25:25-27) Dai hku galaw ai gaw, tinang madu ai sali ga a manu hpe yawm mat shangun chye ai. Dai hta n-ga, Ruhta gaw lasha shangai wa ai rai yang, mari la da ai sali ga hpe bai mari na ahkang nga ai wa a jinghku ni a malai, dai kasha gaw sali wunli lu na re.
FEBRUARY 7-13
KARAI A MUNGGA KAW NA SUT GAN NI | 1 SAMUELA 1-2
“Myit Masin Hpaw Let Yehowa Hpe Akyu Hpyi U”
ia-BU 55 ¶12
Myit Masin Hpaw Let Karai Kasang Kaw Shi Akyu Hpyi Wa
12 Hana a akyu hpyi ga ni gaw, Karai a mayam ni a matu kaja ai kasi ningli re. Tsaw ra myit nga ai kanu kawa hpe kamhpa ai ma langai zawn, anhte mung Yehowa Karai Kasang kaw myit masin hpaw let tsun dan ging ai. Dai hku galaw na matu Yehowa saw shaga da ai. (Shakawn 62:8; 1 Htesaloni 5:17 hpe hti u.) Yehowa kaw akyu hpyi ai hte seng nna, Kasa Petru gaw shalan shabran lam byin shangun ai ndai ga ni hpe ka na matu, chyoi pra ai wenyi a karum shingtau lu wa ai: “Shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu.”—1 Pe 5:7.
w07-BU 3/15 16 ¶4
Hana Myit Simsa Lam Lu Wa
Anhte hpa sharin la lu ai kun? Myit ru myit tsang lam ni hte seng nna Yehowa hpang de akyu hpyi ai shaloi, anhte a hkamsha lam ni tsun dan nna, myit rawt let hpyi shawn mai ai. Anhte n dang di lu ai masa rai yang, Yehowa hpang de tsep kawp ap da ging ai. Dai gaw kaja htum re.—Ga Shagawp 3:5, 6.
Wenyi Sut Gan Ni
w05-BU 3/15 21 ¶5
Samuela Laika Kaw Na Dan Dawng Ai Lam Ni
2:10—Israela mungdan hta hkawhkam n nga ninglen, Yehowa gaw “shi a hkawhkam wa hpe n-gun shaja na wu ai” ngu, Hana hpa majaw akyu hpyi wa ai kun? Israela ni hta hkawhkam nga wa na lam hpe, Mawshe a Tara hta tau hkrau tsun da ai. (Tara Jahprang 17:14-18) Yaku si na mahka ndai hku myihtoi wa ai: “Yuda gaw hkawhkam sumdoi lang lu na ra ai, Shi a amyu matu ni tut nawng a up nga na mara ai.” (Ningpawt 49:10, JCLB) Dai sha n-ga, Israela ni a kawoi dwi daju re ai Sara hte seng nna mung Yehowa ndai hku tsun wa ai: “Shi hta nna mung amyu baw ni a hkawhkam hkawseng pru shajang na ma ra ai.” (Ningpawt 17:16) Dai majaw, Hana gaw htawm hpang na hkawhkam langai a matu akyu hpyi nga ai re.
FEBRUARY 14-20
KARAI A MUNGGA KAW NA SUT GAN NI | 1 SAMUELA 3-5
“Yehowa Gaw Myit Tau Ya Ai”
Chyahtum Chyalai N-gun Rawng Tim Myit Tau Ya
3 Samuela gaw asak grai naw kaji ai kaw nna, nawku sum hta magam gun nga sai. (1 Samuela 3:1) Lana mi hta, shi yup nga ai shaloi, n myit mada ai lam langai byin wa ai. (1 Samuela 3:2-10 hpe hti u.) Shi a amying hpe marai langai ngai shaga ai nsen hpe shi na dat ai. Asak kaba sai Hkinjawng Agyi Eli shaga ai ngu shi shadu ai. Dai majaw Eli hpang de alawan sa nna ndai hku tsun ai: “Nang shaga ai majaw, wa ring ngai.” Eli gaw shi hpe ndai hku tsun ai: ‘Ngai n shaga ai.’ Dai zawn lahkawng lang bai byin ai. Samuela hpe Karai Kasang shaga ai lam Eli chye dat ai. Dai majaw, Eli gaw, hpang kalang dai hku hkrum yang gara hku tsun ra na hpe matsun dat ai. Samuela mung hkan sa ai. Yehowa gaw Samuela hpe shi shaga ai lam hpa majaw kalang ta n tsun dan ai kun? Chyum Laika hta gaw n tsun da ai. Samuela a hkamsha lam hpe myit tau ya ai majaw rai na re.
