Prat Hte Magam Zuphpawng Shaman Laika Buk A Matu Lakap Da Ai Lam Ni
© 2022 Christian Congregation of Jehovah’s Witnesses
JANUARY 2-8
KARAI A MUNGGA KAW NA SUT GAN NI | 2 HKAWHKAM 22-23
“Hpa Majaw Shagrit Shanem Ra?”
w00-BU 9/15 29-30
Shagrit Shanem Ai Yoshia Gaw Yehowa A Myiman Lu
Nawku htingnu hpe gram lajang ai ni gaw jahpawt jau jau kaw na bungli shakut ma ai. Yoshia gaw shi a nhkru ai jiwoi jiwa nkau a majaw hten za wa ai Karai a nta hpe, bungli galaw ai ni bai gram ya nga sai majaw, Yehowa hpe chyeju dum nga na re. Bungli galaw nga ai laman, jahpan tang shawn na matu Shahpan du wa ai. Shahpan laika katsu langai la wa ai! Dai gaw hpa rai kun? Shi gaw, hkinjawng agyi Hilkia gaw “Mawshe a lata hte ap ya ai Yehowa a tara laika he mu hkrup” ai ngu sanglang dan ai. (2 Hkawhkam Labau 34:12-18) Dai laika katsu gaw, Jep Ai Tara a madung laika re!
Yoshia gaw, dai laika hta lawm ai ga si yawng hpe madat na matu myit rawt taw ai. Shahpan hti dan ai shaloi, tara laika gaw hkawhkam wa re ai tinang hte mung, mung masha ni hte mung gara hku seng ang ai lam hpe chye na hkra shakut wa ai. Laksan hku na, dai laika hta teng man ai nawku dawjau lam hpe ahkyak shatai tsun da ai lam hte shut shai ai nawku htung hta shang lawm yang hkrum wa na tsin-yam ni hte bawng dung hkrum na hte seng na tau hkrau tsun da ai lam gaw, shi myit hpe hkra mat shangun ai. Raitim, Karai a hkang da ai ga yawng hpe hkan galaw ai lam n nga shi ai hpe chye na mat ai majaw, Yoshia gaw shi a hpun palawng gang je nna Hilkia, Shahpan hte kaga ni hpe ndai hku hkang dat ai: ‘Ndai mu hkrup ai laika a mungga lam, Yehowa hpe sa san yu mu: ndai laika hta ka da mada hte maren, anhte a ji wa ni n hkan galaw ai majaw, Yehowa gaw anhte hpe grai wa pawt sindawng bu nga ai.’—2 Hkawhkam 22:11-13; 2 Hkawhkam Labau 34:19-21.
w00-BU 9/15 30 ¶2
Shagrit Shanem Ai Yoshia Gaw Yehowa A Myiman Lu
Yoshia a kasa ni gaw, Yerusalem hta nga ai myihtoi Hulda kaw sa nna tang shawn laika la na bai wa ai. Hulda gaw tara laika hta lawm ai tsin-yam ni gaw makam masham htak mat ai amyu masha ni a ntsa du wa na re ngu tsun nna, Yehowa a mungga hpe shalai wa ya ai. Raitim, Yoshia gaw Yehowa a man hta shagrit shanem ai majaw, dai tsin-yam hpe hkrum sha na n re. Shi gaw jiwoi jiwa ni hpawng taw ai shara re ai lup de simsa let du mat na re.—2 Hkawhkam 22:14-20; 2 Hkawhkam Labau 34:22-28.
Wenyi Sut Gan Ni
w01-BU 4/15 26 ¶3-4
Gara Hku Bau Maka Hkrum Wa Tim Nang Awng Dang Lu
Yoshia a ma prat gaw n kaja wa tim, Yehowa a man hta kaja ai lam hpe shi galaw wa ai. Shi hkaw dung ai aten hta grai awng dang wa ai majaw, Chyum Laika hta ndai hku tsun da ai: “Mawshe a tara mahkra hte maren, shi a myit masin mahkra hte, kraw lawang mahkra hte, n-gun lagaw mahkra hte, Yehowa a hpang e, Yoshia zawn hkan nang ai hkawhkam, shi a shawng e n nga yu ai; shi a hpang e mung n pru nga ai.”—2 Hkawhkam 23:19-25.
Ma prat hta grai sawng ai lam ni hpe hkrum wa ai ni a matu, Yoshia a kasi ningli gaw grai n-gun lu hpa re! Shi a kasi ningli kaw na anhte hpa sharin la lu ai kun? Dinghpring ai lam hpe lata nna matut hkawm lu hkra Yoshia hpe hpa gaw karum ya wa ai kun?
JANUARY 9-15
KARAI A MUNGGA KAW NA SUT GAN NI | 2 HKAWHKAM 24-25
“Ahkyak Shatai Ai Myit Hpe Matut Hkang Nga U”
w01-BU 2/15 12 ¶2
Yehowa A Tara Jeyang Na Nhtoi Ni Wa Sai!
