Prat Hte Magam Zuphpawng Shaman Laika Buk A Matu Lakap Da Ai Lam Ni
MAY 2-8
KARAI A MUNGGA KAW NA SUT GAN NI | 1 SAMUELA 27-29
“Dawi A Hpyen Zai Ladat”
it-1-E 41
Ahkisha
Dawi gaw Shawlu a lata na hprawng ra ai aten hta, Ahkisha hkawhkam kaw lahkawng lang sa shingbyi wa ai. Shawng na kalang hta, hpyen zawn ntsen ai shaloi, Dawi mana masu wa ai. Dai majaw, Ahkisha gaw mana ngu mu nna shaden kau ai. (1Sa 21:10-15; Shk 34:Ntsa na ga yan; 56:Ntsa na ga yan) Lahkawng lang hta, Dawi hte rau shi a hpyen ma 600 hte shanhte a nta masha ni lawm wa ai majaw, Ahkisha gaw Zikla mare hta nga na ahkang jaw wa ai. Dai kaw nga ai laning mi hte shata mali nga ngut ai hpang, Dawi hte shi a masha ni gaw, Yuda mare kahtawng ni hpe gasat ai ngu nna, Ahkisha hkawhkam shadu wa ai. Raitim, gaja nga yang, Dawi gaw Geshuri, Gerazi hte Amalek ni hpe sa gasat ai re. (1Sa 27:1-12) Dawi hkalem ai hpe Ahkisha grai kam mat ai majaw, Hkawhkam Shawlu hpe gasat na matu Hpilisti hpyen luksuk ni hpe jahpawng ai aten hta, Ahkisha gaw Dawi hpe shi a asak sin ai bu shatai wa ai. Raitim, Hpilisti du ni gaw laja lana hkum pat ai shaloi, Dawi hte shi a masha ni Zikla de bai wa mat ai. (1Sa 28:2; 29:1-11) Dawi gaw hkawhkam tai wa nna Gat mare hpe gasat ai shaloi, Ahkisha hpe n sat wa ai mai byin ai. Shi gaw Shawlumon uphkang ai aten du hkra nga nga ai.—1Hk 2:39-41.
Ramma Ni, Kaga Ni A Kam Ai Myit Hpe Gara Hku Lu La Mai Na Kun?
8 Dawi hkrum wa ai kaga mayak mahkak langai hpe mung myit yu ga. Hkawhkam hku na aya tang hkrum ngut tim, Yuda Hkawhkam hku nna tara shang hkaw dung na matu, shaning grai na hkra la ra wa ai. (1 Sa 16:13; 2 Sa 2:3, 4) Myit galu let la nga lu na matu hpa gaw shi hpe karum ya wa ai kun? Myit daw nga na malai, shi galaw lu ai lam hpe myit maju jung wa ai. Ga shadawn, Hpilisti shara ni hkan hprawng hkawm ai shaloi, Israela hpyen ni hpe shi gasat wa ai. Dai hku nna Yuda mung a lamu ga jarit hpe makawp maga lu wa ai.—1 Sa 27:1-12.
it-2-E 245 ¶6
Masu Ai
N kaja ai myit hte masu ai hpe Chyum Laika hta hkum pat da tim, teng ai shiga hpe n chye ging ai masha ni hpe teng ai hku tsun ra na ngu nna tsun mayu ai n re. Yesu gaw: “Chyoi pra ai arai hpe gwi ni hpe hkum jaw mu; nanhte a hkachyi ni hpe wa ni man e hkum kabai tawn mu: shing n rai jang, dai ni tinang a lagaw hte dai hpe kabye kau nna, nanhte hpe nhtang kawa na ma rin dai” ngu nna sharin ya wa ai. (Mat 7:6) Yesu mung masa lam nkau hta shiga yawng hpe n tsun dan ai, ga san ni hpe mung dingtawk n htai ya wa ai. Hpa majaw nga yang, dai hku galaw yang n ra ai sha, manghkang grau law wa chye ai majaw re. (Mat 15:1-6; 21:23-27; Yhn 7:3-10) Abraham, Isak, Rahab hte Elisha ni gaw Yehowa hpe n nawku ai ni hpe shut ai hku lam matsun wa ai (sh) shiga yawng hpe n tsun dan wa ai mung, dai majaw re.—Nin 12:10-19; daw kaba 20; 26:1-10; Ysh 2:1-6; Yak 2:25; 2Hk 6:11-23.
Wenyi Sut Gan Ni
w10-BU 1/1 20 ¶5-6
Si Ai Ni Gaw Asak Hkrung Ai Ni Hpe Lu Karum Ya Ai Kun?
Myit yu u. Masha langai si mat ai shaloi, “shi ga de bai nhtang mat wa ai rai nna, . . . shi maw ai hku yawng hten mat wa ai” ngu nna Chyum Laika hta tsun da ai. (Shakawn 146:4) Nat shung ai ni hte matut mahkai ai gaw shut ai lam, Shawlu hte Samuela chye ai. Shawng de, mungdan hta nga ai nat hpaji hkan ai ni yawng hpe Shawlu gaw gawt kau sai re!—Jaw Jau 19:31.