Chyahtum Chyalai N-gun Rawng Tim Myit Tau Ya
4 1 Samuela 3:11-18 hpe hti u. Yehowa a tara hta, ma ni gaw asak kaba ai ni hpe hkungga ra ai ngu nna tsun da ai. Laksan hku nna gaw, ahkang aya nga ai ni hpe re. (Pru Mat 22:28; Jaw Jau 19:32) Dai majaw, ramma Samuela a matu, jahpawt jau jau Eli hpang de sa nna, Karai Kasang a tara jeyang na shiga hpe nden marai rawng let sa tsun na matu loi na n re. Chyum Laika hta, “dai shingran Eli hpe tsun dan na, Samuela n wam wu ai” ngu nna tsun da ai. Raitim, Karai Kasang gaw, Samuela hpe shi shaga ai lam Eli chye hkra galaw wa ai. Dai majaw, Karai Kasang tsun ai lam yawng mayawng hpe bai tsun dan na matu, Samuela hpe Eli tsun ai. Samuela mung Eli a ga hpe madat nna “atsai awai tsun dan wu ai.”
Wenyi Sut Gan Ni
w05-BU 3/15 21 ¶6
Samuela Laika Kaw Na Dan Dawng Ai Lam Ni
3:3—Chyoi Pra Htum Ai Gawk kaw Samuela yup wa ai kun? N yup ai. Samuela gaw hkinjawng n re ai Kohat a lakung kaw na Lewi masha re. (Bu Hkawm 4:17-20) Dai majaw, shi gaw ‘dai chyoi pra ai arai ni hpe yu yu na’ matu shang na ahkang n lu ai. Dai majaw, Samuela gaw nawku sum wang kata kaw sha pru shang na ahkang lu ai. Dai shara hta yup ra na re. Eli mung nawku sum wang a shara ra hta yup wa ai rai na re. “Karai Kasang a sumpu nga ai” shara ngu tsun ai shaloi, Nawku sum wang a shara ra hpe tsun mayu ai gaw dan dawng nga ai.
FEBRUARY 21-27
KARAI A MUNGGA KAW NA SUT GAN NI | 1 SAMUELA 6-8
“Na A Hkawhkam Gaw Kadai Kun?”
it-2-E 163 ¶1
Karai Kasang A Mungdan
Shinggyim Hkawhkam Langai Hpyi Ai Lam. Egutu mung kaw na Pru Wa nna shaning 400 daram na ai aten, Abraham hte Karai Kasang ga shaka galaw nna shaning 800 jan na ai aten hta, Israela ni gaw shinggyim hkawhkam lu ai kaga mungdan ni zawn, shanhte hpe woi awn na hkawhkam langai jaw na matu hpyi shawn wa ai. Dai hku hpyi shawn ai gaw, Yehowa a uphkang ai lam hpe nyet kau ai lam re. (1Sa 8:4-8) Abraham hte Yaku hpe jaw da ai ga sadi hte maren, Karai Kasang gaw Mungdan langai hpawng de na ngu nna masha ni myit mada ai gaw htap htuk ai. Dai hku myit mada na matu kaga lam ni naw nga ai: Yaku si na mahka Yuda hte seng ai myihtoi ga (Nin 49:8-10), Egutu mung kaw na Pru Wa ai hpang Israela ni hpe Yehowa tsun ai ga ni (Pru19:3-6), Tara Ga Shaka hta lawm ai rit kawp tara ni (Trj 17:14, 15), hte myihtoi Balam hpe tsun shangun ai Karai a shiga ni (Bhk 24:2-7, 17) re. Samuela a kanu, sadi dung ai num Hana a akyu hpyi ga hta mung dai myit mada lam lawm ai. (1Sa 2:7-10) Raitim, Yehowa gaw Mungdan hte seng ai “sung htum ai lam” hpe hkum hkum tsup tsup n tsun dan shi ai. Gara aten hta Mungdan Hpawng De na ngu ai hpe n tsun dan shi ai. Mungdan hpe gara hku hpawng de na, sumsing lamu hta kun, ginding aga hta kun, ngu ai hpe n tsun dan shi ai. Dai majaw, shinggyim hkawhkam langai hpe masha ni hpyi shawn ai lam gaw gumrawng ai lam re.