2 Zehpani a myihtoi ga gaw, Yuda mung kaw na n san seng ai nawku daw jau lam ni hpe yeng seng kau na matu ramma Yoshia hpe myit rawt shangun wa na gaw teng sha re. Raitim, shut shai ai nawku dawjau lam ni hpe mungdan kaw na yeng seng kau na matu hkawhkam a galaw ai lam ni gaw, mung masha ni a lapran na nhkru ai lam yawng hpe n lu yeng seng kau wa ai. ‘Mara n rawng ai ni a sai hte Yerusalem mare hpe jahpring’ kau wa ai shi a kaji Hkawhkam Manashe a mara ni hpe mung n lu shaprai kau wa ai. (2 Hkawhkam 24:3, 4; 2 Hkawhkam Labau 34:3) Dai majaw Yehowa a tara jeyang na nhtoi teng sha du wa na re.
w07-BU 3/15 11 ¶10
Yeremia Laika Kaw Na Dan Dawng Ai Lam Ni
B.C. 607 gaw Zedekia hkaw dung ai 11 ning hpring ai shaning re. Babelon Hkawhkam Nebuhkadneza gaw Yerusalem hpe shata 18 ting wang wa ai. Babelon hkawhkam Nebuhkadneza hkaw dung ai shi jahku ning ngu na, shata manga a sanit ya shani hta, shi a hkringmang daju Nebuzaradan Yerusalem de du wa ai. (2 Hkawhkam 25:8) Shi gaw mare bunghku shinggan hta dap jung nna mare a masa lam ni hpe sagawn ai, lamang ni jahkrat ai. Dap jung ai 3 ya na nna, 10 ya shani hta Yerusalem de shang nna mare hpe wan nat kau ai.—Yeremia 52:12, 13.
Wenyi Sut Gan Ni
w05-BU 8/1 12 ¶1
Lahkawng Hkawhkam Laika Kaw Na Dan Dawng Ai Lam Ni
24:3, 4. Manashe tawt lai wa ai sai hkaw ai labau hta Yehowa gaw, Yuda ni a “yubak hpe raw dat na n hkraw” wa ai. Mara n nga ai ni a sai hpe Karai Kasang manu shadan ai. Mara n nga ai ni a sai hkaw hkra galaw wa ai ni hpe, jahten shaza ai hku nna Yehowa matai htang ya na hpe kam mai ai.—Shk 37:9-11; 145:20.
JANUARY 16-22
KARAI A MUNGGA KAW NA SUT GAN NI | 1 HKAWHKAM LABAU 1-3
“Chyum Laika—Maumwi N Re, Teng Man Ai Laika Buk”
w09-BU 9/1 14 ¶1
Adam yan Ewa—Gaja Wa Asak Hkrung Wa Ai Ni Rai Kun?
Ga shadawn, Langai Hkawhkam Labau daw kaba 1 kaw na 9 hte Luka daw kaba 3 hta ka matsing da ai Yuda jiwoi jiwa ni a mying jahpan hpe myit yu u. Ahkri ahkrai ka matsing da ai dai rusai jahpan ni hta, ban 48 hte 75 a lam hpe tsun da ai. Luka laika hta Yesu Hkristu a rusai labau hpe tsang hte tsang ka da nna, Hkawhkam Labau laika hta gaw Israela amyu ni a hkawhkam hte hkinjawng aya hkam la ai jiwoi jiwa ni a mying jahpan hpe ka matsing da ai. Dai jahpan lahkawng yan hta, Shawlumon, Dawi, Yosep, Isak, Abraham, Noa hte Adam zawn masha law law chye ai ni lawm ai. Dai mying jahpan lahkawng yan kaw na mying yawng gaw, gaja wa asak hkrung wa ai ni a mying ni re. Dai jahpan lahkawng yan hta lawm ai Adam gaw gaja wa asak hkrung wa ai shawng nnan na shinggyim masha re.
w08-BU 6/1 3 ¶4
Noa hte Hka Sha-u Ing Ai Lam—Maumwi N Re, Teng Man Ai Mabyin Re
Chyum Laika hta lawm ai rusai labau jahpan lahkawng yan gaw, Noa gaw gaja wa nga wa ai masha re ai lam madun da ai. (1 Hkawhkam Labau 1:4; Luka 3:36) Dai jahpan ni hpe ka wa ai Ezra hte Luka gaw, ahkri ahkrai tam sawk sagawn ai ni re. Luka ka da ai Yesu Hkristu a rusai jahpan hta Noa lawm ai.
w09-BU 9/1 14-15
Adam yan Ewa—Gaja Wa Asak Hkrung Wa Ai Ni Rai Kun?