Ndai hpe myit yu u. Sadi dung ai Samuela gaw wenyi hkum hte asak naw hkrung nga ai rai yang, Karai a tara hpe tawt lai nna Shawlu hte hkrum na matu, nat shung ai wa hte matut mahkai na kun? Yehowa gaw Shawlu hte matut mahkai ai lam n galaw mat sai. Rai yang, nat shung ai wa gaw, si mat sai Samuela hte Shawlu matut mahkai na matu, chyahtum chyalai n-gun rawng ai Karai Kasang hpe, galaw shangun lu na kun? N lu ai. Dai majaw, “Samuela” a hkrang pru wa ai dai shingnip shingna gaw, gara hku nna mung Karai a sadi dung ai myihtoi n mai byin ai gaw dan dawng nga ai. Dai wa gaw, si mat ai Samuela zawn masu da ai nat she re.
MAY 9-15
KARAI A MUNGGA KAW NA SUT GAN NI | 1 SAMUELA 30-31
“Na A Karai Kasang Yehowa Kaw N-gun Dating Nga U”
w06-BU 8/1 28 ¶12
Yehowa Hpe Hkrit Nna Pyaw Nga U!
12 Dawi a Yehowa hpe hkrit ai myit gaw, shut ai ni n galaw hkrup ai sha n-ga, kaja ai akyu pyi jaw ai. Yak ai masa ni hta ngang ngang kang kang, hpaji rawng ai hku galaw lu hkra mung karum ya ai. Dawi hte shi a masha ni gaw Shawlu a hpyen hpe koi yen na matu, Hpilisti mung, Zikla hta laning mi hte shata mali tup makoi shingbyi nga ra wa ai. (1 Samuela 27:5-7) Kalang hta, shanhte n nga ai aten Amalek masha ni gaw mare hpe wan nat nna, madu jan ni hte ma ni, sagu, dumsu ni hpe zing la mat ai. Dawi hte shi a masha ni bai du wa ai shaloi, dai mabyin hpe mu ai shaloi hkrup ma ai. Dawi a masha ni gaw grai yawn nga ai kaw na, myit machyi ai de gale mat ai. Dai majaw, Dawi hpe nlung hte kabai na ngu tsun wa ai. Dai shaloi Dawi gaw grai yawn ai raitim, myit daw myit hten ai lam n nga ai. (Ga Shagawp 24:10) Karai Kasang hpe hkrit ai wa re ai majaw, Karai hpe sha kamhpa nna n-gun la wa ai. Dai hpang, Karai a karum shingtau hte Amalek masha ni hpe hkan gasat nna, yawng hpe bai zing la lu wa ai.—1 Samuela 30:1-20.
w12-BU 4/15 30 ¶14
Anhte Hkye Hkrang Hkrum Na Matu Yehowa Makawp Maga Ya
14 Dawi a prat hta, yawn hkyen hpa ni hte myit tsang hpa lam law law hpe hkrum wa ai. (1 Sa 30:3-6) Dawi a hkamsha lam hpe Yehowa chye ai lam, Chyum Laika hta tsun da ai. (Shakawn Kungdawn 34:18; 56:8 hpe hti u.) Anhte a hkamsha lam ni hpe mung Karai Kasang chye ai. Anhte “myit maku daw” ai shaloi (sh) ‘myit htum’ nga ai masa ni hpe, Yehowa chye ai ngu dum ai gaw shalan shabran lam jaw ya ai. Ndai lam gaw Dawi hpe shalan shabran ya ai majaw, shi ndai hku mahkawn hkawn wa ai: “Nye a nni nkri hpe nang mu nga nna, Nye myit masin a ru tsang ai hpe chye nga ndai majaw, Na a chyeju hta ngai kabu nna shakawn nga na nngai.” (Shk 31:7) Raitim, Yehowa gaw anhte hkrum ai ruyak tsin-yam ni hpe chye ai hta n-ga tatut karum ya ai. Shalan shabran lam, n-gun jaw ai ni hku nna anhte hkamjan lu hkra karum ya ai. Anhte hpe Karai Kasang shalan shabran ya ai lam langai gaw, Hkristan nawku zuphpawng ni hku nna re.
Wenyi Sut Gan Ni
w05-BU 3/15 24 ¶8
Langai Samuela Laika Kaw Na Dan Dawng Ai Lam Ni
30:23, 24. Bu Hkawm 31:27 hta npawt tawn ai ndai dawdan lam gaw, nawku hpung hpe madi shadaw ya ai magam ni hta galaw nga ai ni hpe, Yehowa manu shadan ai lam madun ai. Dai majaw, anhte galaw ai magam bungli shagu hpe, “masha a matu galaw ai zawn n rai, Karai Kasang a matu galaw ai zawn” galaw nga ga.—Kolose 3:23, JCLB.
MAY 16-22
KARAI A MUNGGA KAW NA SUT GAN NI | 2 SAMUELA 1-3
“‘Ndan Pala’ Sharung Shayawt Mahkawn Kaw Na Hpa Sharin La Lu Ai?”