w11-BU 1/1 27 ¶1
Myit Daw Hpa Ni Hkrum Tim Shi Hkamjan Wa
Manghkang a lam Samuela akyu hpyi nna tsun dan ai shaloi, Yehowa ndai hku bai htai ai: “Amyu masha ni nang hpe tsun matsun madat ya mu: shanhte nang hpe kau ai n rai; ngai shanhte a hkawhkam n tai na hku, ngai hpe kau ai she rai ma ai.” Chyahtum Chyalai N-Gun Atsam Rawng Ai Karai Kasang hpe Israela ni jahpoi asawng ai lam gaw grai sawng ai lam raitim, Karai Kasang tsun ai ga ni a majaw Samuela myit simsa lam lu wa ai. Israela ni gaw shinggyim hkawhkam hpyi shawn ai majaw, ladu lai hkra sak jaw ra na ngu nna Samuela hpe Karai Kasang sadi jaw shangun ai. Karai Kasang tsun shangun ai hte maren Samuela tsun ai shaloi Israela ni gaw, Samuela a ga hpe n madat ai sha: “N rai law, . . . anhte a ntsa e up na hkawhkam anhte ra ga ai” nga nna n lu lu hkra hpyi shawn wa ai. Karai Kasang a ga hpe ayan madat ai Samuela gaw, Karai lata da ai Israela la langai kaw sa nna hkawhkam aya tang ya ai.—1 Samuela 8:7-20.
w10-BU 1/15 30 ¶9
Yehowa A Uphkang Ai Ladat Jaw Ai Lam Sakse Dan Dawng Sai!
9 Yehowa a sadi jaw ga teng man ai hpe labau gaw sakse madun ai. Grau nna gaw, hkawhkam wa sadi n dung ai shaloi shinggyim hkawhkam langai uphkang ai lam gaw, Israela ni a matu grai kaba ai manghkang ni pru wa shangun ai. Israela ni a ndai labau ni hpe myit hta bang da yang, labau ting hta Yehowa hpe n chye ai shinggyim masha a uphkang lam gaw ngang grin ai akyu ni n jaw lu ai gaw mauhpa lam n re. Teng ai, mung masa galaw ai masha nkau mi gaw simsa lam hte shimlum lam hpe lu na matu, shanhte a galaw ai lam ni a ntsa Karai Kasang shaman chyeju jaw na matu hpyi shawn wa ai. Raitim, Karai a uphkang ai ladat hpe n hkap la ai ni hpe Karai Kasang gara hku nna shaman chyeju jaw na rai ta?—Shk 2:10-12.
Wenyi Sut Gan Ni
w02-BU 4/1 12 ¶13
Hpa Majaw Hkalup Hkam Ra Ai Kun?
13 Yehowa Sakse hku nna hkalup n hkam shi yang shawng galai shai ra na re. Hkristu a hpang hkan na matu myit masin mahkra hte dawdan da ai wa gaw, tinang a akyang lailen ni hpe sharawng awng let galai shai ai. Shanhte gaw moi aten na galaw shut ai lam ni hpe nyet kau nna, Karai a man hta jaw ai lam hpe galaw na matu dawdan ma ai. Chyum Laika kaw na galai shai ngu ai Hebre hte Grik ga si ni gaw, bai nhtang wa ai, bai kayin wa ai ngu nna lachyum nga ai. Dai hku galaw ai gaw, shut ai prat hkrun lam kaw nna Karai Kasang hpang de bai kayin wa ai ngu ai hpe tsun mayu ai re. (1 Hkawhkam 8:33, 34) Galai shai ai ngu ai shaloi, “myit malai hte ging dan ai arawn alai” ni nga ra ai. (Kasa 26:20) Shut shai ai nawku htung hpe kau da ra ai, Karai a hkang da ai lam matsun ni hte maren galaw ra nna, Yehowa hpe myit masin mahkra hte nawku dawjau ra ai. (Tara Jahprang 30:2, 8-10; 1 Samuela 7:3) Galai shai ai lam a majaw anhte a ningmu, yaw shada lam ni hte myit jasat ni pyi galai shai mat ai. (Ezekela 18:31) Karai a tara hte nhtan shai ai arawn alai ni hpe “raw kau” nna gawng shingyan ningnan hpe dagraw hpun ai hku nna, anhte galai shai wa ai.—Kasa 3:19; Ehpesu 4:20-24; Kolose 3:5-14.