Ga shadawn, church lung ai masha law malawm masin hta bang da ai Chyum Laika sharin achyin lam langai re ai, gawng malai jahpu a lam hpe myit yu u. Dai sharin achyin ai lam hku nga yang, Yesu Hkristu gaw shinggyim masha ni hpe yubak mara kaw na hkye la na matu, shi a hkum tsup ai asak hpe gawng malai jahpu hku nna jaw wa ai. (Mahte 20:28; Yawhan 3:16) Gawng malai jahpu ngu ai gaw, sum mat ai lam langai hpe bai shaw la na matu (sh) bai mari la na matu, jaw ra ai maren mara re ai manu jahpu re. Dai majaw Chyum Laika hta Yesu hpe “maren mara re ai gawng malai jahpu” ngu na tsun da ai re. (1 Timohti 2:6, NWT) Raitim, hpa lam hte maren mara re kun? ngu na anhte myit hkrup chye ai. “Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung wa na ma ra ai” ngu na Chyum Laika hta tsun da ai. (1 Korinhtu 15:22) Madat mara ai shinggyim masha ni hpe hkye la na matu, Yesu sak jaw wa ai hkum tsup ai asak gaw Edin sun hta tawt lai wa ai mara a majaw, Adam sum mat ai asak hte maren mara re. (Roma 5:12) Adam she gaja wa asak hkrung wa ai n rai yang, Yesu a gawng malai hkungga mung tsepkawp lachyum nga sana n re.
Wenyi Sut Gan Ni
it-1-E 911 ¶3-4
Ahtik labau
Num ni a mying ni. Labau hte seng nna galaw ra ai nga yang, ahtik labau jahpan ni hta kalang lang num ni a mying hpe mu lu ai. Ningpawt 11:29, 30 hta, Abraham a kaga num kaw na n re ai sha, ga sadi jaw da ai Rusai gaw Sarai (Sara) kaw na yu hkrat wa na ngu tsun da ai. Milhka gaw Isak a madu jan Rebeka a kadwi re majaw dai chyum daw hta ka shalawm da ai mai byin ai. Isak gaw kaga amyu kaw na num n la ai majaw, Abraham a ru sai jahpan hta Rebehka a ru sai hpe mung bang da ai re. (Nin 22:20-23; 24:2-4) Ningpawt ninghpang 25:1 hta, Abraham a hpang chyahtum num Ketura a mying hpe ka da ai. Dai gaw Sara si mat ai hpang, Abraham dinghku bai de ai lam hte shi a ma bai shaprat lu ai atsam gaw mauhpa lam hte Yehowa bai gram lajang ya ngut ai hpang, shaning 40 naw hkrung nga ai hpe madun dan nga ai. (Rom 4:19; Nin 24:67; 25:20) Midian, Arabi masha ni hte Israela ni a kanawn mazum lam mung madun dan nga ai.
Lea, Rahkela, hte Yaku a lashi num ni hte lu ai kasha ni a mying ni hpe mung rau mu lu ai. (Nin 35:21-26) Dai gaw, hpang hta dai kasha ni hte Karai Kasang a kanawn mazum lam chyena hkra anhte hpe karum ya ai. Dai zawn lam ni a majaw, ahtik labau jahpan ni hta num ni a mying ni hpe mu lu ai re. Shanhte kaw nna sali wunli hkam la lu ai shaloi mung, shanhte a mying lawm ai mai byin ai. (Bhk 26:33) Htama, Rahab hte Ruhta ni gaw laklai wa ai ni re. Meshia ngu ai Yesu Hkristu a ahtik labau yu hkrat wa ai lam hta dai num ni hte seng na laklai ai lam ni nga ai. (Nin 38; Rut 1:3-5; 4:13-15; Mat 1:1-5) Ahtik labau jahpan ni hta num ni hte seng nna tsun da ai kaga ga shadawn ni gaw, 1 Hkawhkam Labau 2:35, 48, 49; 3:1-3, 5 re.
JANUARY 23-29
KARAI A MUNGGA KAW NA SUT GAN NI | 1 HKAWHKAM LABAU 4-6
“Nye A Kyu Hpyi Ga Ni Gaw Ngai Hte Seng Na Hpa Hpe Madun Dan Nga Ai Kun?”
w10-BU 10/1 23 ¶3-7
“Akyu Hpyi Ai Ga Madat Mara Ai Wa”
Yabet gaw sharawng awng let kyu hpyi ai wa re. Shi kyu hpyi ai shaloi Karai a shaman chyeju hpe hpyi nem ai hku na hpang ai. Dai hpang, shi hta ngang kang ai makam masham nga ai hku nna, lam masum hpe bai hpyi nem ai.
Langai, “nye a lamu ga jarit dam lada di ya e!” ngu Karai Kasang hpe Yabet hpyi lajin tawngban wa ai. (Daw kaji 10) Ndai arawng nga ai wa gaw kaga ni madu ai hpe grai ra marin taw ai, lamu ga kashun ai wa gaw n re. Myit rawt let hpyi shawn ai shi a kyu hpyi ga gaw lamu ga hte seng ai n re sha, masha ni hte seng nga ai rai na re. Teng man ai Karai Kasang hpe nawku ai ni grau law wa na matu, shi a buga ginra hpe ngwi pyaw simsa let dam lada hkra di ya rit ngu hpyi shawn nga ai mai byin ai.
Lahkawng, Karai a “lata” shi hte rau nga na matu Yabet hpyi nem wa ai. Ga shadawn, Karai a lata ngu ai gaw Karai a hpung atsam rai nna shi hpe nawku ai ni hpe karum ai shaloi lang ai. (1 Hkawhkam Labau 29:12) Yabet gaw myit rawt let hpyi ai shi a kyu hpyi ga ni hpe bai htang na matu Karai hpe grai myit mada wa ai. Hpa majaw nga yang, Karai Kasang gaw shi hpe kamsham ai ni hpe n-gun atsam jaw ai majaw re.—Esaia 59:1.