w00-BU 6/15 13 ¶9
Anhte Hpe Uphkang Nga Ai Ni Hpe Hkungga U
9 Dawi gaw n tara ai lam ni hpe hkrum ai shaloi, myit daw wa ai kun? “Mazut bu ai ni nye a asak hpe tam ma ai” ngu nna, Dawi gaw Yehowa hpe tsun dan ai. (Shakawn 54:3) Dawi gaw Yehowa hpe: “Nye a Karai Kasang e, . . . Nye a hpyen ni hta na ngai hpe makawp maga da e. N hkru ai amu galaw ai ni kaw na ngai hpe mawai Ia e, . . . Ngai hpe jahten na, n-gun ja ai ni zup hpawng nga ma ai: Rai ti mung, Yehowa e, ngai mara n kap nngai, Ngai yubak mung n galaw nngai. Mara n nga ti mung htim sa wa na, shanhte gat nga ma ai; Ngai hpe karum na rawt nna yu nga e” ngu tsun wa ai. (Shakawn 59:1-4) Ahkang aya nga ai wa hpe, tinang hpa mara mung n galaw ai sha, tinang hpe mara mu ai masa hpe hkrum ga ai kun? Dawi gaw Shawlu hpe galoi mung hkungga lara ai lam madun ai. Shawlu si ai shaloi kabu pyaw nga na malai, hkrap sharung mahkawn langai ka wa ai: “Shawlu yan Yonahtan, hkrung nga dingsa tsaw ra nja, . . . Shan gaw, wa hpai kalang hta grau laram, Hkanghkyi hta n-gun grau ningtsam rai ma ai. Israela shayi sha ni e, Shawlu a majaw hkrap mu.” (2 Samuela 1:23, 24) Dawi gaw Shawlu n tara ai hku galaw ai hpe hkrum wa tim, Yehowa namman chya ya ai wa hpe jet ai hkungga lara lam madun ai, kaja ai kasi langai re!
w12-BU 4/15 10 ¶8
Sadi Run Ai—Hpang Jahtum Nhtoi A N Kaja Htum Lamik Kumla!
8 Chyum Laika hta sadi dung ai ni a kasi law law rawng ai. Sharin la lu na kasi lahkawng hpe yu yu ga. Langai, Dawi hpe sadi dung wa ai masha langai a lam hpe myit yu ga. Yonahtan gaw Hkawhkam Shawlu a kasha alat re ai majaw, hpang de hkawhkam byin na masa nga ai. Raitim, Yehowa gaw Dawi hpe hkawhkam hku nna lata wa ai. Yonahtan gaw Yehowa a dawdan lam hpe hkungga ai lam madun wa ai. Dawi hpe manawn ai lam n nga ai. De a malai, “Yonahtan a myit gaw Dawi a myit hte makyit mat” nna, Dawi a ntsa sadi dung na ngu nna ga sadi jaw wa ai. Yonahtan gaw shi a palawng galu, ri nhtu, ndan hte shingkyit hpe jaw nna, Dawi hpe hkawhkam hku hkap la ai lam madun wa ai. (1 Sa 18:1-4) Yonahtan gaw Dawi hpe madi shadaw ya lu na matu, shi galaw lu ai yawng hpe galaw wa ai. Asak jaw nna, Dawi hpe Shawlu a lata kaw na makawp maga ya wa ai. Dawi hpe sadi dung let: “Nang Israela hkawhkam tai lu na rin dai; ngai mung na a lawu na agyi rai na ring ngai” nga nna tsun wa ai. (1 Sa 20:30-34; 23:16, 17) Yonahtan si ai shaloi, Dawi gaw shi a yawn hkyen ai lam hte tsawra ai lam hpe mahkawn langai hku nna, ka shalat wa ai gaw mau hpa n re.—2 Sa 1:17, 26.
Wenyi Sut Gan Ni
it-1-E 369 ¶2
Hpu
Lam langai hpe myit hkrum mang rum galaw ai ni, yaw shada lam bung ai ni hpe mung, “hpu” ngu nna shaga ma ai. Ga shadawn, Turu Hkawhkam Hiram gaw Shawlumon Hkawhkam hpe, hpu ngu nna shaga wa ai. Shan gaw ahkang aya bung ai majaw sha n-ga, nawku htingnu a matu hpun ni hte kaga arai ni hpe madi shadaw ai lam hta, shada da akyu maren mara lu ai majaw mung re. (1Hk 9:13; 5:1-12) “Yu mu, hpu nau ni myit hkrum nga nna, Rau hpawng nga lu ai gaw, Gade ngwi pyaw nga a hka!” ngu nna Dawi ka wa ai. Kahpu kanau ni a lapran kahkyin gumdin nga ai gaw, kahpu kanau majing daw ai lam langai a majaw sha n re ai hpe Dawi tsun mayu ai re. (Shk 133:1) Gaja nga yang, Dawi hte Yonahtan gaw kahpu kanau majing n rai tim, shada da tsawra ai, myit lawm ai lam ni a majaw, Yonahtan hpe “hpu” ngu shaga wa ai. (2Sa 1:26) N kaja ai akyang lailen ni, myit jasat ni bung ai shada pyi, kahpu kanau ngu shaga chye ma ai.—Gsh 18:9.
MAY 23-29
KARAI A MUNGGA KAW NA SUT GAN NI | 2 SAMUELA 4-6
“Yehowa N Ra Mat Na Hpe Hkrit Nga U”
w05-BU 5/15 17 ¶8
Lahkawng Samuela Laika Kaw Na Dan Dawng Ai Lam Ni
6:1-7. Dawi gaw myit kaja ai wa rai tim, ga shaka sumpu hpe leng hte htaw na matu shakut ai lam gaw, Karai a tara hpe tawt lai ai lam rai nna, hpa akyu n lu wa ai. (Pru Mat 25:13, 14; Bu Hkawm 4:15, 19; 7:7-9) Kaja ai myit hte galaw ai lam gaw, Karai Kasang a hpyi shawn da ai lam hpe n galai shai lu ai gaw, ga shaka sumpu hpe Uza jum sharai dat ai lam hta mu lu ai.