FEBRUARY 28–MARCH 6
KARAI A MUNGGA KAW NA SUT GAN NI | 1 SAMUELA 9-11
“Shawlu Gaw Shawng Nnan Hta Shagrit Shanem Nna Npu Taw Wa”
Karai Kasang Hte Arau Shagrit Shanem Let Hkawm
11 Hkawhkam Shawlu hpa byin wa ai hpe myit yu ga. Shi gaw shawng nnan hta shagrit shanem ai wa re. Shi hta shadawn sharam sha nga ai hpe chye nna, lit ni hpe hkap la na matu mung hting nut wa ai. (1 Sa 9:21; 10:20-22) Raitim, Hkawhkam byin nna kade n na yang rai dum wa ai. Kalang mi hta, myihtoi Samuela hpe la nga ai laman, myit n galu wa ai. Masha ni a matu Yehowa galaw ya na hpe shagrit shanem let kamhpa na malai, wan nat hkungga hpe ahkang n nga ai sha nawng kau ai. Dai majaw, Shawlu gaw Yehowa a myiman sum mat nna, hkawhkam langai hku nna shi hpe n sawn la sai. (1 Sa 13:8-14) Ndai sadi jaw ai ga shadawn kaw na sharin la na nga yang, rai dum ai hpe koi lu nna, hpaji rawng ai hku galaw lu na re.
w14-BU 3/15 5 ¶8
Sak Jaw Ai Myit Jasat Matut Nga Hkra Galaw Lu
8 Tingkyeng myit gaw sak jaw mayu ai myit hpe jahten kau shangun lu ai hpe, Hkawhkam Shawlu a lam kaw nna chye lu ai. Shawlu gaw hkawhkam hku nna uphkang hpang ai shaloi shagrit shanem nna npu taw ai myit nga wa ai. (1 Sa 9:21) Hkawhkam Shawlu gaw Amon masha ni hpe awng dang la lu ai majan hta, Israela ni hpe woi awn ai hku nna Karai Kasang a chyoi pra ai wenyi lam matsun ai hpe hkap la wa ai. Dai hpang, shi gaw awng dang lam a matu Yehowa hpe shagrau ai hku nna shagrit shanem ai lam hpe madun wa ai.—1 Sa 11:6, 11-13.
w95-BU 12/15 10 ¶1
Amon Lasha Ni—Tsawra Matsan Dum Ai Lam Hpe Masin Pawt Ai Hku Bai Htang Ai Amyu
Hpang kalang mung, Amon masha ni gaw Yehowa a tsawra matsan dum ai lam hpe masin pawt let bai htang wa ai. Dai zawn nhkru ai jahkrit shama lam hpe Yehowa n chye masu nna n nga wa ai. “Shawlu dai [Nahasha a] shi na jang, Karai Kasang a wenyi shi hta aze du nna, shi ja ja masin pawt bu nga ai.” Karai a chyoi pra ai wenyi a lam matsun npu hta Shawlu gaw gasat na masha 330,000 nga ai hpyen n-gun hpe mahkawng nna, Amon lasha ni hpe lam ting hta gasat wa ai. “Naw ngam ai ni mung, shada da n kahkyin lu hkra bra mat ma ai.”—1 Samuela 11:6, 11.
Wenyi Sut Gan Ni
w05-BU 3/15 22 ¶8
Samuela Laika Kaw Na Dan Dawng Ai Lam Ni
9:9—“Ya na myihtoi ngu ai wa hpe, moi prat e myi san wa” ngu shaga ai gaw, hpa laksan lachyum nga ai kun? Samuela prat hte Israela hkawhkam prat laman hta, myihtoi ni grau nna dan dawng gumhkawng wa ai majaw “myihtoi” ngu ai a malai “myi san wa” ngu nna malai lang wa ai hpe, dai ga si ni gaw madun nga ai. Samuela gaw myihtoi rusai hta shawng nnan na myihtoi re ai ngu sawn la ma ai.—Kasa 3:24.