Masum, “n hkru n hkra ai hta na ngai hpe makawp maga Ia e!” ngu Yabet kyu hpyi wa ai. “Ngai yawn hkyen ai hta lawt lu n ga” ngu ai ga si gaw nhkru nhkra ai lam kaw na lawt lu na matu n re ai sha, n kaja ai lam ni a majaw yawn hkyen ai (sh) myit mada lam mat mat nna hpa n lu galaw mat ai baw n byin hkra akyu hpyi ai hpe tsun nga ai re.
Yabet gaw tengman ai nawku dawjau lam hpe myit lawm ai. Akyu hpyi ga madat ya ai Karai hpe kamhpa ai hpe shi a kyu hpyi ga gaw madun wa ai. Yehowa Karai Kasang gara hku bai htang wa ai kun? “Karai Kasang mung shi hpyi ai ga madat mara ya wu ai”
Wenyi Sut Gan Ni
w05-BU 10/1 9 ¶7
Langai Hkawhkam Labau Laika Kaw Na Dan Dawng Ai Lam Ni
5:10, 18-22. Shawlu up ai aten ni hta, Yawdan hka sinpraw maga na amyu lakung ni gaw shanhte hta htam 2 daram grau law ai Hagara masha ni hpe gasat awng dang lu wa ai. Hpa majaw nga yang, nden marai rawng ai dai amyu masha ni gaw Yehowa hpe kamhpa nna, shi a karum shingtau hpe myit mada wa ai majaw re. Anhte mung, anhte hta atsam grau kaba ai hpyen ni hpe gasat ra ai wenyi majan hta Yehowa hpe myit masin mahkra hte kamhpa nga ga.—Ehpesu 6:10-17.
JANUARY 30–FEBRUARY 5
KARAI A MUNGGA KAW NA SUT GAN NI | 1 HKAWHKAM LABAU 7-9
“Yak Ai Lit Ni Hpe Yehowa A Karum Lam Hte Nang Atsawm Galaw Lu”
w05-BU 10/1 9 ¶8
Langai Hkawhkam Labau Laika Kaw Na Dan Dawng Ai Lam Ni
9:26, 27. Chyinghka sin ai Lewi masha ni gaw grai kaba ai lit hpe lu da ai. Karai Kasang nta kaw na chyoi pra ai shara ni de shang ai chyinghka zaw hpe lu da ma ai. Shanhte gaw shana shagu chyinghka ni hkan hpaw ya ai hku nna kam mai ai ni re hpe sakse madun ai. Anhte mung hkaw tsun lawk hta nga ai ni hpang de sa nna, Karai Kasang hpe nawku ai ni byin wa hkra karum ya na lit hpe lu da ai. Chyinghka sin ai Lewi masha ni zawn kangka nna kam mai ai ni re ai hpe sakse madun ging ai n re i?
w11-BU 9/15 32 ¶8
Yakhkak Lam Hkrum Ai Aten Hpineha Hpe Kasi La Lu Na Kun?
Moi na Israela aten hta Hpineha gaw nden marai, dinghkren mu ai nyan hpaji, Karai hpe kamhpa ai hku nna grai kaba ai lit ni hpe gun hpai let mayak mahkak ni hpe awng dang lu wa ai. Karai a masha ni hpe Hpineha shakut nna makawp maga ya wa ai majaw, Karai a myiman lu wa ai. Shaning 1,000 daram na ai hpang, Ezra ndai hku ka wa ai: “Eieaza a kasha Hpineha gaw moi shawng e shanhte a ntsa e up nga ai. Yehowa shi hte rau nga u ga.” (1 Hl 9:20) Dai ni aten, Yehowa masha ni hpe woi awn nga ai Hkristan ni hte Karai hpe sadi dung let magam gun nga ai ni yawng dai hte maren byin wa u ga.
Wenyi Sut Gan Ni
w10-BU 12/15 21 ¶6
Yehowa Hpe Mahkawn Shakawn!
6 Yehowa gaw shi hpe mahkawn hte shakawn na matu, shi a myihtoi ni kaw nna nawku dawjau ai ni hpang de matsun wa ai. Hkinjawng lakung kaw na mahkawn hkawn ai ni gaw kaga Lewi masha ni gun hpai ra ai lit ni kaw na lawt lu ai. Hpa majaw nga yang, mahkawn ni ka shalat na matu hte shaman na matu aten law law lu na matu re.—1 Hl 9:33.