w05-BU 2/1 27 ¶20
Yehowa Gaw Jaw Ai Hpe Galoi Mung Galaw
20 Uza gaw Karai a tara hpe atsawm chye da ai hpe matsing da u. Ga shaka sumpu gaw Yehowa du nga ai hpe malai madun ai re. Ahkang n lu ai ni n mai hkra ai ngu nna jep ai tara hta laksan hkang da ai. N hkan sa ai ni gaw si hkrum na ngu, asan sha sadi jaw da ai. (Bu Hkawm 4:18-20; 7:89) Dai majaw, ga shaka sumpu htawt ai lit hpe ahpa atang n mai myit la ai. Uza gaw (hkinjawng agyi n raitim) Lewi masha langai re ai majaw, jep ai tara hpe atsawm chye da ging ai. Dai hta n-ga, de a shawng shaning ni hta ga shaka sumpu a shimlum lam a matu, shi kawa a nta kaw htawt da wa ai. (1 Samuela 6:20–7:1) Dawi gaw htawt na matu n dawdan shi yang, ga shaka sumpu gaw shaning 70 daram na hkra dai shara kaw nga wa ai. Dai majaw, Uza gaw ga shaka sumpu hte seng nna jep ai tara ni hpe, ma kaji ten kaw nna chye da na re.
w05-BU 2/1 27 ¶21
Yehowa Gaw Jaw Ai Hpe Galoi Mung Galaw
21 Shawng hta tsun wa sai hte maren, Yehowa gaw myit masin hpe mu lu ai. Chyum Laika hta Uza a “mara” [n hkungga ai lailen, NWT] ngu tsun da ai majaw, tup hkrak n ka da ai Uza a tingkyang myit hpe Yehowa mu wa na re. Uza gaw gumrawng nna masat da ai tara hpe tawt lai ai wa byin mai ai kun? (Ga Shagawp 11:2) Shi a nta hta laksan makawp maga da ai, ga shaka sumpu hpe masha hpawng man hta woi awn nna htawt ra ai majaw, gumrawng mat ai kun? (Ga Shagawp 8:13) Karai Kasang du taw ai ngu ai masat dingsat re ai ga shaka sumpu hpe, n lu makawp maga ai du hkra Yehowa a lata gaw kadun taw ai ngu nna sawn la ai du hkra, Uza hta makam masham kachyi mi mung n nga sai kun? Ndai masa hta, Yehowa gaw dingman ai hku galaw ya na ngu ai hpe kam mai ai. Yehowa gaw, Uza a myit masin kaw lama ma hpe mu dat ai majaw, alawan tara jeyang kau ai rai na re.—Ga Shagawp 21:2.
Wenyi Sut Gan Ni
w96-BU 4/1 29 ¶1
Na A Lit Hpe Galoi Mung Yehowa Kaw Mara Da U
Hkawhkam Dawi gaw ndai lam hta lit nga ai. Shi bai htang ai lam gaw, Yehowa hte kaja ai hku hkau lam nga ai masha ni pyi, chyam dinglik ai masa ni hpe kalang marang angawk ai hku galaw hkrup chye ai hpe madun ai. Shawng hta Dawi masin pawt wa ai. Hpang de she shi hkrit wa ai. (2 Samuela 6:8, 9) Yehowa hte shi a ngang kang ai hku hkau lam, laja lana chyam dinglik hkrum wa ai. Dawi gaw shi a lit ni hpe Yehowa kaw mara da na matu malap ai aten hta, Karai a tara ni hpe shi n hkan sa wa ai re. Kalang marang, anhte mung dai zawn masa hpe hkrum chye ai kun? Karai a lam matsun ni hpe n chye masu su ai majaw, hkrum wa ai manghkang ni a matu Yehowa hpe mara shagun ai kun?—Ga Shagawp 19:3.
MAY 30–JUNE 5
KARAI A MUNGGA KAW NA SUT GAN NI | 2 SAMUELA 7-8
“Yehowa Gaw Dawi Hte Ga Shaka Galaw”
w10-BU 4/1 20 ¶3
‘Na A Mungdan Gaw Htani Htana Dinggrin A Nga Nga Na’
Yehowa gaw Dawi a myit jasat hpe grai sharawng awng ai. Dai majaw, Dawi a myit rawt ai lam hpe bai htang na matu hte myihtoi ga hpring tsup hkra galaw na matu, htani htana uphkang na masha langai hpe Dawi a amyu lakung kaw na pru wa shangun na lam, Dawi hte ga shaka galaw wa ai. Nahtan gaw Karai a hkik hkam ai ga shaka hte seng nna Dawi hpe: “Na a myu matu hte na a mungdan chyawm gaw, na a man e dinggrin a nga nga na ra ai: na a magam tingnyang mung htani htana dinggrin a nga nga na ra ai” ngu tsun wa ai. (Daw Kaji 16) Ndai ga shaka hpe htani htana agrin shangun na wa, htani htana uphkang mat na wa gaw kadai kun?—Shakawn 89:20, 29, 34-36.
w10-BU 4/1 20 ¶4
‘Na A Mungdan Gaw Htani Htana Dinggrin A Nga Nga Na’
Nazaret mare masha Yesu gaw, Dawi a amyu lakung kaw na yu hkrat wa ai. Lamu kasa langai gaw Yesu shangai wa na lam ndau shana ai aten: “Tsaw htum ai wa a Kasha ngu ai hkam la na ru ai; Madu Karai Kasang mung, shi kawa Dawi a tingnyang, shi hpe jaw na wu ai rai nna, shi gaw Yaku a nta ntsa e, htani htana e a up nga na ra ai: shi a mungdan mung htum ngu ai nga na n rai” ngu tsun wa ai. (Luka 1:32, 33) Dai majaw, Dawi hte tawn ai ga shaka gaw Yesu hta hpring tsup wa ai. Dai majaw, masha lata ai n re ai sha, htani htana uphkang lu na ngu ai Karai a ga shaka a majaw, Yesu uphkang mat wa na re. Karai a ga sadi ni gaw, teng sha hpring tsup wa na hpe dum nga ga.—Esaia 55:10, 11.