FEBRUARY 6-12
KARAI A MUNGGA KAW NA SUT GAN NI | 1 HKAWHKAM LABAU 10-12
“Karai A Ra Sharawng Ai Lam Hpe Galaw Na Ngu Ai Na A Dawdan Lam Hpe Shangang U”
w12-BU 11/15 6 ¶12-13
“Ra Shawng Ai Lam Hpe Galaw Lu Hkra Sharin Achyin Ya Rit”
12 Dawi galaw ai lam kaw na anhte sharin la lu na lam naw nga ai. Dawi gaw npawt tara ni hpe gara hku hkan sa ra na hpe chye na nna, dai hte maren asak hkrung mayu wa ai. Npawt tara ngu ai gaw jaw ai dawdan lam ni jahkrat lu na matu, lam shagu hta Yehowa gara hku mu mada ai hpe chyena na matu karum ya ai tengman ai tara re. “Betlehem chyinghka makau na hka htung ntsin” hpe Dawi lu mayu ai aten hpa byin wa ai hpe myit yu u. Dawi a hpyen ma 3 gaw Hpilisti ni zing da ai mare de hka sa ja la ai. Raitim, Dawi gaw “n lu hkraw ai sha Yehowa man e ru kau” ai. Hpa majaw kun? Shi ndai hku tsun ai: “Ndai ntsin ngai lu na gaw nye a Karai Kasang hkum u ga; tinang asak hpe nawng kau ai ni a asai ngai lu na kun? shanhte gaja wa tinang asak nawng kau ai hte ndai ntsin Ia wa ma ai.”—1 Hl 11:15-19.
13 Jep ai tara hta sai hpe n sha ai sha Yehowa a man hta ru kau ra ai lam Dawi chye da ai. Dai hku hpa majaw galaw ra ai hpe chye na da ai. “Hkum shan a asak gaw asai hta rawng” ai hpe Dawi chye ai. Raitim, ndai gaw sai n re ai sha, hka sha re. Shi hpa majaw n lu ai kun? Hpa majaw nga yang, sai hte seng ai tara a hpang hta nga ai npawt tara hpe Dawi chye da ai majaw re. Dawi a matu dai hka gaw hpyen ma 3 a sai zawn sha manu dan ai. Dai majaw, dai hka hpe Dawi n lu ai re. Hka hpe lu na malai ga kaw ru kau na matu Dawi dawdan wa ai.—Jaw 17:11; Trj 12:23, 24.
Na A Myit Nsam Hpe Karai A Tara Hte Npawt Tara N i Hte Shaman Ya U Ga
5 Karai a hkang da ai tara ni kaw nna akyu lu la hkra, dai tara ni hpe chye da ai hta n-ga, tatut hkan sa ra ai. Tara ni hpe anhte tsawra nna hkungga ra ai. Chyum Laika hta anhte hpe ndai hku tsun ai: “N kaja ai hpe n dawng nna, kaja ai hpe tsaw ra mu.” (Amo 5:15) Dai hpe anhte gara hku hkan sa mai na kun? Dai tara ni hpe Yehowa mu mada ai hku, mu mada chye wa hkra sharin la ra ai. Ndai lam hpe myit yu u. Nang atsawm yup n pyaw ai majaw, sarawun gaw hkamja ai malu masha sha na matu, shamu shamawt ai lam grau galaw na matu hte galai shai ai lam nkau galaw na matu nang hpe matsun ai. Shi a matsun hpe nang hkan galaw ai majaw yup pyaw wa ai. Sarawun a matsun hpe nang gara hku myit la ai kun?
6 Dai hte maren, anhte a prat grau nna kaja wa na hte yubak a majaw n kaja ai akyu ni lu la ai kaw nna koi lu na matu, Hpan Madu gaw anhte hpe tara ni jaw da ai. Ga shadawn, masu ai, lagu ai, akyang hten za ai, dawsa ai lam (sh) nat hpaji hte seng ai lam yawng hpe koi na matu Chyum Laika hta tsun da ai. (Ga Shagawp 6:16-19 hpe hti u; Shingran 21:8) Yehowa a ga madat ai majaw, kaja ai akyu ni hkamsha wa ai shaloi, shi hpe grau tsawra wa nna shi a tara ni hpe hkan sa mayu wa na re.
Wenyi Sut Gan Ni
it-1-E 1058 ¶5-6
Myit Masin
“Myit Masin Ma Hkra” Hte Magam Gun U. Salum majing gaw adaw achyen ma hkra bungli galaw ra ai raitim, ga shadawn salum gaw shi daw hte daw galaw ai. Masha langai a myit salum hpe tsawra myit hte hkrit hkungga ai lam hte seng nna chye ginhka lu hkra, Dawi gaw “na a amying hpe hkungga nga n ga, nye a myit shadut ya e” ngu akyu hpyi wa ai. (Shk 86:11) “Gale galau” re ai wa gaw Karai Kasang hpe myit rawt let n nawku ai wa re. (Shk 119:113; Shr 3:16) “Myit lahkawng” hte re ai wa gaw, (ga si hku nga yang, salum langai hte langai) madu lahkawng kaw mayam yam na matu shakut ai, (sh) lama ma hpe myit nga ai laman lam langai hpe masu tsun ai mung mai byin ai. (1Hl 12:33; Shk 12:2, ftn) Dai zawn sawt ai myit masin hpe Yesu grai n ju n dawng ai.—Mat 15:7, 8.
Karai Kasang ra sharawng ai lam hpe lu na matu shakut taw ai wa gaw, gale galau (sh) myit lahkawng hte n re ai sha, myit masin mahkra hte nawku ra ai. (1Hl 28:9) N kaja ai lam de myit nshe n shang mat hkra grai shakut ra ai. (Yer 17:9, 10; Nin 8:21) Hkum tsup ai myit masin hpe hkang lu hkra karum ya ai lam ni gaw: myit masin mahkra hte akyu hpyi ai (Shk 119:145; Shy 3:41), Karai a mungga hpe ayan hkaja ai (Ezr 7:10; Gsh 15:28), kabu gara shiga hkaw tsun ai hta myit rawt let shang lawm ai (Yer 20:9 hte shingdaw), Yehowa hpe myit masin mahkra hte nawku nga ai ni hte kanawn mazum ai lam ni re.—2Hk 10:15, 16 hte shingdaw.
FEBRUARY 13-19
KARAI A MUNGGA KAW NA SUT GAN NI | 1 HKAWHKAM LABAU 13-16
“Lam Matsun Ni Hpe Hkan Sa Ai Gaw Awng Dang Shangun”
w03-BU 5/1 10-11
“Yehowa Gaw Kanang Rai Nga A Ta?” Ngu Nang San Ai Kun?
12 Ga shaka sumpu hpe Israela mungdan de bai la wa nna, Kiriat-yarim mare hta shaning law law tawn ngut ai hpang, Hkawhkam Dawi gaw dai hpe Yerusalem de bai htawt la mayu wa ai. Dai amyu masha ni kaw na ningbaw ni hte bawngban na “Nanhte ra ai hte, anhte a Karai Kasang Yehowa mung hkraw a yang gaw” ga shaka sumpu hpe htawt la na ngu tsun ai. Raitim, dai lam hte seng na Yehowa ra sharawng ai lam hpe tup hkrak sagawn ai lam n galaw wa ai. She sagawn wa ai nga yang ga shaka sumpu hpe nga leng hta mara na htaw wa na n re. Karai Kasang tup hkrak htet da ai hte maren, ga shaka sumpu hpe Kohat amyu masha ni re ai Lewi masha ni lahpa hta mara na hpai na re. Yehowa hpe Dawi chyahkring hkring san wa ai raitim, ndai kalang gaw jaw ai hku n sagawn wa ai. Akyu gaw tsin-yam hkrum ai re. Hpang hta Dawi ndai hku yin la ai, “tara hte maren shi hpe n tam ai majaw, anhte a Karai Kasang Yehowa anhte hpe ari jaw mi ai.”—1 Hkawhkam Labau 13:1-3; 15:11-13; Bu Hkawm 4:4-6, 15; 7:1-9.
w03-BU 5/1 11 ¶13
“Yehowa Gaw Kanang Rai Nga A Ta?” Ngu Nang San Ai Kun?
13 Hpang jahtum, Obed-edom a nta kaw na Yerusalem de ga shaka sumpu hpe Lewi masha ni htaw wa ai shaloi, mahkawn langai hpe Dawi ka shalat wa ai. Dai hta salum hpe hkra shangun ai sadi jaw ga lawm ai: “Yehowa hte shi a n-gun atsam hpe tam san mu; Shi a myi man hpe tut nawng e hkan tam mu.” “Shi galaw dan sai lamik kumla bungli hte, Shi a mauhpa magam, shi a n-gup na pru ai tara hpe, a dum nga mu.”—1 Hkawhkam Labau 16:11, 13.
Wenyi Sut Gan Ni
w14-BU 1/15 10 ¶14
Htani Htana Hkawhkam Yehowa Hpe Nawku U
14 Dawi gaw ga shaka sumpu hpe Yerusalem de htaw wa ai. Ngwi pyaw hpa dai shani hta, Lewi masha ni gaw Yehowa hpe mahkawn shakawn let ahkyak ai lam langai hpe tsun wa ai. Dai lam hpe 1 Hkawhkam Labau 16:31, NWT hta: “‘Yehowa Hkawhkam byin sai’ ngu amyu masha ni a lapran hta ndau shana nga mu ga” ngu ka matsing da ai. ‘Yehowa gaw Htani Htana Hkawhkam byin ngut chyalu re, dai aten hta Hkawhkam byin sai ngu gara hku na tsun ai?’ ngu langai ngai myit hkrup chye ai. Yehowa gaw shi a awmdawm ahkaw ahkang hpe akyu jashawn ai shaloi (sh) masat da ai aten langai ngai hta, shi a malai hku na (sh) lam langai ngai hpe hparan na matu langai ngai hpe lit jaw ai shaloi, Hkawhkam byin sai ngu tsun lu ai. Yehowa gara hku na hkawhkam byin ai hpe chyena na matu grai ahkyak ai. Dawi garai n si shi yang, shi a uphkang ai lam gaw htani htana grin na ngu Yehowa ndai hku ga sadi jaw wa ai. “Na a aru arat, na a kasha hpe ngai hkawhkam aya tang na . . . shi a mungdan a tingnyang hpe htani htana ngai shagrin ya na.” (2 Sa 7:12, 13, NWT) Shaning 1,000 na mat ai hpang, Dawi a “aru arat” paw pru wa ai shaloi, dai myihtoi ga hpring tsup wa ai. Shi gaw kadai rai kun? Gara aten Hkawhkam byin wa ai kun?