w14-BU 10/15 7 ¶14
Mungdan Hpe Kamsham Ai Myit Ngang Kang Nga U
14 Yehowa gaw, moi na Israela Hkawhkam Dawi hpe ga sadi langai jaw ai. Dai hpe Dawi ga shaka ngu shaga ai. (2 Samuela 7:12, 16 hpe hti u.) Meshia gaw Dawi a amyu lakung kaw na yu hkrat wa na ngu nna Yehowa ga sadi jaw ai. (Luk 1:30-33) Meshia a amyu lakung hte seng ai ahkri ahkrai lam hpe Yehowa bai tsun dan wa ai. Dawi kaw na yu hkrat wa na ndai amyu matu gaw, Meshia Mungdan hta Hkawhkam hku nna “uphkang na ahkang” lu na lam, Yehowa tsun ai. (Eze 21:25-27, NWT) Dawi a hkawhkam aru arat “tut nawng e a nga nga” na re. Hpa majaw nga yang, Dawi a “tingnyang dai ajan zawn, . . . tut nawng e a grin nga” na majaw re. (Shk 89:34-37) Meshia a uphkang lam gaw galoi mung hten mat na n re. Dai uphkang lam kaw na lu na akyu ni mung, htani htana agrin nga na ngu ai hpe anhte kam mai ai!
Wenyi Sut Gan Ni
it-2-E 206 ¶2
Jahtum Nhtoi Ni
Balam a myithtoi ga. Ga Sadi Tawn Da Ai Mungdan de Israela ni n shang shi ai aten, Hkawhkam Balak hpe myihtoi Balam ndai hku tsun ai: “Madat Ia, ndai amyu masha ni htawm hpang de na a amyu hpe kaning di na ma ru ai gaw ngai madun de ga, . . . Yaku kaw na shagan langai mi pru nna, Israela hta na hkawhkam sumdoi paw pru na ra ai: Shi gaw Moba njut nnaw hkan du hkra gasat dang” na re. (Bhk 24:14-17) Ndai myihtoi ga a shawng na hpring tsup ai lam hta, “shagan” gaw Moba ni hpe gasat awng dang wa ai Dawi hpe tsun ai re. (2Sa 8:2) Dai majaw, dai hpring tsup ai lam hta “htawm hpang” na nhtoi ni ngu ai gaw, Dawi hkawhkam tai wa ai aten kaw nna hpang wa ai. Dawi gaw Meshia Hkawhkam hku nna Yesu hpe shingna madun ai re majaw, ndai myihtoi ga gaw hpyen ni hpe Yesu jahten kau ai aten hpe mung tsun mayu ai re.—Esa 9:7; Shk 2:8, 9.
JUNE 6-12
KARAI A MUNGGA KAW NA SUT GAN NI | 2 SAMUELA 9-10
“Dawi Gaw Ngang Kang Ai Tsawra Myit Madun Wa”
w06-BU 6/15 14 ¶6
Ngwi Pyaw Lam Hpe Nang Gaja Wa Tam Mu Lu
“Matsan mayan ni hpe dum ai wa gaw, a nga ai” ngu Dawi ka wa ai. “Yehowa shi hpe bau sin shabran Ia na wu ai, Dai mungdan hta shi apyaw sha nga lu na ra ai: Gumlau ni ra ai hku shi hpe ap kau na wu ai n rai” ngu nna mung ka wa ai. (Shakawn 41:1, 2) Shi grai tsawra ai manang, Yonahtan a lagaw hten ai kasha Mehpiboshet hpe Dawi madun wa ai tsawra matsan dum myit gaw, matsan mayan ni a ntsa da ging ai myit jasat re.—2 Samuela 9:1-13.
w05-BU 5/15 17 ¶12
Lahkawng Samuela Laika Kaw Na Dan Dawng Ai Lam Ni
9:1, 6, 7. Dawi gaw shi a ga sadi hte maren galaw wa ai. Anhte mung anhte tsun ai hte maren galaw na matu shakut ra ai.
w02-BU 2/15 14 ¶10
Hkum Hta Ju Ai Ju Ni Hpe Shanhte Hparan Wa
10 Shaning loi na ai hpang, Hkawhkam Dawi gaw Yonahtan hpe grai tsaw ai myit a majaw, Mehpiboshet hpe tsawra matsan dum ai myit madun wa ai. Dawi gaw Shawlu madu ai yawng hpe Mehpiboshet hpe ap ya nna, dai lamu ga hpe yu gawn na matu Shawlu a ali ama Ziba hpe lit jaw ai. Ngut nna Dawi gaw Mehpiboshet hpe: “Shani shagu nye sha ku e sha” u ngu nna tsun dat ai. (2 Samuela 9:6-10) Dawi a tsawra matsan dum ai lam gaw, Mehpiboshet a matu shalan shabran lam lu shangun nna, nkung nkang byin nga ai majaw hkamsha ai myit hpe, hkyamsa shangun wa na gaw teng sha re. Grai kaja ai kasi ningli re! Anhte mung, hkum hta ju ai ju a majaw yakhkak jamjau nga ai ni hpe, tsawra matsan dum myit madun ging ai.