FEBRUARY 20-26
KARAI A MUNGGA KAW NA SUT GAN NI | 1 HKAWHKAM LABAU 17-19
“Myit Daw Lam Ni Nga Tim Kabu Gara Nga U”
w06-BU 7/15 19 ¶1
Yehowa A Uhpung A Mai Kaja Ai Lam Hpe Myit Maju Jung U
Moi na Israela mungdan hta, Dawi gaw Hebre Chyum Laika ni hta lawm ai mying gumhkawng dik htum masha ni kaw na langai re. Sagu rem mung rai, yungwi ninghkrin mung rai, myihtoi mung re ai ndai hkawhkawm gaw Yehowa Karai Kasang hpe myit masin mahkra hte kamhpa wa ai. Dawi gaw Yehowa hte grai hku hkau ai kanawn mazum lam nga ai majaw, Karai Kasang a matu nawku htingnu gap ya na matu myit rawt wa ai. Dai htingnu gaw Israela mungdan hta teng man ai nawku dawjau lam a daju byin wa na re. Nawku htingnu hte seng ai lamang ni gaw, Karai a amyu masha ni hpe ngwi pyaw lam sha n-ga shaman chyeju ni mung lu la shangun na lam hpe Dawi chye da ai. Dai majaw Dawi ndai hku mahkawn hkawn wa ai: “Na a wing hta e, nang hte ani sha nga lu hkra, Nang san da ai wa gaw, a nga ai; Na a chyoi pra ai htingnu hte na a nta na kaja ai hte, Anhte hkru kat lu na ga ai.”—Shakawn 65:4.
Nang Lu Da Ai Ahkaw Ahkang Ni Hta Kabu Gara Nga U
11 Dai zawn sha, Yehowa a magam hta anhte hpe jaw da ai lit hpa hpe raitim, shakut nna galaw na nga yang, kabu gara lam law wa na re. Hkaw tsun bungli hta myit maju jung nna nawku hpung a galaw ai lam ni hta hpring tup shang lawm u. (Kas 18:5; Heb 10:24, 25) N-gun lu shangun ai mahtai ni jaw lu hkra, zuphpawng ni a matu atsawm hkyen lajang u. Bat lapran zuphpawng ni hta lu la ai, gara jawng ma lit hpe raitim, ahkyak shatai u. Nawku hpung hta bungli langai ngai hpe karum ya na matu hpyi shawng hkrum ai nga yang, tup hkrak galaw nna, kam mai ai wa byin hkra galaw u. Tinang lu da ai lit ni gaw n ahkyak ai, de a matu aten n shama ra ai ngu hkum myit la. Na a atsam ningja ni rawt jat wa hkra galaw u. (Gsh 22:29) Wenyi lam hte lit ni hpe grau shakut magang, tinang mung lawan wan rawt jat wa nna, kabu gara lam mung grau lu magang rai na re. (Gal 6:4) Tinang ra ai lit hpe kaga ni lu la ai shaloi, shanhte hte rau kabu gara na matu mung grau loi wa na re.—Rom 12:15; Gal 5:26.
Wenyi Sut Gan Ni
w20.02 12, lawk
Wa Yehowa Hpe Anhte Grai Tsawra
Yehowa Ngai Hpe Sadi Hkrup Ai Kun?
‘Mungkan hta wan hkying lam hku law ai masha ni nga ai majaw, Yehowa ngai hpe sadi hkrup ai kun?’ nga nna nang san ga na re. Dai zawn ga san hpe masha kaja law law mung san ga ai. Hkawhkam Dawi ndai hku ka wa ai: “Yehowa e, nang chye nga ai shinggyim masha hte, Nang ai mi nawn nga ai masha kasha gaw, hpa wa mi rai nga a hka?” (Shk 144:3) Dawi gaw shi hpe Yehowa atsawm chye ai lam kam ai. (1Hl 17:16-18) Yehowa gaw anhte madun ai tsawra myit hpe sadi hkrup ai lam, Chyum Laika hte shi a uhpung hku nna anhte chye hkra karum ya ai. Yehowa sadi hkrup ai hpe nang chye hkra karum ya lu ai Chyum Laika kaw nna ndai lam nkau mi hpe myit yu ga:
• Nang n shangai shi ai aten kaw nna pyi, Yehowa nang hpe sadi hkrup ai.—Shk 139:16.
• Na a myit masin hte nang myit mang ai lam ni hpe Yehowa chye ai.—1 Hl 28:9.
• Na a akyu hpyi ga langai hpra hpe Yehowa madat ya ai.—Shk 65:2.
• Nang galaw ai lam ni gaw Yehowa hpe shapyaw ya lu ai zawn, yawn hkyen lam mung byin shangun chye ai.—Gsh 27:11.
• Yehowa gaw nang hpe shi hpang de lau la ai.—Yhn 6:44.