Wenyi Sut Gan Ni
it-1-E 266
Nhka Mun
Israela ni hte hpawn moi aten na Sinpraw hkran na masha ni gaw, nhka mun hpe la du ai ngu ai masat hku nna grai manu shadan ma ai. Israela ni hpe jaw ai jep ai tara hta nhka mun rep ai lam, myi hte na lapran hta nga ai “shabyi mun” rep ai lam hpe hkum pat da ai. (Jaw 19:27; 21:5) Shut shai ai nawku htung nkau mi a kamsham ai lam re ai majaw, dai hpe hkum pat da ai re.
JUNE 13-19
KARAI A MUNGGA KAW NA SUT GAN NI | 2 SAMUELA 11-12
“N Htap Htuk Ai Myit Ni Hkang Ai Lam Hpe Hkum Hkam”
Satan A Mahkam Kaw Na Lawt Lu
10 Hkawhkam Dawi mung lawhpa wa ai majaw, Yehowa jaw da ai lam ni hpe malap kau ai. Dai hta sut su ai, arawng aya hte hpyen ni hpe awng dang ai lam lawm ai. Karai Kasang gaw n dang hti hkra law ai shaman chyeju ni hpe jaw da ai majaw, Dawi chyeju dum wa ai. (Shk 40:5) Raitim, kalang mi hta gaw, Yehowa jaw da ai lam ni hpe malap kau ai. Myit dik ai lam n nga ai sha, grau nna ra wa ai. Dawi hta madu jan law law nga ai raitim, kaga ni a madu jan hpe ra marin ai myit nga na ahkang jaw wa ai. Dai num gaw, Batsheba rai nna, shi a madu wa gaw Hiti masha Uria re. Dawi gaw tinggyeng akyu tam let , Batsheba hte shut hpyit wa ai. Batsheba hta ma hkum kap mat ai. Shut hpyit ai sha n-ga, Uria hpe sat na matu lajang wa ai. (2 Sa 11:2-15) Dawi hpa hpe myit nga ai kun? Yehowa n mu na re ngu myit nga ai kun? Yehowa a sadi dung ai mayam raitim, tinggyeng akyu a majaw lawhpa wa nna grai hkra machyi wa ai. Raitim, Dawi gaw shi a mara ni hpe yin la nna myit malai la wa ai. Yehowa a myiman bai lu ai majaw, shi grai kabu na re.—2 Sa 12:7-13.
Yehowa Hpe Sharawng Awng Let Npu Taw U—Hpa Majaw Kun? Gara Hku Kun?
15 Yehowa gaw Dawi hpe dinghku a baw sha n-ga, Israela mung ting a baw hku nna lit shatsam da ai. Hkawhkam hku nna, Dawi hta ahkang aya law law nga ai. Kalang lang, shi a ahkang aya hpe shut ai hku lang wa nna mara kaba ni galaw wa ai. (2 Sa 11:14, 15) Raitim, sharin shaga ai hpe hkap la ai hku nna Yehowa hpe npu taw ai lam madun wa ai. Yehowa hpe myit masin mahkra hte akyu hpyi wa ai. Yehowa a sharin shaga ai lam hpe atsawm madat mara wa ai. (Shk 51:1-4) Bai nna, shi gaw kaja ai hpaji jaw ga ni hpe la ni kaw nna sha n-ga, num ni kaw nna mung shagrit shanem let hkap la wa ai. (1 Sa 19:11, 12; 25:32, 33) Dawi gaw shut ai lam ni kaw nna sharin la wa ai. Shi a prat hpe Yehowa a magam gun ai hta myit maju jung wa ai.
Na A Myit Nsam Hpe Karai Kasang A Tara Ni Gaw Shaman Shakyang Ya U Ga
7 Jaw ai, shut ai hpe chye na matu, tinang nan Karai a tara ni hpe tawt lai nna, n kaja ai akyu hpe n hkam la ra ai. Lai wa sai aten hta shut ai lam galaw wa ai ni kaw nna sharin la mai ai. Shanhte a mabyin ni hpe Chyum Laika hta ka da ai. Ga Shagawp 1:5 (NWT) hta, “Hpaji rawng ai wa gaw madat mara nga nna, lam matsun ni hpe hkam la nga ai” ngu tsun da ai. Karai Kasang kaw nna sa ai ndai hpaji jaw ga gaw kaja htum re. Ga shadawn, Dawi gaw Yehowa a ga n madat nna Batsheba hte shut hpyit ngut ai hpang, kade daram jamjau hkrum wa ai hpe myit yu u. (2 Samuela 12:7-14) Dai labau hpe hti ai shaloi, tinang hkum tinang ndai hku san yu u: ‘Ndai manghkang ni hpe Dawi gara hku koi lu na kun? Dai zawn re ai masa lam hta ngai nga yang hpa galaw na kun? Hpye ai amu galaw na matu gunglau hkrum yang, Dawi zawn rai na kun? (sh) Yosep zawn rai na kun?’ (Ningpawt 39:11-15) Mara galaw nna lu wa na hkrit hpa akyu ni hpe atsawm sha myit yang, grau nna “n kaja ai hpe n dawng” wa na re.
Wenyi Sut Gan Ni
it-1-E 590 ¶1
Dawi
Mara galaw ai hpe Yehowa yu nga nna, shapraw dan wa ai. Lama na, Yehowa gaw Dawi hte Batsheba a lam hpe Mawshe a tara npu hta nga ai shinggyim tara agyi ni a lata hta ap kau na nga yang, shan yan gaw sat hkrum na re. Rai yang, hpye ai amu galaw nna lu wa ai ma mung, kanu hte arau sat hkrum na re. (Trj 5:18; 22:22) Raitim, dai lam hpe Yehowa gaw shi nan hparan wa ai. Hpa majaw nga yang, Mungdan Ga Shaka a majaw (2Sa 7:11-16), Dawi nan kaga masha ni hpe tsawra matsan dum myit madun wa ai majaw (1Sa 24:4-7; shingdaw Yak 2:13) hte mara galaw hkrup nna myit malai la wa ai hpe Yehowa mu ai majaw, Dawi hpe Yehowa gaw tsawra matsan myit madun wa ai. (Shk 51:1-4) Raitim, shan gaw dam jaw ai lam ni kaw na lawt ai gaw n re. Yehowa gaw myihtoi Nahtan hpe ndai hku tsun shangun ai: “Yu u, nang hpe hpyen na masha gaw, na a kashu kasha ni hta na ngai shapraw na we ai.”—2Sa 12:1-12.
JUNE 20-26
KARAI A MUNGGA KAW NA SUT GAN NI | 2 SAMUELA 13-14
“Amnon A Tingkyeng Myit Gaw Yawn Hkyen Shangun”
it-1-E 32
Absalom
Amnon hpe sat ai. Absalom a grai tsawm ai kanau Tama hpe kawa bung kanu n bung kahpu Amnon gaw grai tsawra wa ai. Amnon gaw machyi masu su nna, Tama hpe shi nta de sa nna shadu ya na matu dat ya rit ngu hpyi shawn wa ai. Ngut nna Tama hpe roi rip kau ai. Amnon a ngang kayut mayu ai myit hte tsawra ai myit gaw, nju ndawng ai de gale mat nna, Tama hpe lam ntsa de gawt shapraw kau ai. Tama mung, hkawhkam a hkawn sek shayi sha ni hpun chye ai hpun palawng hpe gang je kau nna, baw ntsa wan dap mara let pru wa ai shaloi Absalom hte hkrum ai. Dai shaloi, Absalom gaw masa hpe yu dat ai hte Amnon galaw ai n re i, ngu kalang ta tsun dat ai. Dai hpe yu yang, Absalom gaw shawng nnan kaw nna, Amnon hta ngang kayut mayu ai myit jasat nga ai hpe tau chye da ai hpe chye lu ai. Raitim, Absalom gaw kadai hpe mung n tsun dan na matu shi kanau hpe htet da nna, shi nta kaw shaga da ai.—2Sa 13:1-20.
Tinang Myit Hpe Hkang Lu Na Matu Shakut U
11 Hpye ai amu galaw na matu gunglau hkrum ai shaloi, n ninghkap wa ai masha ni a kasi ningli ni hpe mung Chyum Laika hta tsun da ai. Anhte hta tinang hkum hpe hkang lu ai atsam n nga yang, n kaja ai akyu ni lu la ai hpe dai gaw madun dan ai. Nang gaw Kim a masa zawn hkrum nga yang, Ga Shagawp daw kaba 7 hta tsun da ai angawk ai ramma lasha a lam hpe myit yu u. Amnon a lam hte shi a akyang lailen a majaw hkrit hpa akyu lu la ai lam hpe mung myit yu u. (2 Samuela 13:1, 2, 10-15, 28-32) Kanu kawa ni gaw ma ni hpe tinang myit hpe hkang lu ai lam grau nga wa na matu, nyan hpaji lu na matu dai zawn kasi ningli ni hpe dinghku nawku hta bawng ban mai ai.
it-1-E 33 ¶1
Absalom
Lahkawng ning na ai hpang. Sagu mun rep poi du ai shaloi, Absalom gaw Yerusalem sinpraw maga, deng 14 daram tsan ai Bala-hazora shara hta poi galaw nna, Dawi hte shi a lasha ma yawng hpe saw shaga wa ai. Dawi n lu sa ai ngu tsun ai shaloi, Absalom gaw kawa a malai kahpu hpe sa na ahkang jaw rit ngu, akroi anoi hpyi shawn wa ai. (Gsh 10:18) Poi hta, Amnon “tsabyi lu nna myit pyaw nga” ai aten, sat kau na matu Absalom gaw mayam ni hpe htet da ai. Kaga lasha ni Yerusalem de wa mat ai. Absalom chyawm gaw, Galile Nawng Sinpraw maga Geshura mung kaw nga ai, Suri masha re ai Kaji Dwi hpang de hprawng mat wa ai. (2Sa 13:23-38) Dai majaw, myihtoi Nahtan myihtoi wa ai hte maren, dai aten kawn hpang nna, Dawi a “amyu” gaw “nhtu” hte si ra wa ai. Shi a ngam nga ai prat ting hta mung matut nna hkrum ra na re.—2Sa 12:10.
Wenyi Sut Gan Ni
g04-E 12/22 8-9
Ahkyak Htum Tsawm Htap Ai Lam
Dawi a kasha Absalom na lam hpe myit yu u. Mu ai masha yawng ra sharawng na zawn tsawm htap ai raitim, nhkru ai wa byin mat ai. Shi hte seng nna Chyum Laika hta ndai hku tsun ai: “Ya Israela amyu ting hta Absalom zawn ahpraw tsawm nna shakawn hkam la ai wa langai mi muk n nga ma ai. Lagaw lahpan kaw nna baw pungding hkren, za ai shara langai mi muk n nga ai.” (2 Samuela 14:25) Raitim, Absalom gaw yaw shada lam grai kaba ai majaw, kawa majing hpe ninghkap nna hkawhkam tingnyang hpe kashun wa ai. Kawa a lashi num ni hpe pyi roi rip wa ai. Dai majaw, Absalom hpe Karai Kasang masin pawt wa ai. Mala shala n htap htuk ai hku si ra mat ai.—2 Samuela 15:10-14; 16:13-22; 17:14; 18:9, 15.