• Lama na, nang si mat yang pyi, Yehowa gaw nang hpe atsawm chye ai majaw, bai jahkrung ya na re. Shi gaw na a hkum hkrang hpe bai galaw ya nna, nang hta nga chyalu re ai matsing nyan hte atsam ningja ni hpe bai bang ya na re.—Yhn 11:21-26, 39-44; Kas 24:15.
FEBRUARY 27–MARCH 5
KARAI A MUNGGA KAW NA SUT GAN NI | 1 HKAWHKAM LABAU 20-22
“Ramma Ni Awng Dang Lu Hkra Karum Ya U”
w17.01-BU 29 ¶8
Dai Lam Ni Hpe “Kangka Re Ai Masha Hte Kaw Htawt Ap Ya U”
8 1 Hkawhkam Labau 22:5 hpe hti u. Dai daram ahkyak ai masing hpe Shawlumon woi awn lu na n re ngu Dawi myit hkrup chye ai. Gaja nga yang, nawku htingnu gaw, “arawng sadang dan hkung kajai gumhkawng ai nta” rai nna, dai aten hta Shawlumon “asak kaji ai hte myit garai n kung” shi ai. Raitim, Shawlumon galaw lu na matu Yehowa karum ya na lam hpe Dawi chye ai. Dai majaw, karum madi shadaw ya na matu sha myit maju jung nna, gawgap hkingrai ni hpe mahkawng ya wa ai.
w17.01-BU 29 ¶7
Dai Lam Ni Hpe “Kangka Re Ai Masha Hte Kaw Htawt Ap Ya U”
7 Nawku htingnu gawgap ai ngu ai mying n lu mat na hpe Dawi myit nna, Shawlumon hpe n karum ai sha n nga ai. Gawgap ngut ai hpang, Dawi nawku htingnu hku n re ai sha Shawlumon nawku htingnu hku nna mying shang mat ai. Byin mayu ai hte maren n lu galaw ai majaw, Dawi myit daw mat chye tim, ndai bungli hpe hpring tup madi shadaw ya wa ai. Bungli galaw ai masha ni lu hkra myit rawt let lajang ya ai. Hpri, magri, gumhpraw, ja, arit hpun ni mahkawng ya ai. Dai sha n-ga, “Ya ngai sha e, Yehowa nang hte rau rai nga u ga; nang galu kaba wa nna, Yehowa na a lam tsun ai hte maren, na a Karai Kasang Yehowa a nta hpe galaw da u” ngu Shawlumon hpe n-gun jaw wa ai.—1 Hl 22:11, 14-16.
Kanu Kawa Ni, Ma Ni Hkalup Hkam Na Matu Karum Ya Nga Ai Kun?
14 Myitsu salang ni gaw, wenyi bandung lam tsun shaga ai hku nna, kanu kawa ni hpe karum ya mai ai. Nauna langai gaw, shi asak kru ning hta Hpunau C. T. Russell tsun wa ai hpe bai myit dum ai. Shi ndai hku tsun ai: “Minit 15 daram shi aten la nna, nye a wenyi bandung hte seng nna bawng ban ai.” Akyu gaw hpa rai kun? Dai nauna gaw ningshawng byin wa nna, 70 ning jan ningshawng galaw wa ai. Kaja ai ga ni hte n-gun jaw ai lam gaw, marai langai a prat ting hpe akyu jaw lu ai lam dan leng nga ai. (Ga Shagawp 25:11) Nawku Htingnu hta galaw ra ai lam ni nga ai shaloi, kanu kawa ni hte ma ni hpe myitsu salang ni saw shaga mai ai. Ma ni hpe shanhte asak hte htap htuk ai bungli ni hpe galaw shangun mai ai.
15 Nawku hpung hta nga ai kaga ni gaw gara hku karum ya mai ai kun? Ma ni hpe myit lawm ai lam madun ai hku nna re. Ga shadawn, ma ni Yehowa hte ni htep hkra galaw nga ai lam ni hpe yu mai ai. Zuphpawng hta ma ni mahtai jaw ai kun? Shing nrai, bat lapran zuphpawng hta lit ang ai kun? Jawng hta sakse hkam ai kun? Shut ai lam galaw na matu gunglau hkrum ai shaloi, jaw ai hpe galaw ai kun? Rai yang, shanhte hpe shakawn ya u. Zuphpawng garai n hpang shi ai aten hte ngut ai aten hta, shanhte hte ga shaga na matu bandung tawn u. Anhte dai hku galaw ai shaloi, ma ni gaw “shawa hpawng kaba” hta lawm lu ai ngu hkamsha lu na re.—Shakawn 35:18.
Wenyi Sut Gan Ni
w05-BU 10/1 11 ¶5
Langai Hkawhkam Labau Laika Kaw Na Dan Dawng Ai Lam Ni
21:13-15. Yehowa gaw, shi amyu masha ni hkrum sha ai yakhkak jamjau ai lam hpe myit grai n pyaw ai majaw, ana zinli hkring mat na matu lamu kasa hpe hkang dat ai. “Shi a matsan dum ai myit grai kaba” ai.