Absalom hpe nang sharawng awng ai kun? Tsep kawp ra na n re. Grai matsat na zawn san ai wa re. Shi a laklai hkra tsawm htap ai lam gaw, shi a gumrawng ai lam, sadi n dung ai lam hta n galai bang ya n lu ai zawn, shi n hten za hkra mung n lu makawp maga ya wa ai. Shi hte n bung ai sha, hpaji rawng ai ni, sharawng awng na zawn re ai masha law law a lam Chyum Laika hta lawm ai. Raitim, shanhte a tsawm htap lam hte seng nna gaw n tsun dan da ai. Dai majaw, ahkyak htum gaw shanhte a myit kraw tsawm ai lam re ai gaw dan dawng nga ai.
JUNE 27–JULY 3
KARAI A MUNGGA KAW NA SUT GAN NI | 2 SAMUELA 15-17
“Absalom Gaw Gumrawng Ai Myit A Majaw Gumlau”
it-1-E 860
Shawng Kaw Gat Ai Wa
Sinpraw hkran htunghking lailen hta, hkawhkam sa wa ai hpe ndau shana na matu, tau hkrau hkyen lajang na matu, karum ya na matu leng ni a shawng kaw gat ai masha ni nga ai. (1Sa 8:11) Absalom hte Adoniya gaw, shan a arawng grau nna gumhkawng na matu dai zawn galaw wa ai. Shan a gumlau ai lam hpe n-gun jaw madi shadaw ai masha marai 50 hpe shan a leng shawng kaw gat shangun wa ai.—2Sa 15:1; 1Hk 1:5.
w12-BU 7/15 13 ¶5
Shang Lawt Lam Jaw Ai Karai A Magam Hpe Gun Hpai U
5 Kaga masha ni hpe n kaja ai hku shingkang ka-up wa ai masha law law a lam Chyum Laika hta lawm ai. Langai gaw, Hkawhkam Dawi a kasha Absalom re. Shi gaw grai tsawm ai wa re. Satan zawn, shi mung shut shai ai ra marin ai myit hpe kaba wa na ahkang jaw wa ai. Hkawhkam byin na ahkaw ahkang n nga tim, kawa a shara hpe kashun nna uphkang mayu wa ai. Shi ra marin ai hkawhkam aya lu hkra hkalem na matu shakut ai shaloi, kaga masha ni hpe shi gaw grai karum ya mayu ai. Raitim, hkawhkam wa gaw dai zawn myit n nga ai ngu masha ni kam hkra hkalem wa ai. Edin sun hta na Satan zawn sha, Absalom gaw shi hkum shi grai kaja ai wa zawn hpyi hpun ai hta n-ga, shi kawa a lam hpe jahpyak tsun wa ai.—2 Sa 15:1-5.
it-1-E 1083-1084
Hebron
Shaning law law na ai hpang, Dawi a kasha Absalom gaw Hebron mare de wa nna Kawa a hkawhkam aya kashun la na yaw shada lam gaw, dai mare kaw hpang wa ai re. (2Sa 15:7-10) Hebron mare gaw Yuda a mare kaba byin yu wa ai majaw, labau shang mare langai re. Dai hta n-ga, Absalom a daidaw buga mung re. Dai majaw, hkawhkam tingnyang kashun la na yaw shada lam hpe, ndai mare kaw na hpang na matu, Absalom lata wa ai byin mai ai. Hpang de, Dawi a kashu Hkawhkam Rehoboam gaw Hebron mare hpe bai de wa ai. (2Hl 11:5-10) Babelon ni a majaw Yuda mare jahten hkrum ai hpang hta, Yuda bawng masha ni bai wa ai shaloi, nkau mi gaw Hebron (Kiriat-arba) mare kaw nga ma ai.—Neh 11:25.
Wenyi Sut Gan Ni
Shiga Yawng Hpe Nang Chye Da Ai Kun?
11 Anhte hte seng nna daw mi sha jaw ai shiga ni hpe masha ni tsun shabra ai shaloi, anhte myit n pyaw na re. Mehpiboshet dai hku hkrum wa ai. Hkawhkam Dawi gaw, Mehpiboshet hpe shi a kaji dwi Shawlu madu ai lamu ga yawng hpe jaw kau ai. (2 Samuela 9:6, 7) Raitim, hpang hta Mehpiboshet hte seng nna n kaja ai shiga hpe Dawi na ai. Dawi gaw shiga hpe n sagawn ai sha, Mehpiboshet a lamu ga yawng hpe bai zing la kau ai. (2 Samuela 16:1-4) Raitim, Mehpiboshet hte Dawi ga shaga ngut ai hpang, shi shut mat sai hpe Dawi chye dat ai. Dai majaw, Mehpiboshet hpe lamu ga bai jaw ai. (2 Samuela 19:24-29) Lama na Dawi gaw, shiga hpe hkum tsup hkra sagawn wa na nga yang, Mehpiboshet gaw n tara ai lam ni hkrum wa na n re.